سابق وزیر اعظم نواز شریف سے کوٹ لکھپت جیل میں جمعرات کے روز ہی ملاقات ہو سکتی ہے. آج صرف خاندان کے افراد کو ملاقات کی اجازت دی گئی ہے
باغی ٹی وی کی رپورٹ کے مطابق نواز شریف سے ملاقات کے لئے ان کی والدہ بیگم شمیم اختر، مریم نواز اور دیگر چند افراد کوٹ لکھپت جیل پہنچے ہیں جہان وہ سابق وزیر اعظم نواز شریف سے ملاقات کریں گے.
واضح رہے کہ نواز شریف طبی بنیادوں پر چھ ہفتوں کی ضمانت پر رہائی کی مدت ختم ہونے کے بعد دوبارہ جیل منتقل ہوئے ہیں.
سینیٹ کا اجلاس سینیٹ کے چیئر مین محمد صادق سنجرانی کی زیر صدارت جاری ہے.
باغی ٹی وی کی رپورٹ کے مطابق سینیٹ اجلاس میں وقفہ سوالات کے دوران پاکستان میں غیر ملکی قرضوں کی تفصیلات پیش کی گئی. وزارت خزانہ کی جانب سے پیش کی گئی تفصیلات کے مطابق پاکستان پر88ارب19کروڑ90 لاکھ امریکی ڈالرکےغیرملکی قرضے ہیں، گزشتہ6مالی سال کےدوران26ارب19کروڑڈالرسےزائدکاقرضہ لیاگیا، وزارت خزانہ کی رپورٹ کے مطابق گزشتہ 6 مالی سال کے دوران 7ارب 32 کروڑ ڈالر کا سودلگا،سود کےبعد گزشتہ 6مالی برسوں کے دوران قرضہ33ارب50کروڑ ڈالرسے زیادہ قرضہ بنا ،
2013سے2014میں سودسمیت6ارب90کروڑ8لاکھ97ہزارامریکی ڈالرکاغیرملکی قرضہ تھا ،پاکستان2014اور2015کےدرمیان سودسمیت5ارب4کروڑ7لاکھ21ہزارامریکی ڈالرکامقروض تھا ،2015اور2016کےدرمیان سودسمیت4ارب45کروڑ20ہزارامریکی ڈالرکا قرضہ تھا ،2016اور2017کےدرمیان6ارب 52کروڑ3لاکھ81ہزار امریکی ڈالر قرضہ تھا ،2017 اور 2018 کے درمیان 6 ارب 2 کروڑ 5 لاکھ 26 ہزارامریکی ڈالرکےقرضے تھے ،2018سے لےکراب تک پاکستان پر4ارب55کروڑایک لاکھ54ہزارامریکی ڈالر قرضہ تھا .
لاہور ہائیکورٹ نے حکومت کو حکم دیا ہے کہ فوری بلدیاتی الیکشن کا اعلان کریں
باغی ٹی وی کی رپورٹ کے مطابق لاہور ہائیکورٹ میں لوکل گورنمنٹ ایکٹ 2019 کے خلاف درخواست پر سماعت ہوئی ،جس میں درخواست گزار کے وکیل نے کہا کہ منتخب بلدیاتی نمائندوں کو اپنی مدت پوری کرنے سے قبل نہیں ہٹایا جا سکتا، پنجاب حکومت نے آرٹیکل 140 اے کی خلاف ورزی کی ہے.عدالت نے بلدیاتی نمائندوں سے استفسار کیا کہ اب تک بلدیاتی نمائندوں نے عوام کے لئے کیا اقدامات کئے ؟عدالت نے پنجاب حکومت کو 30 منٹ میں جواب جمع کرانے حکم دیا اورلوکل گورنمنٹ ایکٹ 2019کیخلاف درخواست سماعت کیلئے منظور کرلی ،عدالت نے حکومت کو کہا کہ الیکشن کااعلان کریں،یہ بلدیاتی نمائندے الیکشن میں حصہ لیں گے،سرکاری وکیل نے کہا کہ ابھی بلدیاتی الیکشن کے شیڈول کااعلان نہیں کرسکتے۔
واضح رہے کہ حکومت پنجاب نے پنجاب اسمبلی سے نیا لوکل سسٹم کا بل پاس کروایا ہے جس پر گورنر پنجاب نے بھی دستخط کر دئیے ہیں.
لودھراں(نمائندہ باغی ٹی وی) دنیاپور چوہدری زوار حسین وڑائچ صوبائی وزیر جیل خانہ جات نے اے سی دنیاپور وسیم قریشی کے ہمراہ دنیاپور کے پاسکو گوداموں کا دورہ کیا پاسکو اہلکار پچاس کلو گرام پر ایک کلو گندم کی کٹوتی کسانوں سے وصول کر رہے تھے جس پر زوار حسین وڑائچ اور اے سی دنیاپور وسیم قریشی نے عملے کی بہت زیادہ سرزنش کی اور فوری طور پر محکمہ خوراک کی طرف سے جاری کردہ کٹوتی فی 50 کلو گرام کے حساب سے 115 گرام کے حساب سے کرنے کی سخت ہدایت کی
سپریم کورٹ آف پاکستان نے امریکی ڈرون حملوں کے خلاف دائر درخواست خارج کرتے ہوئے کہا کہ ڈرون حملے رکوانا عدالت کا کام نہیں
باغی ٹی وی کی رپورٹ کے مطاب عدالت نے کہا کہ ڈرون حملے رکوانا عدالت کا کام نہیں اس طرح کے پالیسی معاملات حکومت کا اختیار ہے,اب تو ڈرون حملے بند ہوگئے ہیں، دوران سماعت چیف جسٹس نے کہا کہ پشاور ہائیکورٹ نے حکومت اور وزارت دفاع کو یہ معاملہ بھیجا تھا، درخواست گزار کا کہنا تھا کہ ہمارا موقف ہے کہ ڈرون حملوں میں بچے اور عورتیں مرتے ہیں ،.امریکہ جاں بحق ہونے والوں کو دیت دے.
واضح رہے کہ پشاور ہائی کورٹ کے چیف جسٹس دوست محمد خان اور خاتون جسٹس مسرت ہلالی پر مشتمل ڈویژن بنچ نے اپنے فیصلہ میں ڈرون حملوں کو غیر آئینی، غیر قانونی اور جنگی جرم قرار دیتے ہوئے کہا تھا کہ حکومت اور سکیورٹی فورسز کو آئین وقانون کے مطابق ڈرون طیارے گرانے کا مکمل آئینی وقانونی اختیار ہے۔
2015 میں بھی سپریم کورٹ نے امریکہ کی جانب سے پاکستان کے قبائلی علاقوں میں کئے جانے والے ڈرون حملوں کے خلاف دائر درخواست ناقابل سماعت قرار دیتے ہوئے خارج کی تھی.۔ عدالت نے کہا تھا کہ مذکورہ مقدمہ آئین کی آرٹیکل ( 3 ) 184 کے تحت قابل سماعت نہیں ۔
فیصل آبادمیں 15 سالہ گھریلوملازمہ کو مبینہ زیادتی کے بعد قتل کر دیا گیا۔ تفصیلات کے مطابق فیصل آباد کے علاقے کھرڑیانوالہ میں 15 سالہ گھریلوملازمہ کو مبینہ زیادتی کے بعد قتل کر دیا گیا ہے۔ واقعے کے بعد مقتولہ کے ورثاء نے لاش تھانہ کھرڑیانوالہ میں رکھ کر احتجاج کرتے ہوئے مالکان پر زیادتی اور قتل کا الزام عائد کیا ہے۔ ملزمان بااثر ہیں، کارروائی نہ کرنے کیلئے دباؤ ڈالا جارہا ہے۔ مظاہرین کے مطابق ملزمان لڑکی کی حالت غیر ہونے پر خود ہی اسپتال لے کر گئے۔ پولیس کے مطابق میڈیکل رپورٹ سامنے آنے کے بعد ہی حقیقت سامنے آسکے گی۔
سابق صدر آصف علی زرداری نے کہا ہے کہ دیکھتے ہیں جج عید کہاں گزارنے دیتے ہیں
باغی ٹی وی کی رپورٹ کے مطابق احتساب عدالت میں پیشی کےموقع پر سابق صدرسے صحافی نے سوال کیا کہ زرداری صاحب عید کہاں گزاریں گے ؟ جس پر سابق صدر نے جواب دیا کہ دیکھتےہیں جج کہاں گزارنےدیتےہیں،صحافی نے پھر سوال کیا کہ کوئی خطرہ نہیں اتنے سارے کیسز کھلے ہیں آپ پر ، جس پر آصف علی زرداری نے جواب دیتے ہوئے کہا کہ برکت ہے رمضان کی برکت ہے ،
واضح رہے کہ جعلی بنک اکاؤنٹس کیس میں سابق صدر آصف زرداری اور ان کی ہمشیرہ فریال تالپور احتساب عدالت میں پیش ہوئے ہیں، اس موقع پر سخت حفاظتی انتظامات کئے گئے تھے۔احتساب عدالت کے جج محمد ارشد ملک نے جعلی بینک اکاؤنٹس کیس کی سماعت کی۔ آصف زرداری کے وکیل فاروق ایچ نائیک نے کہا ریفرنس کی کاپیاں بنی ہیں کہ نہیں ؟ جس پر نیب پراسیکیوٹر نے کہا کاپیاں آفس میں جمع کرا دی گئی ہیں، تفتیشی افسر سر پر چوٹ لگنے کی وجہ سے پیش نہیں ہوئے۔جج ارشد ملک نے حکم دیا کہ ریفرنس کی کاپیاں ملزموں کو فراہم کی جائیں۔ جس پر نیب پراسیکیوٹر نے کہا 28 کاپیاں تیار ہوئی ہیں، باقی کی تیاری کے لئے وقت درکار ہے۔ وکیل صفائی نے کہا اقبال خان نوری دوسرے ریفرنس میں گرفتار ہیں، زین ملک بون میرو کے مرض میں مبتلا ہیں، حاضری سے استثنی دیا جائے۔ عدالت نے زین ملک کی آج کی حاضری سے استثنی کی درخواست منظور کرلی۔
دوسری جانب جعلی اکاؤنٹس کیس کی تحقیقات کے لئے سابق صدر آصف علی زردرای نے نیب کے سامنے پیشی کے لئے مہلت مانگ لی، زرداری نے نیب کو مہلت کے لئے درخواست بھجوا دی۔ آصف زرداری نے موقف اختیار کیا کہ احتساب عدالت میں پیشی کی وجہ سے نیب میں پیش نہیں ہو سکتا۔
واضح رہے کہ نیب نے سابق صدر آصف علی زرداری کو جعلی بینک اکاونٹس کیس میں طلب کر رکھا ہے .
گجرات (نمائندہ باغی ٹی وی) گجرات شہر کے مختلف حصوں میں سحری و افطار کے اوقات میں سوئی گیس کا پریشر انتہائی کم، خواتین کو کھانا بنانے میں مشکلات کا سامنا تفصیلات کے مطابق گجرات شہر کے اکثر علاقوں میں صبح سحری کے وقت اور شام کو افطاری کے وقت سوئی گیس کا پریشر انتہائی کم ہو جاتا ہے جس کی وجہ سے گھروں میں سحری و افطاری کے لئے تیار کیے جانے پکوان تیار کرنا انتہائی مشکل ہو جاتا ہے اور خواتین کو اذیت سے دوچار ہونا پڑتا ہے یاد رہے کہ حکومت نے ماہ رمضان میں بجلی اور گیس کی لوڈشیڈنگ نہ کرنے کا اعلان کیا تھا اہل گجرات نے باغی ٹی وی کے توسط سے سوئی گیس کے اعلی حکام سے مطالبہ کیا ہے کہ سحروافطارمیں سوئی گیس کا پریشر ٹھیک کیا جائے تاکہ روزہ دار اطمینان کے ساتھ سحری و افطاری کر سکیں۔
مسلم لیگ ن کی رہنما مریم نواز کو نائب صدر بنائے جانے کے خلاف حکومتی جماعت تحریک انصاف نے الیکشن کمیشن جانے کا فیصلہ کر لیا
باغی ٹی وی کی رپورٹ کے مطابق سابق وزیر اعظم نواز شریف کی بیٹی کو مسلم لیگ ن کا نائب صدر بنائے جانے پر تحریک انصاف نے الیکشن کمیشن جانے کا فیصلہ کیا ہے اس ضمن میں تحریک انصا نے باضابطہ طور پر آج الیکشن کمیشن آف پاکستان میں درخواست دائر کی جائے گی جس میں مریم نوازکے عہدے کوچلینج کیا جائے گا. درخواست تحریک انصاف کے اراکین قومی اسمبلی کی جانب سے لکھی گئی ہے.
واضح رہے کہ مسلم لیگ ن نے نئی باڈی تشکیل دی ہے جس میں مریم نواز کو نائب صدر کا عہدہ دیا گیا ہے. تحریک انصاف نے کہا ہے کہ سزا یافتہ کو پارٹی عہدہ دینا آئین کی خلاف ورزی ہے، الیکشن کمیشن مسلم لیگ ن کی رجسٹریشن ختم کرے.
گجرات (نمائندہ باغی ٹی) سوشل ویلفیئر کے پارلیمانی سیکرٹری ایم پی اے چوہدری سلیم سرور جوڑا نے لاہور بم دھماکہ پر خیالات کا اظہار کرتے ہوئے کہا ہے کہ ہم داتا دربار پر ہونے والے بم دھماکا کی پر زور مزمت کرتے ہیں حملے میں شہید ہونے والوں کو سلام پیش کرتے ہیں جنہوں نے اپنی قیمتی جان کا نظرانہ دے کر اس بابرکت مہینہ میں اس قوم پر نچھاور کیں اللہ پاک ان کو جوارئے رحمت میں اعلیٰ مقام عطا فرمائے اور ان کے لواحقین کو صبروجمیل عطا فرمائے۔ انہوں نے مزید کہا کہ اس طرح کی بزدلانہ کارروائیوں سے قوم کے حوصلے پست نہیں ہوں گے ساری قوم افواج پاکستان اور حکومت کے ساتھ کھڑی ہے۔