Category: کشمور

تنگوانی، (نامہ نگار منصور بلوچ): کراچی سے تنگوانی آنے والی ایک مسافر کوچ کو تنگوانی نہر کے قریب ہائی وے روڈ پر ڈاکوؤں نے لوٹ لیا اور باآسانی فرار ہونے میں کامیاب ہو گئے۔ عینی شاہدین کے مطابق واقعے کے وقت قریبی گشتی پولیس موبائل موجود تھی لیکن انہوں نے کوئی مزاحمت نہیں کی اور خاموشی سے تماشا دیکھتے رہے۔ اس واقعے پر مسافروں نے شدید احتجاج کرتے ہوئے سڑک بلاک کر دی اور پولیس کے خلاف نعرے بازی کی، جبکہ لوٹا ہوا سامان واپس دلوانے کا مطالبہ کیا۔

تنگوانی نہر کے پاس ہائی وے روڈ پر ڈاکوؤں نے مسافر کوچ کو روکا اور لوٹ مار شروع کر دی۔ ڈاکوؤں نے مسافروں، جن میں مرد، عورتیں، بزرگ اور بچے شامل تھے، سے زیورات، نقدی، موبائل فون اور دیگر قیمتی سامان چھین لیا۔ لوٹا ہوا سامان انہوں نے اپنی ریڑھی پر رکھا اور بلا کسی مزاحمت کے فرار ہو گئے۔

اس واقعے کے بعد پولیس کی کارکردگی پر شدید سوالات اٹھ رہے ہیں۔ عینی شاہدین کا کہنا ہے کہ پولیس کی گشتی موبائل جائے وقوعہ کے قریب ہی موجود تھی لیکن ڈاکوؤں کو روکنے یا ان کا پیچھا کرنے کی کوئی کوشش نہیں کی گئی۔ پولیس کی جانب سے مکمل خاموشی دیکھنے میں آئی، جس پر مسافروں اور مقامی افراد میں شدید غم و غصہ پایا جاتا ہے۔

ڈکیتی کا شکار ہونے والے مسافروں نے روڈ بلاک کر کے پولیس کے خلاف شدید احتجاج کیا۔ انہوں نے پولیس کی غیر ذمہ داری کے خلاف نعرے بازی کی اور مطالبہ کیا کہ ان کا لوٹا ہوا سامان فوری طور پر واپس دلوایا جائے اور ڈاکوؤں کو گرفتار کیا جائے۔ یہ واقعہ تنگوانی میں بڑھتے ہوئے جرائم اور پولیس کی مبینہ لاپرواہی کو نمایاں کرتا ہے۔

تنگوانی،(باغی ٹی وی،نامہ نگار منصور بلوچ) تنگوانی کے قریب پولیس موبائل پر ڈاکوؤں کے حملے کے نتیجے میں ایک پولیس اہلکار نورخان جکرانی زخمی ہو گیا جبکہ جوابی کارروائی میں ایک بدنام زمانہ ڈاکو منظور بھلکانی عرف منو بھلکانی زخمی حالت میں گرفتار کر لیا گیا۔ اس کا ایک ساتھی فرار ہونے میں کامیاب ہو گیا۔

تفصیلات کے مطابق تنگوانی کے قریب پولیس موبائل معمول کے گشت پر تھی کہ جمال تھانے کی حدود میں ڈکیتی کی نیت سے کھڑے ڈاکوؤں نے پولیس موبائل پر اندھا دھند فائرنگ کر دی۔ فائرنگ کے نتیجے میں پولیس اہلکار نورخان جکرانی شدید زخمی ہو گیا۔ پولیس کی جوابی فائرنگ سے دو ڈاکو زخمی ہوئے جن میں سے بدنام زمانہ ڈاکو منظور بھلکانی عرف منو بھلکانی کو پولیس نے زخمی حالت میں گرفتار کر لیا۔ اس کا دوسرا ساتھی موقع سے فرار ہونے میں کامیاب ہو گیا۔

زخمی پولیس اہلکار اور زخمی ڈاکو کو فوری طور پر علاج کے لیے اسپتال منتقل کر دیا گیا ہے۔ واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور ڈاکوؤں کے ٹھکانوں اور رہائش گاہوں کو گھیرے میں لے لیا۔ پولیس اور ڈاکوؤں کے درمیان وقفے وقفے سے فائرنگ کا تبادلہ جاری ہے۔

تنگوانی (باغی ٹی وی،نامہ نگارمنصوربلوچ) تنگوانی کے نواحی گاؤں شیر دل کھوسو میں چوروں نے بھینس چوری کے دوران مزاحمت پر فائرنگ کر کے گھر کے مالک کو شدید زخمی کر دیا۔ واقعہ تھانہ تنگوانی کی حدود میں پیش آیا۔

تفصیلات کے مطابق ولایت علی لاشاری کے گھر میں رات گئے نامعلوم چور داخل ہوئے اور بھینس چوری کر کے فرار ہونے لگے۔ اس دوران اہلِ خانہ کی آنکھ کھل گئی، جس پر انہوں نے چوروں کا پیچھا کیا۔ ہاتھا پائی کے دوران چوروں نے فائرنگ کر دی، جس کے نتیجے میں احمد لاشاری نامی نوجوان شدید زخمی ہو گیا۔

زخمی کو فوری طبی امداد کے لیے سکھرہسپتال منتقل کر دیا گیا ہے۔ پولیس نے موقع پر پہنچ کر تفتیش شروع کر دی ہے، تاہم تاحال ملزمان گرفتار نہیں ہو سکے۔

تنگوانی (باغی ٹی وی، نامہ نگار منصور بلوچ) تنگوانی کے قریب جمال تھانے کی حدود میں کار چھیننے کی کوشش خونریز تصادم میں بدل گئی، ڈاکوؤں اور کار سواروں کے درمیان فائرنگ کے تبادلے میں دو ڈاکو موقع پر ہلاک جبکہ تین شہری شدید زخمی ہو گئے۔

تفصیلات کے مطابق کرمپور روڈ لنک پر نامعلوم ڈاکوؤں نے ایک گاڑی کو روک کر چھیننے کی کوشش کی، تاہم گاڑی میں سوار افراد نے مزاحمت کی جس پر ڈاکوؤں نے فائرنگ شروع کر دی۔ جوابی فائرنگ کے نتیجے میں دو ڈاکو، عیدن نندوانی اور حامد نندوانی موقع پر ہلاک ہو گئے۔

ڈاکوؤں کی فائرنگ سے کار سوار تین افراد — الیاس جعفری، میر حسن جعفری اور علی گل جعفری — شدید زخمی ہو گئے، جنہیں فوری طور پر کرمپور سول اسپتال منتقل کر دیا گیا۔

واقعے کے بعد جمال تھانے کی پولیس موقع پر پہنچ گئی اور شواہد اکٹھے کر کے تفتیش شروع کر دی۔ پولیس کے مطابق ڈاکوؤں کا تعلق جرائم پیشہ گروہ سے ہوسکتا ہے، مزید تحقیقات جاری ہیں۔

تنگوانی (باغی ٹی وی، نامہ نگار منصور بلوچ) تیز رفتار کار نے لوٹ مار کی کوشش کرنے والے دو ڈاکو کچل دیے، دو فرار.جمال تھانہ کی حدود میں ڈاکوؤں کی واردات ناکام، کار سوار اور ڈاکو ایک ہی قبیلے سے تعلق رکھتے ہیں

تنگوانی کے قریب جمال تھانے کی حدود میں واقع زور شاخ لنک روڈ پر ڈاکوؤں کی لوٹ مار کی کوشش اس وقت ناکام ہو گئی جب ایک تیز رفتار کار نے انہیں روند ڈالا۔ واردات کے دوران ڈاکوؤں نے گاڑی کو روکنے کی کوشش کی، تاہم گاڑی کے بریک فیل ہونے کے باعث وہ ڈاکوؤں پر چڑھ گئی۔

حادثے میں دو ڈاکو، سبزل نندوانی اور علی حسن نندوانی شدید زخمی ہو گئے، جو بعد ازاں زخموں کی تاب نہ لاتے ہوئے موقع پر ہی دم توڑ گئے، جبکہ ان کے دو ساتھی فرار ہونے میں کامیاب ہو گئے۔

عینی شاہدین کے مطابق حادثے کا شکار ہونے والی کار بھی نندوانی قبیلے کے افراد کی تھی، جو رفتار زیادہ ہونے کی وجہ سے الٹ گئی۔ کار میں سوار دو افراد بھی زخمی ہوئے ہیں جنہیں طبی امداد دی جا رہی ہے۔ تصادم کے نتیجے میں گاڑی مکمل طور پر تباہ ہو گئی۔

واقعے کی مزید تحقیقات پولیس کی جانب سے جاری ہیں جبکہ علاقے میں خوف و ہراس پھیل گیا ہے۔ ابتدائی اطلاعات کے مطابق ڈاکو اور کار سوار دونوں کا تعلق نندوانی قبیلے سے بتایا جا رہا ہے، جس پر مزید پہلوؤں سے جانچ کی جا رہی ہے۔

تنگوانی (باغی ٹی وی، نامہ نگار منصور بلوچ) تنگوانی کے قریب تھانہ ڈیرہ سر کی حدود میں واقع ٹھل-کندھ کوٹ ہائی وے پر سوکڑ اسٹاپ کے قریب ڈاکوؤں نے پولیس چوکی کے سامنے دن دیہاڑے مسافر گاڑیوں کو روک کر مسافروں سے نقدی، موبائل فون اور دیگر قیمتی سامان لوٹ لیا، جب کہ پولیس خاموش تماشائی بنی رہی اور کوئی کارروائی نہ کی۔

عینی شاہدین کے مطابق ڈاکو دونوں اطراف سے آنے والی گاڑیوں کو روکتے رہے اور لوٹ مار کے بعد با آسانی فرار ہو گئے۔ پولیس کی جانب سے ڈاکوؤں کے خلاف کسی قسم کی مزاحمت یا تعاقب نہیں کیا گیا، جس پر مشتعل مسافروں نے شدید گرمی میں سڑک پر احتجاجی دھرنا دیا اور روڈ کو بلاک کر دیا۔

مظاہرین نے مطالبہ کیا کہ پولیس چوکی کے سامنے ہونے والی اس واردات پر فوری نوٹس لے کر ڈاکوؤں کو گرفتار کیا جائے اور مسافروں کو تحفظ فراہم کیا جائے۔ مظاہرین کا کہنا تھا کہ اگر ملزمان کو جلد گرفتار نہ کیا گیا تو احتجاج کا دائرہ وسیع کیا جائے گا۔

کشمور ( باغی ٹی وی رپورٹ) کشمور کے نواحی علاقے بڈانی کے قریب مزاری پل پر قبائلی دشمنی کے ایک دل دہلا دینے والے واقعے میں بھٹو برادری سے تعلق رکھنے والے نوجوان کو بچوں کے سامنے بےدردی سے قتل کر دیا گیا۔

تفصیلات کے مطابق بڈانی کشمور لنک روڈ پر بنگوار اور بھٹو برادری کے درمیان جاری خونی تنازعے کے نتیجے میں بنگوار برادری کے موٹر سائیکل سوار مسلح افراد نے فائرنگ کر کے نوجوان اللہ جیوایو ولد امان اللہ بھٹو کو اس وقت گولیاں مار کر ہلاک کر دیا جب وہ کشمور سے اپنے بچوں کے ہمراہ بڈانی واپس جا رہا تھا۔ حملہ آور فائرنگ کے بعد موقع سے فرار ہونے میں کامیاب ہو گئے۔

واقعے کے بعد علاقے میں شدید خوف و ہراس پھیل گیا ہے جبکہ مقتول کے ورثاء نے لاش کو اٹھا کر قریبی تھانے پہنچایا، جہاں ابتدائی قانونی کارروائی کے بعد لاش کو پوسٹ مارٹم کے لیے اسپتال منتقل کر دیا گیا۔

پولیس نے واقعے کی تفتیش شروع کر دی ہے تاہم تاحال کوئی گرفتاری عمل میں نہیں آ سکی۔ ذرائع کا کہنا ہے کہ دونوں برادریوں کے درمیان پرانا زمینی تنازعہ چلا آ رہا ہے، جو اب سنگین نوعیت اختیار کر چکا ہے۔ عوامی و سماجی حلقوں نے اس دل خراش واقعے کی مذمت کرتے ہوئے اعلیٰ حکام سے فوری نوٹس اور ملزمان کی گرفتاری کا مطالبہ کیا ہے۔