Author: ڈاکٹرغلام مصطفی بڈانی

سیالکوٹ (باغی ٹی وی بیوروچیف شاہد ریاض)ضلع سیالکوٹ میں 30 پانی کی کمپنیوں کے پانی کے نمونوں کا تجزیہ کیا گیا جس میں سے دو کمپنیوں کے پانی کو مضر صحت قرار دیا گیا۔ یہ معلومات وفاقی ادارہ پاکستان کونسل آف ریسرچ ان واٹر ریسورسز (PCRWR) اسلام آباد کی سیالکوٹ لیبارٹری کی حالیہ رپورٹ میں دی گئی ہیں۔

انچارج آفسیر ڈسٹرکٹ لیبارٹری سیالکوٹ تجمل لنگڑیال نے بتایا کہ مضر صحت پانی میں بیکٹریا اور دیگر نقصان دہ اجزاء موجود ہیں۔ انہوں نے شہریوں کو ہدایت کی کہ وہ اپنے گھریلو پانی کی کوالٹی جانچنے کے لیے لیبارٹری کے دفتر، ہاکی گراؤنڈ، پسرور روڈ پر رابطہ کریں۔

تجمل لنگڑیال نے کہا کہ سیالکوٹ میں تمام کمپنیوں کے پانی کے نمونے اوپن مارکیٹ اور مختلف دکانوں سے حاصل کیے گئے اور تجزیہ کے بعد رپورٹ مرتب کی گئی ہے۔ ان کا کہنا تھا کہ ادارہ ہر تین ماہ بعد پانی کے نمونوں کا معائنہ کرتا ہے تاکہ عوام کو صاف اور محفوظ پانی کی فراہمی یقینی بنائی جا سکے۔

مزید تفصیلات ادارہ کی ویب سائٹ www.pcrwr.gov.pk پر دستیاب ہیں۔

سیالکوٹ (باغی ٹی وی،بیوروچیف شاہد ریاض) ڈپٹی کمشنر صبا اصغر علی کی زیر صدارت ڈسٹرکٹ ڈسپیوٹ ریزولوشن کمیٹی (ڈی آر سی) کا اجلاس ڈی سی آفس میں منعقد ہوا، جس میں سائلین کی داد رسی کا سلسلہ جاری رہا۔ اجلاس میں 20 درخواستوں پر فیصلے کیے گئے اور ناجائز قابضین سے زمینیں واگزار کرنے کے احکامات بھی جاری کیے گئے۔

اجلاس میں ڈی پی او فیصل شہزاد، اے ڈی سی ریونیو عباس ذوالقرنین، اے ڈی سی جنرل شاہد عباس، چاروں تحصیلوں کے اسسٹنٹ کمشنرز، ایس ڈی پی اوز اور متعلقہ ریونیو افسران نے شرکت کی۔

ڈپٹی کمشنر نے حیات والد کے مکان سے حصہ حاصل کرنے کے لیے من گھڑت مؤقف پیش کرنے پر ایک شہری کو 15 ہزار روپے جرمانہ کیا۔ انہوں نے کہا کہ ڈی آر سی کا فورم صرف حقداروں کی داد رسی کے لیے ہے اور جھوٹی درخواستوں کے باعث قیمتی وقت ضائع ہوتا ہے۔

ڈپٹی کمشنر اور ڈی پی او نے اسسٹنٹ کمشنرز اور ایس ڈی پی اوز کو ہدایت کی کہ جائیداد کی متنازعہ تقسیم کی صورت میں فریقین کے درمیان باہمی افہام و تفہیم سے منصفانہ تقسیم یقینی بنائیں اور کسی کے حق کو ضائع نہ ہونے دیں۔

صبا اصغر علی نے کہا کہ جن شہریوں کو ریونیو قوانین کا علم نہیں، انہیں قانونی رہنمائی فراہم کی جائے۔ وزیر اعلیٰ پنجاب کے ویژن اور پنجاب پروٹیکشن آف ایمووایبل پراپرٹی ایکٹ 2025ء کے تحت کمیٹی اپنی ذمہ داریاں پوری کرے گی اور کسی بھی قسم کی غفلت برداشت نہیں کی جائے گی۔

سیالکوٹ، باغی ٹی وی (بیوروچیف شاہد ریاض)کنوینیر اتحاد گروپ محمد خالد وسیم ایڈووکیٹ نے کہا ہے کہ معاشرتی ترقی اور قومی استحکام کا انحصار امنِ عامہ کے قیام پر ہے، کیونکہ امن وہ بنیاد ہے جس پر ایک خوشحال اور مضبوط معاشرہ تشکیل پاتا ہے۔ انہوں نے کہا کہ جس ملک میں سکون، تحفظ اور باہمی احترام موجود ہو وہاں ترقی خود بخود اپنا راستہ بناتی ہے، جبکہ بدامنی اور بے چینی معاشرتی ڈھانچے کو کمزور کرنے کا باعث بنتی ہے۔

علماء کرام اور رفقاء سے گفتگو کرتے ہوئے محمد خالد وسیم ایڈووکیٹ نے کہا کہ امنِ عامہ موجودہ دور کی سب سے اہم ضرورت ہے، اس لیے معاشرے کے ہر فرد پر لازم ہے کہ ہم آہنگی، رواداری اور برداشت کو فروغ دے کر اپنا مثبت کردار ادا کرے۔ انہوں نے اس بات پر زور دیا کہ جہاں امن قائم ہو وہاں زندگی خوشگوار اور پرسکون ہوتی ہے، لیکن امن کے فقدان سے انتشار اور بے چینی میں اضافہ ہوتا ہے جو قوموں کی ترقی میں بڑی رکاوٹ بنتا ہے۔

انہوں نے عزم کا اظہار کیا کہ وہ سماجی ہم آہنگی، عوامی شعور کی بیداری اور امن کے فروغ کے لیے اپنی کوششیں جاری رکھیں گے، جبکہ عوام سے اپیل کی کہ اپنے علاقوں میں پرامن ماحول کے قیام کے لیے بھرپور تعاون کریں تاکہ معاشرہ مضبوط اور خوشحال بن سکے۔