Author: Ayesha Rehmani

ایران میں مبینہ رجیم چینج کی کوششوں میں ناکامی کے بعد اسرائیلی خفیہ ایجنسی موساد کے اندر بڑی سطح پر تبدیلیاں شروع ہو گئی ہیں-

اسرائیلی میڈیا رپورٹس کے مطابق موساد میں مزید اعلیٰ افسران کی رخصتی یا استعفوں کا امکان بھی ظاہر کیا جا رہا ہے، جس سے ادارے کے اندر وسیع پیمانے پر احتساب اور تنظیم نو کی قیاس آرائیاں جنم لے رہی ہیں موساد کے نومنتخب ڈائریکٹر رومن گوفمین نے ادارے کے نائب ڈائریکٹر، جنہیں مسٹر اے کے نام سے شناخت کیا جاتا ہے، کو عہدے سے برطرف کردیا ہےرپورٹس میں دعویٰ کیا گیا ہے کہ یہ اقدام ایران میں رجیم چینج کی مبینہ کوششوں کے مطلوبہ نتائج حا صل نہ ہونے کے تناظر میں کیا گیا۔

امریکی میڈیا کے مطابق موساد کے نائب سربراہ کو پچھلے سال سیکڑوں خفیہ ایجنٹوں کی ٹیم اور ایک ارب شیکل دیے گئے تھے مگر وہ ایرانی حکومت کا تختہ الٹنے میں ناکام رہے، موساد کے اندر مزید اعلیٰ سطحی تبدیلیوں اور بعض افسران کے استعفوں کا بھی امکان ظاہر کیا جا رہا ہے۔

بھارت: شدید گرمی کے باعث خطرے سے دوچار ایشیائی نسل کے شیر کے 8 بچے ہلاک ہوگئے۔

بھارتی میڈیا کے مطابق بھارتی ریاست گجرات میں قائم گر سینکچری لینڈ اسکیپ میں ایشیائی شیر کے 8 بچے دم توڑ گئےاسی حوالے سے ریاست کے وزیر جنگلات ارجن موڈھواڈیا کی جانب سے بتایا گیا ہے کہ 8 ایشیائی شیر کے بچوں کی حالیہ موت ‘بابیشیا’ انفیکشن یا کسی وائرس سے نہیں ہوئی بلکہ گرمی اور گرمی کی وجہ سے ہونے والی کمزوری سے شیر کے بچوں کی موت ہوئی۔

وزیرِ جنگلات کا کہنا تھا کہ جنگل میں بیمار پڑنے والے دیگر 17 شیروں کو فوری طبی امداد دی گئی، جن میں سے 12 شیروں کو احتیاطی تدابیر کے طور پر قرنطینہ میں رکھا گیا تھا اور اب وہ مکمل صحتیاب ہو چکے ہیں جس کے بعد انہیں دوبارہ جنگل میں آزاد کر دیا گیا ہے، بقیہ 5 بیمار شیر بھی اب تیزی سے صحت یاب ہو رہے ہیں اور ڈاکٹروں کی کلین چٹ ملتے ہی جلد ہی انہیں ان کے قدرتی مسکن میں واپس چھوڑ دیا جائے گا۔

ارجن موڈھواڈیا نےاصرار کیا کہ حالیہ دنوں میں کسی بھی وائرل بیماری کی وجہ سے گر کے جنگلات میں شیروں کی کوئی موت واقع نہیں ہوئی، البتہ ایک شیر نی کی موت ضرور ہوئی ہے جو حمل سے متعلق پیچیدگیوں کے باعث دم توڑ گئی تھی۔

واضح رہے کہ ایشیائی شیروں کی نسل پہلے ہی دنیا بھر میں شدید خطرے سے دوچار ہے اور اب یہ صرف اور صرف گجرات کے جنگلاتی حصوں تک ہی محدود ہوکر رہ گئی ہے۔

امریکی میڈیا نے دعویٰ کیا ہے کہ امریکی محکمہ دفاع (پینٹاگون) کے انٹیلیجنس ادارے نے اسرائیلی جاسوسی سرگرمیوں سے لاحق خطرے کی درجہ بندی بڑھا کر ’کریٹیکل‘ یعنی بلند ترین سطح پر کر دی ہے۔

امریکی نشریاتی ادارے این بی سی نیوز اور اخبار نیویارک ٹائمز کی رپورٹس کے مطابق ڈیفنس انٹیلیجنس ایجنسی نے حالیہ ہفتوں میں ایک داخلی جائزہ رپورٹ تیار کی ہے جس میں اسرائیل کی انسانی اور تکنیکی جاسوسی صلاحیتوں کو ’کریٹیکل‘ قرار دیا گیا ہےیہ جائزہ 7 صفحات پر مشتمل دستاویز اور ایک تفصیلی چارٹ پر مبنی ہے، جس میں امریکی حکام کے خلاف ممکنہ انٹیلیجنس سرگرمیوں کا بھی ذکر کیا گیا ہے،یہ پیشرفت ایسے وقت میں سامنے آئی ہے جب ایران اور لبنان کے معاملات پر امریکا اور اسرائیل کے درمیان اختلافات اور کشیدگی میں اضافہ دیکھا جا رہا ہے۔

میڈیا رپورٹس میں دعویٰ کیا گیا ہے کہ امریکی انسدادِ جاسوسی حکام اسرائیلی سرگرمیوں پر بڑھتی ہوئی تشویش رکھتے ہیں، خصوصاً ان کوششوں پر جو ایران اور لبنان کے حوالے سے ٹرمپ انتظامیہ کی پالیسی سازی اور اندرونی مشاورت تک رسائی حاصل کرنے کے لیے کی جا رہی ہیں، بعض اعلیٰ امریکی عہدیداروں کو بھی ممکنہ نگرانی کے اہداف میں شامل قرار دیا گیا ہے۔

نیویارک ٹائمز کے مطابق ایک سینیئر امریکی عہدیدار نے نام ظاہر نہ کرنے کی شرط پر کہا کہ صدر ڈونلڈ ٹرمپ کی دوسری مدتِ صدارت کے آغاز کے بعد اسرائیلی انٹیلیجنس سرگرمیوں کی شدت غیر معمولی رہی ہے اگرچہ اتحادی ممالک کے درمیان محدود پیمانے پر جاسوسی کوئی غیر معمولی بات نہیں، تاہم حالیہ سرگرمیاں معمول کی سفارتی حدود سے آگے جاتی دکھائی دیتی ہیں۔

دوسری جانب پینٹاگون نے اس حوالے سے تبصرہ کرنے سے گریز کیا ہے، جبکہ وائٹ ہاؤس کے ایک عہدیدار نے این بی سی نیوز سے گفتگو میں رپورٹ کو مکمل طور پر غلط قرار دیا، واشنگٹن میں اسرائیلی سفارت خانے کے ترجمان نے بھی ان دعوؤں کو سیاسی محرکات پر مبنی قرار دیتے ہوئے کہا کہ اسرائیلی انٹیلیجنس سرگرمیوں کا رخ اس کے دشمنوں کی جانب ہوتا ہے، اتحادیوں کی جانب نہیں۔

تجزیہ کاروں کا کہنا ہے کہ اگر یہ رپورٹس درست ثابت ہوتی ہیں تو یہ امریکا اور اسرائیل کے تعلقات میں ایک غیر معمولی پیشرفت ہوگی، کیونکہ دونوں ممالک طویل عرصے سے قریبی دفاعی اور انٹیلیجنس شراکت دار سمجھے جاتے ہیں۔ تاہم سرکاری سطح پر ان دعوؤں کی تصدیق نہ ہونے کے باعث معاملہ تاحال میڈیا رپورٹس اور غیر مصدقہ ذرائع تک محدود ہے۔

بھارتی شہر احمد آباد میں ایک سال قبل ائیر انڈیا کے طیارہ حادثے کے مقام پر ریسکیو ٹیموں کیلئے "چائے ناشتے” کے 49 لاکھ روپے کے بل پر بھارت کے سوشل میڈیا صارفین برہم ہیں۔

رپورٹ کے مطابق احمد آباد میونسپل کارپوریشن نے 12 جون 2025 کو ائیر انڈیا کی فلائٹ 171 کے خوفناک حادثے کے بعد ہنگامی امداد اور ریسکیو آپریشن کی ٹیموں کو فراہم کردہ ریفریشمنٹ پر 16 لاکھ 74 (49 لاکھ پاکستانی روپے) ہزار کے بل کی منظوری دی ہے بل میں چائے، بسکٹ، پانی کی بوتلیں اور دودھ وغیرہ شامل تھا جو میونسپل ورکرز، پولیس اور حادثے کی جگہ پر کام کرنے والے رضاکاروں اور ملبہ ہٹانے کے مقامات پر تقریباً ایک ماہ تک فراہم کیا گیا تھا۔

دوسری جانب یہ خبر منظر عام پر آنے کے بعد ایک سانحہ کے دوران عوامی فنڈز کے اس قدر بڑے اخراجات پر سوشل میڈیا پر صارفین برہم نظر آرہے ہیں۔

واضح رہے 12 جون 2025 کو بھارت کے شہر احمد آباد میں ائیر انڈیا کا 242 افراد کو لے جانے والا بوئنگ 787-8 ڈریم لائنر 12 جون کو مغربی انڈین ریاست گجرات میں ٹیک آف کے چند سیکنڈ بعد گر کر تباہ ہو گیا تھایہ طیارہ احمد آباد ایئرپورٹ کے قریب ایک میڈیکل کالج کے ہاسٹل سے جا ٹکرایا اور آگ کے شعلو ں میں گھِر گیا، حادثے میں ایک برطانوی شہری مسافر معجزانہ طور پر زندہ بچ گیا تھا، جبکہ زمین پر موجود مزید 19 افراد بھی جان سے ہاتھ دھو بیٹھے تھے۔

امریکا میں عارضی ملازمت کا خصوصی ایچ ون بی ویزا حاصل کرنے کے لیے بھارتی شہریوں کی جانب سے بڑے پیمانے پر دھوکہ دہی اور فراڈ سامنا آیا ہے-

امریکی ٹی وی کی رپورٹ کے مطابق سال 2015 سے اب تک امریکا میں کل 70 لاکھ ایچ ون بی ویزا درخواستیں پراسس کی گئی ہیں، جن میں سے حیرت انگیز طور پر 70 فیصد درخواستیں اکیلے بھارتی شہریوں کی طرف سے جمع کرائی گئی تھیں،رپورٹ میں انکشاف کیا گیا ہے کہ بھارت سے اس ویزا کے لیے درخواست دینےوالے 80 سے 90 فیصد افراد یا تو مکمل طور پر جعلی دستاویزات کےحامل پائے گئے یا پھر وہ اس مخصوص ملازمت کے لیے مطلوبہ اہلیت اور معیار پر پورا ہی نہیں اترتے تھے۔

تحقیقات کے دوران یہ پریشان کن انکشاف بھی سامنے آیا کہ بھارت میں قائم کئی جامعات باقاعدہ طور پر جعلی ڈگریوں کے دھندے اور غیر قانونی کار و بار میں ملوث ہیں اس حوالے سے ایک ایسی یونیورسٹی کی نشاندہی بھی کی گئی ہے جس نے اکیلے کم سے کم 36 ہزار جعلی ڈگریاں جاری کر کے ریکارڈ قا ئم کیا ہے۔

واضح رہے کہ امریکا کا یہ مخصوص ویزا ان غیر ملکی ماہرین کو دیا جاتا ہے جنہیں امریکی کمپنیاں کچھ خاص شعبوں میں عارضی طور پر ملازمت کے لیے اپنے پاس بلانا چاہتی ہیں۔