Baaghi TV

Author: Ayesha Rehmani

  • جاپان میں انسانی واشنگ مشین متعارف

    جاپان میں انسانی واشنگ مشین متعارف

    ٹوکیو: جاپان کی معروف ٹیکنالوجی کمپنی سائنس کارپوریشن نے انسانی واشنگ مشین متعارف کرا دی۔

    غیر ملکی خبر رساں ایجنسی کے مطابق سردیوں کے موسم میں نہانے سے جھجھک اور سستی محسوس کرنے والوں کے لیے یہ مشین کسی نعمت سے کم نہیں، اس جدید مشین میں انسان کو ایک گرم اور آرام دہ ماحول میں بند کر دیا جاتا ہے جہاں مشینی نظام خودکار طریقے سے جسم پر پانی ڈالتا، صابن لگاتا اور میل کچیل صاف کرتا ہے اس دوران انسان کو انگلی تک ہلانے کی ضرورت نہیں پڑتی۔

    کمپنی کے مطابق یہ انسانی واشنگ مشین نہ صرف جسم کو صاف کرتی ہے بلکہ نہانے کے دوران انسان کے من پسند گانے بھی سناتی ہے جس سے یہ عمل مزید خوشگوار ہو جاتا ہےیہ مشین صرف 15 منٹ میں انسان کو صاف ستھرا اور تروتازہ کر کے باہر نکال دیتی ہے جاپان کے متعدد ہوٹلوں اور حماموں میں یہ انوکھی انسانی واشنگ مشین نصب کی جا چکی ہے جہاں صارفین اسے بے حد پسند کر رہے ہیں۔

    سائنس کارپوریشن نے دعویٰ کیا ہے کہ یہ مشین انسان کو نہ صرف جسمانی بلکہ روحانی طور پر بھی پاکیزگی کا احساس دلاتی ہے، اور مستقبل میں اسے مزید بہتر فیچرز کے ساتھ عام صارفین کے لیے متعارف کرانے کا ارادہ ہے۔

  • پی ٹی اے نے صارفین کو سائبر فراڈ سے خبردار کر دیا

    پی ٹی اے نے صارفین کو سائبر فراڈ سے خبردار کر دیا

    اسلام آباد: پاکستان ٹیلی کمیونیکیشن اتھارٹی (پی ٹی اے) نے صارفین، خصوصاً حکومتی اور نجی اداروں کے ملازمین کو بڑھتے ہوئے سائبر فراڈ کے خطرات سے خبردار کر دیا ہے۔

    سوشل میڈیا پر جاری ایک ویڈیو پیغام میں پی ٹی اے کا کہنا ہے کہ ای میل ہر ادارے کیلئے ایک انتہائی اہم ذرائع ابلا غ ہے،سائبر مجرم مسلسل فشنگ ای میلز کے ذریعے صارفین کو نشانہ بنا رہے ہیں، جن کا مقصد لاگ اِن تفصیلات چرانا، سسٹمز کو رینسم ویئر سے متاثر کرنا یا غیر مجاز رسائی حاصل کرنا ہوتا ہے فراڈ کرنے والے افراد اکثر دھمکی، لالچ یا جعلی وارننگز کا سہارا لیتے ہیں تاکہ صارف گھبرا کر فوری طور پر لنک پر کلک کر دے یا حساس معلومات فراہم کر دے۔

    اتھارٹی نے سائبر فراڈ سے محفوظ رہنے کے لیے صارفین کو احتیاطی تدابیر اختیار کرنے کی ہدایت کی ہے، جن میں ای میل بھیجنے والے کی شناخت اور ای میل ایڈریس کی تصدیق، اٹیچمنٹ کی فائل ایکسٹینشن چیک کرنا، اٹیچمنٹ کھولنے سے پہلے اسکین کرنا اور ای میل استعمال کرنے کے بعد لاگ آؤٹ کرنا شامل ہے۔

    https://x.com/PTAofficialpk/status/1999789211306607077?s=20

    پی ٹی اے نے کہا ہے کہ سرکاری ای میل کو ذاتی یا غیر سرکاری مقاصد کے لیے استعمال نہ کیا جائے، کسی بھی لنک پر کلک کرنے سے پہلے اصل یو آر ایل کی تصدیق ضرور کی جائے، جبکہ ای میل پاس ورڈ یا او ٹی پی کسی کے ساتھ شیئر نہ کیا جائے اور نہ ہی ای میل کے ذریعے ارسال کیا جائے۔

    اتھارٹی نے صارفین کو نامعلوم یا شارٹ لنکس پر کلک کرنے سے بھی سختی سے منع کرتے ہوئے کہا ہے کہ محتاط رویہ ہی سائبر حملوں سے بچاؤ کا مؤثر ذریعہ ہے۔

  • اسلام آباد میں 30 مختلف مقامات پرمفت وائی فائی فراہم کرنے کا منصوبہ

    اسلام آباد میں 30 مختلف مقامات پرمفت وائی فائی فراہم کرنے کا منصوبہ

    اسلام آباد میں کیپیٹل ڈویلپمنٹ اتھارٹی (CDA) نے 30 مختلف مقامات پرمفت وائی فائی فراہم کرنے کا منصوبہ شروع کر دیا ہے۔

    یہ منصوبہ نیشنل ٹیلی کمیونیکیشن کارپوریشن (NTC) کے تعاون سے عملی شکل اختیارکررہا ہے اورشہر کے مختلف اسٹیشنز، پارکس اور سیکٹرزمیں انٹرنیٹ کی مفت سہولت فراہم کرے گامنصوبے کے تحت میٹرو کے 84 اسٹیشنزکو شامل کیا گیا ہے جبکہ پارکس اوراہم مقامات جیسے پاک سیکریٹریٹ سے یو پی روڈ تک 14 اسٹیشنز اور فیض احمد فیض سے جی ٹی روڈ تک 70 اسٹیشنز میں وائی فائی سروس فراہم کی جائیگی، سی اے اے اسپتال، جاپان پارک، لیک ویو پارک، دامن کوہ اور فاطمہ جناح پارک میں بھی مفت وائی فائی دستیاب ہوگا،شہری ہفتہ وار بازاروں جیسا کہ جی سکس اور ایچ نائن کے بازاروں میں بھی اس سہولت سے مستفید ہو سکیں گے، اور اسلام آباد کے پوش سیکٹرز ایف سکس اور ایف سیون میں بھی وائی فائی فراہم کیا جائے گا۔

    سی ڈی اے کے حکام کے مطابق یہ سہولت رواں ماہ کے اختتام تک مکمل ہو جائے گی، جس سے شہر کے شہریوں اور وزیٹرز کو جدید اور تیز رفتار انٹرنیٹ تک رسائی حاصل ہو گی منصوبے کا مقصد نہ صرف شہریوں کیلئے انٹرنیٹ کی سہولت کو فروغ دینا ہے بلکہ شہرکے اہم عوامی مقامات پر ڈیجیٹل رابطے کو بھی مضبوط بنانا ہے تاکہ شہری اور سیاح دونوں جدید ٹیکنالوجی سے بھرپورفائدہ اٹھا سکیں۔

  • بارکھان اور گرد و نواح میں زلزلے کے شدید جھٹکے

    بارکھان اور گرد و نواح میں زلزلے کے شدید جھٹکے

    بارکھان اور اس کے گرد و نواح میں زلزلے کے شدید جھٹکے محسوس کیے گئے-

    بارکھان اور اس کے گرد و نواح میں زلزلے کے شدید جھٹکے محسوس کیے گئے، جس سے مقامی لوگوں میں خوف و ہراس پھیل گیا،لوگ کلمہ طیبہ کا ورد کرتے ہوئے گھروں سے باہر نکل آئے،زلزلہ پیما مرکزکے مطابق زلزلے کی شدت4.2 اور گہرائی 25 کلومیٹر تھی، زلزلے کا مرکز بارکھان سے 27 کلومیٹرشمال مشرق میں واقع تھا۔

    مقامی انتظامیہ کے مطابق زلزلے کے فوری بعد مختلف علاقوں میں ریسکیو اور نگرانی کے عملے کو الرٹ کر دیا گیا تاکہ کسی بھی ہنگامی صورتحال کا بروقت مقابلہ کیا جا سکے تاحال زلزلے کے نتیجے میں کسی جانی نقصان کی اطلاعات موصول نہیں ہوئی، تاہم شہریوں میں خوف کی کیفیت برقرار ہے اور لوگ حفاظتی اقدامات اختیار کر رہے ہیں۔

    مقامی حکومت نے عمارتوں میں کسی بھی ممکنہ نقصان کا جائزہ لینے کے لیے ٹیمیں تشکیل دے دی ہیں،ماہرین زلزلہ سے متعلق شہریوں کو ہدایت کر رہے ہیں کہ وہ محفوظ مقامات پر رہیں اور غیر ضروری باہر نکلنے سے گریز کریں۔

  • پاکستان بار کونسل کے انتخابات، عاصمہ جہانگیر گروپ کو برتری حاصل

    پاکستان بار کونسل کے انتخابات، عاصمہ جہانگیر گروپ کو برتری حاصل

    پاکستان بار کونسل کے انتخابات میں عاصمہ جہانگیر گروپ نے برتری حاصل کرلی –

    پاکستان بار کونسل کی پنجاب کی 11 میں سے 8 نشستیں عاصمہ جہانگیر گروپ نے جیت لی ہیں،وفاقی وزیر قانون اعظم نذیر تارڑ نے کہا کہ عاصمہ جہانگیر گروپ نے پنجاب کی 11 میں سے 8 نشستوں پر کامیابی سمیٹ لی جبکہ دو نشستوں پر حامد خان گروپ کے امیدوار کامیاب ہوئے ہیں اور ایک نشست پر رزلٹ آنا باقی ہے۔

    حامد گروپ کے سلمان اکرم راجا اور شفقت چوہان ممبر پاکستان بار کونسل منتخب ہوگئے ہیں،عاصمہ جہانگیر گروپ کے اعظم نذیر تارڑ، احسن بھون، پیر مسعود چشتی، عامر سعید راں، طاہر ناصراللہ وارئچ، حفیظ الرحمان چوہدری، ثاقب اکرم گوندل اور سید قلب حسن پاکستان بار کونسل کے رکن منتخب ہوگئے ہیں،پاکستان بار کونسل کے امیدواروں کی کامیابی کا حتمی نتیجہ 22 دسمبر کو جاری کیا جائے گا۔

    ادھر خیبرپختونخوا میں بھی پاکستان بار کونسل کے 4 ممبران کا انتخاب ہوا جہاں جمعیت علمائے اسلام کے نوید اختر ایڈووکیٹ، ملگری وکیلان کے رحمان اللہ شاہ ایڈوکیٹ، انصاف لائرز فوم کے ستار خان ایڈووکیٹ اور جماعت اسلامی کے وکلا ونگ آئی ایل ایم کے قاضی ارشد پاکستان بار کونسل کے رکن منتخب ہوگئے ہیں۔

  • پنجاب حکومت اور ٹرانسپورٹرز کے درمیان معاملات طے،اعلامیہ جاری

    پنجاب حکومت اور ٹرانسپورٹرز کے درمیان معاملات طے،اعلامیہ جاری

    پنجاب حکومت اور ٹرانسپورٹرز کے درمیان معاملات طے پاگئے۔

    وزیراعلی مریم نوازشریف نے ٹرانسپورٹ کے شعبے کو صنعت کا درجہ دینے کا فیصلہ، ٹرانسپورٹر ز کا خیرمقدم کیا ہے ٹرانسپورٹرز نے اعلان کیا ہے کہ ٹرانسپورٹ کے شعبے کی ترقی کے لئے وزیراعلی پنجاب کے اقدامات کی بھرپور تائید وحمایت کرتے ہیں، مشترکہ اعلامیہ کے مطابق ٹرانسپورٹ کی صنعت کی بہتری، ترقی اور تمام مسائل کے حل کے لئے چار کمیٹیاں تشکیل دے دی گئیں، پنجاب کے وزیر ٹرانسپورٹ بلال اکبر مرکزی کوآرڈینیٹر مقرر کردیے گئے ہیں۔

    سینئر صوبائی وزیر مریم اورنگزیب کی زیرِ صدارت اجلاس، گڈز اور پبلک ٹرانسپورٹرز کے نمائندوں نے بھرپور شرکت کی اور ہڑتال کے خاتمے کا باضابطہ اعلان بھی کر دیاقائم کردہ کمیٹیوں میں گڈز ٹرانسپورٹ کمیٹی، منی مزدا ٹرانسپورٹ کمیٹی، پبلک ٹرانسپورٹ کمیٹی اور سٹاف ڈیوٹی وہیکل کمیٹی شامل ہے ٹرانسپورٹرز کی سفارشات مرتب کرکے سینئر صوبائی وزیر مریم اورنگزیب کو پیش کریں گی۔

    مشترکہ اعلامیہ کے مطابق ٹرانسپورٹرز اور حکومتی نمائندے آئیندہ بدھ کو مشترکہ پریس کانفرنس میں حتمی تجاویز سامنے لائیں گے، یہ چاروں کمیٹیاں مستقل بنیادوں پر ٹرانسپورٹ سے متعلق مسائل کی نگرانی اور سفارشات پر عمل درآمد کا جائزہ لیں گی ۔ تمام تجاویز کو تین دن میں حتمی شکل دی جائے گی،

    اس کے علاوہ طے پایا کہ انتظامی اقدامات کے لیے ایک ماہ کی مہلت دی جائے گی، حکومت اور ٹرانسپورٹرز کے نمائندوں میں ٹریفک آرڈیننس 2025 پر مشترکہ غور، مزید بہتری اور مل کر عمل درآمد کرنے پر اتفاق ہوگیاٹریفک آرڈیننس 2025 میں دیت کے متعلق کوئی شق شامل نہیں کی گئی جبکہ اس بات پر اتفاق ہوا کہ ثبوت پر مبنی چالان پیش کئے جائیں گے۔

    مشترکہ اعلامیہ کے مطابق ایک جرم پر چالان ہونے کے بعد دوبارہ اسی جرم پر اسی چکر میں دوبارہ چالان نہیں ہوگا، الیکڑانک وَن ایپ کے ذریعے روٹس پر چالان کے عمل کو ریگولیٹ کیا جائے گا، دیگر صوبوں کے ٹرانسپورٹرز کے ساتھ پنجاب کے ٹرانسپورٹ پُل کا کردار ادا کریں گے۔

    ٹرانسپورٹرز نے مطالبہ کیا ہے کہ پنجاب کی طرز پر دیگر صوبوں میں بھی ٹریفک قوانین اور ٹرانسپورٹرز کے مسائل کے حل کے لئے اقدامات کئے جائیں ،ٹرا نسپورٹرز کے مطالبے پر سینئر صوبائی وزیر مریم اورنگزیب مرکزی سطح پر ٹرانسپورٹرز کے مسائل کے حل کے لئے وزیراعظم شہبازشریف کو سفارشات پیش کریں گی۔

    مشترکہ اعلامیہ کے مطابق مرکزی حکومت اور دیگر صوبے بھی پنجاب کی طرح ٹرانسپورٹ کو صنعت کا درجہ دیں، دیگر سہولیات اور بہتری کے لئے اقدامات کریں، ٹریفک قوانین پر عملدرآمد سے نظام میں بہتری لائیں گے اعلامیہ میں دونوں جانب سے باہمی تعاون پر اتفاق ہوگیا ۔پنجاب حکومت ٹرانسپورٹ کی صنعت کوعالمی معیار پر لانے، منسلکہ شعبوں کی ترقی، جدید ٹیکنالوجی اور طریقوں کے استعمال کو یقینی بنائے گی۔

    مشترکہ اعلامیہ کے مطابق پنجاب حکومت ٹرانسپورٹ صنعت کی ترقی اور بہتری کے لئے قانونی، انتظامی اصلاحات کرے گی، انفراسٹرکچر بہتربنائے گی، گڈز، پبلک ٹرانسپورٹ اور انتظامی امور پر مستقل کمیٹیوں کا ہر تین ماہ بعد اجلاس ہو گا چالان اور جرمانوں کے نظام میں اصلاحات، جدید ایپ کے ذریعے دہرا چالان ختم کرنے پر پیش رفت کی جائے گی، اوورلوڈنگ، ایکسل ویٹ، گاڑیوں کے سائز اور فٹنس سے متعلق مسائل ٹرانسپورٹرز کی مشاورت سے حل کیے جائیں گے۔

    سینئر صوبائی وزیر مریم اورنگزیب نے کہا کہ ہمارا مقصد کاروبار کی ترقی، عوام کی زندگی کی حفاظت اور عوام کو بہترین خدمات کی فراہمی یقینی بنانا ہے، ہر زندگی کی حفاظت، نظام کی بہتری، عالمی معیار کانفاذ اور ہر شعبے کی ترقی بنیادی ہدف ہےہم سب کا تعاون اور مشترکہ کوشش سے ہی پنجاب میں عوام کا معیار زندگی بہتر ہوگا،۔

    مریم اورنگزیب نے ٹرانسپورٹرز کے تعاون پر شکریہ ادا کرتے ہوئے کہا کہ مسائل کو مکالمے سے حل کرنے پر یقین رکھتے ہیں، ٹرانسپورٹ آرڈیننس 2025 کا واحد مقصد بچوں اور شہریوں کی جان کا تحفظ اور سڑکوں پر نظم و ضبط قائم کرنا ہے۔

    مریم اورنگزیب کا کہنا تھا کہ کمیونیکیشن کے خلا کیوجہ سے دوبارہ غلط فہمیاں پیدا نہ ہوں، اس لئے مشاورت کا مستقل نظام قائم کر دیا ہے، اسموگ کے تدارک میں ٹرانسپورٹ سیکٹر کا کردار تسلیم کرتے ہیں، وکس اسٹیشنز اور شفٹ سسٹم میں اضافہ کیا جائے گا ملتان، راولپنڈی اور دیگر شہروں میں موبائل فیول ٹیسٹنگ، لاری اڈوں کی بہتری کے لیے جامع پلان تیارہوگا۔ مریم اورنگزیب نے ٹرانسپورٹرز نے تعاون اور تجاویز پر کھلے دل سے مشاورت پر وزیراعلی پنجاب مریم نواز شریف کا شکریہ ادا کیا۔

  • خاتون کا کٹا ہوا کان پاؤں پر لگا دیا گیا

    خاتون کا کٹا ہوا کان پاؤں پر لگا دیا گیا

    چین کے صوبہ شانڈونگ میں واقع ایک فیکٹری میں پیش آنے والے خوفناک حادثے میں زخمی خاتون کا کان اس کے پاؤں سے جوڑ دیا گیا-

    غیر ملکی خبر رساں ادارے کے مطابق رواں سال کے آغاز میں فیکٹری میں کام کے دوران ایک چینی خاتون ملازمہ کے بال اچانک ہیوی مشینری میں الجھ گئے، جس کے نتیجے میں خاتون کا بایاں کان، سر اور جلد کا کچھ حصہ بری طرح متاثر ہو گیا،حادثہ اتنا شدید تھا کہ دیکھنے والوں کے رونگٹے کھڑے ہو گئے، تاہم خوش قسمتی سے خاتون کی جان بچ گئی،حادثے کے فوری بعد خاتون کو قریبی اسپتال منتقل کیا گیا جہاں ڈاکٹروں کو ایک انتہائی مشکل اور نایاب سرجری کا فیصلہ کرنا پڑا۔

    طبی ماہرین کے مطابق متاثرہ کان کو فوری طور پر اس کی اصل جگہ پر جوڑنے سے خون کی نالیوں کو شدید نقصان پہنچنے کا خطرہ تھا، جس کے باعث ڈاکٹروں نے ایک غیر معمولی مگر سائنسی بنیادوں پر درست فیصلہ کیاڈاکٹروں نے متاثرہ کان کو عارضی طور پر خاتون کے پیر پر لگانے کا فیصلہ کیا تاکہ خون کی روانی بحال رہے اور کان کے ٹشوز زندہ رہ سکیں۔

    طبی ماہرین کا کہنا ہے کہ پیر کی جلد نسبتاً پتلی ہوتی ہے اور وہاں موجود خون کی نالیوں کا نظام کان کی نالیوں سے مشابہت رکھتا ہے، جو ٹرانسپلانٹیشن کے عمل میں مددگار ثابت ہوتا ہے،بعد ازاں چینی سرجنز کی ایک بڑی ٹیم نے تقریباً 10 گھنٹے طویل آپریشن کے دوران خاتون کے کان کو پیر سے کامیابی کے ساتھ جوڑ دیا۔

    ڈاکٹروں کے مطابق سرجری کے بعد ابتدائی دن نہایت تشویشناک تھے تاہم خون کی روانی بہتر ہونے کے بعد کان کی جلد کی رنگت نارمل ہونے لگی، جس سے سرجری کی کامیابی کی تصدیق ہوئی،اس عرصے کے دوران خاتون نے باہر جانے کیلئے ڈھیلے جوتے استعمال کیے، اور تیز قدموں سے واک بھی جاری رکھی تاکہ خون کا بہاؤ تیزی سے رواں رہے،بالآخر 5 ماہ بعد اکتوبر میں سرجنز کی ایک ٹیم نے خاتون کا بایان کان اس کی اصل جگہ پر لگا دیا۔ اگرچہ یہ مرحلہ بھی انتہائی نازک اور پیچیدہ رہا، تاہم ڈاکٹرز اس سرجری کو کرنے میں کامیاب رہے۔

  • چین ،امریکا جنگ کے حوالے سے پینٹاگون کی خفیہ رپورٹ لیک

    چین ،امریکا جنگ کے حوالے سے پینٹاگون کی خفیہ رپورٹ لیک

    واشنگٹن: پینٹاگون کی ایک انتہائی خفیہ رپورٹ کے مطابق اگر امریکا تائیوان پر جنگ کی صورت میں مداخلت کرے تو چین کے ہاتھوں اس کی شکست کا امکان بہت زیادہ ہو گا۔

    غیر ملکی خبر رساں ایجنسی کے مطابق پینٹاگون کی جنگی مشقوں میں تائیوان پر چینی حملے کے مختلف منظرنامے تشکیل دیئے گئے۔ جن میں دیکھا گیا کہ چین امریکی لڑاکا طیاروں کے اسکواڈرن، بڑے جنگی بحری جہازوں اور سیٹلائٹ نیٹ ورکس کو مؤثر انداز میں تعیناتی سے قبل ہی مفلوج کرسکتا ہے، یہ انتباہ خفیہ دستاویز اوورمیچ بریف میں دیا گیا۔

    رپورٹ کے مطابق یہ دستاویز پینٹاگون کے آفس آف نیٹ اسسمنٹ نے تیار کی ہے جس میں بتایا گیا کہ امریکا کا مہنگے اور جدید ہتھیاروں پر انحصار اسے چین کے تیزی سے بننے والے سستے ہتھیاروں کے مقابلے میں کمزور بناتا ہے چین نے ایسی صلاحیت حاصل کر لی ہے جو کسی بھی ممکنہ تنازع کے آغاز ہی میں امریکا کے اہم عسکری اثاثوں کو ناکارہ بنا سکتی ہے۔

    رپورٹ میں کہا گیا کہ چین کا تیزی سے ترقی کرتا ہوا اسلحہ خانہ، خصوصاً اس کے طویل فاصلے تک مار کرنے والے درست نشانہ زن میزائل، جدید طیاروں کا پھیلتا ہوا بیڑا، بڑے بحری جہاز اور خلا میں کارروائی کی صلاحیت نے اسے خطے میں امریکی افواج پر واضح آپریشنل برتری حاصل کرا دی ہے۔

    یہ رپورٹ ایسے وقت سامنے آئی ہے جب چین کی وزارت خارجہ کے ترجمان گو جی آکن نے چند روز قبل امریکا کو خبردار کیا تھا کہ وہ تائیوان کے معاملے سے انتہائی احتیاط سے نمٹے۔

    نیشنل سیکیورٹی ایڈوائزر جیک سلیوان بھی خبردار کرچکے ہیں کہ چین کے ساتھ جنگ کی صورت میں امریکا کے اہم ہتھیار بہت جلد ختم ہوجائیں گے۔

    چین کے پاس تقریباً 600 ہائپر سونک ہتھیاروں کا ذخیرہ موجود ہے جو آواز کی رفتار سے پانچ گنا زیادہ تیزی سے سفر کرسکتے ہیں اور انہیں روکنا انتہائی مشکل ہے بیجنگ تائیوان کو اپنا حصہ قرار دیتا ہے اس کا واضح مؤقف ہے کہ 2کروڑ 30لاکھ آبادی والے اس جزیرے کو بالآخر چین سے ملا دیا جائے گا تائیوان خود کو ایک آزاد، خودمختار ملک قرار دیتا ہے اور کہتا ہے کہ اس کے مستقبل کا فیصلہ صرف وہاں کے عوام کریں گے، چین نہیں۔

  • یو اے ای پاکستان کا ایک معتبراوربردارملک ہے،عون چوہدری

    یو اے ای پاکستان کا ایک معتبراوربردارملک ہے،عون چوہدری

    وزیر مملکت برائے اوورسیز پاکستانی عون چودھری نے یو اے ای میں اوورسیز پاکستانیز فاؤنڈیشن (OPF) کے وفد کے ہمراہ پاکستانی سفارتخانے کا دورہ کیا۔

    اس موقع پروزیرمملکت نے پاکستانی سفیر شفقت علی خان سے ملاقات بھی کی اور متحدہ عرب امارات میں مقیم پاکستانیوں کو درپیش مسائل اور ان کے ممکنہ حل پرتفصیلی تبادلہ خیال کیا،عون چودھری نے کہا کہ یو اے ای پاکستان کا ایک معتبراوربردارملک ہے اوردونوں ممالک کے درمیان تعلقات مضبوط اوردوستانہ ہیں،انہوں نے پاکستانی کمیونٹی کی فلاح و بہبود اوران کے مسائل کے فوری حل کے لئے سفارتی اورقانونی اقدامات کو مزید فعال بنانے پر زور دیا۔

    وزیرمملکت نے اس موقع پر مقیم پاکستانیوں کویقین دہانی کرائی کہ ان کے حقوق کے تحفظ اورسہولتوں کے فروغ کیلئے حکومت پاکستان بھرپور کوششیں کررہی ہے اوردونوں ممالک کے درمیان تعلقات مزید مضبوط بنانے کے لئے ہرممکن اقدامات جاری رہیں گے۔

  • لاہور: 2 سگی بہنوں سے 5 افراد کی مبینہ اجتماعی زیادتی

    لاہور: 2 سگی بہنوں سے 5 افراد کی مبینہ اجتماعی زیادتی

    لاہور میں دو سگی بہنوں کو اجتماعی زیادتی کا نشانہ بنایا گیا ہے۔

    لاہور کے علاقے سندر میں پانچ افراد نے 2 سگی بہنوں کو اجتماعی زیادتی کا نشانہ بنایا اور فرار ہوگئےپولیس نے متاثرہ لڑکیوں کی والدہ کی درخواست پر پانچ ملزمان کے خلاف مقدمہ درج کرلیا، جس میں ملزمان قاسم، عمیر جٹ، علی اکبر وٹو، ضیاء الرحمن اور احمد رضا کو نامزد کیا گیا ہے۔

    پولیس نے مقدمہ اندراج کے بعد چار ملزمان کو گرفتار کرلیا تاہم ایک کی تلاش جاری ہے، حراست میں لیے گئے افراد سے تفتیش جاری ہے جبکہ لڑکیوں کو میڈیکل کیلیے اسپتال منتقل کردیا گیا، جس کی رپورٹ آنے کے بعد مزید قانونی پیشرفت ہوگی۔