Category: قرآن اور سائنس

اسلام آباد / کراچی (باغی ٹی وی)محکمہ موسمیات نے خبردار کیا ہے کہ ملک کے بالائی علاقوں میں 13 سے 16 جون کے دوران آندھی، گرج چمک، ژالہ باری اور موسلادھار بارش کا امکان ہے جبکہ جنوبی علاقوں میں شدید گرمی اور گرد آلود ہوائیں متوقع ہیں۔ محکمہ موسمیات نے بالائی سندھ کے تمام اضلاع میں آندھی اور بارش کی پیشگوئی کرتے ہوئے بتایا کہ جھکڑ چلنے اور بارش کے باعث جاری گرمی کی لہر میں کچھ کمی واقع ہو سکتی ہے۔

محکمہ موسمیات کے مطابق جمعہ کے روز خیبرپختونخوا، شمال مشرقی پنجاب، خطہ پوٹھوہار، اسلام آباد، کشمیر اور گلگت بلتستان میں مطلع جزوی ابر آلود رہنے کے علاوہ آندھی اور گرج چمک کے ساتھ بارش جبکہ چند مقامات پر ژالہ باری کا امکان ہے۔ ہفتہ کے روز بھی انہی علاقوں میں موسمی صورتحال برقرار رہنے کی پیشگوئی کی گئی ہے۔

محکمہ موسمیات نے متنبہ کیا ہے کہ 13 سے 16 جون کے دوران آندھی، تیز ہواؤں اور ژالہ باری کے باعث کمزور انفراسٹرکچر جیسے بجلی کے کھمبے، درخت، گاڑیاں اور سولر پینل کو نقصان پہنچنے کا خدشہ ہے۔ متعلقہ اداروں اور شہریوں کو احتیاط برتنے کی ہدایت جاری کر دی گئی ہے۔

ادھر پنجاب، خیبرپختونخوا، اسلام آباد، کشمیر اور گلگت بلتستان میں بھی آئندہ تین دنوں کے دوران بارشوں کا سلسلہ جاری رہنے کا امکان ہے۔ واضح رہے کہ ملک کے بیشتر میدانی علاقے شدید گرمی کی لپیٹ میں ہیں۔ گزشتہ روز جیکب آباد میں درجہ حرارت 50 ڈگری، دادو، نور پور تھل اور سبی میں 49 ڈگری جبکہ سرگودھا، بہاولنگر، بھکر، جوہرآباد، گوجرانوالہ اور حافظ آباد میں 48 ڈگری سینٹی گریڈ ریکارڈ کیا گیا۔

محکمہ موسمیات کے مطابق گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا تاہم چترال اور کالام میں 2 ملی میٹر بارش ریکارڈ کی گئی۔

عوام کو ہدایت کی گئی ہے کہ وہ غیر ضروری طور پر دھوپ میں نکلنے سے گریز کریں، پانی اور مشروبات کا استعمال زیادہ کریں اور آندھی یا تیز ہواؤں کی صورت میں کھلے مقامات سے دور رہیں۔

اسلام آباد(باغی ٹی وی)محکمہ موسمیات کے مطابق، ملک کے بیشتر حصوں میں آئندہ ہفتے کے دوران بارش، آندھی اور گرج چمک جبکہ پہاڑوں پر شدید برفباری کا امکان ہے۔ 24 فروری کی شام یا رات سے ایک طاقتور مغربی ہواؤں کا سلسلہ ملک کے مغربی حصوں میں داخل ہوگا، جو 25 فروری کو بالائی علاقوں کو اپنی لپیٹ میں لے گا اور شمالی علاقوں میں 2 مارچ تک برقرار رہے گا۔

گلگت بلتستان اور آزاد کشمیر:
25 فروری سے 2 مارچ کے دوران گلگت بلتستان (دیامیر، استور، غذر، اسکردو، ہنزہ، گلگت، گوانچے، شگر) اور آزاد کشمیر (وادی نیلم، مظفرآباد، پونچھ، ہٹیاں، باغ، سوڈھیمبر، حویلی، کوٹلی، میرپور) میں وقفے وقفے سے تیز ہواؤں، آندھی اور گرج چمک کے ساتھ بارش اور برفباری کا امکان ہے۔ بعض مقامات پر شدید برفباری متوقع ہے۔

خیبر پختونخوا:
24 فروری کی رات سے 1 مارچ کے دوران چترال، دیر، سوات، شانگلہ، کوہستان، مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی، کرم، پشاور، چارسدہ، نوشہرہ، صوابی، وزیرستان، کوہاٹ، کرک، بنوں اور ڈی آئی خان میں وقفے وقفے سے بارش اور برفباری کا امکان ہے۔ بعض علاقوں میں شدید برفباری بھی ہو سکتی ہے۔

پنجاب اور اسلام آباد:
25 فروری سے 1 مارچ کے دوران مری اور گلیات میں تیز ہواؤں اور گرج چمک کے ساتھ بارش اور شدید برفباری کا امکان ہے۔ جبکہ اسلام آباد، راولپنڈی، اٹک، چکوال، جہلم، گوجرانوالہ، منڈی بہاؤالدین، سرگودھا، میانوالی، خوشاب، گجرات، سیالکوٹ، نارووال، لاہور، شیخوپورہ، فیصل آباد، ٹوبہ ٹیک سنگھ میں بھی بارش کی پیشگوئی ہے۔ جنوبی پنجاب میں جھنگ، بھکر، ملتان، ڈیرہ غازی خان، لیہ، مظفر گڑھ، تونسہ شریف، خانیوال، ساہیوال، پاکپتن، اوکاڑہ، بہاولنگر اور بہاولپور میں 25 سے 27 فروری کے دوران بارش اور گرج چمک کا امکان ہے۔

بلوچستان:
24 فروری کی شام سے 26 فروری تک کوئٹہ، زیارت، چمن، مستونگ، پشین، قلعہ عبداللہ، قلعہ سیف اللہ، چاغی، نوشکی، قلات، خضدار، بارکھان، ہرنائی، ژوب اور موسیٰ خیل میں تیز ہواؤں، گرج چمک کے ساتھ بارش اور پہاڑوں پر برفباری متوقع ہے۔

سندھ:
25 اور 26 فروری کے دوران لاڑکانہ، قمبر شہداد کوٹ، جیکب آباد اور سکھر میں تیز ہواؤں اور گرج چمک کے ساتھ ہلکی بارش کا امکان ہے۔

شدید برفباری کے باعث مری، گلیات، ناران، کاغان، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، اسکردو، وادی نیلم، باغ، پونچھ، حویلی، کوئٹہ، زیارت، چمن، پشین، قلعہ عبداللہ اور قلعہ سیف اللہ میں سڑکوں کی بندش اور ٹریفک میں خلل کا خدشہ۔ 25 فروری سے 1 مارچ کے دوران خیبر پختونخوا اور کشمیر کے مقامی ندی نالوں میں طغیانی کا خطرہ۔

شمالی علاقوں، مری، گلیات، خیبر پختونخوا، کشمیر اور گلگت بلتستان میں لینڈ سلائیڈنگ اور برفانی تودے گرنے کا امکان۔
خیبرپختونخوا، پنجاب اور اسلام آباد کے میدانی علاقوں میں ژالہ باری کی بھی توقع۔

سیاحوں کو محتاط رہنے اور غیر ضروری سفر سے اجتناب کرنے کی ہدایت۔
یہ بارش پنجاب اور خیبرپختونخوا کے بارانی علاقوں میں فصلوں کے لیے فائدہ مند ثابت ہوگی۔

تمام متعلقہ اداروں کو الرٹ رہنے اور پہاڑی علاقوں میں کسی بھی ناخوشگوار واقعے سے بچنے کے لیے تمام ضروری اقدامات کرنے کی ہدایت کی گئی ہے۔ این ڈی ایم اے، پی ڈی ایم ایز اور ایس ڈی ایم ایز کو فوری حفاظتی انتظامات کرنے کی ہدایت جاری کر دی گئی ہے۔