تنگوانی (باغی ٹی وی،نامہ نگار منصور بلوچ) تنگوانی کا رہائشی پولیس اہلکار اے ایس آئی قیصر علی بَلکانی کراچی میں ڈاکوؤں سے مقابلے کے دوران شہید ہو گیا۔
وہ تھانہ سعود آباد کورنگی میں تعینات تھے اور ڈکیتی مزاحمت کے دوران تھانہ سکھن کی حدود دس نمبر روڈ پر شہید ہوئے۔
شہید اہلکار کی نعش کراچی سے آبائی گاؤں تنگوانی لائی گئی تو کہرام مچ گیا اور پورے علاقے میں سوگ کی فضا چھا گئی۔
پولیس کے مطابق مقابلے کے دوران اہلکار کا قاتل ڈکیت بھی مارا گیا۔
کندھ کوٹ (نامہ نگار) سندھ ایمپلائز الائنس کی کال پر کندھ کوٹ میں سرکاری ملازمین نے اپنے مطالبات منوانے کے لیے سکولوں، کالجوں اور دفاتر میں مکمل ہڑتال اور تالہ بندی کر دی۔ اس اچانک ہڑتال کے باعث طلبہ اور طالبات کے ساتھ ساتھ دور دراز سے آئے ہوئے لوگ بھی مایوس ہو کر واپس چلے گئے۔
اس موقع پر اساتذہ اور دیگر دفاتر کے ملازمین نے شدید نعرے بازی کرتے ہوئے احتجاجی مظاہرہ کیا۔ مظاہرے کے رہنماؤں میں سید عبدالغفار شاہ، عبدالوھاب چاچڑ، صدر الدین مرھیٹو اور دیگر شامل تھے۔
میڈیا سے بات کرتے ہوئے انہوں نے کہا کہ پینشن اصلاحات کے نام پر سرکاری ملازمین کا معاشی قتل کیا جا رہا ہے، جس کی ہم شدید مذمت کرتے ہیں۔ انہوں نے حکومت سے مطالبہ کیا کہ ملازم دشمن فیصلوں کو فوری طور پر واپس لیا جائے۔
رہنماؤں نے مزید کہا کہ حکومت تمام سرکاری ملازمین کو گروپ انشورنس، سروس اسٹرکچر، ڈی آر او الاؤنس 50 فیصد اور دیگر جائز مطالبات فوراً تسلیم کرے۔ اگر مطالبات نہ مانے گئے تو احتجاج کا دائرہ کار بڑھا دیا جائے گا اور 6 اکتوبر کو کراچی میں بلاول ہاؤس کے سامنے بھرپور احتجاج کیا جائے گا۔
تنگوانی (نامہ نگارمنصوربلوچ) تنگوانی کے قریب تھانہ جمال کی حدود میں نندوانی اور جعفری قبائل کے درمیان راستے پر گزرنے کے تنازعے پر فائرنگ کے تبادلے میں ایک شخص ہلاک اور دوسرا شدید زخمی ہو گیا۔
واقعہ نواحی گاؤں میں پیش آیا جہاں معمولی بات پر جھگڑا شروع ہوا جو بڑھ کر فائرنگ تک پہنچ گیا۔ فائرنگ کے نتیجے میں راحب علی نندوانی موقع پر ہی جاں بحق ہو گئے جبکہ عمران علی نندوانی شدید زخمی ہوئے۔
تھانہ جمال کی پولیس نے فوری کارروائی کرتے ہوئے مقتول اور زخمی کو سول ہسپتال منتقل کیا۔ پولیس نے پوسٹ مارٹم کے بعد مقتول کی لاش ورثاء کے حوالے کر دی۔ اس واقعے کی اب تک کوئی ایف آئی آر درج نہیں کی گئی ہے۔
قتل ہونے والے راحب علی نندوانی کے گھر میں سوگ کا سماں ہے اور ان کے اہل خانہ پر غم کا پہاڑ ٹوٹ پڑا ہے۔
کشمور(باغی ٹی وی،نامہ نگارمختیاراعوان) سندھ حکومت کی ممکنہ سیلاب سے نمٹنے کی تیاریاں مکمل، گڈو بیراج پر صورتحال کا جائزہ
کشمور میں ممکنہ سیلابی صورتحال سے نمٹنے کے لیے سندھ حکومت حرکت میں آ گئی۔ صوبائی وزیر کھیل و زراعت سردار محمد بخش خان مہر اور سابق ایم پی اے شیریار شر صدر آصف علی زرداری، بلاول بھٹو زرداری اور وزیراعلیٰ سندھ کے حکم پر گڈو بیراج پہنچے جہاں انہیں پانی کی موجودہ صورتحال پر بریفنگ دی گئی۔
ایکسین گڈو بیراج جاوید احمد چاچڑ نے بتایا کہ فلڈ کا پانی آج پنجند پہنچ رہا ہے جو دو دن بعد گڈو بیراج سے گزرے گا۔ ان کا کہنا تھا کہ تمام بند مضبوط ہیں اور آبپاشی کا عملہ 24 گھنٹے ڈیوٹی پر موجود ہے۔
صوبائی وزیر محمد بخش مہر نے کہا کہ سندھ حکومت سپر فلڈ کے لیے مکمل طور پر تیار ہے، 9 لاکھ کیوسک کو سپر فلڈ تصور کیا جاتا ہے، تاہم صورتحال قابو میں ہے۔ ان کا مزید کہنا تھا کہ سندھ حکومت پاک فوج، نیوی اور دیگر اداروں کے ساتھ مل کر ریلیف اور ریسکیو سرگرمیوں کے لیے مکمل طور پر تیار ہے، میڈیکل کیمپ اور ریلیف کیمپ قائم کیے جا چکے ہیں۔
کشمور(باغی ٹی وی،نامہ نگار مختیاراعوان)صوبائی محتسب اعلیٰ کے حکم پر ڈسٹرکٹ اکاؤنٹس آفس میں کھلی کچہری، عوامی مسائل سنے گئے
کشمور ایٹ کندھ کوٹ میں صوبائی محتسب اعلیٰ کے حکم پر ڈسٹرکٹ اکاؤنٹس آفس میں عوامی مسائل کے حل کے لیے کھلی کچہری کا انعقاد کیا گیا۔ ریجنل ڈائریکٹر محتسب اعلیٰ زاہد حسین برڑو کی سربراہی میں منعقدہ کچہری میں پنشن، ریٹائرمنٹ اور دیگر معاملات پر عوامی شکایات سنی گئیں۔
عوام کی بڑی تعداد نے اپنے مسائل پیش کیے جن میں پینشن، ریٹائرمنٹ اور کاغذات کی درستگی کے معاملات شامل تھے۔ ڈائریکٹر محتسب اعلیٰ زاہد حسین برڑو نے کہا کہ صوبائی محتسب اعلیٰ کے احکامات پر عوام کے مسائل ان کی دہلیز پر حل کیے جا رہے ہیں تاکہ فوری ریلیف دیا جا سکے۔
کھلی کچہری میں ڈسٹرکٹ اکاؤنٹس آفیسر عبدالرسول ابڑو، اکاؤنٹنٹ غلام مرتضیٰ سیٹھار، سید واجد شاہ، عبدالواحد اور دیگر افسران بھی موجود تھے۔
کشمور (باغی ٹی وی،نامہ نگارمختیار اعوان)محسن انسانیت، سرورِ کائنات حضرت محمد صلی اللہ علیہ وآلہ وسلم کے یوم ولادت کے سلسلے میں عقیدت، احترام اور جوش و خروش سے تقریبات کے انتظامات کا جائزہ لینے کے لیے ڈپٹی کمشنر کشمور آغا شیر زمان جی کی زیرِ صدارت اجلاس منعقد ہوا۔ اجلاس میں اہلسنت جماعت سمیت مختلف مکاتب فکر کے علمائے کرام، ایڈیشنل ڈپٹی کمشنر ون سید غضنفر علی شاہ، ڈی ایس پی سید اصغر علی شاہ، پاک آرمی اور رینجرز کے افسران و دیگر حکام نے شرکت کی۔
ڈپٹی کمشنر نے اجلاس سے خطاب کرتے ہوئے ہدایت دی کہ ربیع الاول کے دوران امن و امان برقرار رکھنے کے لیے مؤثر سیکیورٹی اقدامات کیے جائیں۔ انہوں نے بتایا کہ عوامی شکایات کے فوری حل کے لیے یکم ربیع الاول سے ڈی سی آفس میں 24 گھنٹے فعال کنٹرول روم قائم کر دیا گیا ہے۔
ڈی سی نے میونسپل کمیٹی اور دیگر اداروں کو ہدایت دی کہ صفائی ستھرائی اور سٹریٹ لائٹس کے انتظامات مکمل کیے جائیں، جبکہ تمام حکام جلوسوں کے راستوں کا خود دورہ کریں تاکہ تمام انتظامات وقت سے پہلے مکمل ہو سکیں۔ سیپکو اور سوئی گیس حکام کو ہدایت دی گئی کہ ربیع الاول کے اجتماعات کے دوران لوڈشیڈنگ نہ کی جائے۔ محکمہ صحت کو ہسپتالوں میں ڈاکٹروں اور عملے کی موجودگی یقینی بنانے کا کہا گیا۔ اس موقع پر میونسپل کمیٹی اور ٹاؤن کمیٹی کو کھلے مین ہولز بند کرنے اور سرکاری عمارتوں، گلیوں اور اہم شاہراہوں کو سجانے کی بھی ہدایت کی گئی۔
کندھ کوٹ (باغی ٹی وی ،نامہ نگار مختیاراعوان) 14 اگست یومِ آزادی اور "معرکۂ حق” کی مناسبت سے محکمہ صحت ڈی ایچ او سید اعجاز علی شاہ کی جانب سے سول ہسپتال کے اسکول میں ایک پروقار تقریب کا انعقاد کیا گیا۔ اس تقریب کا مقصد افواجِ پاکستان کو خراجِ تحسین پیش کرنا تھا۔
تقریب میں ڈپٹی کمشنر کشمور کندھ کوٹ آغا شیر زمان، چیئرمین میونسپل کمیٹی میر راشد خان سندرانی، اسسٹنٹ کمشنر سید علی رضا شاہ، ڈی ایس پی سید اصغر علی شاہ، اور دیگر سرکاری افسران کے علاوہ ڈاکٹروں، اساتذہ، ریسکیو 1122 کے اہلکاروں اور شہریوں کی بڑی تعداد نے شرکت کی۔ شرکاء نے "پاکستان زندہ باد” اور "پاک فوج زندہ باد” کے نعرے لگائے، اور ہاتھوں میں بینرز، پلے کارڈز اور قومی پرچم لہرا کر اپنی والہانہ محبت کا اظہار کیا۔
مختلف اسکولوں کے طلباء نے تقاریر اور ٹیبلو کے ذریعے "معرکۂ حق” میں پاک فوج کی فتح کو خراجِ تحسین پیش کیا۔ اس موقع پر محکمہ صحت اور ضلعی انتظامیہ نے صحت کے شعبے میں بہترین خدمات انجام دینے والے ڈاکٹروں اور پیرا میڈیکل اسٹاف کو ایوارڈ شیلڈز سے نوازا، جبکہ میونسپل کمیٹی چیئرمین نے بچوں میں نقد انعامات بھی تقسیم کیے۔
تقریب سے خطاب کرتے ہوئے ڈپٹی کمشنر اور دیگر مقررین نے کہا کہ پاکستان بہت سی قربانیوں کے بعد حاصل ہوا ہے اور آزادی ایک نعمت ہونے کے ساتھ ساتھ ایک بڑی ذمہ داری بھی ہے۔ انہوں نے کہا کہ ہمیں اس دن کو بھرپور جوش و جذبے سے منانا چاہیے اور اپنے اجداد کی قربانیوں کو ہمیشہ یاد رکھنا چاہیے۔ مقررین نے "معرکۂ حق” میں بھارت کو شکست دینے پر پاک فوج کو دل کی گہرائیوں سے خراجِ تحسین پیش کیا۔
تنگوانی (باغی ٹی وی نامہ نگار منصور بلوچ)پنجاب اور ملک کے دیگر شہروں سے نوجوانوں کو ملازمت کا جھانسہ دے کر اغوا، جنسی تشدد اور بیدردی سے قتل کرنے والا سفاک سیریل کلر اور بدنام زمانہ ڈاکو جیکب آباد پولیس کے مبینہ مقابلے میں مارا گیا۔ ہلاک ملزم کی شناخت نصیر عرف سلیم عرف ٹوڈو ولد تگھیو قوم ملک سکنہ گاؤں حضور بخش ملک تنگوانی ضلع کندھکوٹ کے نام سے ہوئی ہے۔
تفصیلات کے مطابق جیکب آباد کے تھانہ سی سیکشن ٹھل کی حدود ماو واہ کے قریب پولیس اور جرائم پیشہ عناصر کے درمیان مقابلہ ہوا۔ فائرنگ کے تبادلے کے بعد نصیر عرف ٹوڈو ہلاک ہو گیا جبکہ پولیس نے اسلحہ برآمد کر لیا۔ ایس ایس پی جیکب آباد محمد کلیم ملک کے مطابق ہلاک ملزم انتہائی خطرناک اور درندہ صفت مجرم تھا، جو پنجاب، سندھ اور دیگر علاقوں سے نوجوانوں کو نوکری کے بہانے اغوا کرتا، جنسی زیادتی کا نشانہ بناتا اور مزاحمت پر گلا کاٹ کر قتل کر دیتا تھا۔
پولیس ترجمان کے مطابق ہلاک ملزم نے حالیہ واردات میں 17 جولائی 2025 کو ملتان سے تعلق رکھنے والے نوجوان وحید احمد شیخ کو اغوا کے بعد گلا کاٹ کر قتل کیا جبکہ محمد سلیمان نامی نوجوان کو شدید زخمی کیا۔ اس سے قبل بھی ملزم کئی وارداتوں میں ملوث رہا ہے، جس میں درج ذیل مقدمات شامل ہیں:
1. ایف آئی آر نمبر 170/2025 تعزیرات پاکستان 365، تھانہ جمشید کوارٹر، ضلع ایسٹ کراچی
2. ایف آئی آر نمبر 07/2020، غیر قانونی اسلحہ، تھانہ سٹی، جیکب آباد
3. ایف آئی آر نمبر 34/2024، قتل، تھانہ غلام سرور سرکی، کشمور
4. ایف آئی آر نمبر 124/2025، قتل و اقدام قتل، تھانہ اے سیکشن ٹھل، جیکب آباد
ایس ایس پی کلیم ملک نے اس کامیاب کارروائی کو جیکب آباد پولیس کی بڑی پیش رفت قرار دیتے ہوئے کہا کہ ملزم جیسے درندہ صفت عناصر کا انجام صرف قانون کی گرفت میں آنا ہے۔ ہلاک ملزم کی لاش کو پوسٹ مارٹم کے لیے تعلقہ اسپتال منتقل کر دیا گیا ہے۔
ترجمان جیکب آباد پولیس کے مطابق تفتیش جاری ہے اور دیگر مغویوں کے بارے میں بھی معلومات حاصل کی جا رہی ہیں۔ پولیس کی اس کارروائی کو علاقے میں سراہا جا رہا ہے۔
تنگوانی/کشمور (باغی ٹی وی نامہ نگار منصور بلوچ)ضلع کشمور کی حدود تنگوانی، کرمپور اور جمال کے علاقوں میں پولیس اور رینجرز نے بدنام زمانہ چولیانی اور جعفری گینگز کے خلاف مشترکہ انٹیلیجنس بیسڈ آپریشن کیا، جو مسلسل دو روز تک جاری رہا۔ کارروائی کے دوران پولیس اور رینجرز کی مشترکہ ٹیموں نے جدید ٹیکنالوجی اور ڈرون حملوں کا استعمال کرتے ہوئے جرائم پیشہ عناصر کو نشانہ بنایا۔
پولیس ترجمان کے مطابق کارروائی کے دوران دو بدنام زمانہ ڈاکو عبدالرزاق چولیانی اور فتح چولیانی ہلاک جبکہ جعفری گینگ سے تعلق رکھنے والے غلام جعفری، داڑو جعفری، انیس بنگلانی اور دیگر تین افراد زخمی ہوئے۔ ان گروہوں کے خلاف کارروائی تھانہ جمال اور کرمپور کی حدود میں کی گئی۔
ایس ایس پی کشمور زبیر نظیر احمد شیخ کے مطابق جعفری اور چولیانی گینگ قتل، اقدام قتل، ڈکیتی، بھتہ خوری اور دیگر سنگین مقدمات میں پولیس کو مطلوب تھے۔ آپریشن کے دوران جرائم پیشہ عناصر کے تین مورچوں اور ٹھکانوں کو نذر آتش کر کے مکمل طور پر مسمار کر دیا گیا۔
دورانِ کارروائی پولیس اور رینجرز کو شدید مزاحمت کا سامنا کرنا پڑا اور کئی مقامات پر فائرنگ کا تبادلہ بھی ہوا، تاہم فورسز نے پیشہ ورانہ مہارت سے علاقہ کلیئر کرایا۔
ترجمان کے مطابق ہلاک اور زخمی ڈاکوؤں کی لاشیں اور افراد تاحال پولیس کی حراست میں نہیں آئے، تاہم مشتبہ مقامات کی نگرانی اور تلاشی کا عمل جاری ہے۔
ایس پی انویسٹیگیشن محمد مراد گھانگھرو، سی آئی اے، تمام ایس ایچ اوز، مددگار فائیٹرز، ریپڈ ریسپانس ٹیموں اور رینجرز کی بھاری نفری اس کارروائی میں شریک تھی۔ ترجمان پولیس کے مطابق یہ آپریشن مکمل امن و امان کے قیام اور جرائم کے خاتمے تک جاری رہے گا۔
تنگوانی (باغی ٹی وی، نامہ نگار منصور بلوچ)تنگوانی شہر اور گردونواح میں چوری کی وارداتیں مسلسل جاری ہیں، شہری عدم تحفظ کا شکار اور کاروباری طبقہ شدید پریشانی میں مبتلا ہے۔ گزشتہ شب تنگوانی شہر میں ایک اور واردات میں چور دکان کا تالا توڑ کر نقدی اور قیمتی سامان لے اڑے، جبکہ پولیس حسبِ روایت غائب رہی۔
تفصیلات کے مطابق میرل نندوانی نامی شہری کی دکان کو رات کی تاریکی میں نشانہ بنایا گیا۔ چور تالے توڑ کر دکان میں داخل ہوئے اور نقد رقم و قیمتی سامان چوری کر کے فرار ہو گئے۔ مقامی لوگوں کا کہنا ہے کہ پولیس تھانہ تنگوانی کی جانب سے نہ کوئی گشت ہے اور نہ ہی چوری کی وارداتوں کو روکنے کے لیے کوئی مؤثر حکمت عملی اپنائی گئی ہے۔
مسلسل وارداتوں کے باعث شہر میں خوف و ہراس کی فضا ہے، جبکہ شہریوں کا کہنا ہے کہ وہ خود کو غیر محفوظ تصور کر رہے ہیں۔ تاجروں نے شکوہ کیا ہے کہ بڑھتی ہوئی وارداتوں نے کاروبار کو متاثر کر دیا ہے، اور اگر یہی صورتحال رہی تو لوگ اپنا کاروبار سمیٹنے پر مجبور ہو جائیں گے۔
شہریوں نے اعلیٰ حکام سے مطالبہ کیا ہے کہ پولیس کی کارکردگی بہتر بنائی جائے اور چوروں کے خلاف فوری کارروائی کر کے انہیں کیفرِ کردار تک پہنچایا جائے، تاکہ عوام کے جان و مال کا تحفظ یقینی بنایا جا سکے۔