Category: کشمور

تنگوانی(باغی ٹی وی، نامہ نگار منصور بلوچ) اینٹی کرپشن اہلکار ذوالفقار ڈاہانی تین روز بعد بازیاب، پولیس اور دیگر ذرائع کا متضاد موقف

تفصیل کے مطابق تنگوانی کے قریب اینٹی کرپشن اہلکار ذوالفقار علی ڈاہانی جو تین روز قبل تھانہ جمال کی حدود سے اغوا ہوا تھا بالآخر بازیاب ہو کر گھر واپس پہنچ گیا۔ مغوی اہلکار کی بازیابی کے حوالے سے مختلف اطلاعات سامنے آ رہی ہیں۔

ذرائع کے مطابق ذوالفقار علی ڈاہانی کی رہائی مبینہ طور پر کسی ڈیل کے تحت ممکن ہوئی ہے، تاہم پولیس نے اس دعوے کی تردید کرتے ہوئے واضح کیا کہ یہ بازیابی ایک باقاعدہ سرچ آپریشن کے نتیجے میں عمل میں آئی۔ پولیس کے مطابق کشمور پولیس نے تھانہ کرمپور تھانہ جمال کی حدود میں کارروائی کے دوران مغوی کو بحفاظت بازیاب کرا لیا۔

واضح رہے کہ ذوالفقار علی ڈاہانی کا اغوا چند روز قبل ہوا تھا جس سے علاقے میں تشویش کی لہر دوڑ گئی تھی۔ مقامی افراد اور اہلِ خانہ نے بازیابی پر اطمینان کا اظہار کیا ہے مگر بازیابی کے طریقۂ کار اور اس کے پسِ پردہ حالات پر مزید شفاف تحقیقات کا مطالبہ بھی کیا جا رہا ہے۔

تنگوانی( باغی ٹی وی ،نامہ نگار منصور بلوچ)تنگوانی کے قریب جمال تھانے کی حدود میں اینٹی کرپشن پولیس کے اہلکار ASI ذوالفقار علی ڈاہانی کو مبینہ طور پر اغوا کر لیا گیا۔ اطلاعات کے مطابق، ان اہلکار کو پکے کے ڈاکوؤں نے اغوا کیا ہے، جو علاقے میں اپنی کارروائیاں جاری رکھتے ہیں۔

ذوالفقار علی ڈاہانی کرم پور کے ایم این اے شبیر علی بجارانی کے کمدار فوج علی ڈہانی کے قریبی رشتہ دار ہیں۔ ذرائع کے مطابق، ڈاکوؤں نے اپنے ٹھکانوں پر پولیس کی قائم کردہ چھاؤنیوں کو ختم کرنے کا مطالبہ کیا ہے، جو کہ اس بات کی طرف اشارہ کرتا ہے کہ ڈاکوؤں کا مقصد علاقے میں پولیس کی موجودگی کو کم کرنا یا ختم کرنا ہے۔

اس واقعے کے بعد، مقامی پولیس اور قانون نافذ کرنے والے ادارے اغواکاروں کی گرفتاری کے لیے کارروائی میں مصروف ہیں، جبکہ علاقے میں سکیورٹی کی صورتحال مزید پیچیدہ ہو گئی ہے۔

تنگوانی (باغی ٹی وی،نامہ نگارمنصوربلوچ): تنگوانی کے قریب اغوا کی وارداتوں میں اضافہ ہو گیا ہے، جس کے نتیجے میں ایک اور مزدور ایاز علی لاشاری اغوا کر لیا گیا ہے۔ ایاز علی جو گاؤں حاجی خادم حسین لاشاری کا رہائشی تھا، کندکوٹ غلہ منڈی سے مزدوری کے بعد گھر واپس آ رہا تھا تو تنگوانی کے قریب جعفری لاڑو ریلوے پھاٹک پر اسے اغوا کر لیا گیا۔

اس کا موٹر سائیکل موقع پر ہی برآمد ہوا جبکہ علاقے میں خوف و ہراس پھیل گیا ہے۔ مقامی افراد کا کہنا ہے کہ پولیس صورتحال پر خاموش تماشائی بنی ہوئی ہے، جس پر شدید تشویش کا اظہار کیا جا رہا ہے۔

تنگوانی (باغی ٹی وی نامہ نگار منصور بلوچ) ضلع کشمور کندھ کوٹ میں ایک بار پھر اغوا کاریوں میں شدت آ گئی ہے، جہاں گزشتہ 72 گھنٹوں کے دوران 8 افراد اغوا ہو چکے ہیں۔ اس صورتحال نے علاقے میں خوف و ہراس پھیلا دیا ہے اور عوام کی زندگی مفلوج ہو کر رہ گئی ہے۔

تنگوانی کے علاقے سے دو افراد، عارف ملک اور شہزادو گولو، بھی اغوا کر لیے گئے ہیں، جس کے بعد ان کے اہل خانہ میں غم اور پریشانی کی لہر دوڑ گئی ہے۔ مقامی لوگوں کا کہنا ہے کہ اغوا کی وارداتوں میں تیزی آگئی ہے اور روزانہ ایک یا دو افراد کو اغوا کیا جا رہا ہے، جس نے عوام کی سکون کی نیند چھین لی ہے۔

ڈسٹرکٹ کشمور کے کچے اور پکے علاقے میں ڈاکووں کی سرگرمیاں بڑھ گئی ہیں اور ان کی کارروائیاں تیز ہو گئی ہیں، جس سے مقامی لوگ شدید پریشان ہیں۔ اس صورتحال کے باوجود، ڈسٹرکٹ پولیس اور کشمور رینجرز کی جانب سے اغوا کاروں کے خلاف کوئی ٹھوس کارروائی نظر نہیں آ رہی۔ عوام کا کہنا ہے کہ سندھ حکومت اور سندھ پولیس نے ضلع کشمور کو ڈاکوؤں کے حوالے کر رکھا ہے، جس سے علاقے میں امن و امان کی صورتحال انتہائی خراب ہو گئی ہے۔

اہلِ علاقہ نے حکومت سے فوری طور پر کارروائی کی اپیل کی ہے تاکہ اغوا کاروں کے خلاف سخت کارروائی کی جائے اور عوام کو اس خوفناک صورتحال سے نجات دلائی جا سکے۔

تنگوانی(باغی ٹی وی، نامہ نگار منصور بلوچ) تنگوانی کے قریب ہائی وے پر ڈاکوؤں کی جانب سے گاڑیوں پر فائرنگ کا افسوسناک واقعہ پیش آیا، جس میں سات سالہ علی لاشاری جاں بحق ہوگیا اور گاڑی کا ڈرائیور شدید زخمی ہوگیا۔

تفصیلات کے مطابق یہ واقعہ ٹھل-کندھ کوٹ روڈ پر کھاہی اسٹاپ کے قریب پیش آیا جو تھانہ تنگوانی کی حدود میں واقع ہے۔ حملے کے دوران ڈاکوؤں نے کئی گاڑیوں کو نشانہ بنایا، جس سے علی لاشاری موقع پر ہی دم توڑ گیا اور ڈرائیور الطاف حسین لاشاری جوکہ جاں بحق ہونے والے بچے کا والد ہے کو شدید چوٹیں آئیں۔

زخمی الطاف حسین کا کہنا ہے کہ وہ اپنے سسرال سے واپس کندھ کوٹ جا رہے تھے، جب 6 مسلح ڈاکوؤں نے ان پر حملہ کیا۔ فائرنگ کے نتیجے میں ان کا کمسن بیٹا جاں بحق ہو گیا۔

پولیس کی کارکردگی پر سوالات اٹھتے ہیں کیونکہ اطلاع ملنے کے باوجود اب تک جائے وقوعہ پر پولیس نہیں پہنچ سکی۔ علاقے میں خوف و ہراس پھیل گیا ہے، اور مقامی افراد نے فوری کارروائی کا مطالبہ کیا ہے۔

تنگوانی (باغی ٹی وی، نامہ نگار منصور بلوچ) تنگوانی کے قریب واقع دلی جان ہائی اسکول پر مسلح افراد کی فائرنگ کے باعث طلباء اور اساتذہ میں بھگدڑ مچ گئی جبکہ واقعے سے علاقے میں خوف و ہراس پھیل گیا۔

علاقہ مکینوں کے مطابق یہ واقعہ ملک اور چولیانی قبائل کے درمیان جاری زمینی تنازعے کا نتیجہ ہے۔ چولیانی قبیلے کے افراد نے اسکول میں موجود ٹیچر ایاز ملک کو نشانہ بنانے کے لیے فائرنگ کی۔ جوابی کارروائی میں گاؤں والوں نے بھی فائرنگ کی جس کے بعد حملہ آور موقع سے فرار ہو گئے۔

رپورٹس کے مطابق دونوں قبائل کے درمیان اس تنازعے میں اب تک تین افراد قتل ہو چکے ہیں۔ اس سے قبل اسی تنازعے میں ایک پرائمری اسکول کے ٹیچر رانو ملک بھی جاں بحق ہو چکے ہیں۔

علاقہ مکینوں نے پولیس پر الزام عائد کیا ہے کہ وہ واقعے پر خاموش تماشائی بنی ہوئی ہے اور مؤثر کارروائی کرنے سے گریزاں ہے۔

تنگوانی،باغی ٹی وی ،نامہ نگارمنصوربلوچ) ڈاکوؤں کا وحشیانہ حملہ، ایک شخص قتل،دوسرازخمی، سڑک بلاک

تفصیل کے مطابق تنگوانی تھانے کی حدود میں واقع ہائی وے پر ڈاکوؤں نے موٹر سائیکل چھیننے کی کوشش کی۔ مزاحمت کرنے پر ڈاکوؤں نے اندھا دھند فائرنگ شروع کر دی جس کے نتیجے میں خان محمد قمبرانی نامی ایک شخص جاں بحق ہو گیا جبکہ جعفری قبیلے سے تعلق رکھنے والے علی حسین کو شدید زخمی حالت میں ہسپتال منتقل کر دیا گیا ہے۔

عینی شاہدین کے مطابق دو ڈاکو موٹر سائیکل پر سوار ہو کر آئے اور انہوں نے خان محمد قمبرانی کا موٹر سائیکل چھیننے کی کوشش کی۔ جب خان محمد نے مزاحمت کی تو ڈاکوؤں نے اس پر فائرنگ شروع کر دی اور اسے قتل کر دیا۔

اس واقعے کے بعد مقتول کے ورثا نے ٹھل، کندھ کوٹ سڑک بلاک کر دی اور احتجاج شروع کر دیا۔ عورتیں سڑک پر بیٹھ کر ماتم کر رہی ہیں اور لاش کو سڑک پر رکھ دیا گیا ہے۔ دونوں طرف سڑک پر گاڑیوں کی لمبی قطاریں لگ گئی ہیں۔ پولیس ابھی تک موقع پر نہیں پہنچی ہے۔