کوئٹہ۔(اے پی پی)صوبائی مشیر تعلیم میرمحمد خان لہڑی نے کہا ہے کہ تعلیم کے بغیر کوئی بھی ملک،قوم اور معاشرہ ترقی نہیں کرسکتا ہے،جدید اورترقی کے اس تیز رفتار دور میں جن قوموں نے تعلیم کو اپنی ترجیح بنایا وہ آج ترقی کے منا زل بڑی تیز ی سے طے کررہی ہے، تعلیم کے بغیر ترقی ممکن نہیں اس لئے تعلیم کو ترجیح دیتے ہوئے اقوام نے اپنی معشیت،انفراسٹرکچر، آئی ٹی،شعبہ طب سمیت دیگر شعبہ جات میں عصرحاضر کے تقاضو ں کے مطابق اصلاحات کیں اس طرح اپنی قوم کو دنیا کے طا قتور او ر ترقی یافتہ اقوام کی صفوں میں لا کھڑا کیا ہے،ان خیالا ت کا اظہار انہوں نے”اے پی پی“ سے بات چیت کرتے ہوئے کیا۔ صوبائی مشیر تعلیم حاجی محمد خان لہڑی نے کہا کہ موجودہ صوبائی حکومت نے اقتدار میں آتے ہوئے تعلیم کو اپنی ترجیحات میں شامل کرکے اس میں موجودہ اور جدیددورکے تقاضوں کے مطابق اہم اصلاحات لانا ضروری سمجھا، بلوچستان کی جغرافیائی وسعت، بڑھتی ہوئی آبادی اور نئے تعلیمی سہولیات کے مراکز میں اساتذہ کی کمی پر قابو پانے اور صحت مند مقابلوں کے رجحان کی پذیرائی کے لیئے نظامِ تعلیم میں جہاں تدریسی عملے کا کلیدی کردار ہوتا ہے وہیں مددگار غیر تدریسی عملے کا کردار بھی انتہائی اہمیت کا حامل ہے،انہوں نے کہا کہ درس و تدریس کے عمل میں مدد گار عملے ہی کی بدولت اساتذہ کرام ذہنی سکون اور تندہی سے اپنے فرائض انجام دے سکتے ہیں اور بچوں کو بھی سہولت مہیا ہوتی ہے۔انہوں نے کہا کہ وزیر اعلیٰ بلوچستان کے عوامی ترقیاتی پروگرام کے تحت بتدریج بہتری کے پیشِ نظر صوبہ بھر کے اسکولز کو عمارتی ضروریات کی فراہمی کا منصوبہ شروع کیا گیا ہے جسکے تحت 159 ملین روپے کی لاگت سے 200 پرائمری سکولز کو بنیادی عمارت فراہم کی جائیگی جبکہ پینے کے صاف پانی کی فراہمی کو یقینی بنانے اور بیت الخلا جیسی بنیادی ضروریات کی دستیابی کے لیئے 1.3 ملین روپے مختص کی گئی ہے سی تسلسل میں خطیر رقم کی لاگت سے66 ہائی اسکولز کو ماڈل ہائی اسکولز اور257 مڈل اسکولز کو ماڈل مڈل اسکولز کا درجہ دیا جا رہا ہے جس سے بنیادی ضروریات کے ڈھانچے میں خاطر خواہ بہتری آئے گی۔ انہوں نے کہاکہ بلوچستان ایجوکیشن فاونڈیشن تعلیمی میدان میں کام کرنے والے نجی / غیر سرکاری اداروں کو تربیتی، مشاورتی اور بنیادی ڈھانچے کے حوالے سے سہولیات کی فراہمی کا ایک اہم ادارہ ہے۔انہوں نے مزید بتایا کہ محکمہ تعلیم میں انتظامی معاملات میں بہتری کے لئے اساتذہ کرام کی سہولت کی پیشِ نظر تمام ضلعی تعلیمی افسران کو ہدایات جاری کی گئی ہیں کہ ریٹائرمنٹ اور پنشن کے کیسز کو فوری طور پر حل کیا جائے اور پس و پیش کرنے والے افسران کے خلاف تادیبی کارروائی کے احکامات بھی جاری کیئے گئے۔محکمہ ثانوی تعلیم کے زیرِ انتظام تمام اسکولز میں موجود ناکارہ اشیاء کی فوری نیلامی کی گئی جس کے ذریعے حاصل ہونے والی رقم کو اسکولز کی بہتری کے لیئے استعمال کیا جارہاہے۔ محکمہ کے انتظامی دفاتر اور اسکولز میں موجود ناکارہ گاڑیوں کی فہرستیں تیار کی جا چکی ہیں جنھیں مجاز حکام کی منظوری کے بعد باقاعدہ نیلامی کے لیئے پیش کیا جائے گا اور اس نیلامی سے حاصل ہونے والی رقم بھی اسکولز کی بہتری کے لیئے استعمال کی جائے گی۔ صوبائی مشیر تعلیم نے مزید کہا کہ ضلعی سطح پر تعلیم کے شعبے کو در پیش مسائل کے فوری اور موثر حل کے لیئے ہر ڈی ای او کی سربراہی میں قائم ڈسٹرکٹ ایجوکیشن اتھارٹی اور ڈپٹی کمشنر کی سربراہی میں قائم ڈسٹرکٹ ایجوکیشن گروپ نامی فورمز کو فعال بنا یا گیا ہے۔
Author: Regional News
آٹو پارٹس ایکسپورٹرز ایسوسی ایشن کا بڑا اعلان
فیصل آباد۔ (اے پی پی) پاکستان آٹو پارٹس ایکسپورٹرز ایسوسی ایشن کے ترجمان نے کہا کہ اگر حکومت مطلوبہ سہولیات فراہم کرے تو پاکستان سے آٹو پارٹس کی برآمدات ایک سال میں 35 کروڑ ڈالر سے بڑھا کر 65کروڑ ڈالر تک پہنچاسکتے ہیں نیز حکومت کو آٹو پارٹس کی برآمدی پالیسی میں تسلسل قائم رکھنے کیلئے اقدامات کو بھی یقینی بناناچاہیے۔ انہوں نے کہاکہ حکومت کو مقامی آٹو انڈسٹری کی حوصلہ افزائی کرنی چاہیے اور اس ضمن میں سٹیک ہولڈرز کی مشاورت سے ایسی پالیسی مرتب کی جائے جس سے برآمدات میں زیادہ سے زیادہ اضافہ کرکے ملک و قوم کیلئے قیمتی زر مبادلہ حاصل کرنا ممکن ہو سکے۔ انہوں نے کہاکہ پاکستان کی آٹو پارٹس مینوفیکچرنگ انڈسٹری اپنے معیار کے لحاظ سے دنیا کی کسی بھی انڈسٹری سے کم نہیں یہی وجہ ہے کہ پاکستان کے تیار کردہ آٹو پارٹس دنیاکی تمام بڑی کمپنیوں کی گاڑیوں میں استعمال ہو رہے ہیں۔ انہوں نے کہاکہ ملک کے مختلف مقامات پر آٹو پارٹس شوز کے انعقاد سے بھی مثبت نتائج حاصل کئے جا سکتے ہیں۔
پاکستان میں متوسط طبقہ سے تعلق رکھنے والے افراد کی تعدادبڑھ کر کتنی ہوگئی جانیے
(اے پی پی) پاکستان کی 22 کروڑ ۱ٓبادی میں متوسط طبقہ سے تعلق رکھنے والے افراد کی تعدادساڑھے9کروڑ سے بھی تجاوز کر گئی ہے جن میں سے 45 فیصد کا تعلق پنجاب، 23 فیصد کا سندھ، 21 فیصد کا خیبر پختونخواہ اور 11 فیصد کا تعلق بلوچستان سے ہے۔ اقتصادی ترقیاتی انسٹیٹیوٹ کے ذرائع نے بتایاکہ پاکستان میں متوسط طبقہ سے تعلق رکھنے والے افراد کی تعداد میں مسلسل اضافہ ہو رہاہے۔ انہوں نے بتایاکہ حالیہ سٹڈی کے مطابق پاکستان کی شہری آبادی میں مڈل کلاس طبقے کی شرح 62 جبکہ دیہی آباد ی میں 38 فیصد ہے۔ انہوں نے بتایاکہ مہنگائی کے بڑھتے ہوئے رجحان پر قابو پانے سمیت روزگار کے نئے مواقع پیداکرکے متوسط طبقہ کی تعدا دمیں کمی لائی جاسکتی ہے۔
جنرل بس اسٹینڈ کے تمام 15 بلاکس میں ٹف ٹائل لگائی جائے گی، عامرخٹک
ملتان۔ (اے پی پی) ڈپٹی کمشنر عامر خٹک نے جنرل بس سٹینڈ کیلئے ٹریکس کی کارپٹنگ، مارکیٹوں میں ٹف ٹائل لگانے اور منظم سیکورٹی سسٹم قائم کرنے کے پراجیکٹ کا اعلان کیا ہے۔انہوں نے کہا ہے کہ بس اڈے کو گرین اینڈ کلین ملتان مہم کا حصہ بنایا جائے گا۔ انہوں نے کہا کہ وزیراعلیٰ عثمان بزدار نے صوبہ بھر میں بس اور ویگن سٹینڈز پر عوام کو بہترین سہولیات فراہم کرنے کے لیے خصوصی ہدایات جاری کی ہیں۔ یہ اعلان انہوں نے جنرل بس اسٹینڈ کے دورہ کے موقع پر ٹرانسپورٹرز، آٹو سٹور مالکان اور تاجر تنظیموں کے نمائندوں سے ملاقات کے موقع پر کیا۔ سیکرٹری آر ٹی اے کامران بخاری، اے سی شجاع آباد عابدہ فرید اور اے سی جلالپورپیروالا احمد رضا بھی ان کے ہمراہ تھے۔ڈپٹی کمشنر عامر خٹک نے گفتگو کرتے ہوئے کہا کہ بس اڈے کے تمام 15 بلاکس میں ٹف ٹائل لگائی جائے گی اور بس اسٹینڈ کے ٹریکس پر کارپیٹڈ روڈ تعمیر کئے جائیں گے۔ تمام بس ٹریکس اور مارکیٹوں میں سٹریٹ لائٹس لگائی جائے گی۔ انہوں نے کہا کہ سکیورٹی کی غرض سے 6 واک تھروگیٹس اور 20 میٹل ڈیٹکٹر کا انتظام کیا جائے گا۔ بس اڈے میں 100 کلوز سرکٹ کیمرے لگائے جائیں گے اور کنٹرول روم قائم کیا جائے گا جہاں سے سیکیورٹی کی صورتحال کو مانیٹر کیا جائے گا۔عامر خٹک نے کہا کہ بس اڈے کے مین گیٹس کو خوبصورت بنایا جائے گا۔ بس اسٹینڈ میں مختلف مقامات پرگندگی کیلئے 10کنٹینر اور 100 کوڑے دان رکھے جائیں گے۔اس کے علاوہ لاری اڈے میں بھرپور شجر کاری بھی کی جائے گی۔انہوں نے کہا کہ شجاع آباد اور جلالپور پیروالا بس اسٹینڈ کو بھی خوبصورت بنایا جائے گا۔
دریاؤں اور آبی ذخائر میں پانی کی تازہ ترین صورتحال
لاہور۔(اے پی پی)تربیلا، منگلا اور چشمہ کے آبی ذخائر میں بدھ کے روز پانی کی آمد و اخراج، ان کی سطح اور بیراجوں میں پانی کے بہاؤ کی صورت حال حسب ذیل رہی:دریاؤں میں دریائے سندھ (تربیلاکے مقام پر) پانی کی آمد111400 کیوسک اور اخرج 140000کیوسک، دریائے کابل(نوشہرہ کے مقام پر): آمد 15500 کیوسک اور اخراج15500 کیوسک،دریائے جہلم: (منگلاکے مقام پر)آمد18400 کیوسک اور اخراج37000کیوسک، چناب (مرالہ کے مقام پر): آمد44000 کیوسک اور اخراج 15300کیوسک۔بیراجز میں جناح بیراج پر پانی کی آمد165900 کیوسک اور اخراج157500 کیوسک،چشمہ:آمد 163000کیوسک اور اخراج160000 کیوسک، تونسہ: آمد158900 کیوسک اور اخراج131800 کیوسک، پنجند: آمد22600 کیوسک، اور اخراج 6100 کیوسک،گدو: آمد 129000کیوسک اور اخراج 96800کیوسک، سکھر: آمد 92200 کیوسک اور اخراج35700 کیوسککوٹری:آمد57800کیوسک اور اخراج 20600 کیوسک۔ریزروائرز میں تربیلاڈیم کا کم از کم آپریٹنگ لیول 1392فٹ،ریزروائر میں پانی کی موجودہ سطح1544.76 فٹ،ڈیم میں پانی ذخیرہ کرنے کی انتہائی سطح 1550فٹ اور قابلِ استعمال پانی کا ذخیرہ 5.750 ملین ایکڑ فٹ ہے۔ منگلا ڈیم:ریزروائر کا کم از کم آپریٹنگ لیول 1050فٹ،ریزروائر میں پانی کی موجودہ سطح 1220.50 فٹ،ریزروائر میں پانی ذخیرہ کرنے کی انتہائی سطح 1242فٹ اور قابلِ استعمال پانی کا ذخیرہ 5.717 ملین ایکڑ فٹ۔ چشمہ:ریزروائر کا کم از کم آپریٹنگ لیول 638.15فٹ،ریزروائر میں پانی کی موجودہ سطح 646.80 فٹ،ریزروائر میں پانی ذخیرہ کرنے کی انتہائی سطح 649 فٹ اور قابلِ استعمال پانی کا ذخیرہ 0.179 ملین ایکڑ فٹ۔تربیلا اور چشمہ کے مقامات پر دریائے سندھ، نوشہرہ کے مقام پر دریائے کابل اور منگلا کے مقام پر دریائے جہلم میں پانی کی آمد اور اخراج 24گھنٹے کے اوسط بہاؤ کی صورت میں ہے جبکہ دیگر مقامات پر پانی کی آمد و اخراج کی تفصیل بدھ صبح 6 بجے کی ہے۔
گندم میں رکھنے والی زہریلی گولیوں کی غیر قانونی فروخت پر پابندی عائد
فیصل آباد۔ (اے پی پی) حکومتی ہدایات کی روشنی میں محکمہ زراعت پنجاب نے گندم میں رکھنے والی زہریلی گولیوں کی کھلے عام غیر قانونی فروخت پر پابندی عائد کردی ہے اور رجسٹرڈ ڈیلرز کے علاوہ عام مقامات پر گولیاں فروخت کرنے کی ممانعت اور رجسٹرڈ ڈیلر ز کو گولیوں کی فروخت کاریکارڈ رکھنے کا بھی حکم دیاگیاہے۔ محکمہ زراعت کے ذرائع نے بتایاکہ اعلیٰ حکومتی شخصیات سمیت محکمہ کے حکام کی جانب سے گندم میں رکھنے والی زہریلی گولیاں کھا کر خود کشی کرنے کی خبروں کی اشاعت کے بعد سختی سے نوٹس لیتے ہوئے مذکورہ گولیوں کی کھلے عام فروخت روکنے کا فیصلہ کیاگیاہے۔ انہوں نے بتایاکہ مختلف شہروں میں محکمہ زراعت توسیع اور شعبہ پیسٹ وارننگ کے حکام نے مختلف مقامات پر اچانک چھاپے مار کر بعض دوکانداروں کے خلاف مقدمات بھی درج کروائے ہیں۔ انہوں نے کہاکہ یہ امر انتہائی تشویشناک ہے کہ گلی محلوں میں کریانہ کی دوکانوں پر بھی یہ گولیاں فروخت کی جا رہی ہیں۔انہوں نے کہاکہ محکمہ زراعت کے حکام پر مشتمل چھاپہ مار ٹیمیں تشکیل دے دی گئی ہیں جو اچانک مختلف علاقوں میں زرعی ادویات کی دوکانوں، پیسٹی سائیڈ ز ڈیلرز، کریانہ سٹورز وغیرہ کی چیکنگ کریں گی اور اگر دوران چیکنگ کسی جگہ پر گندم میں رکھنے والی زہریلی گولیوں کی غیر قانونی فروخت پائی گئی تو ان کے خلاف سخت کارروائی عمل میں لائی جائے گی اور متعلقہ افراد کی گرفتاری کے علاوہ ان کے خلاف فوجداری مقدمات کااندراج بھی کروایا جائیگا۔
سرگودھا چیمبرکے ممبران فاؤنڈر گروپ پر اعتماد کرتے ہیں، شفیق الرحمن
سرگودھا۔ (اے پی پی) سرگودھا چیمبر آف کامرس اینڈ انڈسٹری کے انتخابات میں جس طرح فاؤنڈر گروپ نے کامیابی حاصل کی ہے اس سے ثابت ہوگیا ہے کہ ووٹرز فاؤنڈر گروپ پر اعتماد کرتے ہیں کارپوریٹ اور ایسوسی ایٹ کلاس کے ممبران کی جیت اسی کا نتیجہ ہے، ان خیالات کا اظہار صدر انجمن تاجران سرگودھا و ایگزیکٹو ممبر سرگودھا چیمبر آف کامرس اینڈ انڈسٹری شفیق الرحمن نے کیا۔ انہوں نے کہا کہ اللہ کے بعد ہماری جیت میں کردار ووٹرز کا ہے ہم انہیں کبھی بھی مایوس نہیں کرینگے، ایسے لوگوں کو سیاست سے آؤٹ ہوجانا چاہیئے جو عوام کو صرف الیکشن کے دنوں میں ہی نظر آتے ہیں۔شفیق الرحمن نے کہا کہ ہمارے گروپ کی کامیابی اصل میں ووٹرز کی کامیابی ہے۔
دن کے اوقات میں مزدا گاڑیوں کے شہر میں داخلے پر پابندی کا مطالبہ
سرگودھا۔ (اے پی پی) سرگودھا کے شہریوں نے مزدا ٹرکوں کے اڈے بھی شہر سے باہر منتقل کرنے اور دن کے اوقات میں ان مزدا گاڑیوں کے شہر میں داخلے پر پابندی کا مطالبہ کیا ہے۔انھوں نے کہا ہے کہ شہر میں دن کے اوقات میں مزدا گاڑیاں گلی محلوں میں قائم گوداموں پر آتی جاتی ہیں کیونکہ کانداروں کی اکثریت نے گلی محلوں میں گودام بنا رکھے ہیں جس کی وجہ سے ٹریفک کی روانی میں مشکلات کا سامنا ہے۔سرگودھا شہر میں دن کے اوقات میں شہر میں ٹرکوں کے داخلے پر پابندی ہے لیکن ٹرانسپورٹروں نے ٹرکوں کو مزدا گاڑیوں کی شکل دینا شروع کردی ہے ان مزدا گاڑیوں میں ٹرک سے زیادہ سامان لوڈ ہوجاتا ہے ان کو شہر میں آنے کی اجازت ہے جس سے ٹریفک کی روانی متاثر ہونے کیساتھ حادثات بڑھ رہے ہیں۔
تجاوزات مافیا رعایت کے مستحق نہیں،بلا امتیار کارروائی جاری رہے گی، نذیر اللہ اعوان
پشاور۔(اے پی پی)میونسپل کمیٹی کے اہلکاروں نے تجاوزات کے خلاف آپریشن کرتے ہوئے سامان اپنے قبضہ میں لے لیا اورتھڑے مسمار کر دیئے۔لینڈ انسپکٹر نذیر اللہ اعوان نے بنوں کے مختلف بازاروں میں تجاوزات کے خلاف آپریشن کیا۔ انہوں نے شہریوں کی طرف سے سٹرکوں اوردکانوں کے باہر رکھے گئے سامان کو قبضے میں لے لیا۔ انہوں نے میڈیا کو بتایا کہ تجاوزات کے خلاف بلاتفریق ہماری کارروائیاں جاری رہے گی جس میں کسی کے ساتھ کسی قسم کی رعایت نہیں کی جائے گی،تجاوزات کی وجہ سے بازاروں میں کافی رش پیداہوتا ہے جس کی وجہ سے آمدورفت میں شدید پریشانی کا سامنا کرنا پڑتا ہے۔ انہوں نے عوام سے اپیل کی ہے کہ تجاوزات کے خاتمے کیلئے میونسپل کمیٹی کا ساتھ دیں۔
مسئلہ کشمیر تحریک انصاف کے دور حکومت میں ہی حل ہوگا، ملک پختون یار خان
پشاور۔(اے پی پی)تحریک انصاف کے رکن صوبائی اسمبلی ملک پختون یار خان نے سیروبڈاخیل بنوں کیلئے مکمل ہونے والی سڑک کی افتتاحی تقریب سے خطاب کرتے ہوئے کہا ہے کہ پسماندہ علاقوں کے عوام کو بنیادی سہولیات کی فراہمی ہماری اولین ترجیح ہے اور ہم بلاامتیاز عوام کی خدمت پر یقین رکھتے ہیں، ماضی میں سیرو بڈاخیل بنوں کو سیاستدانوں نے مکمل طور پر نظرانداز کیا،سڑک کی تعمیر یہاں کی عوام کی اہم ضرورت تھی، باقی مسائل بھی ہم ہی حل کریں گے،ہم کھوکھلے نعروں کی سیاست نہیں کرتے،سیاست کو ہم عبادت سمجھتے ہیں اور جو لوگ سیاست کو کاروبار سمجھتے ہیں، وہ لوگ عام انتخابات کے ایک سال بعد عوام کو نظر نہیں آرہے اور بلدیاتی انتخابات قریب آتے ہی دوبارہ عوام کو سبز باغ دکھائیں گے۔ انہوں نے کہا کہ کشمیر کا مسئلہ تحریک انصاف کے دور حکومت میں ہی حل ہوگا۔انہوں نے کہا کہ عوام سابقہ حکمرانوں اور منتخب نمائندوں کی کارکردگی بھی نظر میں رکھیں جنہیں 70سال ووٹ دیئے ہیں اور ہماری مختصر کارکردگی بھی عوام کے سامنے ہے،کوئی بھی علاقہ ترقیاتی کاموں سے محروم نہیں رہے گا۔
