Author: ڈاکٹرغلام مصطفی بڈانی

اوکاڑہ (نامہ نگار ملک ظفر) ڈپٹی کمشنر اوکاڑہ احمد عثمان جاوید کی زیر صدارت ڈسٹرکٹ ایمرجنسی بورڈ کا اجلاس منعقد ہوا، جس میں ایڈیشنل ڈپٹی کمشنرز، تینوں تحصیلوں کے اسسٹنٹ کمشنرز، چیف افسران، محکمہ ریسکیو 1122، ہیلتھ، ٹریفک پولیس، سیکرٹری ڈی آر ٹی اے، سول ڈیفنس، انڈسٹری سمیت تمام متعلقہ محکموں کے افسران نے شرکت کی۔

اجلاس میں وزیراعلیٰ پنجاب مریم نواز شریف کے احکامات کی روشنی میں ہنگامی بنیادوں پر ضلع بھر کے کاروباری مراکز اور اہم عمارات میں فائر سیفٹی کے انتظامات فوری طور پر مکمل کرنے کے احکامات جاری کیے گئے۔ ڈپٹی کمشنر احمد عثمان جاوید نے تمام متعلقہ محکموں کو 48 گھنٹوں کے اندر فائر سیفٹی آڈٹ مکمل کرنے کا ٹاسک سونپ دیا۔

ڈپٹی کمشنر نے ضلع بھر میں 16 مختلف مقامات پر فائر ہائیڈرنٹس نصب کرنے کے احکامات بھی جاری کیے۔ انہوں نے ہدایت کی کہ تین یا اس سے زائد منزلہ رہائشی و کمرشل عمارات کا فائر سیفٹی آڈٹ کیا جائے اور حفاظتی اقدامات ان کی براہِ راست نگرانی میں مکمل کرائے جائیں۔ فائر سیفٹی انتظامات میں تعاون نہ کرنے والے بلڈنگ مالکان کے خلاف قانونی کارروائی کے ساتھ عمارات کو فوری سیل کرنے کا حکم بھی دیا گیا۔

اجلاس میں یہ بھی فیصلہ کیا گیا کہ تینوں تحصیلوں کی میونسپل کمیٹیوں کے چیف افسران بلڈنگ مالکان سے میٹنگز کر کے انہیں فوری حفاظتی اقدامات کی پابندی کروائیں گے، جبکہ ایکسین بلڈنگز اہم سرکاری عمارات کا سیکیورٹی آڈٹ کریں گے۔ کسی بھی ہنگامی صورتحال میں ریسکیو 1122 عوام کے بحفاظت انخلا، ٹریفک پولیس سڑکوں کی کلیئرنس، واپڈا حکام بجلی کی وائرنگ اور بورڈز کی چیکنگ، جبکہ محکمہ صحت سرکاری ہسپتالوں میں تمام بنیادی طبی سہولیات کی فراہمی یقینی بنائے گا۔

ڈپٹی کمشنر احمد عثمان جاوید نے کہا کہ رہائشی اور کمرشل عمارات میں فائر سیفٹی انتظامات ناگزیر ہیں اور تمام متعلقہ ادارے عوام کی جان و مال کے تحفظ کے لیے اپنی ذمہ داریاں پوری کریں۔

اوکاڑہ (نامہ نگار ملک ظفر)وزیراعلیٰ پنجاب مریم نواز کے تعلیمی وژن اور صوبائی وزیرِ تعلیم رانا سکندر حیات کی خصوصی ہدایات کی روشنی میں صوبہ بھر کی طرح گورنمنٹ گریجویٹ کالج اوکاڑہ میں بھی ٹیسٹ کی بنیاد پر نمایاں کارکردگی دکھانے والے پوزیشن ہولڈر طلبہ میں تعریفی اسناد تقسیم کی گئیں۔

اس موقع پر طلبہ کی تعلیمی کارکردگی، دلچسپی اور نتائج سے والدین کو آگاہ کرنے کے لیے ٹیچر پیرنٹس میٹنگ کا بھی انعقاد کیا گیا، جس میں اساتذہ اور والدین نے بھرپور شرکت کی۔ میٹنگ کا مقصد طلبہ کی تعلیمی پیش رفت کا جائزہ لینا اور والدین و اساتذہ کے باہمی اشتراک سے بہتر تعلیمی نتائج کا حصول تھا۔

تقریب سے خطاب کرتے ہوئے پرنسپل گورنمنٹ گریجویٹ کالج پروفیسر علی حیدر ڈوگر نے کہا کہ سرکاری تعلیمی اداروں میں معیاری تعلیم کے فروغ کے ساتھ ساتھ دورِ جدید کے تدریسی طریقے اپنائے جا رہے ہیں تاکہ طلبہ کو ایک بہتر، سازگار اور ہمہ جہت تعلیمی ماحول فراہم کیا جا سکے۔ انہوں نے کہا کہ والدین کو طلبہ کی تعلیمی دلچسپی اور نتائج سے باخبر رکھنا نہایت ضروری ہے کیونکہ والدین اور اساتذہ کا باہمی تعاون ہی طلبہ کی تعلیمی کامیابی کی ضمانت بنتا ہے۔

پرنسپل نے مزید کہا کہ حکومتِ پنجاب تعلیم کے شعبے میں اصلاحات کے ذریعے طلبہ کو جدید تقاضوں سے ہم آہنگ کرنے کے لیے مؤثر اقدامات کر رہی ہے جن کے مثبت نتائج سامنے آ رہے ہیں۔ تقریب کے اختتام پر نمایاں کارکردگی دکھانے والے پوزیشن ہولڈر طلبہ میں تعریفی اسناد تقسیم کی گئیں اور ان کی حوصلہ افزائی کی گئی۔

اوکاڑہ (نامہ نگار ملک ظفر)ممبر چیف منسٹر پنجاب انسپکشن ٹیم نعیم غوث طبی سہولیات کا جائزہ لینے ڈسٹرکٹ ہیڈ کوارٹر ہسپتال سٹی اوکاڑہ پہنچے، جہاں ڈپٹی کمشنر احمد عثمان جاوید بھی ان کے ہمراہ تھے۔ دورے کے دوران ممبر انسپکشن ٹیم نے ہسپتال کے مختلف شعبہ جات میں دستیاب طبی سہولیات، صفائی ستھرائی اور انتظامی امور کا تفصیلی معائنہ کیا۔

انہوں نے میڈیسن سٹور میں ادویات کی دستیابی اور ریکارڈ چیک کیا اور مجموعی انتظامات پر اطمینان کا اظہار کیا۔ اس موقع پر ایمرجنسی، کارڈک وارڈ اور ٹراما سنٹر میں زیرِ علاج مریضوں سے مفت ادویات کی فراہمی کے بارے میں بھی دریافت کیا گیا۔ نعیم غوث نے کہا کہ وزیر اعلیٰ پنجاب مریم نواز کے احکامات کی روشنی میں سرکاری ہسپتالوں میں مفت ادویات کی فراہمی کو یقینی بنایا جا رہا ہے اور مریضوں کو تسلسل کے ساتھ معیاری طبی سہولیات فراہم کی جا رہی ہیں۔

قبل ازیں ممبر چیف منسٹر پنجاب انسپکشن ٹیم نعیم غوث نے ڈپٹی کمشنر احمد عثمان جاوید کے ہمراہ ضلع کے متعدد آؤٹ سورس سکولوں کا بھی دورہ کیا۔ انہوں نے سکولوں میں تعلیمی سہولیات، واش رومز اور صفائی ستھرائی کا جائزہ لیا جبکہ زیرِ تعلیم طلبہ سے نصاب سے متعلق سوالات بھی کیے۔

اس موقع پر انہوں نے کہا کہ وزیر اعلیٰ پنجاب مریم نواز کے وژن کے مطابق شعبہ تعلیم میں انقلابی اقدامات کیے جا رہے ہیں، طلبہ کو معیاری تعلیم کی فراہمی پر کوئی سمجھوتہ نہیں کیا جائے گا۔ انہوں نے اساتذہ کرام پر زور دیا کہ وہ تعلیمی معیار کے ساتھ ساتھ طلبہ کی اخلاقی و کردار سازی پر بھی خصوصی توجہ دیں۔