سیالکوٹ (باغی ٹی وی بیوروچیف شاہد ریاض) ڈپٹی کمشنر سیالکوٹ صبا اصغر علی نے کہا ہے کہ وزیراعلیٰ پنجاب امام مسجد اعزازیہ پروگرام کے تحت ضلع بھر سے 2500 سے زائد آئمہ کرام کی رجسٹریشن مکمل ہو چکی ہے اور رجسٹریشن کا عمل تیزی سے جاری ہے۔ انہوں نے علماء کرام پر زور دیا کہ وہ اس عمل کو بروقت مکمل کرنے کیلئے انتظامیہ سے مکمل تعاون جاری رکھیں۔
یہ بات انہوں نے ضلعی امن کمیٹی کے اجلاس سے خطاب کرتے ہوئے کہی۔ اجلاس میں ڈسٹرکٹ پولیس آفیسر فیصل شہزاد، ایڈیشنل ڈپٹی کمشنر (جنرل) شاہد عباس، کوآرڈینیٹر امن کمیٹی حافظ اصغر علی چیمہ سمیت مختلف مکاتب فکر کے علماء کرام اور کمیٹی ممبران شریک تھے۔ اجلاس میں امن و امان کی صورتحال اور اعزازیہ پروگرام پر پیش رفت کا تفصیلی جائزہ لیا گیا۔
ڈپٹی کمشنر صبا اصغر علی نے کہا کہ سیالکوٹ کے علماء نے ہمیشہ بھائی چارے اور ہم آہنگی کے فروغ میں مؤثر کردار ادا کیا ہے اور مسلکی ہم آہنگی کے ذریعے شہر میں امن کے قیام کو یقینی بنایا۔ انہوں نے مزید کہا کہ وزیراعلیٰ مریم نواز شریف کا آئمہ کرام کیلئے اعزازیہ پروگرام ایک اہم قدم ہے جس میں علماء کرام کی بھرپور شرکت خوش آئند ہے۔
اس موقع پر ڈسٹرکٹ پولیس آفیسر فیصل شہزاد نے کہا کہ موجودہ ملکی حالات کو مدنظر رکھتے ہوئے شرپسند عناصر کی بیخ کنی میں علماء کا مثبت کردار انتہائی اہم ہے۔ انہوں نے کہا کہ امن کے قیام کیلئے ہر طبقے اور شہری کا تعاون ناگزیر ہے اور علماء ہمیشہ انتظامیہ و پولیس کے ساتھ تعاون کرتے آئے ہیں۔
اجلاس میں شریک علماء کرام نے انتظامیہ اور پولیس کو ہر ممکن تعاون کی یقین دہانی کرائی اور اعزازیہ پروگرام پر وزیراعلیٰ پنجاب مریم نواز شریف کا شکریہ ادا کیا۔
