Category: کشمور

تنگوانی (باغی ٹی وی، نامہ نگار منصور بلوچ) تنگوانی کے قریب جمال تھانے کی حدود میں باجکانی برادری کے دو گروپوں کے درمیان تصادم کے نتیجے میں ایک شخص ہلاک ہوگیا جبکہ مزید خونریزی کا خدشہ ہے۔

دونوں گروپوں کے درمیان جھگڑا گندم کی فصل کو جانوروں کے نقصان پہنچانے کے معاملے پر ہوا۔ جھگڑے کے دوران ایک شخص اسلم عرف دنگلو باجکانی ہلاک ہوگیا۔ پولیس جائے وقوعہ پر پہنچ گئی ہے لیکن دونوں گروپوں کے درمیان کشیدگی برقرار ہے اور مزید تصادم کا امکان ظاہر کیا جا رہا ہے۔

علاقہ مکینوں نے پولیس سے فوری اقدامات کرنے اور کشیدگی کم کرنے کے لیے فوری کارروائی کا مطالبہ کیا ہے۔

تنگوانی (باغی ٹی وی، نامہ نگار منصور بلوچ) تھاغمان باجکانی میں چاول کی فصل کو آگ، 200 من جل کر خاک

تنگوانی کے قریب تھانہ تنگوانی کی حدود میں واقع گاؤں تھاغمان باجکانی میں کامریڈ منظور احمد باجکانی کی چاول کی فصل کو آگ لگنے کا واقعہ پیش آیا، جس کے نتیجے میں 200 من چاول جل کر خاک ہو گئے۔

آگ لگنے کی وجوہات تاحال معلوم نہیں ہو سکیں۔ متاثرہ چاول کی فصل کامریڈ منظور احمد کی محنت کا نتیجہ تھی، جس کے جلنے سے انہیں شدید مالی نقصان کا سامنا ہے۔ عوام نے متعلقہ حکام سے واقعے کی تحقیقات اور متاثرہ کسان کی مدد کا مطالبہ کیا ہے۔

کندھ کوٹ(باغی ٹی وی ،نامہ نگارمختیاراحمد اعوان)کشمور پولیس نے ایک اہم کارروائی کرتے ہوئے کچے کے علاقے میں اسلحہ کی بڑی اسمگلنگ ناکام بنادی۔ اس کارروائی کے دوران سات بین الصوبائی اسلحہ اسمگلرز کو گرفتار کیا گیا اور ان کے قبضے سے بھاری مقدار میں غیر قانونی اسلحہ برآمد ہوا۔ پولیس ٹیم نے ایس ایس پی کشمور بشیر احمد بروھی کی ہدایات پر عمل کرتے ہوئے اے ایس پی کندھکوٹ محمد نعمان ظفر اور اے ایس پی کشمور محمد عاشر کی سربراہی میں خفیہ اطلاع پر کارروائی کی۔

پولیس نے ہیبت روڈ پر ناکہ بندی کے دوران اسمگلنگ میں استعمال ہونے والا ایک ٹرک قبضے میں لیا جس سے 12,000 گولیاں، 4 جی تھری رائفلز، 4 ایس ایم جی رائفلز، ایک ایم فور اے ون رائفل، 2 پسٹلز اور متعدد میگزینز برآمد کیے گئے۔ گرفتار ملزمان نے اعتراف کیا کہ وہ خیبرپختونخوا سے پنجاب اور سندھ کے کچے کے علاقوں میں ڈاکوؤں کو اسلحہ فراہم کرتے ہیں۔

ملزمان کے خلاف تھانہ اے سیکشن کندھکوٹ میں مقدمہ درج کر لیا گیا ہے، جبکہ ان کے مجرمانہ ریکارڈ کی چھان بین اور مزید تفتیش جاری ہے۔ ترجمان کشمور پولیس کے مطابق یہ کارروائی غیر قانونی اسلحہ کی روک تھام اور امن و امان کی بحالی کے سلسلے میں ایک بڑی کامیابی ہے۔

تنگوانی،باغی ٹی وی (نامہ نگار منصور بلوچ) دو بچے ہیپاٹائٹس بی سے جاں بحق، گاؤں میں غم کی لہر

تفصیلات کے مطابق تنگوانی کے قریبی گاؤں قیصر خان گجرانی میں دو بچے ہیپاٹائٹس بی کے باعث سکھر کے نجی ہسپتال میں انتقال کر گئے۔
دونوں بچے اس مہلک بیماری میں مبتلا تھے اور علاج کے دوران دم توڑ گئے۔ ان کی لاشیں گھر پہنچنے پر علاقے میں کہرام مچ گیا اور ہر طرف غم کی فضا چھا گئی۔

گاؤں کے مکینوں نے محکمہ صحت کو شدید تنقید کا نشانہ بناتے ہوئے کہا کہ کبھی بھی ان کے علاقے میں بیماریوں کی روک تھام کے لیے کوئی اقدامات یا وزٹ نہیں کیا گیا۔ انہوں نے حکومت سے فوری اقدامات کی اپیل کی ہے تاکہ مزید جانی نقصان سے بچا جا سکے۔

تنگوانی، باغی ٹی وی (نامہ نگار منصور بلوچ)شوہر نے بیوی کو کاروکاری کے الزام میں قتل کر دیا،تنگوانی کے قریب غوث پور کے علاقے جمال تھانے کی حدود میں کاروکاری کے الزام پر شوہر نے بیوی کو گولی مار کر قتل کر دیا۔

تفصیلات کے مطابق گاؤں الف خان بچارانی کے رہائشی عمران علی بھیو نے اپنی بیوی جنت خاتون کو کاروکاری کے الزام میں گولیاں مار دیں۔ پولیس نے مقتولہ کی لاش پوسٹ مارٹم کے لیے کندھ کوٹ اسپتال منتقل کر دی ہے۔

واقعے کا مقدمہ تاحال درج نہیں کیا گیا، اور مزید تحقیقات جاری ہیں۔

تنگوانی (باغی ٹی وی، نامہ نگار منصور بلوچ) تنگوانی کے قریب غوثپور لنک روڈ پر مسلح افراد کی فائرنگ سے ملک برادری کے دو افراد بابل ملک اور جاوید ملک قتل کر دیے گئے۔ مقتولین اس وقت فائرنگ کا نشانہ بنے جب وہ تنگوانی کورٹ میں اپنی شنوائی سے فارغ ہو کر واپس اپنے گھر جا رہے تھے۔ قاتل واردات کے بعد فرار ہو گئے، جبکہ لاشوں کو فوری طور پر اسپتال منتقل کر دیا گیا۔

واقعے کے بعد مقتولین کے گھروں میں کہرام مچ گیا اور علاقہ سوگوار ہو گیا۔ ابتدائی اطلاعات کے مطابق یہ قتل دیرینہ دشمنی اور زمینی تنازع کا نتیجہ ہے جو ملک اور چولیانی قبائل کے درمیان چل رہا ہے۔ دونوں قبائل کے مابین زمینی تنازع کے باعث پہلے بھی متعدد جانیں ضائع ہو چکی ہیں، جن میں ایک پرائمری ٹیچر بھی شامل تھا۔ اب تک دونوں قبائل کے درمیان اس دشمنی کے باعث پانچ افراد قتل ہو چکے ہیں۔

عوامی حلقوں نے حکومت سے اپیل کی ہے کہ اس خونی دشمنی کو ختم کرنے کے لیے فوری اقدامات کیے جائیں تاکہ مزید انسانی جانوں کا ضیاع نہ ہو۔