Category: ہزارہ

ایبٹ آباد۔ (اے پی پی) نو تعینات ایس ایس پی ٹریفک وارڈن طارق محمود خان کی سربراہی میں ٹریفک وارڈن آفس میں ٹریفک افسران و سٹاف کے ساتھ میٹنگ کا انعقاد ہوا۔ جس میں ڈی ایس پی ہیڈ کوارٹر، ٹریفک وارڈن ہمایوں خان، ڈی ایس پی ٹریفک اعظم علی شاہ، انسپکٹرز ٹریفک وسیم خان، تحفور خان، ذوالفقار علی، ٹریفک سب انسپکٹرز پرویز خان، جہانزیب خان، انور خان اور دیگر تمام شعبہ جات سے تعلق رکھنے والے انچارج صاحبان نے شرکت کی۔ میٹنگ کے دوران پریشر ہارن، ایکسٹرا ڈیکوریشن، و ایکسٹرا سپیکر سمیت بچوں کو خطرناک طریقہ سے سکول لے جانے اور لانے والی گاڑیوں کے خلاف سخت آپریشن شروع کرنے کے احکامات جاری کئے گئے۔

مانسہرہ۔ (اے پی پی) مانسہرہ کے علاقہ دارہ کا رہائشی شخص کرنٹ لگنے سے جاں بحق ہو گیا۔ اس سلسلہ میں ذرائع نے بتایا کہ دارہ کا رہائشی ظہور احمد المعروف فوجی جو ڈرائیور تھا، گھر کے باتھ روم میں بجلی ٹھیک کر رہا تھا کہ اچانک اسے کرنٹ لگ گیا جس کے باعث وہ موقع پر ہی جاں بحق ہو گیا۔ مرحوم نماز جنازہ کی ادائیگی کے بعد آبائی قبرستان میں سپرد خاک کر دیا گیا۔

ایبٹ آباد۔ (اے پی پی) کمشنر ہزارہ ڈویژن سید ظہیرالاسلام نے کوہستان کے تینوں اضلاع سمیت پورے ہزارہ ڈویژن میں سرکاری رقوم کے استعمال اور ترقیاتی کاموں میں ہونے والی مبینہ بدعنوانیوں کے ذمہ دار سرکاری افسران اور اہلکاروں کے خلاف اینٹی کرپشن مقدمات قائم کرنے کا حکم دیا ہے، کوہستان کے تینوں اضلاع میں طالبات کو فراہم کئے گئے وظائف میں کرپشن کی اطلاعات کا بھی سخت نوٹس لیتے ہوئے ان وظائف میں ہونے والی کرپشن کے معاملات بھی تفتیش کے لئے گئے، محکمہ انسداد بدعنوانی سے گذشتہ 30 جون سے قبل کے تمام ترقیاتی کاموں کی پراگریس رپورٹ اور ان کیلئے کی گئی ادائیگیوں کی تفصیلات دو ہفتوں کے اندر طلب کر لی گئی ہیں۔ یہ احکامات انہوں نے کمشنر ہاؤس میں سرکاری رقوم کے استعمال اور ترقیاتی کاموں کیلئے کی گئی ادائیگیوں کی جانچ پڑتال کے حوالہ سے منعقدہ اجلاس کی صدارت کرتے ہوئے جاری کیں۔ اجلاس میں لوئر کوہستان اور کولائی پالس کے ڈپٹی کمشنروں کے علاوہ بعض اضلاع کے ڈسٹرکٹ مانیٹرنگ افسران، محکمہ پبلک ہیلتھ انجینئرنگ، سی اینڈڈبلیو، ٹی ایم اے، کینٹ بورڈ، واسا، انتظامیہ اور دیگر متعلقہ محکموں کے افسران نے شرکت کی۔ اجلاس کے دوران ضلعی مانیٹرنگ افسروں کی جانب سے پیش کی گئی مانیٹرنگ رپورٹس کی روشنی میں ترقیاتی کاموں اور مختلف دیگر مدوں میں کی گئی مالی ادائیگیوں میں ظاہر ہونے والی مبینہ بدعنوانیوں اور بے قاعدگیوں کی نشاندہی کی گئی تھی۔ کمشنر ہزارہ نے ان بے قاعدگیوں کا سخت نوٹس لیتے ہوئے ان کے ارتکاب کو ناقابل معافی جرم قرار دیا اور متعلقہ مانیٹرنگ افسران کو حکم دیا کہ وہ ان بے قاعد گیوں کی تمام تفصیلات محکمہ اینٹی کرپشن کے حوالے کریں تاکہ سرکاری رقوم خرد برد کرنے کے ذمہ دار افسروں اور اہلکاروں کے خلاف کارروائی کی جا سکے۔ کمشنرہزارہ سید ظہیر الاسلام نے مانیٹرنگ رپورٹ کا حوالہ دیتے ہوئے اس امر پر تشویش کا اظہار کیا کہ کوہستان کے اضلاع میں طالبات کیلئے مختص کی گئی وظائف کی رقوم میں کرپشن کی گئی ہے۔ انہوں نے متعلقہ افسران کو ہدایت کی کہ اس کرپشن کے ذمہ دار افراد کے خلاف محکمہ اینٹی کرپشن کے ذریعہ کارروائی کی جائے۔ انہوں نے ترقیاتی کاموں کے حوالہ سے کہا کہ آئندہ کوئی بھی ایسا منصوبہ شروع نہ کیا جائے جس میں عوام کے ٹیکسوں کا پیسہ ضائع ہو۔ انہوں نے مانیٹرنگ افسران اور متعلقہ محکموں کو ہدایت کی کہ وہ 15 دن کے اندر تمام ترقیاتی کاموں اور ان کیلئے کی گئی ادائیگیوں کو چیک کر کے رپورٹ پیش کریں اور چیکنگ کے دوران جن منصوبوں میں بے قاعدگیاں یا بدعنوانیاں سامنے آئیں ان سے محکمہ اینٹی کرپشن کو فوری آگاہ کیا جائے۔ انہوں نے کولائی پالس سمیت کوہستان کے تمام ڈپٹی کمشنروں کو ہدایت کی کہ وہ ترقیاتی فنڈز یونین کونسلوں میں مساوی تقسیم کریں اور رابطہ سڑکوں کی تعمیر و مرمت کو ترجیح دی جائے اور کھلی کچہریوں میں جن مسائل کی نشاندہی کی گئی ہے انہیں حل کیا جائے جبکہ ترقیاتی کاموں اور دیگر امور پر ماہانہ کارکردگی رپورٹ پیش کی جائے۔ کمشنر ہزارہ نے ڈویژنل ہیڈ کوارٹر ایبٹ آباد میں صفائی ستھرائی کی صورتحال پر بھی عدم اطمینان کا اظہار کرتے ہوئے واسا کو اپنی کارکردگی بہتر بنانے کی ہدایت کی۔ انہوں نے سالڈ ویسٹ پلانٹ کو بھی بیکار قرار دیتے ہوئے کہا کہ اس پلانٹ پر 17 ملین روپے خرچ کئے گئے اور گذشتہ دس سال سے اس پر انکوائری چل رہی ہے جس کا تاحال کوئی نتیجہ نہیں نکلا۔ انہوں نے ٹی ایم اے کو ہدایت کی کہ وہ تین روز کے اندر اس پلانٹ کی انکوائری رپورٹ پیش کرے تاکہ اس ناکام منصوبہ کیلئے قومی خزانہ سے ادائیگیاں کرنے والوں سے یہ رقوم واپس لی جا سکیں۔ انہوں نے کہا کہ غریب عوام کے ٹیکسوں کا پیسہ ضائع ہونے نہیں دیا جائے گا اور نہ ہی آئندہ ایسا کوئی منصوبہ لگایا جائے گا جس سے عوام کو فائدہ نہ ہو۔

محمد طلحہ محمود فاؤنڈیشن کی جانب سے ضلع ہری پور میں انقلابی پروگرام مستحق خاندانوں میں جہیز پیکج کی تقسیم کی گئی،سینیٹر محمد طلحہ محمود ( چیئرمین محمد طلحہ محمود فاؤنڈیشن) نے پروگرام میں شرکت کی اور مستحق خاندانوں میں جہیز پیکج تقسیم کیا

باغی ٹی وی کی رپورٹ کے مطابق اس موقع پر ان کا کہنا تھا کہ دکھی انسانیت کی بلا امتیاز خدمت افضل ترین عبادت ہے۔ حدیث کا مفہوم ہے کہ ساری مخلوق اللہ کا کنبہ ہے، اللہ تعالیٰ کے نزدیک تمام مخلوق میں سب سے زیادہ محبوب و پسندیدہ وہ ہے جو اس کے کنبے کے ساتھ نیکی کرے۔ہمیں اپنے معاشرے میں کمزور طبقات کو سہارا دینے کی ضرورت ہے ایک ایسے وقت میں جب کہ ہر طرف مہنگائی اور بے روزگاری کا طوفان ہے غریب، بے سہارا لوگوں کی زندگی اجیرن ہوچکی ہے،ہونا تو یہ چاہیئے تھا کہ ہماری حکومتیں اس جانب متوجہ ہوتیں اور ان طبقات کے دکھوں کا مداوا کرتیں مگرافسوس کہ ان کی جانب سے کوئی اقدام نہیں ہورہے۔

ایسی حالت میں محمد طلحہ محمود فاؤنڈیشن اپنے وسائل سے اندرون ملک ہی نہیں بلکہ بیرون ممالک میں بھی دکھی انسانیت کی خدمت میں پیش پیش ہے،ضلع ہریپور کی تحصیل خانپورکیلئے خصوصی طور پر جہیز پیکج کا اعلان کیا گیا ہے، جس سے مستحق خاندان مستفید ہونگے اور ہماری خواہش ہے کہ اس طرح کے مزید پروگرام بھی اس ضلع میں منعقد کئے جائیں،

اس موقع پرانکا مزید کہنا تھا کہ ضلع ہری پورکو قدرت نےہر نعمت سے نوازا ہے ، ہری پور کی مسماندگی کو ختم کرنے کیلئے محمد طلحہ محمود فاؤنڈیشن مختلف شعبوں میں کام کررہی ہے،تعلیم کا میدان ہو یا صحت کا شعبہ ہم اس علاقے کی خوشحالی کیلئے فکرمند ہیں اور ہماری فاؤنڈیشن کے مسلسل پروگرام جاری ہیں۔ یتیم اور بے سہارا خاندانوں کیلئے جہیز کی تیاری بھی ایک کٹھن مرحلہ ہوتا ہے اس سلسلہ میں محمد طلحہ محمود فاؤنڈیشن نے خصوصی پیکج تقسیم کرکے ان خاندانوں کی مشکلات میں کمی کی ہے اور ہماری کوشش ہے کہ آئندہ بھی ایسے انقلابی پروگرام لاکر آپ کے علاقہ کی ترقی میں اپناکردار ادا کرتے رہیں ۔ سینیٹر محمد طلحہ محمود نے مستحق خاندانوں میں نقد رقم بھی تقسیم کی۔

پروگرام کا آغاز تلاوت قرآن مجید سے ہوا، پروگرام سے علاقہ کی معزز شخصیات مولانا مطیع الرحمن قاسمی، ممبر تحصیل کونسل سفیر اعوان،ملک طارق ، چیئرمین ارشاد ،چوہدری پرویز ناظم وی سی کیلگ ، محمد مسکین ، عظمت خان نائب ناظم وی سی میرپورنے بھی خطاب کیا ،مقررین نے سینیٹر محمد طلحہ محمود کی ہزارہ بھر میں خدمات کو سراہا اور ضلع ہری پور میں محمد طلحہ محمود فاؤنڈیشن کے پروگراموں پر اطمینان کا اظہار کیا اور ان کو علاقہ کی ترقی اور خوشحالی کا زریعہ قرار دیا ،اہلیان علاقہ نے سینیٹر محمد طلحہ محمود کا پروگرام میں شرکت اور جہیز پیکج کی تقسیم پر شکریہ ادا کیا۔۔۔

کوہستان۔ (اے پی پی) ڈی پی او لوئر کوہستان محمد سلیمان خان کی خصوصی ہدایات کی روشنی میں زیر قیادت ایس ڈی پی او سرکل پٹن اورنگزیب خان بمعہ تھانہ دوبیر پولیس اور ایلیٹ کمانڈوز نے تھانہ دوبیر کے حدود کالونی، دوبیر، جیجال اور گلوز بانڈہ میں سرچ اینڈ سٹرائیک آپریشن کیا۔ پولیس ذرائع کے مطابق دوران سرچ اینڈ سٹرائیک آپریشن لالزادہ ولد بخت زمان کو بحوالہ مقدمہ علت نمبر 19/181 جرم نائن بی تھانہ دوبیر کو اے ایس آئی محمد عثمان خان نے گرفتار کر کے ملزم کو حوالات بند کر دیا۔ زاہد حسین ولد محمد افضل کو اے ایس آئی محمد عثمان خان نے ایک پستول 30 بور بمعہ 5 عدد کارتوس سمیت گرفتار کر کے ملزم کے خلاف مقدمہ علت نمبر 019/182 جرم 15 اے اے تھانہ دوبیر درج کر کے ملزم کو بند حوالات تھانہ کیا۔ جیل خان ولد جمعہ سین بندوق 12 بور ریپیٹر بمعہ 14 عدد کارتوس سمیت آئی ایچ سی چوکی چکئی اورنگزیب خان نے گرفتار کر کے ملزم کے خلاف مقدمہ علت نمبر 019/183 جرم 21 اے اے تھانہ دوبیر درج کر کے ملزم کو بند حوالات کیا گیا۔ دوران سرچ اینڈ سٹرائیک ہوٹلز، دکانوں، گاڑیوں اور موٹر سائیکلز کو چیک کیا گیا۔

ایبٹ آباد۔ (اے پی پی) نواں شہر پولیس نے یونین کونسل ککمنگ کے گاؤں ریالی میں صدام نامی نوجوان کے قتل میں نامزد ملزم کو گرفتار کر لیا ہے۔ پولیس ذرائع کے مطابق پولیس کو چند روز قبل گاؤں ریالی میں صدام کی نعش ملی تھی، نوجوان کو فائرنگ کر کے قتل کیا گیا۔ مقتول نوجوان کے والد خورشید کی مدعیت میں تھانہ نواں شہر میں نامزد ملزم جہانگیر ولد رفیق کے خلاف مقدمہ درج کیا گیا۔ ایس ایچ او تھانہ نواں شہر طارق خان نے مخبر کی اطلاع پر پولیس نفری کے ہمراہ چھاپہ کے دوران ملزم جہانگیر کو گرفتار کر کے ملزم کے قبضہ سے آلہ قتل بھی برآمد کر لیا

مانسہرہ۔ (اے پی پی) رکن صوبائی اسمبلی سید احمد حسین شاہ کی کاوشوں سے بالاکوٹ میں 40 جامع مساجد میں سولر سسٹم تنصیب کی منظوری دیدی گئی، دیگر مساجد میں سولر سسٹم کی تنصیب دوسرے فیز میں کی جائے گی۔ صوبائی حکومت خیبر پختونخوا نے سید احمد حسین شاہ کی تجویز پر تحصیل بالاکوٹ کی 40 جامع مساجد کو پہلے فیز میں سولر انرجی فراہم کرنے کی اصولی طور پر منظوری دیدی ہے جبکہ دوسرے فیز میں تحصیل بالاکوٹ کی دیگر مساجد کو بھی شامل کیا جائے گا۔ واضح رہے کہ جن جامع مساجد کیلئے سولر سسٹم فراہم کرنے کی منظوری دی گئی ہے ان میں جامع مساجد ابوبکر صدیق بٹہ کنڈی، جامع مسجد پل بٹہ کنڈی، مسجد عمر فاروق سہوچ جامع مسجد ناران، جامع مسجد راجوال، جامع مسجد کاغان، جامع مسجد درمیانہ گراں کاغان، جامع مسجد لڑی، مسجد بلال باڑی کاغان، جامع مسجد پھاگل، جامع مسجد مہانڈری، تبلیغی مرکز جرید، جامع مسجد بھونجہ، جامع مسجد بیلہ پارس، مسجد باڑی پارس، مسجد چونٹیاں پارس، جامع مسجد گھنول، جامع مسجد سنگڑ، مدرسہ جامع سید احمد شہید بالاکوٹ، جامع مسجد شوہال میدان، جامع جامع مسجد نڑاہ، مسجد بالا پیر گرلاٹ، مسجد محمدی گرلاٹ، جامع مسجد شوہال معزاللہ، مسجد پت سیری شوہال، جامع مسجد تلہٹہ، جامع مسجد لوئر حصاری، جامع مسجد ہنگرائی، جامع مسجد بیلہ پارس، جامع مسجد کھیت سراش، جامع مسجد کرنول، جامع مسجد دوگہ، جامع مسجد خیرآباد، جامع مسجد گل ڈھیری، جامع مسجد گڑھی حبیب اللہ، جامع مسجد برار کوٹ، جامع مسجد حسہ، جامع مسجد کیوائی شامل ہیں جن کو سولر سسٹم فراہمی کی مکمل طور پر منظوری ہو چکی ہے اور جلد اس کی تنصیب شروع ہو گئی جبکہ دوسرے فیز میں رہ جانے والی مساجد شامل کیا جائے گا۔

ایبٹ آباد۔ (اے پی پی) گلیات کی یونین کونسل پلک کے گاؤں ملکوٹ میں چادر چھت مکان میں بجلی کے شارٹ سرکٹ کے باعث ہونے والی آتشزدگی کے نتیجہ میں تین کمروں پر مشتمل مکان جل کر خاکستر ہو گیا۔ زرداد خان کے مکان میں بجلی کے شارٹ سرکٹ کے باعث گیس سلنڈر کے پائپ کو آگ لگنے کے بعد آگ کے شعلوں نے پورے گھر کو اپنی لپیٹ میں لے لیا۔ آتشزدگی سے تین کمروں پر مشتمل چادر چھت مکان کے تینوں کمرے جل گئے۔ آتشزدگی سے متاثرہ شخص نے ضلعی انتظامیہ سے مالی امداد کی اپیل کی ہے۔

ہری پور۔ (اے پی پی) تربیلا ڈیم میں پانی کی سطح کم ہو کر 1542.63 فٹ ہوگئی، 16 پیداواری یونٹس سے 3833 میگاواٹ بجلی کی پیداوار ریکارڈ کی گئی۔ تفصیلات کے مطابق تربیلا ڈیم میں پانی کی سطح معمولی طور پر کم ہو کر 1542.63 فٹ ہو گئی، ڈیم میں پانی کی آمد 100600 اور اخراج 120000 کیوسک ہے جبکہ تربیلا ڈیم کے تمام 17 میں سے 16 پیداواری یونٹ کام کر رہے ہیں جن سے بجلی کی پیداوار 3833 میگاواٹ ریکارڈ کی گئی ہے۔

ایبٹ آباد۔ (اے پی پی) ایبٹ آباد یونیورسٹی آف سائنس اینڈ ٹیکنالوجی نے بی اے/بی ایس سی سال 2019ء کے نتائج کا اعلان کر دیا۔ سالانہ نتائج کے حوالہ سے تقریب یونیورسٹی میں منعقد جس میں وائس چانسلر پروفیسر ڈاکٹر ملک مجدد الرحمن نے پوزیشن حاصل کرنے والے طلباء و طالبات میں انعامات تقسیم کئے۔ اس موقع پر کنٹرولر امتحانات سمیت فیکلٹی ممبران اور پوزیشن حاصل کرنے والے کالجز کے پرنسپلز اور طلبہ کے والدین نے کثیر تعداد میں شرکت کی۔ ایبٹ آباد یونیورسٹی آف سائنس اینڈ ٹیکنالوجی نے سالانہ نتائج 2019ء کا اعلان کر دیا ہے، اس حوالہ سے یونیورسٹی کے ہال میں پروقار تقریب کا انعقاد کیا گیا جس میں یونیورسٹی کے وائس چانسلر پروفیسر ڈاکٹر ملک مجدد الرحمن نے پوزیشن حاصل کرنے والے طلباء و طالبات میں انعامات تقسیم کئے۔