Author: Regional News

کوئٹہ۔(اے پی پی) جامعہ بلوچستان ایڈمنسٹریٹو آفیسرز ایسوسی ایشن کے چیئرمین محمد اکرم رئیسانی نے کہا ہے کہ جامعہ بلوچستان ہماری مادر علمی ہے جس کی تقدس کو کسی صورت میں پامال نہیں ہونے دیا جائے گا،بلوچستان یونیورسٹی میں پیش ہونے والے افسوسناک واقعہ کی آڑ میں سوشل میڈیا پر معزز آفیسران،اساتذہ کرام اور دیگر ملازمین کے خلاف بے بنیاد پروپیگنڈہ کی جارہا ہے،ان خیالا ت کااظہار انہوں نے جمعرات کو بلوچستان یونیورسٹی ایڈمنسٹریٹو آفیسرز ایسوسی ایشن کے ہنگامی اجلاس سے خطاب کرتے ہوتے ہوئے کیا، اجلاس میں وائس چیئرمین نذیر لہڑی،جوائنٹ سیکرٹری عزیز لانگو،پریس سیکرٹری محمد اسماعیل پرکانی،فنانس سیکرٹری چاند حسین،مجلس عملہ کے ممبران عبداللہ مینگل سید احمد کاسی،قیصر محمود،لیاقت شاہ اور دیگر نے شرکت کی،اجلاس میں بلوچستان یونیورسٹی میں پیش ہونے والے واقعہ جس میں طلباء وطالبات کو جنسی طور پر ہراساں کرنے کی سیکنڈل منظرعام آنے پر انتہائی افسوس کا اظہار کرتے ہوئے واقعہ کی شدید الفاظ میں مذمت کی گئی،اجلاس کے شرکاء نے کہا کہ بلوچستان یونیورسٹی میں طلباء وطالبات کو جنسی طور پر ہراساں کرنے کا سیکنڈل شرم ناک عمل ہے جس کی مکمل تحقیقات کی جائے جس میں ایسوسی ایشن بھر پور تعاون کریگی مگر بدقسمتی سے کچھ عناصر اس واقعہ کی آڑ میں سوشل میڈیا کے ذریعے جامعہ بلوچستان کے بعض آفیسران،اساتذہ کرام اور دیگر ملازمین کے خلاف بے بنیاد پروپیگنڈہ کررہے ہیں اس لیے اس طرح کے عمل سے گریز کیا جائے اور جو لوگ بھی واقعہ میں ملوث ہے ان کے خلاف بلا امتیاز کارروائی کی جائے۔

کوئٹہ۔ (اے پی پی) سابق پولیس چیف کراچی اور ایڈیشنل آئی جی سندھ شاہد حیات کی وفات پرڈی آئی جی نصیرآباد رینج شہاب عظیم لہڑی، ایس ایس پی سبی محمد فاروق فیض لہڑی،ایس ایس پی تربت میرحسین احمد لہڑی، ایس ایس پی نصیرآباد عرفان بشیر اورایس ایس پی نیشنل ہائی وے پولیس عبدالعزیزسرپرہ نے اپنے مشترکہ تعزیتی بیان میں انتہائی دکھ اورافسوس کااظہار کرتے ہوئے کہا ہے کہ شاہد حیات کی محکمہ پولیس کے لیے گراں قدر خدمات تھے وہ ایک سنیئراور تجربہ کار پولیس آفیسر تھے ان کے وفات سے محکمہ پولیس سندھ ایک اچھے سنیئر اور قابل،دلیر پولیس آفیسر سے محروم ہوگیاہے انہوں نے کہاکہ اللہ تعالی مرحوم کی مغفرت فرمائے اوراہل خانہ کو یہ عظیم صدمہ برداشت کرنے کی صبرواستقامت عطاء فرمائے۔

کوئٹہ۔ (اے پی پی) ڈپٹی کمشنر نصیر آباد ظفر علی ایم شہی نے کہا ہے کہ صوبائی حکومت تعلیمی نظام کو مزید موثر بنانے کیلئے تمام اقدامات کو حتمی شکل دے رہی ہے۔ تعلیمی ڈھانچے میں تبدیلی نا گزیر ہے ضلع نصیر آباد میں تعلیم کے معیار پر کوئی کمپرومائز نہیں کیا جائے گا ہم ملک کے مستقبل کو سنوارنے میں کوئی کسر نہیں چھوڑیں گے تمام اساتذہ اپنی حاضریوں کو یقینی بنائیں غیر حاضر اساتذہ تعلیمی نظام کیلئے نقصان دہ ہیں جس کی غیر حاضری سے ہمارے مستقبل کے معماروں کو ناقابل تلافی نقصان پہنچ رہا ہے ایسے افراد کو کسی صورت برداشت نہیں کی جائے گی ان کے خلاف فی الفورکاروائی عمل میں لائی جائے ہمیں تعلیم کے نظام کو ٹھیک کرنے میں حائل دشواری کا ڈٹ کا مقابلہ کرنا ہوگا تاکہ ملک کے مستقبل کو مزید بہتر انداز میں تر قی یافتہ بنایا جاسکے۔ان خیالات کا اظہار انہوں نے ڈسٹرکٹ ایجوکیشن گروپ کے منعقدہ اجلاس سے خطاب کرتے ہوئے کیا اجلاس میں ڈسٹرکٹ ایجوکیشن آفیسرحفیظ اللہ کھوسہ، ڈی ایچ اوڈاکٹرعبدالمنان لاکٹی، ڈی اوای بختیاراحمدی، خزانہ آفیسربشیراحمد شیرازی سمیت دیگر آفیسران نے بھی شرکت کی اجلاس میں تعلیمی سرگرمیوں کے حوالے سے بریفنگ دی گئی اور تعلیم مسائل کو زیر غور لایا گیا. ڈپٹی کمشنر نصیر آباد ظفر علی ایم شہی نے کہا کہ غیر حاضراساتذاہ کی تنخواہوں سے کٹوتی کی جائے تعلیمی نظام میں پائی جانے والی خامیوں پر گہری نظر رکھی جائے اوران کی نشاندہی کرکے حکام بالا تک پہنچایا جائے. سکولوں میں حاضری کے نظام کو موثر بنایا جائے مانیٹرنگ کے اصول کو بھی تیز کرکے تعلیمی اداروں کا بھی دورہ کریں درس اورتدریس کے عمل کی بھی خصوصی نگرانی کی جائے بچوں کو بزم ادب کے پروگراموں میں شرکت پر زور دیں اورانہیں ایسے پروگرام میں حصہ لینے پر قائل کریں کیونکہ ہمیں تعلیمی میدان میں نصیرآباد کو دیگر اضلاع کے مقابلے میں آگے لانا ہوگا۔