Author: Regional News

ساہیوال(نمائندہ باغی ٹی وی)کم سن بچوں میں نشے کی لعنت تیزی سے پروان چڑھنے لگی،
حکام فوٹوسیشن کروا کر لمبی تانے سونے میں مشغول،ایڈز سمیت کئی مہلک بیماریوں کے پھیلنے کا خدشہ
ساہیوال شہر میں منشیات کی سرعام فروخت اور استعمال تو عرصے سے جاری ہے لیکن افسوسناک امر یہ سامنے آیا ہے کہ اب نشے کی لعنت کم سن اور نوعمر بچوں کو اپنی لپیٹ میں لے رہی ہے،اور دھڑا دھڑ بچے نشے کی لت میں مبتلا ہوتے جارہے ہیں لیکن حکام اس پر مجرمانہ خاموشی اختیار کیے ہوئے ہیں،نشے کی لعنت میں منتلا بچوں میں زیادہ تر چائلڈ لیبر کا شکار ورکشاپس اور دوکانوں میں کام کرنے والے شامل ہیں،نشے کی لعنت میں مبتلا ان بچوں کو اکثر اوقات جنسی بدفعلی کا نشانہ بھی بنایا جاتا ہے جبکہ اس کے ساتھ ساتھ غیر محفوظ اور استعمال شدہ سرنج کا دوبارہ استعمال ایڈز اور دیگر کئی مہلک بیماریوں کے پھیلاؤ کا باعث ہوسکتا ہے،یہ بچے اکثر شہر کے مختلف چوکوں، مزدور پلی،محلہ فرید گنج،پل بازار،بابے والا چوک ریلوے سٹیشن اور کچی آبادیوں میں عمر رسیدہ اور نوجوان نشئیوں کے ساتھ نشہ کرتے ہوئے نظر آتے ہیں،حد تو یہ ہے کہ ان بچوں کے ساتھ خواتین بھی اس لعنت میں مبتلا ہیں،لیکن خوفناک پہلو یہ ہے کہ یہ بچے روزانہ اپنے ساتھ کسی نئے بچے کو ورغلا پھسلا کر لاتے ہیں اور اسے نشے کا عادی بنادیتے ہیں،جسم فروشی،جیب تراشی اور ہر طرح کی چوری کرنا بھی ان کے ہاں عام سی بات ہے لیکن متعلقہ حکام اس سارے معاملے سے دانستہ چشم پوشی اختیار کئیے ہوئے ہیں جو کہ آنے والی نسل میں جرائم پیشہ افراد کے اضافے کا سبب ہوگی،

ساہیوال(نمائندہ باغی ٹی وی)خاتون پولیس افسر کے خلاف کارروائی کے لیے درخواست دائر،
اے ایس پی نے مبینہ طور پر اختیارات کا ناجائز استعمال کرتے ہوئے سائلہ کی داد رسی نہ ہونے دی،
تفصیلات کے مطابق 89/6R کی رہائشی ارم نے اے ایس پی سٹی سرکل انعم فریال کے خلاف کارروائی کے لیے ریجنل پولیس آفیسر ساہیوال کو درخواست گزاری ہے،درخواست میں سائلہ نے اے ایس پی انعم فریال پر الزام لگایا ہے کہ اس نے اختیارات کا ناجائز استعمال کرتے ہوئے متعلقہ تھانہ کو سائلہ کی درخواست پر عملدرآمد کرنے سے روکا اور سائلہ کو اپنے دفتر بلا کر توہین اور ہتک آمیز سلوک کا نشانہ بنایا،درخواست سے دستبردار ہونے کے لیے دباؤ ڈالا اور سنگین نتائج کی دھمکیاں دیں،سائلہ کا موبائل فون چھینا اور اسے زدوکوب کرنے کی کوشش کی،ارم نامی سائلہ نے مقامی صحافیوں سے گفتگو کرتے ہوئے بتایا کہ اس کے بھائی عمر فاروق نے گھر پر ناجائز قابض ہو کر اسے گھر سے نکال دیا ہے اور سائلہ کے لاکھوں روپے مالیت کے سامان اور زیورات پر قبضہ کرلیا ہے جس کے خلاف کاروائی کے لیے تھانہ فرید ٹاؤن میں درخواست دی گئی لیکن اے ایس پی انعم فریال نے ملزم سے ساز باز ہوکر تھانہ فرید ٹاؤن کو سائلہ کی درخواست پر کارروائی سے روک دیا اور سائلہ کو اپنے دفتر بلاکر مذکورہ بالا ناجائز سلوک کا نشانہ بنایا،ارم شہزادی نے مزید بتایا کہ ملزم عمر فاروق اے ایس پی انعم فریال کا ہم جماعت اور دوست رہا ہے جس بنا پر اے ایس پی اس کے خلاف کسی قسم کی کاروائی نہیں ہونے دے رہی،سائلہ ارم شہزادی نے ریجنل پولیس آفیسر ساہیوال کو اے ایس پی کے خلاف قانونی کارروائی کے لیے درخواست دیتے ہوئے افسران بالا اور وزیراعظم عمران خان سے اسے انصاف دلوانے کی اپیل کی ہے