حافظ آباد ،باغی ٹی وی(خبرنگارشمائلہ) نواحی علاقے چٹھہ داد میں تیز رفتار ڈمپر نے سائیکل سوار کو کچل دیا، جس کے نتیجے میں وہ موقع پر ہی جاں بحق ہوگیا۔ عینی شاہدین کے مطابق حادثے کے بعد ڈرائیور ڈمپر سمیت فرار ہوگیا۔
مرنے والے کی شناخت 45 سالہ خالد کے نام سے ہوئی ہے، جو چٹھہ داد کا ہی رہائشی تھا۔ پولیس نے موقع پر پہنچ کر تحقیقات شروع کر دی ہیں جبکہ ڈرائیور کی تلاش جاری ہے۔
حافظ آباد، باغی ٹی وی (خبر نگار شمائلہ) احسن بھون جوڈیشل کمیشن آف پاکستان کے رکن منتخب، حافظ آباد میں خوشی کی لہر
حافظ آباد سے تعلق رکھنے والے سینئر قانون دان اور سابق صدر سپریم کورٹ بار ایسوسی ایشن احسن بھون ایڈووکیٹ جوڈیشل کمیشن آف پاکستان کے رکن منتخب ہو گئے۔ وہ پاکستان بار کونسل کی نمائندگی کریں گے اور دو سال کے لیے اپنے عہدے پر خدمات انجام دیں گے۔
جوڈیشل کمیشن میں ان کی نامزدگی کے لیے ہونے والی رائے شماری میں 19 ممبران نے حصہ لیا، جن میں سے 14 نے ان کے حق میں ووٹ دیا جبکہ 4 ممبران نے مخالفت کی۔
احسن بھون کی کامیابی پر حافظ آباد کی عوام اور وکلاء برادری نے خوشی کا اظہار کرتے ہوئے اسے شہر کے لیے باعثِ فخر لمحہ قرار دیا ہے۔
حافظ آباد،باغی ٹی وی(خبرنگارشمائلہ) کسانوں کا حکومت کے خلاف احتجاج، گندم کی خریداری اور قیمت میں اضافے کا مطالبہ
حافظ آباد میں کسان بورڈ کے زیر اہتمام ایک بڑی احتجاجی ریلی نکالی گئی، جس میں ضلع بھر سے کسانوں نے شرکت کی۔ ریلی کی قیادت نائب صدر کسان بورڈ امان اللہ چٹھہ، تحصیل پنڈی بھٹیاں کے چیئرمین شاہ نواز ہنجرا اور صدر کسان بورڈ حافظ آباد ملک شوکت علی پھلروان نے کی۔
کسانوں نے حکومت کی کسان دشمن پالیسیوں کے خلاف شدید نعرے بازی کی اور مطالبہ کیا کہ حکومت فوری طور پر گندم کی خود خریداری کا اعلان کرے اور اس کی کم از کم قیمت 4 ہزار روپے فی من مقرر کی جائے۔
کسان رہنماؤں نے خبردار کیا کہ اگر ان کے مطالبات پورے نہ کیے گئے تو احتجاج کا دائرہ ملک بھر میں پھیلا دیا جائے گا اور شہروں میں زرعی مصنوعات کی سپلائی کا بائیکاٹ کیا جائے گا۔
حافظ آباد ،باغی ٹی وی(خبرنگارشمائلہ)پولیس سے فرار ملزم دوبارہ گرفتار، 3 اہلکار بھی شکنجے میں آ گئے
تفصیل کے مطابق ڈسٹرکٹ پولیس آفیسر (ڈی پی او) عاطف نذیر کے حکم پر فوری ایکشن لیتے ہوئے پولیس نے اشتہاری ملزم بابر علی کوطورخم بارڈر سے گرفتار کر لیا۔ ملزم 48 گھنٹے قبل پولیس کی حراست سے فرار ہوا تھا اور بیرون ملک فرار ہونے کی کوشش میں تھا۔
ایس ڈی پی او صدر رانا جمیل قیصر کی نگرانی میں جوائنٹ انویسٹی گیشن ٹیم نے کارروائی کرتے ہوئے ملزم کو دھر لیا۔ ایس ایچ او کسوکی مشتاق نون کی قیادت میں ٹیم نے ملزم کو گرفتار کیا۔ پولیس حکام کے مطابق بابر علی پر منشیات، چوری اور ڈکیتی کے 6 مقدمات درج ہیں۔
ملزم کی پولیس حراست سے فراری کے بعد مکمل انکوائری کی گئی، جس میں ایک اسسٹنٹ سب انسپکٹر اور دو کانسٹیبلز کو ملوث پایا گیا۔ تینوں اہلکاروں کو گرفتار کر کے ان کے خلاف مقدمہ درج کر لیا گیا۔
گرفتاری کے لیے بنائی گئی ٹیم میں ایس ایچ او کالیکی منڈی شعیب اسلم، ایس ایچ او سکھیکی منڈی میاں ظہیر احمد، ایس ایچ او کسوکی مشتاق نون، ایس ایچ او سٹی سہیل اشرف، ایس ایچ او جلالپور بھٹیاں جہانگیر چدھڑ، انسپکٹر حفیظ انجم اور دیگر شامل تھے۔
ڈسٹرکٹ پولیس افسر عاطف نذیر کا کہنا ہے کہ قانون شکن عناصر جہاں بھی چھپیں گے، قانون کی گرفت سے نہیں بچ سکیں گے۔
حافظ آباد،باغی ٹی وی (خبرنگارشمائلہ) پولیس حراست سے ملزم فرار، تین اہلکار گرفتار
حافظ آباد میں پولیس حراست سے ملزم کے فرار پر ڈی پی او کا سخت نوٹس، تین پولیس اہلکاروں کے خلاف مقدمہ درج کر کے حوالات میں بند کر دیا گیا۔
تفصیلات کے مطابق 22 فروری 2025 کو ای ایس آئی صفدر حسین اور کانسٹیبل امداد حسین و ارشد اقبال ملزم بابر علی ولد محمد امیر کو مقدمہ نمبر 192/23 بجرم 457/380 میں جسمانی ریمانڈ کے بعد تھانے واپس لا رہے تھے کہ ملزم کالیکی ٹبہ کے قریب موقع پا کر فرار ہو گیا۔
ڈی پی او حافظ آباد نے واقعے کا فوری نوٹس لیتے ہوئے تینوں اہلکاروں کے خلاف غفلت و لاپرواہی کے الزام میں مقدمہ درج کروا کر حوالات میں بند کر دیا۔ ڈی ایس پی صدر سرکل رانا جمیل قیصر کی سربراہی میں ٹیمیں تشکیل دے دی گئیں، جو جلد از جلد ملزم کو گرفتار کریں گی۔
ڈی پی او حافظ آباد کا کہنا تھا کہ فرائض میں غفلت برتنے والے کسی بھی افسر یا اہلکار کو معاف نہیں کیا جائے گا۔
حافظ آباد،باغی ٹی وی (خبرنگارشمائلہ) ڈپٹی کمشنر عبدالرزاق نے جلالپور بھٹیاں کا دورہ کیا، جہاں انہوں نے تجاوزات کے خلاف جاری آپریشن کا معائنہ کیا۔ اس موقع پر ایڈیشنل ڈپٹی کمشنر ریونیو تنویر یاسین، ایڈیشنل ڈپٹی کمشنر جنرل حمداللہ اور اسسٹنٹ کمشنر پنڈی بھٹیاں اشفاق احمد بھی ان کے ہمراہ تھے۔
ڈپٹی کمشنر نے متعلقہ حکام کو ہدایت کی کہ تجاوزات کے خاتمے میں کسی قسم کی رعایت نہ برتی جائے اور عوامی راستوں کو ہر حال میں کلیئر کیا جائے۔
حافظ آباد،باغی ٹی وی (خبرنگارشمائلہ) پولیس میں خود احتسابی، 7 افسران نوکری سے برطرف
تفصیل کے مطابق حافظ آبادمیں اختیارات سے تجاوز اور فرائض میں غفلت پر پولیس افسران اور اہلکاروں کے خلاف سخت کارروائی کرتے ہوئے ڈی پی او حافظ آباد عاطف نذیر نے 7 پولیس افسران کو ملازمت سے برطرف کر دیا۔
ترجمان پولیس کے مطابق خود احتسابی کے عمل کے تحت 3 پولیس ملازمین کو جرمانے کیے گئے جبکہ 3 افسران کو سنشور کی سزائیں دی گئیں۔ سزا پانے والوں میں سب انسپکٹر اور اے ایس آئی بھی شامل ہیں۔
ڈی پی او عاطف نذیر کا کہنا ہے کہ قانون کی پاسداری نہ کرنے والے افسران کو پولیس فورس میں رہنے کا کوئی حق نہیں۔ پولیس میں اصلاحاتی عمل جاری رہے گا اور غفلت برتنے والوں کے خلاف بلا امتیاز کارروائی کی جائے گی۔
حافظ آباد ،باغی ٹی وی (شمائلہ خبر نگار) حافظ آباد کے کلمہ چوک کے قریب گلی مسجد بلالؓ والی میں ایک گھر میں استری بند کرنا بھول جانے کے باعث اچانک آگ بھڑک اٹھی، جس نے دیکھتے ہی دیکھتے پورے گھر کو لپیٹ میں لے لیا۔
آتشزدگی کے نتیجے میں گھر میں موجود لاکھوں روپے مالیت کا قیمتی سامان، فرنیچر اور دیگر اشیاء جل کر راکھ ہو گئیں۔ رہائشیوں کے مطابق جیسے ہی آگ بھڑکی، دھواں اور شعلے بلند ہونے لگے، جس سے اہلِ محلہ میں خوف و ہراس پھیل گیا۔ مقامی افراد نے فوری طور پر ریسکیو 1122 کو اطلاع دی۔
واقعے کی اطلاع ملتے ہی ریسکیو 1122 کی ٹیم موقع پر پہنچ گئی اور پیشہ ورانہ مہارت کا مظاہرہ کرتے ہوئے صرف 15 منٹ کی جدوجہد کے بعد آگ پر قابو پا لیا۔ ریسکیو اہلکاروں نے نہایت مستعدی سے کام لیتے ہوئے آگ کو مزید پھیلنے سے روکا، جس سے ممکنہ جانی نقصان سے بچاؤ ممکن ہو سکا۔
شہریوں نے ریسکیو 1122 کی بروقت کارروائی کو سراہتے ہوئے ان کی محنت اور پیشہ ورانہ صلاحیتوں کو خراجِ تحسین پیش کیا۔ مقامی افراد کا کہنا تھا کہ اگر ریسکیو ٹیم تاخیر سے پہنچتی تو نقصان مزید سنگین ہو سکتا تھا۔
حافظ آباد ،باغی ٹی وی(خبرنگارشمائلہ) حافظ آباد پولیس میں کانسٹیبلان اور لیڈی کانسٹیبلان کی آسامیوں پر بھرتی کا عمل زور و شور سے جاری ہے۔ چیئرمین بھرتی بورڈ ڈی آئی جی عثمان اکرم گوندل، ڈی پی او حافظ آباد عاطف نذیر اور ڈاکٹر خدیجہ عمر کی نگرانی میں قد، وزن اور چھاتی کا معائنہ کیا جا رہا ہے۔
ڈی پی او عاطف نذیر نے بتایا کہ 1782 امیدواروں کے لیے فول پروف سکیورٹی انتظامات کیے گئے ہیں۔ امیدواروں کے آرام اور سہولت کے لیے سائبان اور پینے کے پانی کی دستیابی یقینی بنائی گئی ہے۔
ترجمان پولیس کے مطابق بھرتی مکمل طور پر میرٹ پر ہوگی اور شفافیت کو یقینی بنانے کے لیے ہر ممکن وسائل بروئے کار لائے جا رہے ہیں۔ ڈی پی او نے نوجوانوں کو تلقین کی کہ وہ اپنی محنت، قابلیت اور صلاحیت پر بھروسہ کریں اور نوسربازوں کے جھانسے میں نہ آئیں۔
انہوں نے مزید کہا کہ بھرتی کا عمل مکمل دیانتداری اور شفافیت کے ساتھ انجام دیا جائے گا تاکہ صرف اہل اور قابل امیدوار ہی فورس کا حصہ بنیں۔
حافظ آباد،باغی ٹی وی (خبرنگارشمائلہ) بیرونی ریلوے پھاٹک پر فلائی اوور کی تعمیر کے باعث سڑک کو ہر قسم کی ٹریفک کے لیے بند کر دیا گیا ہے۔ ضلعی انتظامیہ اور ٹریفک پولیس کے مطابق بڑی گاڑیوں کے لیے متبادل راستے فراہم کیے گئے ہیں، جبکہ چھوٹی گاڑیاں اندرونِ شہر کے راستوں سے گزر سکیں گی۔
متبادل راستے:
سرگودھا سے گوجرانوالہ جانے والی ہیوی ٹریفک موٹر وے کے ذریعے خانقاہ ڈوگراں انٹرچینج استعمال کرے گی۔
سرگودھا سے سیالکوٹ و وزیر آباد جانے والی ہیوی ٹریفک جلال پور بھٹیاں سے بند روڈ کا استعمال کرے گی۔
گوجرانوالہ سے سرگودھا، جھنگ، چنیوٹ جانے والی ہیوی ٹریفک گرڈ اسٹیشن چوک، حاجی کرم اللہ چوک سے خانقاہ ڈوگراں انٹرچینج کے ذریعے موٹر وے کا استعمال کرے گی۔
چھوٹی گاڑیوں کے لیے اندرونِ شہر کے راستے کھلے رہیں گے۔
ٹریفک پولیس نے شہریوں کو متبادل راستے اختیار کرنے، دورانِ سفر احتیاط برتنے اور ٹریفک قوانین کی مکمل پاسداری کرنے کی ہدایت کی ہے۔ مزید ہدایات بھی عوام کی سہولت کے پیش نظر جاری کی جائیں گی۔