Category: کشمور

تنگوانی، میہڑ(باغی ٹی وی نامہ نگار) تنگوانی اور میہڑ کے علاقوں میں دو معصوم بچوں کی پانی میں ڈوب کر موت ہو گئی ہے جس نے علاقے میں غم و غصہ کی لہر دوڑا دی ہے۔

تفصیلات کے مطابق تنگوانی میں 5 سالہ نصیبان بروہی کھیلتے ہوئے نہر میں گر گئی۔ اس کے والد نے فوراً بچی کو پانی سے نکال کر سرکاری تعلقہ ہسپتال پہنچایا لیکن ڈاکٹر نہ ہونے کی وجہ سے بچی کو نجی ہسپتال لے جایا گیا جہاں ڈاکٹر نے اسے مردہ قرار دے دیا۔

اسی طرح میہڑ کے نواحی علاقے فریدآباد بیتل میں 7 سالہ زمان چانڈیو سیم نالے میں ڈوب گیا۔ مقامی لوگوں نے اس کی لاش کو نالے سے نکالا لیکن بچے کو بچایا نہیں جا سکا۔

ان دونوں واقعات نے ایک بار پھر صحت کے نظام پر سوالات اٹھا دیے ہیں کہ جب ایک طرف معصوم بچے اپنی جان گنوا رہے ہیں تو دوسری طرف سرکاری ہسپتالوں میں ڈاکٹر کی عدم موجودگی کیوں ہے۔ متاثرہ خاندانوں نے حکومت سے انصاف اور متاثرہ علاقوں میں سہولیات فراہم کرنے کا مطالبہ کیا ہے۔

تنگوانی(باغی ٹی وی ،نامہ نگار منصوربلوچ) تنگوانی کے قریب واقع گاؤں پیر جان باجکانی کے قریب انڑ پل پر چولیانی اور ملک برادریوں کے درمیان زمین کے تنازع پر شدید جھڑپ ہوئی جس کے نتیجے میں فائرنگ کا سلسلہ شروع ہو گیا۔ اس تشدد میں ملک برادری کے معزز شخص استاد رانو ملک اور ایک راہگیر عبد التقی کو قتل کر دیا گیا جبکہ رانو ملک کا بیٹا شدید زخمی ہو گیا۔

دونوں برادریوں کے درمیان زمین کے مالکیت پر کافی عرصے سے اختلاف چلا آ رہا تھا۔ آج جب دونوں فریق اس جگہ پر آمنے سامنے آئے تو بات بگڑ گئی اور فائرنگ شروع ہو گئی، چولیانی برادری نے اندھا دھند فائرنگ کرتے ہوئے ملک برادری پر حملہ کر دیا۔

مقامی لوگوں کا کہنا ہے کہ پولیس اس واقعے کے وقت سے ابھی تک موقع پر نہیں پہنچی اور نہ ہی کوئی قانونی کارروائی عمل میں لائی گئی اس واقعے کے بعد علاقے میں دہشت کا ماحول ہے اور لوگ خوفزدہ ہیں۔

پولیس کی غیر موجودگی اور فریقین کی جانب سے مسلسل فائرنگ سے علاقے میں مزید خونریزی کا خطرہ بڑھ گیا ہے۔ لوگ اپنے گھروں میں قید ہو کر رہ گئے ہیں اور انہیں اپنی جان و مال کا خطرہ ہوچکاہے۔

تنگوانی (باغی ٹی وی نامہ نگارمنصوربلوچ) تنگوانی میں بڑھتی ہوئی بدامنی اور اغوا برائے تاوان کے واقعات کے خلاف شہر میں مکمل طور پر شٹر ڈاؤن ہڑتال کی گئی۔ مختلف سیاسی و سماجی تنظیموں نے مشترکہ طور پر احتجاجی مظاہرہ کیا اور دھرنا دے کر روڈ کو بلاک کر دیا۔

احتجاجی مظاہرین نے پولیس کے خلاف شدید نعرے بازی کرتے ہوئے کہا کہ علاقے میں بدامنی کا راج ہے اور پولیس خاموش تماشائی بنی ہوئی ہے۔ مظاہرین نے مطالبہ کیا کہ حکومت فوری طور پر کارروائی کرکے علاقے میں امن و امان کی بحالی کرے۔

مظاہرے میں سندھ ترقی پسند پارٹی کے ضلعی صدر اکرم باجکانی، جدون سبزوئی، مہتاب ملک، ایس یو پی جے کے رہنماؤں تعقلہ صدر عبدرزاق نندوانی، رحمدل لاشاری، جسقم کے صدر دیشی اعجاز ملک، وقار ملک، دیشی صادق نندوانی، راہ حق کے رہنماشہمور بکرانی، دکاندار ایسوسی ایشن کے صدر لال باجکانی اورشہر کے دیگر سیاسی،سماجی اور مذہبی حلقوں نے شرکت کی۔

تنگوانی (باغی ٹی وی،نامہ نگارمنصوربلوچ) تنگوانی کے رہائشی شہید پولیس اہلکار محمود لاشاری کا جنازہ نماز پہلے ایس ایس پی کشمور کے دفتر میں ادا کیا گیا اور پھر آج تنگوانی شہر میں بھی جنازہ نماز ادا کرنے کے بعد سپرد خاک کر دیا گیا۔

شہید پولیس جوان محمود علی لاشاری نے کل غوث پور کے نزدیک ہائی وے روڈ پر ڈاکوؤں کے ساتھ مقابلے میں جام شہادت نوش کی تھی۔ شہید پولیس اہلکار ڈاکٹر احمد علی لاشاری کا بیٹا تھا۔

شہید کی نماز جنازہ میں ڈی آئی جی پی لاڑکانہ ناصر آفتاب صاحب، ایس ایس پی کشمور، ونگ کمانڈر رینجرز اور قانون نافذ کرنے والے دیگر اداروں کے افسران، میڈیا نمائندگان، مختلف مکتبہ فکر کے رہنماؤں، سول سوسائٹی، عام شہریوں، شہید کے اہلخانہ سمیت بڑی تعداد میں پولیس افسران، جوانان اور رینجرز کے افسران و جوانان نے شرکت کی۔

واضح رہے کہ پولیس کے مطابق ایک ڈاکو بلو بھلکانی بھی پولیس مقابلے میں مارا گیا ہے اور پولیس نے بھلکانی گینگ کے ڈاکوؤں کے ٹھکانوں کو بھی مسمار کر دیا ہے۔

تنگوانی (باغی ٹی وی،نامہ نگارمنصوربلوچ): تنگوانی شہر میں گندگی اور پانی کی نکاسی کا نظام مکمل طور پر ناکام ہو چکا ہے۔ شہر کے مختلف علاقوں میں گندے پانی کے ڈھیر لگے ہوئے ہیں، جس سے شہریوں کی زندگی اجیرن ہو چکی ہے۔

خاص طور پر تنگوانی اسٹیشن روڈ پر گندے پانی کی شدید صورتحال ہے۔ سڑکوں پر پانی جمع ہونے کی وجہ سے گاڑیوں کا چلنا مشکل ہو گیا ہے اور لوگوں کو شدید مشکلات کا سامنا ہے۔

شہر کے لوگوں کا کہنا ہے کہ ٹاؤن انتظامیہ کے پاس لاکھوں روپے کا بجٹ اور کافی عملہ ہونے کے باوجود شہر کی حالت زار انتہائی خراب ہے۔ شہریوں نے ڈپٹی کمشنر کشمور اور دیگر اعلیٰ حکام سے مطالبہ کیا ہے کہ وہ اس نااہل ٹاؤن انتظامیہ کے خلاف سخت کارروائی کریں اور شہر کو صاف ستھرا بنائیں۔

بارشوں نے صورتحال کو مزید بگاڑ دیا ہے اور شہریوں کو شدید مشکلات کا سامنا ہے۔

کندھ کوٹ،باغی ٹی وی (نامہ نگار نختیاراعوان کی رپورٹ) کندھ کوٹ میں سیوریج کے گندے پانی اور کوڑے کرکٹ کے ڈھیروں نے شہر کو بدبو دار بنا دیا ہے۔ گلشیر محلہ وارڈ نمبر 12، گورنمنٹ ایلیمنٹری اسکول روڈ اور ڈگری کالج روڈ سمیت دیگر علاقوں میں سڑکوں پر گندے پانی کے تالاب بن چکے ہیں۔

شہریوں کا کہنا ہے کہ سیوریج کے گندے پانی کی وجہ سے مختلف بیماریاں پھیل رہی ہیں جن میں ملیریا بھی شامل ہے۔ شہریوں نے مزید بتایا کہ میونسپل کمیٹی کا صفائی کرنے والا عملہ 500 سے زائد افراد پر مشتمل ہے لیکن وہ اپنا کام نہیں کر رہے اور صرف تنخواہیں ہی لے رہے ہیں۔

شہریوں نے الزام لگایا ہے کہ میونسپل کمیٹی کے سی ایم او، ایڈمنسٹر اور چیف سپروائزر ملازمین سے رشوت لے کر انہیں کام سے آزاد کر دیتے ہیں جس کی وجہ سے شہر کی صفائی کا نظام مکمل طور پر تباہ ہو چکا ہے۔

شہریوں نے مطالبہ کیا ہے کہ وزیر اعلیٰ سندھ، بلدیاتی سیکریٹری، نیب سکھر اور ڈپٹی کمشنر کشمور اس معاملے کا نوٹس لیں اور میونسپل کمیٹی میں چلنے والی کرپشن کے خلاف کارروائی کریں۔ انہوں نے کہا کہ شہر میں بڑھتی ہوئی گندگی اور سیوریج کے گندے پانی کی نکاسی کا مسئلہ فوری طور پر حل کیا جائے۔

کندھ کوٹ،باغی ٹی وی (نامہ نگار مختیاراعوان )دکان پر حملے کے خلاف احتجاج، انصاف کا مطالبہ

کندھ کوٹ کے گلشیر محلہ میں ایک دکان پر حملے کے خلاف متاثرین نے احتجاج کیا ہے۔ متاثرین محمد عظیم رند اور محمد حنیف رند نے الزام عائد کیا ہے کہ صبح کے وقت جب وہ اپنی دکان کھولنے گئے تو عبدالوہاب سبزوئی دو نامعلوم افراد کے ہمراہ وہاں پہنچا اور انہوں نے دکان پر فائرنگ کرتے ہوئے فرار ہو گئے۔

متاثرین کے مطابق، ملزم نے پہلے بھی ان کے بھائی سے جھگڑا کیا تھا اور اس کی گاڑی کو نقصان پہنچایا تھا۔ متاثرین نے ایس ایس پی کشمور اور دیگر حکام سے مطالبہ کیا ہے کہ ملزم کو فوری طور پر گرفتار کر کے ان کے ساتھ انصاف کیا جائے۔

ایس ایچ او اے سیکشن تھانہ کو اطلاع ملنے پر پولیس موقع پر پہنچی اور ابتدائی تحقیقات کی ہیں۔