Author: ڈاکٹرغلام مصطفی بڈانی

اوچ شریف (باغی ٹی وی،نامہ نگارحبیب خان) تحصیل احمد پور شرقیہ، بالخصوص اوچ شریف کے سرکاری سکولوں میں ’’مسنگ فیسلیٹیز‘‘ اور ’’سیکیورٹی پروٹوکول‘‘ کے تحت تعمیراتی کاموں کے لیے جاری فنڈز میں مبینہ طور پر سنگین بے ضابطگیوں اور کرپشن کے انکشافات نے شہریوں کو شدید تشویش میں مبتلا کر دیا ہے۔ وزیراعلیٰ پنجاب مریم نواز شریف کی جانب سے حفاظتی دیواروں، ٹوائلٹس، پینے کے صاف پانی، کلاس روم مرمت اور دیگر بنیادی سہولیات کی فراہمی کے لیے بھاری رقوم جاری کی گئیں تھیں، مگر یہ فنڈز بھی مبینہ طور پر این ایس بی کی طرح بدعنوانی کی نذر ہونے لگے۔

ذرائع کے مطابق متعدد سرکاری سکولوں کے ہیڈز نے ذاتی کمیشن حاصل کرنے کے لیے سرکاری کنٹرول ریٹ کی خلاف ورزی کرتے ہوئے خودساختہ مہنگے نرخوں پر غیر معیاری سیمنٹ، بجری، ریت اور دیگر تعمیراتی سامان کی خریداری شروع کر رکھی ہے۔ کئی اسکولوں میں تعمیراتی کام انتہائی ناقص، عارضی اور محض کاغذی کارروائی تک محدود بتایا جا رہا ہے، جبکہ بعض اسکولوں میں فنڈز کے ہونے کے باوجود کوئی نمایاں تعمیراتی سرگرمی دکھائی ہی نہیں دیتی۔

شہریوں نے شکوہ کیا کہ اتنے بھاری بجٹ کے باوجود اسکولوں کی حالت نہ سدھرنا خود ایک بڑا سوالیہ نشان ہے۔ ان کا کہنا ہے کہ سکول ہیڈز نے ٹھیکیداروں اور کمیشن مافیا کے ساتھ مل کر کم معیار کا سامان مہنگے داموں ظاہر کرکے فنڈز ہڑپنے کا سلسلہ جاری رکھا ہوا ہے۔ کئی مواقع پر تعمیراتی میٹریل کھلی مارکیٹ کے کم ترین معیار سے بھی نیچے پایا گیا، جس سے حکومتی اصلاحاتی منصوبوں کے متاثر ہونے کا شدید خدشہ ہے۔

بعض سکول انتظامیہ نے مؤقف اختیار کیا کہ تمام خریداری تحصیل انتظامیہ کی ہدایات اور بجٹ کے مطابق کی جا رہی ہے، اور کرپشن کے الزامات بے بنیاد ہیں۔ تاہم زمینی حقائق ان دعوؤں کی نفی کرتے دکھائی دیتے ہیں، جس پر عوامی و سماجی حلقوں نے گہری تشویش کا اظہار کیا ہے۔

عوام نے وزیراعلیٰ پنجاب، سیکرٹری سکول ایجوکیشن اور ڈپٹی کمشنر بہاولپور سے مطالبہ کیا ہے کہ تحصیل بھر کے تمام سکولوں کا شفاف آڈٹ اور انکوائری کرائی جائے، سرکاری کنٹرول ریٹ کے مطابق خریداری کو لازمی قرار دیا جائے، جبکہ کرپشن میں ملوث عناصر کے خلاف سخت ترین کارروائی عمل میں لائی جائے۔ شہریوں نے خبردار کیا کہ اگر فوری ایکشن نہ لیا گیا تو مسنگ فیسلیٹیز کے منصوبے مکمل طور پر کرپشن کی بھینٹ چڑھ جائیں گے اور بچوں کا تعلیمی مستقبل شدید خطرے سے دوچار ہو جائے گا۔

اوچ شریف (باغی ٹی وی،نامہ نگارحبیب خان)اوچ شریف اور گردونواح کے پیف اسکولوں کی ابتر حالت نے سرکاری تعلیمی دعوؤں کی قلعی کھول دی ہے۔ بیشتر اسکول آج بھی کرائے کی خستہ اور بوسیدہ عمارتوں میں قائم ہیں جہاں نہ بنیادی سہولیات موجود ہیں اور نہ ہی بچوں کی جانوں کا تحفظ ممکن ہے۔

مقامی ذرائع کے مطابق اوچ شریف، ناصر ٹاؤن، جامڑاہ، حلیم پور، قادر آباد، بیٹ احمد، بیٹ بختیاری، چناب اور رسول پور سمیت متعدد علاقوں میں چلنے والے پیف اسکولوں کی حالت انتہائی تشویشناک ہے۔ کئی عمارتیں بارش میں ٹپکنے والی چھتوں، ٹوٹی ہوئی دیواروں اور غیر محفوظ کمروں پر مشتمل ہیں جہاں درجنوں بچے قطاروں کی شکل میں بیٹھ کر تعلیم حاصل کرنے پر مجبور ہیں۔

والدین کا کہنا ہے کہ بجلی کا نظام ناکارہ ہے، پینے کا صاف پانی میسر نہیں، ٹوائلٹ کی سہولت موجود نہیں جبکہ بچوں کے بیٹھنے کے لیے مناسب فرنیچر بھی فراہم نہیں کیا جاتا۔ پسماندہ بستیوں کے اسکولوں کی حالت سب سے زیادہ بدتر بتائی جاتی ہے۔

گزشتہ برس ناصر ٹاؤن میں اسکول کی دیوار گرنے سے ایک طالبہ جاں بحق ہوئی تھی جبکہ جامڑاہ میں شارٹ سرکٹ کے باعث دو افراد کی ہلاکت نے پیف اسکولوں کے انتظامی نقائص کی سنگینی کو واضح کیا تھا۔ مقامی افراد کے مطابق ان سانحات کے باوجود متعلقہ محکموں نے کوئی مؤثر اصلاحاتی اقدامات نہیں کیے۔

مزید یہ کہ شہریوں نے غیر رجسٹرڈ اور غیر معیاری پرائیویٹ اسکولوں کی بھرمار پر سخت تشویش کا اظہار کیا ہے۔ والدین کے مطابق نصاب اور یونیفارم کی قیمتوں پر کوئی کنٹرول نہیں، اور غیر منظور شدہ کتابیں بھی کھلے عام پڑھائی جا رہی ہیں، جس سے تعلیمی معیار مزید متاثر ہو رہا ہے۔

عوام نے مطالبہ کیا ہے کہ پیف اسکولوں کی عمارتوں کا ہنگامی بنیادوں پر سروے کیا جائے، خطرناک عمارتوں کو فوری تبدیل کیا جائے اور ذمہ دار افراد کے خلاف کارروائی عمل میں لائی جائے۔ مزید برآں غیر قانونی اسکولوں کو بند کر کے تعلیمی نظام کو فائلوں تک محدود رکھنے کے بجائے زمینی سطح پر ٹھوس اقدامات کیے جائیں۔

شہریوں نے خبردار کیا ہے کہ اگر فوری اقدامات نہ کیے گئے تو کسی بھی وقت بڑا سانحہ رونما ہو سکتا ہے۔

اوچ شریف (باغی ٹی وی ،نامہ نگارحبیب خان) گزشتہ کئی دنوں سے اوچ شریف میں نجی بینکوں کے اے ٹی ایم مشینیں اور بائیو میٹرک تصدیقی نظام کارکردگی سے محروم ہیں، جس کے باعث صارفین کو رقم نکلوانے اور ٹرانزیکشن کرنے میں شدید دشواری کا سامنا ہے۔

شہریوں نے بتایا کہ مختلف بینکوں کی برانچوں میں نصب بائیو میٹرک ڈیوائسز خراب ہیں اور اے ٹی ایم مشینیں اکثر “ناکارہ” نظر آتی ہیں۔ نتیجتاً، بینکنگ کے بنیادی اقدامات رقم نکالنا، پنشن یا سوشل بینیفٹ وصول کرنا اور دیگر اہم مالی ٹرانزیکشنز شدید متاثر ہو رہے ہیں۔

کئی صارفین کا کہنا ہے کہ موجودہ بینکنگ نظام کی یہ خرابی ان کے روزمرہ کے مالی معاملات پر منفی اثر ڈال رہی ہے۔ خاص طور پر اُن افراد کے لیے مسئلہ سنگین ہے جو پنشن یا سوشل بینیفٹ بائیو میٹرک کے ذریعے وصول کرتے ہیں کیونکہ بائیو تصدیق نہ ہونے کی وجہ سے رقم حاصل کرنا ممکن نہیں۔

عوامی حلقوں نے مطالبہ کیا ہے کہ بینک حکام فوری طور پر اے ٹی ایم اور بائیو میٹرک نظام کی مرمت کریں تاکہ صارفین کو آسانی سے خدمات مل سکیں اور انہیں بار بار بینکوں کے چکر نہ لگانے پڑیں۔ انہیں بینکوں سے توقع ہے کہ وہ جدید بینکنگ سروسز فراہم کرنے کے ساتھ ساتھ اپنے بنیادی نظام کی فعال کارکردگی کو بھی یقینی بنائیں۔