Category: حافظ آباد

حافظ آباد (خبر نگار شمائلہ) ڈسٹرکٹ اینڈ سیشن جج محمد ندیم انصاری نے علی پور چٹھہ کے علاقہ برج تاشہ میں ہونے والے دو سگے بھائیوں اور بیٹے کے مشہور قتل کیس کا فیصلہ سنا دیا۔ عدالت نے مجرم نعمان حیدر کو 3 مرتبہ سزائے موت کا حکم سنایا ہے۔

عدالت نے مجرم کو لواحقین کو 10 لاکھ روپے ہرجانہ ادا کرنے کا بھی حکم دیا ہے۔ ہرجانے کی عدم ادائیگی پر مجرم کو مزید 6 ماہ قید بھگتنا ہوگی۔ واضح رہے کہ مجرم کے خلاف قتل کی دفعات کے تحت 29 جون 2023 کو مقدمہ درج کیا گیا تھا۔

وزیرآباد کے تھانہ علی پور چٹھہ میں اوباش نوجوان نعمان حیدر نے فائرنگ کرکے افتخار احمد چٹھہ، ان کے بیٹے سعد بن افتخار چٹھہ اور بھائی منور چٹھہ کو قتل کر دیا تھا۔ یہ واقعہ نواحی گاؤں برج تاشہ میں پیش آیا تھا۔

پولیس حکام کے مطابق ملزم نعمان حیدر اپنی موٹر سائیکل پر منور چٹھہ کو ڈیرے پر لایا، جبکہ اس کے بھائی افتخار چٹھہ کو پہلے ہی ڈیرے پر بلایا ہوا تھا۔ ملزم نے دونوں بھائیوں کو یکے بعد دیگرے فائرنگ کر کے قتل کیا۔ فائرنگ کی آواز سن کر افتخار چٹھہ کا بیٹا سعد چٹھہ ڈیرے پر پہنچا تو ملزم نے اس پر بھی گولیوں کی بوچھاڑ کر دی۔

یہاں یہ امر قابل ذکر ہے کہ مقتول سعد چٹھہ نے سی ایس ایس کا امتحان پاس کر رکھا تھا اور کچھ ہی عرصہ میں اسسٹنٹ کمشنر کے طور پر چارج لینے والا تھا۔ دوسری جانب ملزم نعمان 6 سال قبل اپنے والد سرفراز چٹھہ کو بھی رات کی تاریکی میں فائرنگ کر کے قتل کر چکا ہے۔

حافظ آباد (باغی ٹی وی، خبر نگار) حافظ آباد کے نواحی علاقے کالیکی منڈی کے رہائشی غلام سبحانی نے تھانہ صدر میں درخواست دائر کرتے ہوئے بتایا کہ چند دن قبل انہیں دن دہاڑے ڈاکوؤں نے روک کر ان سے موٹر سائیکل، نقدی اور موبائل فون چھین لیا۔ غلام سبحانی دارالامان حافظ آباد میں سکیورٹی گارڈ کے طور پر ڈیوٹی دے رہے تھے اور کام ختم ہونے کے بعد گھر واپس جا رہے تھے کہ راستے میں سپائر کالج کے قریب یہ واقعہ پیش آیا۔

متاثرہ شخص کے مطابق نامعلوم مسلح ڈاکوؤں نے اسے روکا اور اسلحہ کے زور پر موٹر سائیکل، نقدی، موبائل فون اور دیگر ضروری دستاویزات بھی چھین لیں۔

غلام سبحانی نے اپنی درخواست میں لکھا کہ ڈاکوؤں کے اس ظلم و ستم کی وجہ سے انہیں نہ صرف مالی نقصان ہوا بلکہ ان کی ذاتی زندگی بھی متاثر ہوئی۔ انہوں نے اعلیٰ حکام سے مطالبہ کیا ہے کہ اس واردات کی تحقیقات کی جائیں، ملزمان کو فوری طور پر گرفتار کیا جائے اور موٹر سائیکل سمیت تمام سامان واپس دلوایا جائے تاکہ وہ مزید پریشانی سے بچ سکیں۔

حافظ آباد ،باغی ٹی وی(خبر نگارشمائلہ کی رپورٹ) خانپور کے رہائشی نوجوان نعمان حسن ولد نصر اللہ نے گھریلو جھگڑے کے باعث دلبرداشتہ ہو کر تیزاب پی لیا۔ نوجوان کو فوری طور پر ڈسٹرکٹ ہیڈ کوارٹر ہسپتال حافظ آباد کے ایمرجنسی وارڈ میں منتقل کیا گیا، جہاں اس کی حالت تشویشناک بتائی جا رہی ہے۔

ابتدائی اطلاعات کے مطابق گھریلو تنازع کے باعث نوجوان نے انتہائی قدم اٹھایا، تاہم ڈاکٹرز اس کی جان بچانے کے لیے بھرپور کوشش کر رہے ہیں۔ پولیس نے واقعے کی تحقیقات شروع کر دی ہیں جبکہ اہل خانہ ہسپتال میں پریشان حال موجود ہیں۔

ماہرین کا کہنا ہے کہ گھریلو مسائل اور ذہنی دباؤ کے باعث خودکشی کے رجحانات میں اضافہ ہو رہا ہے، جس کے تدارک کے لیے سماجی سطح پر آگاہی مہم اور ذہنی صحت کی سہولیات کی فراہمی ناگزیر ہے۔

حافظ آباد،باغی ٹی وی (خبرنگار)پنڈی بھٹیاں میں تھانہ سکھیکی پولیس کی بڑی کارروائی، چوری شدہ کار برآمد

تفصیل کے مطابق پنڈی بھٹیاں میں تھانہ سکھیکی پولیس نے تیز رفتار کارروائی کرتے ہوئے چند روز قبل چوری ہونے والی کار کو ہزارہ سے برآمد کر کے اصل مالک کے حوالے کر دیا۔

ایس ایچ او ظہیر عباس نے اپنی ٹیم کے ہمراہ دن رات محنت کر کے ملزم کو گرفتار کر لیا، جس سے برآمد شدہ گاڑی مالک کے سپرد کر دی گئی۔

کار کی واپسی پر متاثرہ شہری نے پولیس کی کارکردگی کو سراہتے ہوئے مکمل اعتماد کا اظہار کیا۔

حافظ آباد،باغی ٹی وی (خبرنگار)پنڈی بھٹیاں میں تجاوزات کے خلاف بھرپور آپریشن، بازار کلیئر

تفصیل کے مطابق پنڈی بھٹیاں میں اسسٹنٹ کمشنر اشفاق احمد کی نگرانی میں تجاوزات کے خلاف بھرپور آپریشن جاری ہے، جس کے دوران تمام غیر قانونی تجاوزات کا خاتمہ کر کے بازاروں کو کلیئر کیا جا رہا ہے۔

آپریشن میں میونسپل کمیٹی اور ٹریفک پولیس نے حصہ لیا۔ اس موقع پر اسسٹنٹ کمشنر اشفاق احمد کا کہنا تھا کہ بازاروں میں تجاوزات کسی صورت برداشت نہیں کی جائیں گی اور جو بھی تجاوزات قائم کرنے کی کوشش کرے گا، اس کے خلاف سخت کارروائی کی جائے گی۔

حافظ آباد ،باغی ٹی وی(خبرنگارشمائلہ کی رپورٹ) تعلیمی اداروں میں چوری کی بڑھتی ہوئی وارداتوں نے تعلیمی نظام کو خطرے میں ڈال دیا ہے۔ حالیہ دنوں میں امریکن لائسیم انٹرنیشنل سکولز سسٹم کے ماتحت متعدد سرکاری آؤٹ سورس سکولوں میں چوری کی وارداتیں رپورٹ ہوئی ہیں، جس پر تعلیمی حلقوں نے شدید تشویش کا اظہار کیا ہے۔

ذرائع کے مطابق 47 آؤٹ سورس سکولوں میں معیارِ تعلیم بہتر ہونے اور طلبہ کی تعداد دوگنا ہونے کے باوجود، تعلیم دشمن عناصر ان اداروں کو نقصان پہنچا رہے ہیں۔ اسکولوں میں قیمتی سامان چوری ہونے کے واقعات تسلسل سے پیش آ رہے ہیں، جن میں ٹرانسفارمر، بجلی کی کیبلز، پنکھے اور درختوں کی چوری شامل ہے۔

متاثرہ سکولوں کی تفصیلات درج ذیل ہیں
🔹 گورنمنٹ گرلز پرائمری اسکول ملاح والا: ٹرانسفارمر سے قیمتی سامان چوری
🔹 گورنمنٹ پرائمری اسکول دھری والا: بجلی کی کیبل اتار لی گئی
🔹 گورنمنٹ گرلز پرائمری اسکول کوٹ حسین: تین عدد پنکھے چوری
🔹 گورنمنٹ پرائمری اسکول کھٹرانی: متعدد درخت کاٹے گئے

متاثرہ اسکولوں کے انتظامیہ نے ڈسٹرکٹ پولیس آفیسر (ڈی پی او) حافظ آباد سے مطالبہ کیا ہے کہ ان واقعات کا فوری نوٹس لے کر چوری شدہ سامان واپس دلوایا جائے اور ملزمان کو قانون کے کٹہرے میں لایا جائے۔