Category: کشمور

کندھ کوٹ(باغی ٹی وی نامہ نگارمختیاراحمداعوان) تھانہ اے سیکشن کندھ کوٹ کی حدود میں کشمور پولیس نے بھتہ خوری اور اغواکاری میں ملوث دو سہولت کاروں کو گرفتار کر لیا ہے۔ گرفتار ملزمان اغوا کاروں کو راشن فراہم کرنے، بھتہ وصولی اور اغوا کی منصوبہ بندی میں مدد فراہم کرتے تھے۔

گرفتار ملزمان میں اجیت کمار ولد منور لال اورونیش کمار ولد دیوان لال شامل ہیں

پولیس کے مطابق تفتیش کے دوران ملزمان کے وائس ریکارڈنگز اور کال ڈیٹا ریکارڈ (CDR) سے شواہد حاصل ہوئے ہیں، جن سے ثابت ہوتا ہے کہ دونوں ملزمان خادم بھیو گینگ اور نواب جاگیرانی گینگ کے ساتھ مسلسل رابطے میں تھے اور مختلف وارداتوں میں سہولت فراہم کر رہے تھے۔

کشمور پولیس نے خفیہ اطلاع اور جدید ٹیکنالوجی کی مدد سے اس کارروائی کو کامیاب بنایا۔ مزید تفتیش کے دوران اغوا کاروں کے نیٹ ورک سے متعلق مزید انکشافات متوقع ہیں۔

پولیس نے اعلان کیا ہے کہ علاقے میں مزید کریک ڈاؤن کا آغاز کر دیا گیا ہے تاکہ ڈاکوؤں اور ان کے سہولت کاروں کو کیفر کردار تک پہنچایا جا سکے اور امن و امان کو یقینی بنایا جا سکے۔

گرفتار ملزمان کے خلاف تھانہ اے سیکشن کندھ کوٹ میں درج مقدمات کی تفصیلات درج ذیل ہیں FIR نمبر 308/2024: دفعات 324، 353، 384، 385، 400، 216A، 6/7 اے ٹی اے،FIR نمبر 309/2024: دفعات 324، 353، 384، 385، 400، 216A، 6/7 اے ٹی اے

ترجمان کشمور پولیس نے بتایا کہ مزید کارروائیاں جاری رہیں گی تاکہ علاقے کو جرائم پیشہ عناصر سے پاک کیا جا سکے۔

تنگوانی (باغی ٹی وی، نامہ نگار منصور بلوچ) تنگوانی میں بڑھتی ہوئی بدامنی کے خلاف شہری ایکشن کمیٹی نے رہبر چوک پر تین دن کے لیے بھوک ہڑتال کیمپ قائم کر دیا ہے۔

شہری ایکشن کمیٹی کے رہنما قاری کفایت اللہ کوسو، وقار احمد ملک، رحمدل لاشاری، اعظم کوسو، عبدالفتاح کنڈرا، مولانا شہمور بکرا اور سہراب ملک نے میڈیا سے بات کرتے ہوئے بتایا کہ تنگوانی شہر اور اس کے نواحی علاقوں میں مسلسل بدامنی کا راج ہے، جس سے عوام شدید پریشان ہیں۔

رہنماؤں کا کہنا تھا کہ ڈاکوؤں کی سرگرمیاں اس حد تک بڑھ چکی ہیں کہ اب وہ پولیس اہلکاروں سے بھی ہتھیار چھین لیتے ہیں اور انتظامیہ مکمل طور پر بے بس نظر آ رہی ہے۔ ان کا کہنا تھا کہ پولیس کی خاموشی نے عوام کو مایوس کر دیا ہے اور حکام کی جانب سے مؤثر اقدامات نہ ہونے کی وجہ سے صورتحال بگڑتی جا رہی ہے۔

شہری ایکشن کمیٹی نے مطالبہ کیا ہے کہ موجودہ ایس پی کو فوری طور پر ہٹایا جائے اور کسی ایماندار اور قابل ایس ایس پی کو تعینات کیا جائے تاکہ شہر میں امن و امان بحال ہو سکے۔ رہنماؤں نے خبردار کیا کہ اگر ان کے مطالبات پر توجہ نہ دی گئی تو احتجاج کا دائرہ مزید وسیع کیا جائے گا۔

تنگوانی (باغی ٹی وی رپورٹ) تنگوانی کے قریب مسلح افرادنے مقامی صحافی منصور بلوچ کو نشانہ بناتے ہوئے ان سے موٹر سائیکل چھیننے کی کوشش کی۔ مزاحمت پر مسلح افراد نے صحافی پر تشدد کیا اور انہیں لوٹنے کی کوشش کی۔

تفصیلات کے مطابق جب منصور بلوچ تنگوانی سے اپنے گھر جا رہے تھے تو ٹھل،کندھ کوٹ روڈ پر نئوں روڈ اسٹاپ کے قریب انہیں مسلح ڈاکوؤں نے روک لیا۔ ڈاکوؤں نے منصور بلوچ کو روکنے کے بعد ان سے موٹر سائیکل چھیننے کی کوشش کی۔

جب صحافی نے مزاحمت کی تو ڈاکوؤں نے ان پر تشدد کیا تاہم اس دوران ایک ڈاکو کا نقاب اتر گیا جس سے ڈاکو کی شناخت ظاہر ہو گئی۔ اس کے بعد تمام ڈاکو موقع سے فرار ہو گئے۔

صحافی منصور بلوچ نے فوری طور پر15 پر پولیس کو اطلاع دی۔ پولیس نے موقع پر پہنچ کر ڈاکوؤں کو گرفتار کر لیا۔ تاہم بعد میں ایک "بڑے آدمی” کے فون پر پولیس نے ملزمان کو چھوڑ دیا۔ اس واقعے کے بعد پولیس کی کارکردگی پر شدید تنقید کی جا رہی ہے۔

صحافی منصور بلوچ نے ایس ایس پی کشمور سے مطالبہ کیا ہے کہ ڈاکوؤں کو دوبارہ گرفتار کر کے ان کے خلاف قانونی کارروائی کی جائے۔ پولیس کی طرف پکڑے گئے ملزمان کو ایک فون کال پر چھوڑ دینے اور عدم کارروائی سے صحافی برادری میں شدید غم و غصہ پایا جا رہا ہے۔

تنگوانی(باغی ٹی وی، نامہ نگار منصور بلوچ) کرم پور کے نزدیک تھانہ ناپر کوٹ کی حدود میں انڈس ہائی وے پر نامعلوم ڈاکوؤں نے کراچی سے کندھ کوٹ جانے والی مسافر کوچ پر حملہ کر دیا۔ ڈاکوؤں نے کوچ پر اندھا دھند فائرنگ کی، جس کے نتیجے میں ایک مسافر موقع پر ہی جاں بحق ہوگیا جبکہ پانچ افراد زخمی ہو گئے۔

واقعے کے بعد مقتول کے ورثاء نے ملزمان کی فوری گرفتاری کا مطالبہ کرتے ہوئے انڈس ہائی وے کو بلاک کر دیا، جس سے ٹریفک کی روانی میں شدید خلل پیدا ہوا۔

مقامی انتظامیہ اور پولیس نے واقعے کی تفتیش شروع کر دی ہے تاہم ملزمان کی گرفتاری تاحال عمل میں نہیں آسکی۔ عوامی حلقوں نے امن و امان کی ابتر صورتحال پر تشویش کا اظہار کیا ہے اور ملزمان کو جلد از جلد گرفتار کرنے کا مطالبہ کیا ہے۔

تنگوانی(باغی ٹی وی، نامہ نگار منصور بلوچ)ڈاکوؤں کا پولیس چوکی پر حملہ، سرکاری ہتھیار اور ذاتی سامان چھین کر فرار

تفصیلات کے مطابق تنگوانی کے قریب ڈاکوؤں نے ڈیرہ سر کی حدود میں واقع سیفل اسٹاپ پولیس چوکی پر حملہ کر کے پولیس اہلکاروں سے سرکاری ہتھیار چھین لیے۔ حملے میں ڈاکوؤں نے پولیس اہلکار اسد گجرانی اور ممتاز گاجانی سے سرکاری ہتھیار، موبائل فون، اور ذاتی اسکوٹر چھین کر فرار ہو گئے۔

ذرائع کے مطابق حملے کے بعد دونوں پولیس اہلکاروں کو کوارٹر گارڈ کر دیا گیا ہے جبکہ ڈیرہ سرکی پولیس کا کہنا ہے کہ ڈاکوؤں کا پیچھا کیا جا رہا ہے۔ تاہم عوام کا کہنا ہے کہ پولیس کی جانب سے صرف رسمی کارروائی کے طور پر موبائلز کی نقل و حرکت دکھائی گئی اور حقیقت میں کوئی ٹھوس کارروائی نہیں کی گئی۔

عوام نے پولیس کی کارکردگی پر سوالات اٹھاتے ہوئے کہا ہے کہ اگر پولیس خود محفوظ نہیں ہے تو عوام کی حفاظت کا کیا حال ہو گا؟ اس واقعے نے علاقے میں امن و امان کی صورتحال کو مزید خراب کر دیا ہے، اور عوام میں خوف و ہراس کی فضا پیدا ہو گئی ہے۔

کشمور(باغی ٹی وی رپورٹ) سندھ کے ضلع کشمور میں تنگوانی تھانہ پیر جان سٹاپ کے قریب سے دو ہفتے قبل مسلح افراد کے ہاتھوں اغوا ہونے والے اسد اللہ بگٹی اور منظور بگٹی کی ویڈیو ایک بار پھر سوشل میڈیا پر وائرل ہو گئی ہے۔

ویڈیو میں اغوا شدہ افراد اپنی جان کو خطرے میں بتاتے ہوئے مدد کی اپیل کر رہے ہیں۔ اغوا کاروں نے ان سے 10 کروڑ روپے کا تاوان طلب کیا ہے اور تاوان نہ دینے کی صورت میں انہیں جان سے مارنے کی دھمکی دی ہے۔

یہ واقعہ تنگوانی غوث پور روڈ پر پیش آیا تھا جہاں سے مسلح افراد نے اسد اللہ بگٹی اور منظور بگٹی کو اغوا کر لیا تھا۔ پولیس نے اس واقعے کے بعد سے اب تک کوئی پیشرفت نہیں کی ہے۔

اغوا شدہ افراد کی ویڈیو وائرل ہونے کے بعد علاقے میں خوف و ہراس کی فضا پھیل گئی ہے۔ مقامی لوگوں نے حکومت سے مطالبہ کیا ہے کہ وہ اغوا شدہ افراد کو جلد از جلد بازیاب کروائے۔

کشمور: اغوا کاروں نے 10 کروڑ روپے کا تاوان نہ دینے پر اغوا شدہ بگٹی قبیلے کے افراد کو جان سے مارنے کی دھمکی دی، ویڈیو وائرل
https://x.com/DrMustafa983/status/1844193416676323599

تنگوانی (باغی ٹی وی ،نامہ نگار منصور بلوچ)ڈاکوؤں کے حملے میں زخمی ہونے والا نوجوان کراچی ہسپتال میں دم توڑ گیا

تفصیل کے مطابق تنگوانی کے قریب ایک ہفتہ قبل ڈاکوؤں سے مزاحمت کے دوران زخمی ہونے والا نوجوان کراچی کےہسپتال میں زخموں کی تاب نہ لاتے ہوئے چل بسا۔

یاد رہےکہ فاروق احمد ڈاہانی جو اپنے گھر واپس آرہا تھا جس کو ڈاکوؤں نے راستے میں لوٹنے کی کوشش کی۔ فاروق احمد نے مزاحمت کی جس پر ڈاکوؤں نے فائرنگ کر دی اور اسے بری طرح زخمی کر دیا۔ اسے فوری طور پر علاج کے لیے کراچی اسپتال منتقل کیا گیا تھا، تاہم وہ جانبر نہ ہوسکا اور ہسپتال میں دم توڑ گیا۔

نوجوان کی موت پر گھر میں کہرام مچ گیا ہے اور اہل خانہ شدید غم و صدمے میں مبتلا ہیں۔

تنگوانی (باغی ٹی وی،نامہ نگار)ڈاکوؤں کا انڈس ہائی وے پر دھاوا، فائرنگ سے ڈرائیور شدید زخمی

تفصیلات کے مطابق تنگوانی میں انڈس ہائی وے پر ڈاکوؤں نے ایک مزدا گاڑی پر دھاوا بول دیا۔ ڈاکوؤں نے اندھا دھند فائرنگ کی، جس کے نتیجے میں گاڑی کا ڈرائیور شدید زخمی ہو گیا۔ زخمی ڈرائیور کو فوری طور پر ورثا نے طبی امداد کے لیے کندھ کوٹ ہسپتال منتقل کر دیا۔

ذرائع کے مطابق واقعہ کے وقت پولیس جائے وقوعہ پر موجود نہیں تھی، جس کا فائدہ اٹھاتے ہوئے ڈاکو فائرنگ کے بعد باآسانی فرار ہو گئے۔ پولیس کی جانب سے ڈاکوؤں کی گرفتاری کے لیے کارروائی کا آغاز کر دیا گیا ہے، تاہم تاحال کوئی پیشرفت سامنے نہیں آئی ہے۔

مزید تفصیلات کا انتظار ہے۔

کندھ کوٹ(باغی ٹی وی ،نامہ نگار) ڈیوائس مافیا کی جانب سے بینظیر انکم سپورٹ پروگرام (BISP) کی مستحق خواتین سے رقوم کی غیر قانونی کٹوتی کا سلسلہ مسلسل دوسرے روز بھی جاری رہا۔

مقامی ذرائع کے مطابق ضلع انتظامیہ کی مبینہ ملی بھگت سے چلنے والے اس فراڈ میں ڈیوائس ایجنٹس مستحق خواتین کو ان کی قسط کی پوری رقم دینے کے بجائے 1000 سے 1500 روپے تک غیر قانونی طور پر کاٹ رہے ہیں۔

مقامی خواتین کا کہنا ہے کہ انہیں پروگرام کے تحت ملنے والی رقم میں سے غیر قانونی کٹوتی کی جا رہی ہے اور اس کا کوئی سدباب نہیں کیا جا رہا۔ ایک متاثرہ خاتون نے بتایا کہ "ہم غریب لوگ ہیں، یہ پیسہ ہمارے لیے بہت اہم ہے، لیکن ایجنٹس ہماری قسطوں میں سے کٹوتی کر کے خود فائدہ اٹھا رہے ہیں۔”

مقامی لوگوں نے الزام عائد کیا ہے کہ اس فراڈ میں ضلع انتظامیہ کے چند اہلکار بھی شامل ہیں، جو ان بدعنوانیوں پر خاموش تماشائی بنے بیٹھے ہیں۔ اس غیر قانونی عمل کی وجہ سے مستحقین کو ان کے جائز حقوق سے محروم رکھا جا رہا ہے۔

عوامی حلقوں کی جانب سے حکام بالا سے مطالبہ کیا گیا ہے کہ فوری طور پر اس معاملے کا نوٹس لیا جائے اور ڈیوائس مافیا کے خلاف سخت کارروائی کی جائے تاکہ مستحق افراد کو ان کا پورا حق مل سکے۔