Category: حافظ آباد

حافظ آباد(خبرنگارشمائلہ) وزیر اعلیٰ پنجاب مریم نواز کی جانب سے عید کے موقعہ پر ڈی ایچ کیو ہسپتال کے مریضوں، ڈسٹرکٹ جیل کے قیدیوں اور ویسٹ منیجمنٹ کمپنی کے اہلکاروں میں مٹھائی تقسیم کی گئی۔ ڈپٹی کمشنر عبدالرزاق نے مریضوں، قیدیوں اور سینٹر سٹاف میں مٹھائی تقسیم کی۔

ڈپٹی کمشنر عبدالرزاق نے ڈی ایچ کیو ہسپتال کا دورہ کیا جہاں انہوں نے ہسپتال کے مختلف شعبہ جات میں زیر علاج مریضوں کی تیمارداری کرتے ہوئے انہیں عید کی مبارکباد دی اور ان میں مٹھائی تقسیم کی۔ ڈپٹی کمشنر کا کہنا تھا کہ عید کے اس پر مسرت موقعہ پر تمام ڈاکٹرز، پیرا میڈیکل سٹاف، نرسز اور دیگر اہلکار مبارکباد کے مستحق ہیں جو اپنی خوشیاں قربان کر کے مریضوں کے علاج معالجہ میں مصروف ہیں۔ سی ای او ہیلتھ ڈاکٹر ظہیر احمد، ایم ایس ڈاکٹر رضوان علی تابش اور دیگر ڈاکٹرز بھی انکے ہمراہ تھے۔

ڈپٹی کمشنر نے شہر بھر میں صفائی ستھرائی کے بہترین انتظامات کرنے پر ویسٹ منیجمنٹ کمپنی کے افسران اور اہلکاروں میں بھی مٹھائی تقسیم کی۔ ڈپٹی کمشنر نے ڈسٹرکٹ جیل کا بھی دورہ کیا جہاں انہوں نے قیدیوں سے ملاقات کی اور انہیں عید کی مبارکباد دیتے ہوئے ان میں بھی مٹھائی تقسیم کی۔

حافظ آباد(خبرنگارشمائلہ) وزیراعلیٰ پنجاب مریم نواز کے احکامات اور ڈپٹی کمشنر عبدالرزاق کی ہدایت پر ضلعی انتظامیہ اور ٹرانسپورٹ اتھارٹی نے عید کے موقع پر مسافروں سے زائد کرایوں کی وصولی اور اوور لوڈنگ کرنے والے ٹرانسپورٹرز اور اڈہ انتظامیہ کے خلاف سخت کارروائیاں شروع کر دی ہیں۔ سیکرٹری ریجنل ٹرانسپورٹ اتھارٹی اقصیٰ ریاض نے جنرل بس اسٹینڈ سمیت شہر کے تمام اڈوں کا دورہ کیا اور مسافروں سے کرایوں کی وصولی اور دیگر انتظامات کا جائزہ لیا۔

ٹرانسپورٹ اتھارٹی نے تمام بس اڈوں پر خصوصی شکایات کاؤنٹرز قائم کر دیے ہیں تاکہ مسافر کسی بھی قسم کی شکایت درج کروا سکیں۔ سیکرٹری آر ٹی اے اقصیٰ ریاض نے بس اڈوں اور گاڑیوں پر آویزاں کیے جانے والے کرایہ ناموں کا بھی جائزہ لیا اور بسوں اور ویگنوں میں سوار مسافروں سے ٹکٹ چیک کرتے ہوئے ان سے کرایہ وصولی کے حوالے سے فیڈ بیک لیا۔

اقصیٰ ریاض نے کہا کہ وزیراعلیٰ پنجاب اور ڈپٹی کمشنر حافظ آباد کی ہدایت پر ضلع کے تمام بس اڈوں پر کرایہ نامے آویزاں کر دیے گئے ہیں اور شکایات کاؤنٹرز بھی قائم کر دیے گئے ہیں۔ انہوں نے کہا کہ وہ خود اور ٹرانسپورٹ اتھارٹی کی خصوصی ٹیمیں عید سے قبل اور عید کے ایام میں تمام بس اڈوں کے دورے کر رہی ہیں تاکہ کوئی بھی ٹرانسپورٹر مسافروں سے زائد کرایہ وصول نہ کر سکے۔ انہوں نے خبردار کیا کہ جو بھی ٹرانسپورٹر زائد کرایہ وصول کرے گا، اسے بھاری جرمانہ کیا جائے گا اور اس کی گاڑیاں بند کر دی جائیں گی۔

سیکرٹری ڈی آر ٹی اے نے ٹرانسپورٹرز اور اڈہ انتظامیہ کو ہدایت کی کہ وہ اپنے اڈوں پر مسافروں کے بیٹھنے اور دیگر تمام سہولیات کو یقینی بنائیں۔ انہوں نے کہا کہ مسافروں کو کسی قسم کی پریشانی نہیں ہونی چاہیے۔

حافظ آباد(خبرنگارشمائلہ)تھانہ جلالپور بھٹیاں میں درج نوجوان کے مبینہ اغوا کا معمہ حل ہو گیا، اور نوجوان کو بحفاظت بازیاب کروا لیا گیا۔

تفصیلات کے مطابق تھانہ جلالپور بھٹیاں میں نوجوان کے مبینہ اغوا کا مقدمہ نمبر 293/25 درج کیا گیا۔ ڈی پی او حافظ آباد عاطف نذیر کے فوری نوٹس پر ڈی ایس پی پنڈی بھٹیاں کی زیر نگرانی ایس ایچ او تھانہ جلالپور بھٹیاں نے اپنی ٹیم کے ہمراہ فوری طور پر تحقیقات کا آغاز کیا۔ جدید ٹیکنالوجی اور پیشہ ورانہ مہارت کو بروئے کار لاتے ہوئے، تفتیشی ٹیم نے فوری کارروائی کرتے ہوئے شورکوٹ، جھنگ سے نوجوان غلام مصطفیٰ ولد محمد حنیف کو تلاش کر لیا۔

تفتیش کے دوران غلام مصطفیٰ نے انکشاف کیا کہ اسے کسی نے اغوا نہیں کیا تھا بلکہ نہم جماعت کے انگریزی کے امتحان کے دباؤ کی وجہ سے وہ گھر سے خود ہی نکل گیا تھا۔ خوش قسمتی سے نوجوان مکمل محفوظ ہے اور اس کے ساتھ کسی بھی قسم کا ناخوشگوار واقعہ پیش نہیں آیا۔

ڈی پی او حافظ آباد کا کہنا تھا کہ والدین بچوں پر امتحانات کا بے جا دباؤ نہ ڈالیں تاکہ بچے ذہنی تناؤ کا شکار ہو کر گھر سے نہ بھاگیں۔

حافظ آباد(خبر نگارشمائلہ) صوبائی وزیر ہاؤسنگ و اربن ڈویلپمنٹ بلال یاسین نے حافظ آباد کا دورہ کیا جہاں انہوں نے رمضان سہولت بازار اور "اپنی چھت اپنا گھر” منصوبے کے تحت جاری تعمیراتی کاموں کا جائزہ لیا۔ انہوں نے عوامی سہولیات اور ترقیاتی منصوبوں کی پیشرفت پر اطمینان کا اظہار کیا اور متعلقہ حکام کو ہدایات دیں کہ ان منصوبوں کو شفافیت اور معیار کے مطابق جلد مکمل کیا جائے۔

صوبائی وزیر نے بتایا کہ حکومت پنجاب "اپنی چھت اپنا گھر” منصوبے کے تحت رواں سال کے آخر تک صوبے میں ایک لاکھ گھروں کی تعمیر مکمل کرنے کا ہدف رکھتی ہے۔ ان کا کہنا تھا کہ اب تک پنجاب بھر میں 25 ہزار سے زائد گھروں کی تعمیر مکمل ہو چکی ہے جبکہ مزید مکانات کی تعمیر تیزی سے جاری ہے۔ اس منصوبے کے تحت شہریوں کو بلاسود قرضے فراہم کیے جا رہے ہیں تاکہ وہ آسانی سے اپنے گھروں کے مالک بن سکیں۔

بلال یاسین نے مزید بتایا کہ اس منصوبے کے لیے اب تک 10 لاکھ سے زائد افراد نے پورٹل وزٹ کیا جبکہ 5 لاکھ درخواستیں وصول ہو چکی ہیں۔ انہوں نے واضح کیا کہ وزیراعلیٰ مریم نواز کے ویژن کے تحت اس منصوبے میں مکمل شفافیت رکھی گئی ہے اور قرضوں کی فراہمی میرٹ پر کی جا رہی ہے تاکہ حقدار افراد ہی اس سہولت سے فائدہ اٹھا سکیں۔

وزیر ہاؤسنگ نے رمضان پیکج پر بات کرتے ہوئے کہا کہ حکومت پنجاب نے 30 لاکھ کم آمدنی والے خاندانوں کے لیے 30 ارب روپے کا خصوصی رمضان پیکج متعارف کرایا ہے۔ اس پیکج کے تحت ہر مستحق خاندان کو 10 ہزار روپے کی امدادی رقم عزت و وقار کے ساتھ ان کے گھروں تک پہنچائی گئی ہے تاکہ وہ رمضان المبارک میں بنیادی ضروریات پوری کر سکیں۔

انہوں نے مزید کہا کہ حکومت پنجاب عوام کی فلاح و بہبود کے لیے بے مثال اقدامات کر رہی ہے اور ماضی میں ایسی سہولتوں کی مثال نہیں ملتی۔ رمضان بازاروں میں اشیائے خورونوش کی دستیابی اور قیمتوں کو کنٹرول کرنے کے لیے موثر اقدامات کیے گئے ہیں تاکہ عوام کو معیاری اور سستی اشیاء دستیاب ہو سکیں۔

دورے کے دوران بلال یاسین نے رمضان بازار کا معائنہ کیا اور وہاں کیے گئے بہترین انتظامات پر ضلعی انتظامیہ کی کارکردگی کو سراہا۔ انہوں نے کہا کہ شہر بھر میں صفائی ستھرائی اور تجاوزات کے خاتمے کے اقدامات قابل ستائش ہیں اور یہ ضلعی انتظامیہ کی مؤثر حکمت عملی کا ثبوت ہیں۔

انہوں نے رمضان بازار میں خریداروں سے اشیائے خورونوش کی قیمتوں اور معیار کے حوالے سے فیڈبیک بھی لیا۔ شہریوں نے حکومت کی جانب سے سستی اور معیاری اشیاء کی فراہمی پر اطمینان کا اظہار کرتے ہوئے کہا کہ رمضان المبارک میں یہ اقدام غریب عوام کے لیے بہت فائدہ مند ثابت ہو رہا ہے۔

بلال یاسین نے "اپنی چھت اپنا گھر” منصوبے کے تحت بننے والے گھروں کا بھی جائزہ لیا اور وہاں موجود شہریوں سے گفتگو کی۔ شہریوں نے حکومت کے اس اقدام کو سراہتے ہوئے کہا کہ مہنگائی کے اس دور میں اپنا گھر بنانا ایک خواب لگتا تھا، جو اب حقیقت بن رہا ہے۔ انہوں نے بلا سود قرضوں کی فراہمی پر وزیراعلیٰ مریم نواز کا شکریہ ادا کیا اور امید ظاہر کی کہ یہ منصوبہ مزید وسعت اختیار کرے گا تاکہ زیادہ سے زیادہ خاندانوں کو فائدہ پہنچے۔

صوبائی وزیر نے یقین دلایا کہ حکومت عوام کی فلاح و بہبود کے لیے ہر ممکن اقدامات جاری رکھے گی اور ترقیاتی منصوبے شفافیت اور تیزی کے ساتھ مکمل کیے جائیں گے۔

حافظ آباد(خبرنگارشمائلہ) وزیر اعلیٰ مریم نواز کی جانب سے گورنمنٹ اسپیشل ایجوکیشن سکول کے خصوصی بچوں میں عید گفٹ تقسیم کیے گئے۔ ڈپٹی کمشنر عبدالرزاق نے خصوصی بچوں میں عید گفٹ تقسیم کیے۔

ڈپٹی کمشنر عبدالرزاق نے بتایا کہ وزیر اعلیٰ کی ہدایت پر خصوصی بچوں کو پہلی بار عید گفٹ تقسیم کیے گئے ہیں۔ حافظ آباد اور پنڈی بھٹیاں کے اسپیشل سکولوں میں زیر تعلیم 530 سے زائد بچوں میں عید گفٹ تقسیم کیے گئے۔

ڈپٹی کمشنر نے مزید کہا کہ اسپیشل بچوں کو عید گفٹ کی تقسیم وزیر اعلیٰ مریم نواز کا تعلیم دوست اور خوش آئند اقدام ہے۔ عید گفٹ ملنے پر خصوصی بچوں کی خوشی دیدنی تھی۔ پہلی بار عید گفٹ ملنے پر خصوصی بچوں نے وزیر اعلیٰ مریم نواز کا شکریہ بھی ادا کیا۔

حافظ آباد،باغی ٹی وی(خبر نگارشمائلہ) حضرت علیؓ کی شہادت اور عید الفطر کے موقع پر پولیس کا فلیگ مارچ

حافظ آباد پولیس نے ڈی پی او عاطف نذیر کی ہدایت پر 21 رمضان المبارک کو حضرت علیؓ کی شہادت اور عید الفطر کے موقع پر شہر میں امن و امان برقرار رکھنے کے لیے فلیگ مارچ کیا۔

فلیگ مارچ ڈی ایس پی صدر سرکل حافظ آباد کی قیادت میں صدر سرکل پولیس کے ہمراہ ڈی پی او دفتر سے شروع ہوا اور شہر کے مختلف علاقوں سے گزرتا ہوا واپس ڈی پی او دفتر پر اختتام پذیر ہوا۔

ڈی پی او حافظ آباد نے بتایا کہ فلیگ مارچ کا مقصد شہریوں میں تحفظ کا احساس پیدا کرنا، سیکیورٹی انتظامات کا جائزہ لینا اور کسی بھی ناخوشگوار واقعے کی روک تھام کو یقینی بنانا ہے۔ انہوں نے مزید کہا کہ عوام کے جان و مال کا تحفظ پولیس کی اولین ترجیح ہے اور کسی بھی قسم کی شرپسندی یا قانون شکنی کو برداشت نہیں کیا جائے گا۔

ڈی پی او نے بتایا کہ پولیس اور دیگر قانون نافذ کرنے والے ادارے مکمل طور پر الرٹ ہیں اور سیکیورٹی انتظامات کو مزید بہتر بنایا جا رہا ہے تاکہ عوام اپنے مذہبی تہوار کے ایام پر سکون گزار سکیں۔