Author: ڈاکٹرغلام مصطفی بڈانی

واربرٹن: خیرالبشر فاؤنڈیشن کی جانب سے فیروز وٹواں میں صاف پانی کا منصوبہ، واٹر فلٹریشن پلانٹ کا سنگِ بنیاد
واربرٹن (نامہ نگارعبدالغفارچوہدری) خیرالبشر فاؤنڈیشن پاکستان کے زیرِ اہتمام فیروز وٹواں کے عوام کے لیے صاف پانی کی فراہمی کے ایک اہم منصوبے کا آغاز کر دیا گیا۔ اس سلسلے میں ساجد حفیظ واٹر فلٹریشن پلانٹ کا باقاعدہ سنگِ بنیاد رکھ دیا گیا ہے۔
واٹر فلٹریشن پلانٹ کا بنیادی مقصد عوام کو آلودہ پانی اور اس سے پھیلنے والی بیماریوں سے محفوظ رکھنا اور معیاری صاف پانی کی فراہمی کو یقینی بنانا ہے۔ اس منصوبے سے علاقے کے 500 سے زائد گھرانے مستفید ہوں گے، جس سے اہلِ علاقہ کا صاف پانی کا دیرینہ مسئلہ حل ہو جائے گا۔
سنگِ بنیاد کی تقریب میں خیرالبشر فاؤنڈیشن پاکستان کے رہنما قاری صفی الرحمان، میڈیا کوآرڈینیٹر وقاص علی بھٹی اور صدر قومی امن کمیٹی و بین المذاہب ہم آہنگی ملک غلام فرید نے خصوصی شرکت کی۔
اس کے علاوہ سینئر تاجر رہنما اور چیئرمین اسٹینڈنگ کمیٹی لاہور چیمبر آف کامرس اینڈ انڈسٹری محمد رفیق چوہان، عابد چوہان، مرکزی صدر انٹر فیتھ آرگنائزیشن فار پیس پاکستان چوہدری سمیع الرحمن منگول، یاسر اقبال، افتخار بھٹی سمیت سول سوسائٹی کے نمائندوں اور علاقہ معززین کی بڑی تعداد نے شرکت کی۔
تقریب سے خطاب کرتے ہوئے مرکزی رہنما خیرالبشر فاؤنڈیشن پاکستان خواجہ عاطف حفیظ نے منصوبے اور ادارے کے جاری فلاحی پروگرامز پر تفصیلی بریفنگ دی۔
قاری صفی الرحمان نے قرآن و حدیث کی روشنی میں پانی کے صدقے کی اہمیت اور اس کے سماجی فوائد پر روشنی ڈالی۔
تقریب کے اختتام پر معزز مہمانوں نے ساجد حفیظ واٹر فلٹریشن پلانٹ کا سنگِ بنیاد اپنے ہاتھوں سے اینٹیں رکھ کر کیا اور منصوبے کی کامیابی کے لیے دعائے خیر کی۔
دسمبر 25, 2025
بن قاسم پولیس کی تاریخی کارروائی، اسٹیل ملز سے کروڑوں کی چوری میں ملوث گروہ گرفتار
ٹھٹھہ (ڈسٹرکٹ رپورٹر بلاول سموں) بن قاسم پولیس نے خفیہ اطلاع پر کارروائی کرتے ہوئے پاکستان اسٹیل ملز سے کروڑوں روپے مالیت کی مشینری اور قیمتی دھاتیں چوری کرنے والے منظم گروہ کو گرفتار کر لیا۔ کارروائی کے دوران 22 ویلر ٹرک سمیت بڑی مقدار میں چوری شدہ سامان بھی تحویل میں لے لیا گیا۔
پولیس کے مطابق کارروائی میں 6 ملزمان کو گرفتار کیا گیا جن میں اسٹیل ملز کے ملازمین بھی شامل ہیں، جو اندرونی سہولت کاری کے ذریعے پلانٹ کی قیمتی مشینری اور دھاتیں باہر منتقل کر رہے تھے۔
پولیس کا کہنا ہے کہ گرفتار ملزم ندیم حسین اس گروہ کا مرکزی کردار تھا، جو چوری شدہ سامان کی سہولت کاری اور فروخت کا نیٹ ورک چلا رہا تھا۔ برآمد ہونے والا لوہا اور مشینری اسٹیل ملز کے پلانٹ سے تعلق رکھتی ہے۔
گرفتار ملزمان کی شناخت ندیم حسین، نصار، عبدالوحید، لیاقت خان، زاہد خان اور خالد شام کے نام سے ہوئی ہے۔ کارروائی کے دوران پولیس نے 36 ہزار کلوگرام سے زائد، یعنی تقریباً 36 ٹن مشینری اور لوہے کا سامان برآمد کیا، جس کی مالیت کروڑوں روپے بتائی جا رہی ہے۔
پولیس کے مطابق ملزمان چوری شدہ سامان 22 ویلر ٹرک کے ذریعے منتقل کر رہے تھے اور مختلف گوداموں میں فروخت کیا جاتا تھا، جبکہ دیگر ملزمان اس نیٹ ورک میں معاونت فراہم کرتے تھے۔
گرفتار ملزمان کے خلاف ضابطے کے تحت مقدمہ درج کر کے مزید تفتیش شروع کر دی گئی ہے، جبکہ دیگر ممکنہ سہولت کاروں کی گرفتاری کے لیے بھی چھان بین جاری ہے۔
دسمبر 25, 2025
اوچ شریف: سیلاب کے بعد کارپٹ روڈ شدید کٹاؤ کا شکار، حادثات کا خدشہ
اوچ شریف (نامہ نگار حبیب خان)دریائے چناب اور دریائے ستلج میں حالیہ سیلابی ریلے گزرنے کے بعد اوچ شریف اور گردونواح میں انفراسٹرکچر کو شدید نقصان پہنچا ہے۔ سب سے زیادہ تشویشناک صورتحال ترنڈ بشارت سے سرور آباد تک تقریباً پانچ کلو میٹر طویل کارپٹ روڈ کی ہے، جہاں سڑک کے دونوں اطراف شدید کٹاؤ کے باعث بنیاد کمزور ہو چکی ہے۔
مقامی مشاہدے کے مطابق سیلابی پانی کے تیز بہاؤ نے سڑک کے کناروں کو بری طرح متاثر کیا ہے۔ کئی مقامات پر کارپٹ روڈ نیچے سے خالی ہو چکی ہے جبکہ بعض حصوں میں گہرے شگاف پڑ گئے ہیں۔ بظاہر ہموار دکھائی دینے والی یہ سڑک اندرونی طور پر غیر محفوظ ہو چکی ہے، جس پر بھاری ٹریفک کی آمد و رفت کسی بڑے حادثے کا سبب بن سکتی ہے۔
سیلابی صورتحال ختم ہونے کے باوجود تاحال محکمہ ہائی ویز کی جانب سے سڑک کا تکنیکی معائنہ، مرمتی کام یا حفاظتی اقدامات شروع نہیں کیے جا سکے۔ خطرناک مقامات پر نہ تو وارننگ سائن بورڈ نصب ہیں اور نہ ہی ٹریفک کی رہنمائی کے لیے کوئی انتظام موجود ہے، جس سے عوامی تحفظ کے حوالے سے سنگین خدشات پیدا ہو گئے ہیں۔
یہ سڑک اوچ شریف سمیت درجنوں دیہی آبادیوں کے لیے مرکزی رابطہ ذریعہ ہے، جس سے طلبہ، مریض اور کسان روزانہ مستفید ہوتے ہیں۔ بروقت اقدامات نہ کیے گئے تو نہ صرف عوام کو مشکلات کا سامنا کرنا پڑے گا بلکہ کروڑوں روپے کی لاگت سے تعمیر کی گئی یہ سڑک مکمل طور پر ناکارہ ہونے کا بھی خدشہ ہے۔
علاقہ مکینوں اور سماجی حلقوں نے ضلعی انتظامیہ اور محکمہ ہائی ویز کے اعلیٰ حکام سے مطالبہ کیا ہے کہ ہنگامی بنیادوں پر سڑک کا تکنیکی سروے کرایا جائے، کٹاؤ روکنے کے لیے حفاظتی پشتے تعمیر کیے جائیں اور نکاسی آب کے مؤثر انتظامات کیے جائیں۔ شہریوں کا کہنا ہے کہ کسی بھی ناخوشگوار واقعے کی ذمہ داری متعلقہ محکموں پر عائد ہو گی۔
دسمبر 24, 2025
اوکاڑہ: کمشنر ساہیوال کا کرسمس انتظامات کا جائزہ، سہولیات پر اطمینان
اوکاڑہ (نامہ نگار ملک ظفر) کمشنر ساہیوال ڈویژن ڈاکٹر آصف طفیل نے آر پی او رانا ایاز سلیم اور ڈپٹی کمشنر احمد عثمان جاوید کے ہمراہ کرسمس کے انتظامات کے سلسلے میں اوکاڑہ کے کیتھولک چرچ کا دورہ کیا۔
دورے کے دوران چرچ میں صفائی، بجلی، پانی اور سیکیورٹی انتظامات کا تفصیلی جائزہ لیا گیا۔ کمشنر ساہیوال نے کرسمس کے موقع پر مسیحی برادری کو بہترین سہولیات کی فراہمی یقینی بنانے کی ہدایات دیں اور چرچ انتظامیہ سے ملاقات کے بعد انتظامات پر اطمینان کا اظہار کیا۔
کمشنر ساہیوال ڈاکٹر آصف طفیل اور آر پی او رانا ایاز سلیم نے کرسچن کمیونٹی کے ساتھ مل کر کرسمس کا کیک بھی کاٹا۔ اس موقع پر فول پروف سیکیورٹی انتظامات یقینی بنانے کے احکامات جاری کیے گئے۔
کمشنر نے کہا کہ کرسمس کی تقریبات کے دوران مسیحی برادری کو ہر ممکن سہولیات فراہم کی جائیں گی اور اس ضمن میں کسی قسم کا سمجھوتہ نہیں کیا جائے گا۔ پبلک پارکس، قبرستانوں اور کرسچن کالونیوں میں بہترین میونسپل سروسز کی فراہمی کے لیے تمام ممکن اقدامات کیے جائیں گے۔
انہوں نے واضح کیا کہ اقلیتی برادری کے مذہبی تہواروں پر مکمل احترام اور سہولیات کی فراہمی ضلعی انتظامیہ کی اولین ترجیح ہے، جبکہ سیکیورٹی ادارے کرسمس کے موقع پر فول پروف سیکیورٹی انتظامات کو یقینی بنائیں گے۔ کمشنر ساہیوال نے ضلعی انتظامیہ کے موثر اقدامات کو سراہا۔
دسمبر 24, 2025
ڈیرہ غازی خان: موٹر سائیکل مارکیٹ میں دن دیہاڑے فائرنگ، شہری زخمی
ڈیرہ غازی خان (نیوزرپورٹر شاہد خان) شہر کی مصروف موٹر سائیکل مارکیٹ میں دن دیہاڑے فائرنگ کے واقعے نے خوف و ہراس پھیلا دیا۔ فائرنگ کے نتیجے میں حجانہ نامی شخص شدید زخمی ہو گیا، جبکہ مبینہ حملہ آور جاوید وڈانی موقع سے فرار ہو گیا۔
ذرائع کے مطابق معمولی تلخ کلامی کے بعد اچانک فائرنگ شروع ہوئی۔ زخمی شخص کو فوری طور پر ریسکیو 1122 کے ذریعے ٹیچنگ ہسپتال منتقل کر کے طبی امداد دی گئی۔
پولیس کی بھاری نفری نے فوری طور پر جائے وقوعہ کا رخ کیا، اور ڈی پی او ڈیرہ غازی خان نے ملزم کی گرفتاری کے لیے خصوصی ٹیمیں تشکیل دے دی ہیں۔ حکام کا کہنا ہے کہ جاوید وڈانی کی تلاش جاری ہے اور جلد قانون کے شکنجے میں آئے گا۔
واقعے پر انجمن تاجران نے شدید تشویش کا اظہار کیا اور ملزم کی فوری گرفتاری و عبرت ناک سزا کا مطالبہ کیا تاکہ بازار میں تحفظ کا احساس دوبارہ قائم ہو سکے۔
دسمبر 24, 2025
پسرور:قائداعظمؒ کی سالگرہ: سدرہ ستار کا فکری پیغام
پسرور (باغی ٹی وی،نامہ نگار وقاص اسلم ) بانیٔ پاکستان قائداعظم محمد علی جناحؒ کے یومِ ولادت کے موقع پر اسسٹنٹ کمشنر پسرور سدرہ ستار نے اپنے خصوصی پیغام میں کہا ہے کہ 25 دسمبر ہمارے قومی قائد کی عظیم جدوجہد اور لازوال قربانیوں کی یاد دلاتا ہے، جنہوں نے اپنی پوری زندگی اصولوں کی پابندی، نظم و ضبط اور محنت کے لیے وقف کر رکھی تھی۔ انہوں نے کہا کہ قائداعظمؒ نے برصغیر کے مسلمانوں کی سیاسی و معاشی محرومیوں کو بھانپتے ہوئے انہیں مسلم لیگ کے پلیٹ فارم پر متحد کیا اور انتھک جدوجہد کے ذریعے دنیا کے نقشے پر ایک ایسی آزاد ریاست تخلیق کی جہاں ہر شہری اپنے مذہب، ثقافت اور اقدار کے مطابق زندگی گزار سکے۔ سدرہ ستار نے اس بات پر زور دیا کہ پاکستان کا قیام ایک ایسی فلاحی اور جمہوری ریاست کے لیے عمل میں لایا گیا تھا جہاں قانون کی بالادستی ہو اور اقلیتوں، بالخصوص مسیحی برادری سمیت تمام شہریوں کو مساوی حقوق اور مکمل مذہبی آزادی حاصل ہو۔
انہوں نے موجودہ ملکی حالات پر تشویش کا اظہار کرتے ہوئے کہا کہ بدعنوانی، ناانصافی اور انتشار نے ہمیں قائد کے اصل وژن سے دور کر دیا ہے، جس کی وجہ سے ہماری نوجوان نسل مایوسی اور بے سمتی کا شکار ہو رہی ہے۔ اسسٹنٹ کمشنر نے واضح کیا کہ قائداعظمؒ کا نوجوانوں کے لیے ہمیشہ یہی پیغام رہا کہ وہ تعلیم پر توجہ دیں، دیانتداری اختیار کریں اور ملک کی خدمت کو اپنا شعار بنائیں۔ انہوں نے اپیل کی کہ 25 دسمبر کے دن کی اصل روح تقاضا کرتی ہے کہ ہم محض الفاظ کی حد تک نہیں بلکہ عملی طور پر قائد کے سنہری اصولوں "ایمان، اتحاد اور تنظیم” کو اپنائیں، کیونکہ قائد کے پاکستان کو حقیقی معنوں میں ترقی یافتہ بنانے کا یہی واحد راستہ ہے اور یہی ان سے سچی عقیدت کا اظہار ہو گا۔
دسمبر 24, 2025
بابا گورو نانک یونیورسٹی کے وائس چانسلر کی چیئرمین پی ایچ ای سی سے ملاقات، اعلیٰ تعلیم کے فروغ پر اتفاق
ننکانہ صاحب (باغی ٹی وی، نامہ نگار احسان اللہ ایاز)بابا گورو نانک یونیورسٹی ننکانہ صاحب کے وائس چانسلر پروفیسر ڈاکٹر شاہد عمران نے منصب سنبھالنے کے بعد پنجاب ہائر ایجوکیشن کمیشن (پی ایچ ای سی) کے چیئرمین پروفیسر ڈاکٹر اقرار احمد خان سے ملاقات کی۔ ملاقات میں اعلیٰ تعلیم کے فروغ، تعلیمی معیار میں بہتری، ادارہ جاتی ترقی اور باہمی تعاون کے امور پر تفصیلی تبادلۂ خیال کیا گیا۔
اس موقع پر وائس چانسلر پروفیسر ڈاکٹر شاہد عمران نے چیئرمین پی ایچ ای سی کو یونیورسٹی کے تعلیمی وژن سے آگاہ کرتے ہوئے کہا کہ تدریسی و تحقیقی معیار کو مزید بہتر بنانا، تحقیق کے کلچر کو فروغ دینا اور ادارے کو صوبائی اعلیٰ تعلیمی پالیسیوں سے ہم آہنگ کرنا ان کی اولین ترجیحات ہیں۔ انہوں نے اس عزم کا اظہار کیا کہ بابا گورو نانک یونیورسٹی پی ایچ ای سی کے تمام ضوابط اور معیارات پر مکمل عمل درآمد کرتے ہوئے صوبے کے تعلیمی نظام میں مؤثر کردار ادا کرے گی۔
چیئرمین پی ایچ ای سی پروفیسر ڈاکٹر اقرار احمد خان نے وائس چانسلر کو منصب سنبھالنے پر مبارکباد دیتے ہوئے کمیشن کی جانب سے مکمل تعاون کی یقین دہانی کرائی۔ انہوں نے کہا کہ پی ایچ ای سی اعلیٰ تعلیمی اداروں میں معیارِ تعلیم، فیکلٹی ڈویلپمنٹ اور ادارہ جاتی صلاحیتوں کے فروغ کے لیے اپنا کردار جاری رکھے گا۔
ملاقات کے اختتام پر بابا گورو نانک یونیورسٹی اور پنجاب ہائر ایجوکیشن کمیشن کے درمیان تعاون کو مزید مضبوط بنانے کے عزم کا اعادہ کیا گیا، تاکہ تعلیمی معیار، تحقیق اور بہتر انتظامی ڈھانچے کے ذریعے پنجاب میں اعلیٰ تعلیم کے نظام کو مزید مستحکم کیا جا سکے۔
دسمبر 24, 2025
ننکانہ صاحب: سردی میں مستحق افراد کیلئے ڈی پی ایس چوک پر “دیوارِ مہربان” قائم، شہریوں سے تعاون کی اپیل
ننکانہ صاحب (باغی ٹی وی، نامہ نگار احسان اللہ ایاز)ضلعی انتظامیہ ننکانہ صاحب نے سرد موسم کے پیشِ نظر ایک اہم فلاحی اقدام کرتے ہوئے ڈی پی ایس چوک میں دیوارِ مہربان قائم کر دی ہے، جہاں ضرورت مند افراد کے لیے گرم ملبوسات رکھ دیے گئے ہیں۔
ڈپٹی کمشنر ننکانہ صاحب محمد تسلیم اختر راؤ نے اس موقع پر معزز شہریوں سے اپیل کی کہ وہ یتیموں، بیواؤں اور غریب افراد کی مدد کے لیے دیوارِ مہربان پر استعمال شدہ یا نئے کپڑے رکھیں۔ انہوں نے کہا کہ سردی کے موسم میں مستحق اور نادار افراد کا خیال رکھنا ہم سب کی مشترکہ ذمہ داری ہے۔
ڈپٹی کمشنر کا کہنا تھا کہ آئیں ہم سب مل کر انسانیت کے جذبے کے تحت اپنی استطاعت کے مطابق نئے یا صاف ستھرے استعمال شدہ کپڑے دیوارِ مہربان پر رکھیں تاکہ ضرورت مند افراد باعزت طریقے سے فائدہ اٹھا سکیں۔ انہوں نے امید ظاہر کی کہ شہری اس فلاحی اقدام میں بڑھ چڑھ کر حصہ لیں گے اور معاشرے میں ہمدردی اور بھائی چارے کو فروغ دیں گے۔
دسمبر 24, 2025
سیالکوٹ: کرسمس کے موقع پر مسیحی برادری کیلئے خصوصی انتظامات، چراغاں، صفائی اور سیکیورٹی یقینی بنا دی گئی، ڈپٹی کمشنر صبا اصغر علی
سیالکوٹ (باغی ٹی وی، ڈسٹرکٹ رپورٹر مدثر رتو)ڈپٹی کمشنر صبا اصغر علی نے کہا ہے کہ حکومتِ پنجاب کی ہدایات پر کرسمس کے موقع پر مسیحیوں کی عبادت گاہوں میں چراغاں اور واشنگ کے خصوصی انتظامات کیے گئے ہیں، جبکہ شہر میں کرسمس بازار بھی قائم کر دیے گئے ہیں جہاں آٹے سمیت دیگر اشیائے ضروریہ رعایتی نرخوں پر فراہم کی جا رہی ہیں۔
انہوں نے یہ بات جناح ہال قلعہ میں ایس ڈبلیو ایم سی کے ورکرز کے ہمراہ کرسمس کیک کاٹنے کی تقریب سے خطاب کرتے ہوئے کہی۔ اس موقع پر سی او میونسپل کارپوریشن زبیر وٹو، ایم ڈی ایس ڈبلیو ایم سی کاشف نواز رندھاوا اور مسیحی رہنماؤں نے بھی شرکت کی۔
ڈپٹی کمشنر صبا اصغر علی نے بتایا کہ کرسمس کے موقع پر صفائی ستھرائی اور سیکیورٹی کے مؤثر انتظامات کیے گئے ہیں۔ انہوں نے مسیحی برادری کو کرسمس کی مبارکباد دیتے ہوئے نیک تمناؤں کا اظہار کیا اور کہا کہ قائداعظم کے پاکستان میں تمام مذاہب کو مساوی شہری حقوق حاصل ہیں اور ہر شہری اپنے عقیدے کے مطابق آزادانہ زندگی گزار سکتا ہے۔
انہوں نے مزید کہا کہ مسیحی برادری کی خدمات قابلِ تحسین ہیں اور وہ پاکستان کی ترقی اور خوشحالی میں مؤثر کردار ادا کر رہی ہے۔
دسمبر 24, 2025
اوچ شریف: بلیک میلر گینگ کے سنسنی خیز انکشافات، لڑکیوں کو ورغلا کر نازیبا ویڈیوز بنانے والا گروہ بے نقاب
اوچ شریف ( باغی ٹی وی ، نامہ نگار حبیب خان)اوچ شریف کے علاقے میں گزشتہ دنوں وائرل ہونے والی نازیبا اور فحش ویڈیوز کے معاملے میں انتہائی چونکا دینے والے انکشافات سامنے آئے ہیں۔ تحقیقات کے دوران احسن رضا، عمر، ندیم اور عرفان پر مشتمل ایک منظم بلیک میلر گینگ بے نقاب ہوا ہے، جس میں اوچ گیلانی کی رہائشی عظمیٰ خورشید نامی خاتون مرکزی کردار ادا کر رہی تھی۔ انکشاف ہوا ہے کہ یہ گروہ عظمیٰ خورشید کے ذریعے شریف گھرانوں کی بچیوں کو ورغلا کر مخصوص ٹھکانوں پر لاتا تھا، جہاں ان کی عزت پامال کرنے کے بعد خفیہ ویڈیوز بنا لی جاتی تھیں تاکہ انہیں بلیک میل کیا جا سکے۔ اس گروہ کے مظالم کی انتہا یہ ہے کہ بدنامی کے خوف سے ایک متاثرہ لڑکی پہلے ہی خودکشی کر کے اپنی جان دے چکی ہے۔ ویڈیوز وائرل ہونے کے بعد تھانہ اوچ شریف میں پولیس کی مدعیت میں مقدمہ تو درج کر لیا گیا ہے، تاہم گینگ اب اپنے جرائم پر پردہ ڈالنے کے لیے اوچھے ہتھکنڈوں پر اتر آیا ہے۔
ذرائع کے مطابق، گینگ کی اہم رکن عظمیٰ خورشید نے خود کو بچانے کے لیے نازیبا ویڈیوز میں نظر آنے والے احسن رضا کو اپنا شوہر ظاہر کیا ہے، حالانکہ احسن رضا پہلے سے شادی شدہ ہے اور عظمیٰ خورشید خود بھی اوچ گیلانی کے رہائشی محمد آصف کی منکوحہ ہے۔ عظمیٰ اور آصف کا کیس گزشتہ کئی سالوں سے عدالت میں زیر سماعت ہے اور ان کا ایک بچہ بھی ہے، جسے آصف اپنی اولاد تسلیم کرنے سے انکاری ہے اور اس نے عدالت میں ڈی این اے ٹیسٹ کی درخواست دے رکھی ہے۔ خفیہ ذرائع کا دعویٰ ہے کہ یہ گروہ قانونی گرفت سے بچنے کے لیے عظمیٰ خورشید کی اپنے شوہر سے طلاق اور احسن رضا سے نکاح کا ڈرامہ رچا کر خود کو میاں بیوی ثابت کرنے کی کوشش کر رہا ہے۔ ان ہوش ربا انکشافات کے بعد عوامی و سماجی حلقوں میں شدید تشویش کی لہر دوڑ گئی ہے اور شہریوں نے اعلیٰ حکام سے مطالبہ کیا ہے کہ تحقیقات کا دائرہ وسیع کر کے اس خطرناک بلیک میلر گینگ کو عبرتناک سزا دی جائے تاکہ آئندہ کوئی بھی شریف زادی ان کے ہتھے نہ چڑھ سکے اور نہ ہی کسی کو جان دینے پر مجبور ہونا پڑے۔
دسمبر 24, 2025