Category: کشمور

تنگوانی ،باغی ٹی وی(نامہ نگارمنصوربلوچ) مویشیوں کے کاروبار پر تصادم، فائرنگ سے نوجوان اور گائے جاں بحق

تنگوانی کے قریب جمال تھانے کی حدود میں گاؤں عبدالصمد بجارانی میں مویشیوں کے کاروبار پر بهیو اور شیخ برادری کے درمیان تصادم، فائرنگ سے نوجوان اور گائے جاں بحق۔

تفصیلات کے مطابق بهیو برادری کے مسلح افراد نے جدید اسلحے سے شیخ برادری کے گھر پر فائرنگ کر دی، جس کے نتیجے میں شیخ برادری کا نوجوان گورو شیخ اور ایک گائے گولیوں کا نشانہ بن کر موقع پر دم توڑ گئے۔

واقعے کی اطلاع ملتے ہی جمال پولیس موقع پر پہنچ گئی اور لاش کو تحویل میں لے کر پوسٹ مارٹم کے لیے منتقل کر دیا گیا۔ پولیس مزید تحقیقات میں مصروف ہے۔تاہم ذرائع کا کہنا ہے کہ پولیس نے ابھی تک کوئی ایف آئی آر درج نہیں کی.

تنگوانی (نامہ نگار منصور بلوچ) سندھ بلوچستان بارڈر کے علاقے 138 آر ڈی غریب آباد میں بگٹی قبیلے کے دو گروپوں، باخلانی اور ہیجوانی، میں تصادم کے نتیجے میں ایک شخص قتل ہوگیا۔

خبر کے مطابق دونوں فریقوں کے درمیان فائرنگ کا تبادلہ ہوا جس میں ظفر خان ہیجوانی بگٹی موقع پر ہی قتل ہوگیا۔ ذرائع کا کہنا ہے کہ بگٹی قبیلے کے دونوں فریقین میں پرانے تنازعے پر جھگڑا چل رہا تھا جس کی وجہ سے یہ افسوسناک واقعہ پیش آیا۔ پولیس نے موقع پر پہنچ کر تحقیقات کا آغاز کردیا ہے۔

تنگوانی (باغی ٹی وی، نامہ نگار منصور بلوچ) تنگوانی تھانے کی حدود سے دو ماہ قبل اغوا کیے گئے دو مغوی گل حسن کھوسو اور مورزادو کھوسو بحفاظت بازیاب ہو کر اپنے گھروں کو پہنچ گئے، جس پر ورثاء میں خوشی کی لہر دوڑ گئی۔

ذرائع کے مطابق مغویوں کے اہل خانہ نے کلام پاک کچے کے ڈاکوؤں کے پاس لے جاکر ان کی رہائی کے لیے دعا کی، جس کے بعد مغوی بازیاب ہو گئے۔ تاہم پولیس اس معاملے سے لاعلم دکھائی دے رہی ہے اور بازیابی کے حوالے سے کسی قسم کا بیان جاری نہیں کیا گیا۔

مغویوں کے ورثاء کا کہنا ہے کہ انہوں نے متعدد بار پولیس سے مدد طلب کی، مگر کوئی پیش رفت نہ ہوئی۔ اہلِ علاقہ نے حکومت اور قانون نافذ کرنے والے اداروں سے مطالبہ کیا ہے کہ اغوا کی وارداتوں پر قابو پایا جائے اور عوام کو تحفظ فراہم کیا جائے۔

تنگوانی ،باغی ٹی وی(نامہ نگارمنصور بلوچ) گاؤں نور اللہ خان باجکانی کے قریب ڈاکوؤں کی موٹر سائیکل چھیننے کی کوشش مزاحمت پر خونریز تصادم میں بدل گئی۔ تنگوانی تھانے کی حدود گہنا نہر پر ڈاکوؤں نے تین نوجوانوں سے بائیک چھیننے کی کوشش کی، مزاحمت پر فائرنگ کر کے عبدالنبی، عابد علی، اور اشفاق احمد کو شدید زخمی کر دیا۔

گولیوں کی آواز سن کر گاؤں کے رہائشیوں نے دو ڈاکوؤں کو پکڑ کر تنگوانی پولیس کے حوالے کر دیا۔ زخمیوں کو فوری طور پر اسپتال منتقل کر دیا گیا جبکہ عبدالنبی کی مدعیت میں ایف آئی آر درج کر کے پولیس نے گرفتار ڈاکوؤں کے خلاف تفتیش شروع کر دی ہے۔

پولیس ریکارڈ چیک کر کے ڈاکوؤں کے دیگر جرائم کی تفصیلات بھی حاصل کر رہی ہے۔ عوام نے مقامی افراد کی جرات اور پولیس کے فوری ایکشن کی تعریف کی ہے۔

تنگوانی،باغی ٹی وی (نامہ نگارمنصوربلوچ) گولیوں سے چھلنی نوجوان کی لاش برآمد،حدود کا مسئلہ کسی تھانہ کی پولیس موقع پر نہ پہنچی

تفصیل کے مطابق تنگوانی کے قریب گاؤں نائب بھلکانی کے مچھلی فارم کے قریب ایک نامعلوم نوجوان کی گولیوں سے چھلنی لاش برآمد ہوئی، تاہم پولیس حدود کے تنازع کے باعث لاش تاحال جائے وقوع پر موجود ہے۔

ذرائع کے مطابق لاش کے پاس سے برآمد شناختی کارڈ پر نام "اقبال ولد علی دوست، رہائشی بخشاپور” درج ہے۔ مقامی افراد نے فوری طور پر پولیس کو اطلاع دی، لیکن مختلف تھانوں کے درمیان حدود کے تنازعے کے باعث کارروائی تعطل کا شکار ہے۔

علاقہ مکینوں نے فوری تحقیقات اور لاش کو ورثا کے حوالے کرنے کا مطالبہ کیا ہے۔

تنگوانی،باغی ٹی وی (نامہ نگار منصور بلوچ) تنگوانی میں ڈاکوؤں کی فائرنگ کے واقعے پر شہری نے سخت ردعمل دیتے ہوئے منتخب نمائندوں، وڈیروں اور ڈاکوؤں کے سہولت کاروں کو ویڈیو لنک پر وارننگ دے دی۔

سیاسی و سماجی رہنما حاجی شیر خان کھوسو نے ایم این اے شبیر بجارانی، ایم پی اے سردار محبوب علی بجارانی، سردار سلیم جان مزاری اور سردار عابد خان سندرانی سمیت دیگر شخصیات کو مخاطب کرتے ہوئے کہا کہ تنگوانی شہر میں ڈاکوؤں کی جانب سے شوروم پر اندھا دھند فائرنگ ناقابل برداشت ہے۔

حاجی شیر خان کھوسو نے خبردار کیا کہ اگر ڈاکوؤں کو نہ روکا گیا تو قبائلی تنازع شدت اختیار کر سکتا ہے اور ہم بھی سخت اقدامات اٹھانے پر مجبور ہوں گے۔ انہوں نے مزید کہا کہ ہم پہلے بھی ان ڈاکوؤں کی شکایت کر چکے ہیں، مگر کوئی کارروائی نہیں کی گئی۔

شہریوں نے واقعے کی شدید مذمت کرتے ہوئے فوری امن و امان کے قیام کا مطالبہ کیا ہے۔