Blog

ایران پر حملے کے نتیجے میں امریکی صدر ڈونلڈ ٹرمپ کے مواخذے کے امکانات بڑھ کر 67 فیصد ہوگئے ہیں ۔

یہ بات امریکی میڈیا نے سٹہ بازار کے اعداد و شمار کی بنیاد پر کہی ہے ،ماہرین کا کہنا ہے کہ سٹہ بازار سیاسی ماحول کی عکاسی تو کرتا ہے لیکن اُسے حتمی پیش گوئی نہیں سمجھا جا سکتا ۔،سیاسی تجزیہ کاروں کے مطابق فی الحال ٹرمپ کے مواخذے کا امکان کم ہے کیونکہ ری پبلکن پارٹی ایوانِ نمائندگان اور سینیٹ دونوں میں اکثریت رکھتی ہے اور پارٹی کے ارکان کی بڑی تعداد صدر کی حمایت کر رہی ہے ،تاہم اگر اس سال نومبر کے وسط مدتی انتخابات میں ڈیموکریٹس ایوانِ نمائندگان میں اکثریت حاصل کر لیتے ہیں تو صورتِ حال بدل سکتی ہے.


امریکی اخبار کی رپورٹ کے مطابق ایک خفیہ امریکی انٹیلی جنس جائزے میں خبردار کیا گیا ہے کہ بڑے پیمانے پر فوجی حملوں کے باوجود ایران کی موجودہ حکومت کو ہٹانا آسان نہیں ہوگا۔
رپورٹ کے مطابق یہ تجزیہ نیشنل انٹیلیجنس کونسل کے سینئر ماہرین نے تیار کیا ہے جو امریکا کی 18 انٹیلیجنس ایجنسیوں سے حاصل ہونے والی معلومات کی بنیاد پر خفیہ رپورٹس مرتب کرتے ہیں۔ یہ رپورٹ ایران پر امریکا اور اسرائیل کے حالیہ حملوں کے آغاز سے تقریباً ایک ہفتہ پہلے مکمل کی گئی تھی۔
‎رپورٹ میں کہا گیا ہے کہ اگر ایران کی اعلیٰ قیادت کو نشانہ بنایا جاتا ہے تو ملک کی مذہبی اور فوجی قیادت پہلے سے طے شدہ طریقہ کار کے مطابق فوری ردعمل دے سکتی ہے۔ اس کے ساتھ یہ بھی کہا گیا کہ ایران کی اپوزیشن کے اقتدار سنبھالنے کے امکانات بھی انتہائی کم ہیں۔
‎امریکی حکام کے مطابق اب تک ایران میں نہ تو بڑے پیمانے پر عوامی بغاوت کے آثار دیکھے گئے ہیں اور نہ ہی حکومتی ڈھانچے کے اندر ایسا کوئی واضح اختلاف سامنے آیا ہے جس سے نظام کی تبدیلی ممکن ہو۔
‎تجزیہ کاروں کا کہنا ہے کہ ایران میں مذہبی اور فوجی قیادت کا کنٹرول ابھی بھی مضبوط ہے اور صرف فوجی کارروائیوں کے ذریعے موجودہ نظام کو تبدیل کرنا مشکل ہوگا۔


ایران کی پارلیمانی قومی سلامتی کمیٹی نے کہا ہے کہ آیت اللہ علی خامنہ ای کے قتل کا بدلہ لینے تک دشمنوں کے خلاف جنگ جاری رکھی جائے گی۔
کمیٹی کے بیان میں کہا گیا ہے کہ ایران اپنی خودمختاری اور سلامتی کے دفاع کے لیے ہر ممکن اقدام کرے گا اور دشمنوں کے خلاف کارروائیاں جاری رہیں گی۔
‎دوسری جانب ایرانی صدر مسعود پزشکیان نے کہا ہے کہ ایران خطے کے ممالک کے ساتھ دوستانہ تعلقات کا خواہاں ہے تاہم یہ خواہش امریکا کے مقابلے میں ایران کے حق دفاع کی نفی نہیں کرتی۔
‎ایرانی صدر کے مطابق ایران نے اپنے دوست ہمسایہ ممالک کو نشانہ نہیں بنایا بلکہ خطے میں موجود امریکی فوجی اڈوں اور تنصیبات کو ہدف بنایا ہے۔
‎انہوں نے کہا کہ ایران نے خطے میں امریکی سہولیات اور فوجی مراکز کو نشانہ بنایا تاکہ اپنے دفاع کے حق کو استعمال کیا جا سکے۔


ایران پر جاری جنگ کے آٹھویں دن بھی تہران، اصفہان اور دیگر علاقوں میں فضائی حملوں کی نئی لہر دیکھی گئی جس کے نتیجے میں کم از کم آٹھ افراد جان سے گئے۔
ایرانی حکام کے مطابق امریکی اور اسرائیلی حملوں کے دوران اصفہان اور تہران کے بعض رہائشی علاقوں کو نشانہ بنایا گیا۔
‎دوسری جانب امریکی میڈیا کا کہنا ہے کہ حملوں میں فوجی اڈوں، میزائل لانچرز اور پاسداران انقلاب سے متعلق تنصیبات کو ہدف بنایا گیا جس کی ایرانی حکام نے بھی تصدیق کی ہے۔
‎اسرائیل نے دعویٰ کیا ہے کہ ان کارروائیوں کے دوران ایران کے 80 سے زائد لڑاکا طیارے تباہ کر دیے گئے تاہم ایران نے اس دعوے کی تصدیق نہیں کی۔
‎ادھر ایران نے بھی جوابی کارروائی کرتے ہوئے درجنوں ڈرونز اور میزائل داغے۔ اطلاعات کے مطابق بغداد ایئرپورٹ کے قریب امریکی فوجی اڈے اور بصرہ میں واقع امریکی آئل کمپلیکس کو ڈرون حملوں کا نشانہ بنایا گیا۔


مشرق وسطیٰ میں بڑھتی ہوئی کشیدگی کے پیش نظر سعودی عرب نے بیک ڈور سفارت کاری کو تیز کر دیا ہے۔
بلوم برگ کی رپورٹ کے مطابق سعودی عرب نے خطے میں کشیدگی کم کرنے کے لیے ایران کے ساتھ براہ راست رابطے بھی کیے ہیں۔
‎رپورٹ کے مطابق سعودی ولی عہد محمد بن سلمان نے یورپی ممالک کو بھی اعتماد میں لیا اور جنگ روکنے کے لیے فعال کردار ادا کرنے پر زور دیا۔
‎سعودی وزارت خارجہ کے مطابق سعودی ولی عہد اور برطانوی وزیراعظم کیئر اسٹارمر کے درمیان ٹیلیفونک گفتگو بھی ہوئی جس میں ایران جنگ اور خطے کی مجموعی صورتحال پر تبادلہ خیال کیا گیا۔
‎اس کے علاوہ شہزادہ محمد بن سلمان نے ترک صدر رجب طیب اردوان سے بھی ٹیلی فونک رابطہ کیا جبکہ قبرص کے صدر نے بھی سعودی ولی عہد سے گفتگو کی۔


متحدہ عرب امارات کے شہر دبئی میں واقع 23 مرینا نامی رہائشی ٹاور پر مبینہ ڈرون حملے کی اطلاعات سامنے آئی ہیں جس کے بعد عمارت سے رہائشیوں کے انخلا کا عمل شروع کر دیا گیا ہے۔
رپورٹس کے مطابق یہ عمارت دبئی مرینا کے ساحلی علاقے میں واقع ہے اور حملے کے بعد سکیورٹی اداروں نے فوری طور پر احتیاطی اقدامات کرتے ہوئے عمارت کو خالی کرانا شروع کر دیا۔
‎ابتدائی اطلاعات میں دعویٰ کیا گیا ہے کہ حملے میں عمارت کے اندر موجود سکیورٹی کنٹرول اور کمانڈ روم کو نشانہ بنایا گیا جو مبینہ طور پر اسرائیلی اداروں سے متعلق بتایا جا رہا ہے۔
‎حکام کی جانب سے ابھی تک حملے کی تفصیلات یا نقصان کے بارے میں باضابطہ بیان جاری نہیں کیا گیا جبکہ سکیورٹی ادارے صورتحال کا جائزہ لے رہے ہیں۔

‎اسرائیل نے لبنان کو خبردار کیا ہے کہ وہ حزب اللہ کو غیر مسلح کرے ورنہ سنگین نتائج کے لیے تیار رہے۔
‎اسرائیلی وزیر دفاع اسرائیل کاٹز نے بیان میں کہا کہ اسرائیل کا لبنان کے خلاف کوئی علاقائی دعویٰ نہیں ہے تاہم لبنانی سرزمین سے اسرائیل پر حملے کسی صورت قابل قبول نہیں۔
‎ان کا کہنا تھا کہ لبنان کی حکومت کو اس صورتحال پر فوری کارروائی کرنی چاہیے اور حزب اللہ کی سرگرمیوں کو روکنا چاہیے۔
‎اسرائیلی وزیر دفاع نے مزید کہا کہ لبنانی حکومت ہماری ہدایات پر عمل کرے اس سے پہلے کہ اسرائیل مزید سخت کارروائیاں کرنے پر مجبور ہو۔


برطانیہ میں مجرمانہ ریکارڈ رکھنے والے غیر ملکی افراد کے خلاف سخت کریک ڈاؤن شروع کر دیا گیا ہے اور ایسے افراد کے داخلے پر پابندیاں عائد کی جا رہی ہیں۔
برطانوی میڈیا رپورٹس کے مطابق مجرمانہ ریکارڈ رکھنے والے افراد کو برطانیہ میں داخلے کی اجازت نہیں دی جائے گی جبکہ ایسے افراد کے ویزے بھی منسوخ کیے جا سکیں گے۔
‎رپورٹس کے مطابق وہ غیر ملکی افراد بھی برطانیہ آنے کے اہل نہیں ہوں گے جنہیں 12 ماہ کی معطل سزا سنائی گئی ہو۔
‎برطانیہ کی وزیر داخلہ شابانہ محمود کا کہنا ہے کہ برطانیہ آنا کسی کا حق نہیں بلکہ ایک اعزاز ہے اور جو لوگ برطانوی عوام کے لیے خطرہ بنیں گے انہیں ملک بدر کر دیا جائے گا۔
‎انہوں نے کہا کہ حکومت اب تک تقریباً 60 ہزار غیر قانونی تارکین وطن اور مجرموں کو ملک بدر کر چکی ہے جبکہ نئے امیگریشن قوانین 26 مارچ سے نافذ کیے جائیں گے۔