Category: کھیل

تفصیلات کے مطابق کے سی سی اے اسٹیڈیم کراچی میں کھیلے گئے میچ میں سنٹرل پنجاب نے خیبرپختونخوا کو 35 رنز سے شکست دے دی۔ 5 رنز کی سبقت سے اپنی دوسری اننگز کا آغاز کرنے والی سنٹرل پنجاب کی پوری ٹیم میچ کے آخری روز 231 رنز بناکر آؤٹ ہوگئی۔عمران ڈوگر74 اور بلاول اقبال نے ناٹ آؤٹ 55 رنز کی اننگز کھیلیں۔ 237 رنز کے تعاقب میں کے پی کی پوری ٹیم 56.2 اوورز میں 201 رنز بناکر آؤٹ ہوگئی۔ پہلی اننگز میں 5 وکٹیں حاصل کرنے والے کامران افضل نے دوسری اننگز میں 4 کھلاڑیوں کو آؤٹ کیا۔ اوپنر مصدق احمد 70 اور مہران ابراہیم 43 رنز بناکر آؤٹ ہوئے۔ اس سے قبل سنٹرل پنجاب کے 138 رنز کے جواب میں کے پی کی پوری ٹیم 133 رنز پر ڈھیر ہوگئی تھی۔

ٹی ایم سی گراؤنڈ کراچی میں کھیلے گئے میچ میں جلات خان کی عمدہ باؤلنگ کی بدولت بلوچستان نے ناردرن کوایک اننگز اور 63 رنز سے ہرادیا۔ دوسری اننگز میں 67 رنز کے عوض 7 کھلاڑیوں کو پویلین کی راہ دکھانے والے اسپنر جلات خان نے میچ میں کُل 10 وکٹیں حاصل کیں۔ 206 رنز کے خسارے سے اپنی دوسری اننگز کا آغاز کرنے والی ناردرن کی پوری ٹیم میچ کے آخری روز 143 رنز پر ڈھیر ہوگئی۔ناردرن کے صرف تین بلے باز ڈبل فگرز میں داخل ہوسکے، ضیاد خان نے 81 رنز بنائے۔حیات اللہ نے میچ میں 5 وکٹیں حاصل کیں۔اس سے قبل ناردرن کے 169 رنز کے جواب میں بلوچستان نے مقررہ 83 اوورز میں 8 وکٹوں کے نقصان پر 375 رنز بنائےتھے۔ اویس ضیاء نے سب سے زیادہ 108 اور اکبر الرحمٰن نے 79 رنز بنائے۔ شہباز خان 62 رنز بناکر ناٹ آؤٹ رہےتھے۔ ناردرن کے فرحان شفیق نے 4 جبکہ راجہ فرزان نے 3 وکٹیں حاصل کی تھیں۔

اسٹیٹ بنک اسٹیڈیم کراچی میں کھیلے گئے میچ میں سندھ نے سدرن پنجاب کو 8 وکٹوں سے ہرادیا۔ سندھ نے میچ کے آخری روز 145 رنز کا مطلوبہ ہدف 38.1 اوورز میں 2 وکٹوں کے نقصان پر حاصل کرلیا۔ جاہد علی 55 اور دانش عزیز 36 رنز بناکر ناٹ آؤٹ رہے۔ سعد خان نے 42 گیندوں پر 41 رنز بنائے۔اس سے قبل سدرن پنجاب نے 7 وکٹوں کے نقصان پر 149 رنز سے میچ کے آخری روز اپنی دوسری اننگز کا دوبارہ آغاز کیا تو اس کی پوری ٹیم 167 رنز پر آؤٹ ہوگئی۔ پہلی اننگز میں 23 رنز کی سبقت کی بنیاد پر سدرن پنجاب نے سندھ کو جیت کے لیے 145 رنز کا ہدف دیا تھا۔ابرار احمد نے 53 رنز کے عوض 5 کھلاڑیوں کو پویلین کی راہ دکھائی۔انہوں نے میچ میں مجموعی طور پر 8 وکٹیں اپنے نام کیں۔پہلی اننگز میں سدرن پنجاب کے 126 رنز کے جواب سندھ کی پوری ٹیم اپنی پہلی اننگز میں 149 رنز بناکر آؤٹ ہوگئی تھی۔سدرن پنجاب کے علی عثمان نے 34 رنز کے عوض 6 کھلاڑیوں کو پویلین کی راہ دکھائی تھی۔

سپورٹس بورڈ پنجاب وائٹ نے سپورٹس بورڈ پنجاب گرین کو ہرادیا،سیکرٹری یوتھ افیئرز اینڈ سپورٹس پنجاب احسان بھٹہ،ڈی جی سپورٹس پنجاب عدنان ارشداولکھ نے ٹرافیاں دیں
محکمہ یوتھ افیئرز اینڈ سپورٹس پنجاب سیرت طیبہ ﷺپر سیمینار، محافل نعت منعقد کررہا ہے،کھیلوں کے میدان آباد ہورہے ہیں، سیکرٹری یوتھ افیئرز اینڈ سپورٹس پنجاب احسان بھٹہ
کورونا کی دوسری لہر آنے پر ایس او پیز پر سختی پر عمل کرتے ہوئے سماجی فاصلے کو مدنظر رکھتے ہوئے سپورٹس کرائی جارہی ہے، ڈی جی سپورٹس پنجاب عدنان ارشد اولکھ

سپورٹس بورڈ پنجاب کے زیراہتمام ہفتہ عید میلاد النبیﷺ کے سلسلہ میں نشترپارک سپورٹس کمپلیکس کے جمنیزیم ہال میں سپورٹس بورڈ پنجاب وائٹ اور سپورٹس بورڈ پنجاب گرین کے درمیان ہینڈ بال کا نمائشی میچ ہوا جو سپورٹس بورڈ وائٹ نے سپورٹس بورڈ پنجاب گرین کو 15-12سے ہرا کرجیت لیا، سیکرٹری یوتھ افیئرز اینڈ سپورٹس پنجاب احسان بھٹہ اور ڈائر یکٹر جنرل سپورٹس پنجاب عدنان ارشد اولکھ نے کامیاب ٹیموں میں ٹرافیاں تقسیم کیں، اس موقع پر میڈیا سے گفتگو کرتے ہوئے سیکرٹری یوتھ افیئرز اینڈ سپورٹس پنجاب احسان بھٹہ نے کہا ہے کہ ہفتہ عید میلادالنبیﷺ کے سلسلہ میں صوبہ بھر میں تقریبات جاری ہیں، محکمہ یوتھ افیئرز اینڈ سپورٹس پنجاب کے زیراہتمام نبی پاک ﷺ کی حیات طیبہ پر سیمینار، محافل نعت و تقاریر کے مقابلے منعقد کئے جارہے ہیں، کورونا کی وجہ سے کھیلوں کی سرگرمیاں مارچ سے ستمبر تک معطل رہیں، اب حکومتی ایس او پیز کے تحت کھیلوں کا آغاز کردیا ہے، کھیلوں کے میدان دوبارہ آباد ہورہے ہیں، سیکرٹری یوتھ افیئرز اینڈ سپورٹس پنجاب احسان بھٹہ نے مزید کہا کہ ای لائبریری لاہور میں مقابلہ قرات اور نعت منعقد کرایا ہے، کورونا وباء کی وجہ سے ملک سمیت دنیا بھر میں تمام سرگرمیاں ٹھپ ہوکر رہ گئی تھیں، حکومتی ایس او پیز کے تحت کھیلوں کی سرگرمیاں شروع کردی ہیں تاکہ کورونا کی وجہ سے گھروں تک محدود رہنے والے کھلاڑی دوبارہ سپورٹس کی سرگرمیاں شروع کرسکیں، فی الحال نان ٹچ ایونٹس کرارہے ہیں،ڈائر یکٹر جنرل سپورٹس پنجاب عدنان ارشد اولکھ نے کہا کہ کورونا کی دوسری لہر آنے پر ایس او پیز پر سختی پر عمل کرتے ہوئے سماجی فاصلے کو مدنظر رکھتے ہوئے سپورٹس کرائی جارہی ہے، مستقبل کے سپورٹس ایونٹس کا شیڈول بنا رہے ہیں، کورونا کے بعد سپورٹس کے ایونٹس بھرپور انداز میں کرائیں گے، انہوں نے مزید کہا کہ ہفتہ عید میلادالبنی ؐ کے تحت ڈویژن، ضلع اور تحصیل کی سطح پر تقریبات منعقد کی جارہی ہیں، اس کے ساتھ ساتھ سپورٹس کے ایونٹس بھی کرارہے ہیں، 7ماہ بعد احتیاطی تدابیر اختیار کرتے ہوئے سپورٹس شروع کردی ہے، اس کا مقصد کھلاڑیوں کو وارم اپ کرنا ہے تاکہ وہ آئندہ ہونیوالے قومی و بین الاقوامی ایونٹس کی تیاری کرسکیں، انہوں نے مزید کہا کہ مختلف شہروں میں سیرت نبیﷺ پر تقریبات منعقد ہورہی ہے، نعت کے مقابلے بھی ہورہے ہیں، ان تقریبات کو منعقد کرنے کا مقصد حضرت محمد ﷺ سے اظہار عقیدت اور محبت کرنا ہے، سپورٹس سرگرمیوں میں حکومت پنجاب کی جانب سے جاری کئے گئے ایس او پیز پر مکمل عملدآمد کیا جا رہا ہے۔

جمنیزیم ہال آمد پر سیکرٹری یوتھ افیئرز اینڈ سپورٹس پنجاب احسان بھٹہ اور ڈائر یکٹر جنرل سپورٹس پنجاب عدنان ارشد اولکھ کا پرتپاک استقبال کیا گیا، ان کو گلدستے پیش کئے گئے، کھلاڑیوں نے تالیاں بجا کر خوش آمدید کہا، کھلاڑیوں کا مہمانان خصوصی سے تعارف کرایا گیا، کھلاڑیوں نے ان کے ساتھ گروپ فوٹوز بھی بنوائے، اس موقع پر ڈائریکٹر سپورٹس محمد حفیظ بھٹی، ڈپٹی ٖڈائریکٹر سپورٹس چاند پروین، ڈپٹی ڈائریکٹر پلاننگ رؤف علی باجوہ ودیگر بھی موجود تھے۔

کراچی (باغی ٹی وی) کے سی سی اے اسٹیڈیم کراچی میں جاری میچ میں سنٹرل پنجاب نے اپنی دوسری اننگز میں خیبرپختونخوا کے خلاف 207 رنز کی سبقت حاصل کرلی ہے جبکہ اس کی دو وکٹیں ابھی باقی ہیں۔ 5 رنز کی سبقت سے اپنی دوسری اننگز کا آغاز کرنے والی سنٹرل پنجاب کی ٹیم نےمیچ کے دوسرے روز کھیل کے اختتام پر 8 وکٹوں کے نقصان پر 202 رنز بنالیے ہیں۔عمران ڈوگر 74 اور فرحان خان 45 رنز بناکر آؤٹ ہوئے۔ اسپنر آصف آفریدی 4 وکٹیں حاصل کرچکے ہیں۔ اس سے قبل سنٹرل پنجاب کے 138 رنز کے جواب میں کے پی کی پوری ٹیم 133 رنز پر ڈھیر ہوگئی۔ کامران افضل نے 49 رنز کے عوض 5 وکٹیں حاصل کیں۔ محمد علی اور اعتزاز حبیب خان نے 2،2 کھلاڑیوں کو آؤٹ کیا۔

ٹی ایم سی گراؤنڈ کراچی میں جاری میچ میں ناردرن کی ٹیم اپنی دوسری اننگز میں 94 رنز کے خسارے کا شکار ہے۔ 206 رنز کے خسارے سے اپنی دوسری اننگز کا آغاز کرنے والی ناردرن کی ٹیم نےمیچ کے دوسرے روزکھیل کے اختتام پانچ وکٹوں کے نقصان پر 112 رنز بنالیے ہیں۔ ضیاد خان 59 اور جمال انور بغیر کوئی رنز بنائے کریز پر موجود ہیں۔پہلی اننگز میں 3 وکٹیں حاصل کرنے والے جلات خان دوسری اننگز میں اب تک 5 وکٹیں حاصل کرچکے ہیں۔اس سے قبل ناردرن کے 169 رنز کے جواب میں بلوچستان نے مقررہ 83 اوورز میں 8 وکٹوں کے نقصان پر 375 رنز بنائے۔ اویس ضیاء نے سب سے زیادہ 108 اور اکبر الرحمٰن نے 79 رنز بنائے۔ شہباز خان 62 رنز بناکر ناٹ آؤٹ رہے۔ ناردرن کے فرحان شفیق نے 4 جبکہ راجہ فرزان نے 3 وکٹیں حاصل کیں۔

اسٹیٹ بنک اسٹیڈیم کراچی میں جاری میچ میں سدرن پنجاب کو دوسری اننگز میں سندھ کے خلاف 126 رنز کی سبقت حاصل ہوچکی ہے جبکہ اس کی ابھی 3 وکٹیں باقی ہیں۔ 23 رنز کے خسارے سے اپنی دوسری اننگز کا آغاز کرنے والی سدرن پنجاب کی ٹیم نے میچ کے دوسرے روز کھیل کے اختتام پر 7 وکٹوں کے نقصان پر 149 رنز بنالیے ہیں۔ رمیز عالم 26 اور ضیاء الحق 18 رنز بناکر کریز پر موجود ہیں۔ پہلی اننگز میں تین وکٹیں حاصل کرنے والے سندھ کے ابرار احمد دوسری اننگز میں بھی تین کھلاڑیوں کو آؤٹ کرچکے ہیں۔ اس سے قبل سدرن پنجاب کے 129 رنز کے جواب سندھ کی پوری ٹیم اپنی پہلی اننگز میں 149 رنز بناکر آؤٹ ہوئی۔ علی عثمان نے 34 رنز کے عوض 6 کھلاڑیوں کو پویلین کی راہ دکھائی۔ شہزر محمد 47 رنز بناکر آؤٹ ہوئے۔

قائداعظم ٹرافی فرسٹ الیون ٹورنامنٹ کا دوسرا راؤنڈ مکمل،سدرن پنجاب نے بلوچستان کو 4 وکٹوں سے ہرادیاسندھ اور خیبرپختونخوا کے درمیان میچ ڈرا ہوگیا

تفصیلات کے مطابق نیشنل اسٹیڈیم کراچی میں کھیلے گئے میچ کےآخری روز آغا سلمان کی 42 ناٹ آؤٹ رنز کی اننگز نے سدرن پنجاب کو بلوچستان کے خلاف 4 وکٹوں سے کامیابی دلادی۔سدرن پنجاب کی یہ ایونٹ میں مسلسل دوسری کامیابی ہے۔ میچ کےآخری روز سدرن پنجاب نے 154 رنز کا ہدف 6 وکٹوں کے نقصان پر حاصل کرلیا۔ سیف بدر نے 37 اور عمر صدیق نے 22 رنز بنائے۔ بلوچستان کے یاسر شاہ نے میچ میں 8 وکٹیں حاصل کیں۔ اس سے قبل 41 رنز کے سبقت سے اپنی دوسری اننگز کا آغاز کرنے والی بلوچستان کی پوری ٹیم112 رنز بناکر آؤٹ ہوگئی تھی۔ اسپنرزاہد محمود نے میچ میں 7 کھلاڑیوں کو پویلین کی راہ دکھائی ۔میچ کی پہلی اننگز میں سدرن پنجاب کی ٹیم بلوچستان کے 372 رنز کے جواب میں 331 رنز بنا کر آؤٹ ہوگئی تھی۔

یو بی ایل اسپورٹس کمپلیکس کراچی میں سندھ اور خیبرپختونخوا کے درمیان کھیلا گیا چار روزہ فرسٹ کلاس میچ بے نتیجہ ختم ہوگیا۔ رواں سیزن میں یہ پہلا فرسٹ کلاس میچ ہے جو ڈرا ہواہے۔میچ کے آخری روز سندھ نے کے پی کو جیت کے لیے 289 رنز کا ہدف دیاتھا کہ کے پی کی ٹیم کھیل کے اختتام پر7وکٹوں کے نقصان پر 96 رنز ہی بناسکی۔اسپنر عاشق علی نےدوسری اننگز چھ کھلاڑیوں کو پویلین کی راہ دکھائی۔ انہوں نے میچ میں کُل 11 وکٹیں حاصل کیں۔ اس سے قبل 54 رنز کی سبقت سے اپنی دوسری اننگز کا آغاز کرنے والی سندھ کی ٹیم نے میچ کے آخری روز 3 وکٹوں کے نقصان پر 74 رنز سے اپنی دوسری اننگز کا دوبارہ آغاز کیا تو کپتان سرفراز احمد نے 7 وکٹوں کے نقصان پر 234 رنز پر اننگز ڈکلیئر کردی۔ اسد شفیق 72 رنز بناکر ناٹ آؤٹ رہے۔خالد عثمان اور ساجد خان نے میچ میں 5،5 وکٹیں حاصل کیں۔پہلی اننگزمیں سندھ کے 361 رنز کے جواب میں کے پی کی پوری ٹیم 307 رنز بناکر آؤٹ ہوگئی تھی۔

قائداعظم ٹرافی فرسٹ الیون ٹورنامنٹ کے دوسرے راؤنڈ کے اختتام پر سدرن پنجاب کی ٹیم 50 پوائنٹس کے ساتھ پہلی پوزیشن پر براجمان ہے۔ سندھ اور بلوچستان کی ٹیمیں 32، 32 پوائنٹس کے ساتھ بالترتیب دوسرے اور تیسرے نمبر پر موجود ہیں۔ ناردرن 28 اور کے پی 11 پوائنٹس کے ساتھ چوتھی اور پانچویں پوزیشن پر موجود ہیں۔ 6 پوائنٹس حاصل کرنے والی دفاعی چیمپئن سنٹرل پنجاب کی ٹیم کا فی الحال پوائنٹس ٹیبل پر آخری نمبر ہے۔

‏
اسپورٹس (رپورٹ،کراچی)کراچی میں جاری قائداعظم ٹرافی فرسٹ کلاس ٹورنامنٹ کے دوسرے راؤنڈ میچ میں کھلاڑی اور اسپورٹ اسٹاف کے لیے مقررہ ضابطہ اخلاق کے لیول 1 کی خلاف ورزی کرنے پر خیبرپختونخوا کے کامران غلام پر میچ فیس کا40 فیصد جرمانہ عائد کردیا گیا ہے۔

کامران غلام پر سندھ کے خلاف میچ کے دوران امپائر کے فیصلے پر ناراضگی کا اظہار کرنے پر جرمانہ عائد کیا گیا۔

یہ واقعہ خیبرپختونخوا کی پہلی اننگز کے 57ویں اوور کی تیسری گیند پر پیش آیا جب کامران غلام نے سہیل خان کی گیند پرامپائر کی جانب سے وکٹوں کے پیچھے کیچ آؤٹ دئیے جانے کے فیصلے پر ناراضگی کا اظہار کیا۔

آن فیلڈ امپائرز قیصر وحید اورثاقب خان نے کامران غلام کو پی سی بی کوڈ آف کنڈکٹ کی شق 2.8 کی خلاف ورزی کرنے پر چارج کیا۔

کامران غلام کی جانب سے اعتراف جرم کرنے پر میچ ریفری ندیم ارشد نے کامران غلام پر جرمانہ عائد کردیا۔

پیر کی دوپہر کراچی کے ایک مقامی ہسپتال میں بلاول بھٹی کا سی ٹی اسکین کیا گیا۔اسکین کی رپورٹ کلیئر آنے پر آل راؤنڈر کو ہسپتال سےڈسچارج کردیا گیا ہے۔انہیں آئندہ چند روز کے لیے مکمل آرام کا مشورہ دیا

سدرن پنجاب کی پہلی اننگز کے 85ویں اوور کی پہلی گیند پر (صبح11:24 بجے)خرم شہزاد کی گیند بلاول بھٹی کے سر پر لگی۔اس وقت سدرن پنجاب کا اسکور 6 وکٹوں کے نقصان پر 311 رنز تھا

پلیئنگ کنڈیشنز 1.2.7.1.2 کے تحت میڈیکل ٹیم کے ایک نمائندے نے بلاول بھٹی کا معائنہ کیا، جس کے نتیجے میں بلاول بھٹی میدان سے باہر چلے گئے
میڈیکل ٹیم کے نمائندے نے ٹیم ٹریٹمنٹ روم میں بلاول بھٹی سے کن کشن قانون کے لیے مقررہ چند سوالات پوچھے، جن کے درست جوابات دینے پر بلاول بھٹی کو(ضرورت پڑنے پر) اپنی اننگز دوبارہ شروع کرنے کی اجازت دی گئی

90.5 اوورز میں سدرن پنجاب کی نو وکٹیں گرنے کے بعد بلاول بھٹی نے دوبارہ میدان میں قدم رکھا
بلاول بھٹی سدرن پنجاب کے آخری آؤٹ ہونے والے بیٹسمین تھے۔سدرن پنجاب کی پوری ٹیم 92.2 اوورز میں آؤٹ ہوگئی۔ میدان میں واپسی پر 7 گیندیں کھیلنے والے بلاول بھٹی نے میچ میں مجموعی طور پر 11 گیندیں کھیلیں

اننگز بریک کے دوران میڈیکل ٹیم کے نمائندے نے بلاول بھٹی کا ایک بار پھر معائنہ کیا اور انہوں نےچند ضروری ٹیسٹ کے لیے آلراؤنڈر کو ہسپتال لے جانے کا فیصلہ کیا

پی سی بی کی وینیو سے متعلق ہدایات کے مطابق نیشنل اسٹیڈیم کراچی میں موجود ایمبولینس سروس کے ذریعے کھلاڑی کو گراؤنڈ سے ہسپتال منتقل کیا گیا