Category: حافظ آباد

حافظ آباد،باغی ٹی وی (خبر نگارشمائلہ) ای او عنبرین کاکوٹ چیاں سکول کا دورہ، شاندار انتظامات پر اطمینان

ای او عنبرین نے گورنمنٹ گرلز ایلیمنٹری سکول کوٹ چیاں کا تفصیلی دورہ کیا۔ سکول کے دورے کے دوران ہیڈ مسٹریس صبا رانا اور دیگر سٹاف و بچیوں نے پرتپاک استقبال کیا۔ مس نوشابہ ضمیر نے سکول میں منعقدہ پروگرام پر بریفنگ دی اور سکول کا تفصیلی تعارف اور وزٹ کروایا۔

ای او عنبرین نے سکول داخلہ مہم کا افتتاح کیا، جس میں نئی آنے والی بچیوں کے داخلے اور شجرکاری مہم میں حصہ لیتے ہوئے پودے لگائے گئے۔ سکول فاریسٹ کا وزٹ کیا گیا اور یونیفارم بینک کا افتتاح کیا گیا، جس میں غریب اور نادار 50 بچیوں میں مفت یونیفارم تقسیم کیے گئے۔

ای سی ای روم اور بچیوں کے کھیلنے کے لیے جھولوں کا انتظام دیکھ کر ای او عنبرین نے سکول کی شاندار کارکردگی کو سراہا اور ہیڈ مسٹریس صبا رانا، مس نوشابہ ضمیر، مس مریم، مس طیبہ، مس دیبہ اعجاز اور دیگر سٹاف کو تعریفی سرٹیفکیٹ سے نوازا۔

حافظ آباد،باغی ٹی وی (خبرنگارشمائلہ) ڈسٹرکٹ پولیس آفیسر حافظ آباد عاطف نذیر نے عوامی مسائل کے بروقت حل اور فوری انصاف کی فراہمی کو یقینی بنانے کے لیے تھانہ ونیکی تارڑ میں کھلی کچہری کا انعقاد کیا۔

کھلی کچہری میں ڈی پی او حافظ آباد نے سائلین اور معززین علاقہ کو مخاطب کرتے ہوئے کہا کہ پولیس افسران عوام کے سامنے جوابدہ ہوتے ہیں۔ سائلین کے مسائل فوری طور پر حل کر کے داد رسی کو ہر ممکن یقینی بنایا جاتا ہے۔ کھلی کچہریوں کا مقصد انصاف کو عوام کی دہلیز تک پہنچانا ہے۔

کھلی کچہری میں شہریوں کی درخواستوں کی سماعت کی گئی اور مسائل سنے گئے۔ ڈی پی او حافظ آباد نے متعلقہ افسران کو سائلین کے مسائل ترجیحی بنیادوں پر حل کرنے کے احکامات جاری کرتے ہوئے مزید کہا کہ کھلی کچہریوں میں پیش ہونے والے شہریوں کی درخواستوں کا ریکارڈ آن لائن کمپلینٹ مینجمنٹ سسٹم پر کیا جاتا ہے اور مقرر کردہ ٹائم لائن پر ان درخواستوں کے بارے میں متعلقہ افسران سے فالو اپ لیا جاتا ہے اور متعلقہ افسران کی جانب سے کارروائی کو ہر ممکن یقینی بنایا جاتا ہے۔

مزید کہا کہ پولیس کے دروازے عوام کے لیے ہر وقت کھلے ہیں اور شہریوں کے مسائل کا بروقت حل ہماری اولین ترجیح ہے۔

حافظ آباد (خبر نگار) ایڈیشنل ڈپٹی کمشنر فنانس حامد ناصر گورایہ نے آج ڈسٹرکٹ ہیڈ کوارٹر ہسپتال کا دورہ کیا، جہاں انہوں نے مریضوں کی خیریت دریافت کی اور ہسپتال میں طبی سہولیات اور ادویات کی دستیابی کا جائزہ لیا۔

اس موقع پر انہوں نے ہسپتال انتظامیہ سے تفصیلی بریفنگ لی اور علاج معالجے کے معیار کو مزید بہتر بنانے کے لیے ضروری ہدایات جاری کیں۔ انہوں نے زور دیا کہ مریضوں کو معیاری اور بروقت طبی سہولیات فراہم کرنا حکومت کی اولین ترجیح ہے۔

حامد ناصر گورایہ نے ہسپتال کے عملے کی کارکردگی کو سراہتے ہوئے یقین دلایا کہ سرکاری ہسپتالوں کو درکار وسائل اور ادویات کی فراہمی یقینی بنانے کے لیے ہر ممکن اقدامات کیے جائیں گے۔

بعد ازاں، میڈیا سے گفتگو کرتے ہوئے انہوں نے کہا کہ حکومت صحت کے شعبے میں بہتری کے لیے عملی اقدامات کر رہی ہے اور مریضوں کو معیاری علاج فراہم کرنا ہماری بنیادی ذمہ داری ہے۔

حافظ آباد(خبرنگارشمائلہ) رمضان المبارک کے مقدس مہینے میں قصابوں نے سرکاری نرخوں پر گوشت فروخت کرنے سے انکار کر دیا ہے۔ ان کا کہنا ہے کہ مویشی منڈی میں جانوروں کی قیمتوں میں بے پناہ اضافہ ہو چکا ہے، جس کے باعث مہنگے داموں خریداری کے بعد کم نرخوں پر فروخت ممکن نہیں، کیونکہ اس سے انہیں بھاری مالی نقصان برداشت کرنا پڑے گا۔

قصابوں کا کہنا ہے کہ وہ کئی بار انتظامیہ سے سرکاری نرخوں پر نظرثانی کا مطالبہ کر چکے ہیں، لیکن کوئی شنوائی نہیں ہوئی، جس کے باعث اب وہ گوشت فروخت کرنے سے قاصر ہیں۔ رمضان المبارک کے دوران قانونی کارروائیوں اور جرمانوں سے بچنے کے لیے کئی دکانداروں نے اپنی دکانیں ہی بند کر دی ہیں، جس سے شہری شدید مشکلات کا شکار ہو گئے ہیں۔

دوسری جانب شہریوں نے انتظامیہ کی ناقص حکمتِ عملی پر شدید احتجاج کرتے ہوئے کہا ہے کہ رمضان سے قبل بھی قصاب من مانے نرخوں پر مہنگا گوشت فروخت کر رہے تھے جبکہ انتظامیہ سرکاری نرخوں پر عمل درآمد کروانے میں ناکام رہی۔ اب اسی صورتحال کا فائدہ اٹھاتے ہوئے قصابوں نے سرے سے گوشت فروخت کرنے سے انکار کر دیا ہے، جس سے عوام کو شدید پریشانی کا سامنا ہے۔

قصابوں نے ضلعی انتظامیہ سے مطالبہ کیا ہے کہ مویشی منڈی میں جانوروں کی بڑھتی ہوئی قیمتوں کو مدنظر رکھتے ہوئے سرکاری نرخوں پر نظرثانی کی جائے، تاکہ وہ نقصان سے بچ سکیں اور عوام کو بھی معیاری گوشت مناسب داموں دستیاب ہو سکے۔ دوسری طرف، ضلعی انتظامیہ کا مؤقف ہے کہ سرکاری نرخوں پر سختی سے عمل درآمد کروایا جائے گا اور ناجائز منافع خوری کی ہرگز اجازت نہیں دی جائے گی۔

حافظ آباد،باغی ٹی وی (خبرنگارشمائلہ) پنجاب رورل ہیلتھ ایمپلائیز ایسوسی ایشن نے ڈاکٹروں کے ساتھ اظہار یکجہتی کرتے ہوئے صوبے بھر میں ہڑتال کا اعلان کر دیا ہے۔ ایسوسی ایشن کے مطابق، تمام ضلعی صدور اور صحت کی تنظیموں سے مشاورت کے بعد یہ فیصلہ کیا گیا ہے کہ آن لائن رپورٹنگ سمیت او پی ڈی اور دیگر تمام خدمات فوری طور پر بند کی جائیں گی۔

ایسوسی ایشن نے واضح کیا ہے کہ وہ ڈاکٹروں کے ساتھ کھڑے ہیں اور رہیں گے۔ تمام ملازمین سے اپیل کی گئی ہے کہ وہ ہر قسم کی سرگرمی کا مکمل بائیکاٹ کریں۔ یہاں تک کہ رمضان چیک تقسیم پروگرام میں ڈیوٹی دینے والے ملازمین بھی اس ڈیوٹی کا بائیکاٹ کریں گے۔

پنجاب رورل ہیلتھ ایمپلائیز ایسوسی ایشن اور آل پنجاب ہیلتھ ایمپلائیز ایسوسی ایشن نے ملازمین سے تعاون کی اپیل کی ہے۔

حافظ آباد،باغی ٹی وی(خبرنگارشمائلہ) ڈی جی فوڈ اتھارٹی کی ہدایت پر رمضان المبارک میں معیاری خوراک کی فراہمی یقینی بنانے کے لیے فوڈ سیفٹی ٹیموں کی سحر و افطار پوائنٹس پر چیکنگ جاری ہے۔ سٹی سکھیکی، جلال پور بھٹیاں سمیت مختلف علاقوں میں گرینڈ آپریشن کے دوران 44 فوڈ پوائنٹس کی جانچ کی گئی۔

تفصیلات کے مطابق 12 فوڈ پوائنٹس کو 1 لاکھ 22 ہزار روپے جرمانہ کیا گیا جبکہ 32 کو سخت وارننگز جاری کی گئیں۔ ترجمان فوڈ اتھارٹی کے مطابق بڑی مقدار میں گلے سڑے پھل، سبزیاں، بچا ہوا کھانا اور آلودہ پانی تلف کر دیا گیا۔ صفائی کے ناقص انتظامات اور قوانین کی سنگین خلاف ورزیوں پر کارروائیاں عمل میں لائی گئیں۔

علی الصبح 20 دودھ بردار گاڑیوں میں موجود دودھ کا معائنہ بھی کیا گیا، جس میں اشیاء کی تیاری میں گلے سڑے پھل اور سبزیوں کے استعمال کا انکشاف ہوا۔ فاسٹ فوڈ ہوٹلز کو پیور فوڈ ریگولیشنز کی سنگین خلاف ورزیوں پر بھاری جرمانے کیے گئے۔

ترجمان کے مطابق فنگس زدہ اور گلے سڑے پھلوں کا استعمال موذی امراض کا سبب بنتا ہے، اسی لیے رمضان المبارک میں معیاری اشیاء کی فراہمی یقینی بنانے کے لیے سحر و افطار کے دوران بھی ٹیمیں فیلڈ میں موجود ہیں۔ فوڈ سیفٹی ٹیمیں تین شفٹوں میں ملاوٹ مافیا کے خلاف کارروائیاں کر رہی ہیں۔ شہریوں کو ہدایت کی گئی ہے کہ اشیاء خریدنے سے قبل معیار کی جانچ ضرور کریں اور کسی بھی شکایت کی صورت میں 1223 پر اطلاع دیں۔

حافظ آباد،باغی ٹی وی (خبرنگارشمائلہ) پاکستان پیپلز پارٹی حافظ آباد کے ضلعی صدر ملک وزیر احمد اعوان نے پنڈی بھٹیاں کا دورہ کیا، جہاں انہوں نے پارٹی رہنماؤں سے ملاقات کی اور مختلف امور پر تبادلہ خیال کیا۔

تفصیلات کے مطابق تحصیل صدر چوہدری امداد مبارک لودھرا، سٹی صدر جابر ندیم چوہان، سینئر نائب صدر شیخ آصف رضا قادری اور رائے عمران علی نے ملک وزیر احمد اعوان کا پرتپاک استقبال کیا۔ ملاقات میں پارٹی کو مزید فعال بنانے اور تنظیمی استحکام پر گفتگو ہوئی۔ اس موقع پر پارٹی رہنماؤں نے کہا کہ ان کے درمیان اختلاف پیدا کرنے کی کوششیں ناکام ہوں گی اور وہ متحد ہو کر پارٹی کے لیے کام کرتے رہیں گے۔

بعد ازاں ملک وزیر احمد اعوان نے ضلعی جنرل سیکرٹری شیخ معراج الدین کی اہلیہ کے انتقال پر ان کے بیٹے ذیشان معراج اور بھائی شیخ عمران سے اظہارِ تعزیت کیا اور مرحومہ کے لیے فاتحہ خوانی کی۔ اس موقع پر پارٹی کے سینئر کارکن بندو خان کی وفات پر بھی ان کے اہلخانہ سے تعزیت کی گئی اور دعا مغفرت کی گئی۔