خبر:
سکھر (باغی ٹی وی، نامہ نگار مشتاق علی لغاری) جمعیت علماء اسلام ضلع سکھر کے امیر اور صوبائی ڈپٹی سیکریٹری جنرل مولانا محمد صالح انڈھڑ نے کہا ہے کہ ضلع سکھر میں بڑھتی ہوئی بدامنی، لاقانونیت اور قتل و غارتگری کے خلاف “امن بحال کرو تحریک” کا آغاز حکومت اور قانون نافذ کرنے والے اداروں کی ناکامی کا واضح ثبوت ہے۔ انہوں نے واضح کیا کہ یہ احتجاجی تحریک کسی صورت ختم نہیں ہوگی اور ضلع میں امن و امان کی مکمل بحالی تک جدوجہد جاری رہے گی۔
ان خیالات کا اظہار انہوں نے امن و امان کی مخدوش صورتحال کے پیش نظر جمعیت علماء اسلام ضلع سکھر کی جانب سے تحریک “امن بحال کرو” کے سلسلے میں تھرمل پاور ہاؤس سٹی سکھر میں منعقد احتجاجی مظاہرے اور دھرنے سے خطاب کرتے ہوئے کیا۔ مولانا محمد صالح انڈھڑ نے کہا کہ افسوسناک امر یہ ہے کہ ضلع سکھر میں بدامنی اس حد تک بڑھ چکی ہے کہ سڑکوں، بازاروں، گھروں، عوام و خواص حتیٰ کہ ججز اور پولیس اہلکار بھی خود کو غیر محفوظ محسوس کر رہے ہیں۔
انہوں نے مزید بتایا کہ یہ احتجاجی مظاہرے ضلع سکھر کے 14 مختلف چھوٹے بڑے مقامات پر منعقد کیے جا رہے ہیں تاکہ امن و امان کی بحالی کے لیے ایک مؤثر اور منظم عوامی آواز بلند کی جا سکے۔ ان کا کہنا تھا کہ ان شاء اللہ یہ تحریک فروری کے ابتدائی ایام میں دوسرے مرحلے میں داخل ہوگی اور احتجاج کا دائرہ مزید وسیع کیا جائے گا۔
احتجاجی مظاہرے اور دھرنے میں جمعیت علماء اسلام کے دیگر رہنماؤں میں حافظ عبد الحمید مہر، مولانا محمد عابد سندھی، قاری لیاقت علی مغل، مولانا امان اللہ سکھروی، قاری رفیق احمد بندھانی، قاری عبد الوحید مہر، مولانا عبدالرشید ٹانوری، مفتی عزیز اللہ چوہان، مفتی محمد اعظم مہر سمیت دیگر علماء کرام اور کارکنان نے شرکت کی۔
شرکاء نے حکومتِ وقت اور متعلقہ اداروں سے پرزور مطالبہ کیا کہ فوری طور پر جرائم پیشہ عناصر کے خلاف ٹھوس اور نتیجہ خیز کارروائیاں عمل میں لاتے ہوئے ضلع بھر میں امن و امان کی صورتحال بہتر بنائی جائے، بصورت دیگر احتجاجی تحریک میں مزید شدت لائی جائے گی جس کی تمام تر ذمہ داری متعلقہ اداروں پر عائد ہوگی۔
