Blog

ایران سے منسلک ہیکر گروپ ہنڈالا نے دعویٰ کیا ہے کہ اس نے اسرائیلی فوج کے سابق سربراہ ہرزی حلوی کے ذاتی موبائل فون کو ہیک کر لیا ہے اور اس میں موجود تصاویر اور ویڈیوز آن لائن جاری کر دی ہیں۔

ہیکر گروپ کے مطابق لیک ہونے والے مواد میں حساس نوعیت کی نجی معلومات، ذاتی تصاویر اور ویڈیوز شامل ہیں، جن میں مبینہ طور پر اردن کے ایک خفیہ دورے کی تصاویر بھی موجود ہیں۔ گروپ نے اس ڈیٹا کو اپنی جاری سائبر مہم کا حصہ قرار دیتے ہوئے مختلف پلیٹ فارمز پر شیئر کیا۔ہنڈالا، جو ایران سے وابستہ ہیکر گروپ سمجھا جاتا ہے، اس سے قبل بھی اسرائیلی شخصیات اور اداروں کو نشانہ بنانے کے دعوے کرتا رہا ہے۔ ماضی میں اس گروپ نے اسرائیلی حکام کے ذاتی ڈیٹا اور تصاویر لیک کرنے اور سرکاری و نجی اداروں کے سسٹمز میں دراندازی کے دعوے کیے تھے ۔

ماہرین کے مطابق ایران اور اسرائیل کے درمیان جاری کشیدگی اب سائبر جنگ کی شکل بھی اختیار کر چکی ہے، جہاں "ہیک اینڈ لیک” جیسے حملے اہم ہتھیار بن گئے ہیں۔ ایسے حملوں کا مقصد نہ صرف حساس معلومات حاصل کرنا بلکہ مخالف فریق کی ساکھ کو نقصان پہنچانا بھی ہوتا ہے ۔

واشنگٹن: امریکی صدر ڈونلڈ ٹرمپ نے ایک غیر متوقع بیان میں ایران کے خلاف دوبارہ فوجی کارروائی کا عندیہ دیا ہے۔

سماجی رابطے کی ویب سائٹ پر جاری اپنے بیان میں امریکی صدر نے کہا کہ جب تک باقاعدہ معاہدہ طے نہیں پا جاتا، امریکی بحری جہاز، جنگی طیارے اور فوجی اہلکار ایران کے گرد موجود رہیں گے۔ انہوں نے خبردار کیا کہ اگر کسی بھی وجہ سے صورتحال غیر متوقع رخ اختیار کرتی ہے تو امریکا دوبارہ حملے شروع کر دے گا۔صدر ٹرمپ کے مطابق ممکنہ حملے پہلے سے کہیں زیادہ بڑے اور طاقتور ہوں گے، جن کی مثال ماضی میں نہیں ملتی۔ انہوں نے واضح کیا کہ امریکا پہلے ہی اس مؤقف پر قائم ہے کہ ایران کو کسی صورت جوہری ہتھیار حاصل نہیں کرنے دیے جائیں گے۔انہوں نے مزید کہا کہ امریکی فوج اس وقت مکمل تیاری کے ساتھ موجود ہے اور بظاہر آرام کی حالت میں ہونے کے باوجود اگلی کارروائی کے لیے ہر لمحہ تیار ہے۔ ان کے بقول امریکی افواج اپنی “اگلی فتح” کی منتظر ہیں۔

ابوظہبی: متحدہ عرب امارات نے ایران کے ساتھ ہونے والی جنگ بندی کے حوالے سے محتاط اور سخت مؤقف اختیار کرتے ہوئے کہا ہے کہ وہ اس معاہدے پر مزید وضاحت چاہتا ہے تاکہ تہران کی جانب سے مکمل پابندی اور آبنائے ہرمز کی “بلا مشروط بحالی” کو یقینی بنایا جا سکے۔

وزارتِ خارجہ کے بیان میں کہا گیا کہ امارات یہ بھی چاہتا ہے کہ جنگ کے دوران ملک کو پہنچنے والے نقصانات پر ایران کو جوابدہ ٹھہرایا جائے۔متحدہ عرب امارات نے اپنے بعض خلیجی اتحادیوں کے برعکس ایران اور امریکا کے درمیان عارضی جنگ بندی کا خیر مقدم کرنے سے گریز کیا اور واضح کیا کہ صرف وقتی وقفہ کافی نہیں بلکہ ایک جامع اور پائیدار حکمت عملی کی ضرورت ہے۔بیان میں مزید کہا گیا کہ ایران کے جوہری اور میزائل پروگرام، خطے میں پراکسی گروپس کی حمایت اور آبنائے ہرمز کی بندش جیسے معاملات کو بھی اس حکمت عملی کا حصہ بنایا جانا چاہیے۔

صدر امارات کے مشیر انور قرقاش نے بھی سوشل میڈیا پلیٹ فارم ایکس پر اپنے بیان میں کہا کہ امارات کے مؤقف پر کسی کو حیران نہیں ہونا چاہیے۔ ان کا کہنا تھا “رسمی مروّت کا دور گزر چکا ہے، اب صاف گوئی ناگزیر ہو چکی ہے۔ آنے والے مرحلے میں ہمیں ایک مضبوط اور واضح اجتماعی مؤقف اپنانا ہوگا جو خطے میں استحکام اور سلامتی کو فروغ دے۔”

واضح رہے کہ حالیہ جنگ کے دوران متحدہ عرب امارات ایران کے حملوں کا بڑا نشانہ بنا، جہاں تقریباً نصف میزائل اور ڈرون حملے امارات کی جانب کیے گئے جن میں سے زیادہ تر کو فضائی دفاعی نظام نے ناکام بنا دیا۔
جنگ بندی کے اعلان کے بعد بھی ایران کی جانب سے اماراتی شہروں پر میزائل اور ڈرون حملے کیے گئے، جنہیں ایرانی میڈیا نے ایران کی آئل ریفائنریوں پر پہلے کیے گئے حملوں کا ردعمل قرار دیا ہے۔

بیروت: اسرائیل نے دعویٰ کیا ہے کہ اس کی تازہ فضائی کارروائی میں ایران کے حمایت یافتہ گروپ حزب اللہ کے سربراہ کے قریبی ساتھی کو شہید کر دیا گیا ہے، جبکہ لبنان بھر میں شدید بمباری کے نتیجے میں سینکڑوں افراد جان کی بازی ہار گئے۔

اسرائیلی فوج کے مطابق حملے میں علی یوسف حارشی نامی شخص مارا گیا، جو حزب اللہ کے سیکریٹری جنرل نعیم قاسم کے قریبی مشیر اور ذاتی معاون تھے۔ اسرائیلی ڈیفنس فورسز (آئی ڈی ایف) کا کہنا ہے کہ حارشی نہ صرف نعیم قاسم کے دفتر کے انتظامی امور سنبھالتے تھے بلکہ سیکیورٹی معاملات میں بھی مرکزی کردار ادا کرتے تھے۔آئی ڈی ایف کے بیان کے مطابق رات گئے بیروت میں کیے گئے حملے میں حرشی کو نشانہ بنایا گیا۔ اسرائیلی فوج نے مزید دعویٰ کیا کہ اس نے دریائے لیتانی کے شمال اور جنوب کے درمیان حزب اللہ کے جنگجوؤں کی نقل و حرکت کے لیے استعمال ہونے والے دو اہم راستوں کو بھی نشانہ بنایا۔

اسرائیلی حکام کے مطابق ان کارروائیوں کے دوران جنوبی لبنان میں اسلحے کے تقریباً 10 ذخائر، راکٹ لانچرز اور کمانڈ سینٹرز کو بھی تباہ کیا گیا۔دوسری جانب لبنان میں جاری اسرائیلی بمباری نے بڑے پیمانے پر تباہی مچائی ہے۔ رپورٹس کے مطابق گزشتہ روز ملک بھر میں ہونے والے حملوں میں کم از کم 254 افراد جاں بحق ہوئے، جن میں بڑی تعداد عام شہریوں کی ہے۔دارالحکومت بیروت کے رہائشی علاقوں کو بھی نشانہ بنایا گیا، جہاں صرف ایک دن میں 91 افراد کے مارے جانے کی اطلاعات ہیں۔ شہری علاقوں پر حملوں کے باعث عالمی سطح پر تشویش میں اضافہ ہو رہا ہے اور انسانی بحران مزید سنگین ہونے کا خدشہ ظاہر کیا جا رہا ہے۔

18 سالہ لڑکی نے دو بچوں کی ماں سے بیاہ رچا لیا، سوشل میڈیا سے شروع ہونے والی کہانی نے سب کو حیران کر دیا

بہار (بھارت) کے ایک علاقے میں پیش آنے والی ایک انوکھی محبت کی کہانی نے لوگوں کو حیرت میں ڈال دیا، جہاں 18 سالہ لڑکی نے 32 سالہ دو بچوں کی ماں سے شادی کر لی۔ یہ غیر معمولی واقعہ سوشل میڈیا پر تیزی سے وائرل ہو رہا ہے اور ہر طرف موضوعِ بحث بنا ہوا ہے۔میڈیا رپورٹس کے مطابق، ضلع بکسر کے باگین تھانہ علاقے کی رہائشی 18 سالہ روبی نے 32 سالہ سندھیا کے ساتھ شادی کی، جو پہلے سے دو بچوں کی ماں ہیں۔ دونوں کے درمیان محبت کا آغاز سوشل میڈیا پر ریلز بنانے کے دوران ہوا، جو وقت کے ساتھ گہری محبت میں تبدیل ہو گیا۔ذرائع کے مطابق، دونوں نے پہلی بار 4 اپریل کو وندھیاچل مندر میں شادی کی، جبکہ 6 اپریل کو رام ریکھا گھاٹ کے ایک پرانے شادی منڈپ میں روایتی ہندو رسومات کے تحت دوبارہ شادی کی تقریب منعقد کی گئی۔ اس منفرد شادی کی خبر جیسے ہی پھیلی، سینکڑوں افراد موقع پر جمع ہوگئے اور اس منظر کو اپنی آنکھوں سے دیکھا۔

اس رشتے کی ایک خاص بات یہ بھی ہے کہ روبی نے خود کو ’شوہر‘ کے کردار میں قبول کیا ہے جبکہ سندھیا ’بیوی‘ کے طور پر اس رشتے میں شامل ہوئی ہیں۔دونوں خواتین کا کہنا ہے کہ ان کے اس فیصلے پر خاندان والے سخت ناراض ہیں اور انہیں دھمکیوں کا سامنا بھی ہے، تاہم انہوں نے معاشرتی دباؤ کو نظر انداز کرتے ہوئے ایک ساتھ زندگی گزارنے کا فیصلہ کیا ہے۔مقامی سطح پر اس واقعے پر ملے جلے ردعمل سامنے آ رہے ہیں۔ کچھ لوگ اسے محبت کی آزادی کی مثال قرار دے رہے ہیں، جبکہ دیگر اسے سماجی اقدار کے خلاف سمجھتے ہیں۔