Category: ہزارہ

ایبٹ آباد میں ٹیکس نادہندگان کے خلاف کارروائیوں کا آغاز، پٹرول پمپ، ہوٹل،سروس سٹیشن سیل
ایبٹ آباد میں محکمہ ایکسائز اینڈ ٹیکسیشن نے ٹیکس نہ دینے والوں کے خلاف کارروائیوں کا آغاز کر دیا۔ ایک پٹرول پمپ، ایک نجی ہوٹل سمیت سروس سٹیشن سیل کر دیا گیا۔ ایکسائز اینڈ ٹیکسیشن ٹیم نے شاہراہ ریشم پر موجود پٹرول پمپ، ایک نجی ہوٹل اور سروس سٹیشن کیا۔ سیل کی گئی پراپرٹی پر 20 لاکھ روپے سے زائد ٹیکس کے بقایا جات ہیں۔ ٹیکس کی مکمل ادائیگی پر سیل کی گئی پراپرٹی کو اوپن کیا جائے گا۔ ایکسائز اینڈ ٹیکسیشن پولیس کے مطابق ٹیکس ادا نہ کرنے والے کاروباری شخصیات کے خلاف کارروائیاں جاری رہیں گی۔

ایبٹ آباد، ڈی پی او کی ڈیٹکٹو کانسٹیبلان کو تمام غیر قانونی سرگرمیوں پر کڑی نظر رکھنے کی ہدایت
ایبٹ آباد۔ 25 جولائی (اے پی پی) ضلعی پولیس سربراہ عباس مجید خان مروت نے ایبٹ آباد کے جملہ تھانہ جات میں تعینات ڈیٹکٹو کانسٹیبلان کے ہمراہ خصوصی میٹنگ کی۔ ضلعی پولیس سربراہ کے ہمراہ ایس پی ہیڈ کوارٹرز قمر حیات خان بھی موجود تھے۔ میٹنگ کے دوران ضلعی پولیس سربراہ نے جملہ ملازمین کو اپنی اپنی بیٹ میں ہر قسم کی غیر قانونی سرگرمیوں، مجرمان اشتہاریوں، ناجائز اسلحہ کے حامل افراد، امام بارگاہوں، مساجد، سکول، حساس مقامات، بازاروں، اڈہ جات اور تمام تر معمولات زندگی سے تعلق رکھنے والی سیاسی و سماجی شخصیات، ممبران اسمبلی و عوامی نمائندگان کے بارے میں ہر قسم کی معلومات رکھنے، تقریبات، جلسہ جلوس، احتجاج اور نقص امن کے حوالہ سے ہونے والی سرگرمیوں پر کڑی نظر رکھنے کی ہدایت کی۔ خطاب کے دوران ضلعی پولیس سربراہ نے کہا کہ محکمہ پولیس میں تھانہ جات کی حدود میں جرائم کی روک تھام اور علاقہ سے باخبر رہنے کیلئے ایک سراغ رساں کانسٹیبل کو تعینات کیا جاتا ہے جو اپنے تھانہ کی حدود/بیٹ سے اپنے سینئر افسران کو باخبر رکھتا ہے۔ میٹنگ کے دوران ضلعی پولیس سربراہ اور ایس پی ہیڈکوارٹرز نے جملہ ڈی ایف سیز کو اپنے کام میں مزید بہتری لانے، علاقہ کے لوگوں خاص کر عوامی نمائندگان، ممبران پی ایل سی، علماء کرام اور دیگر علاقہ کے معززین کے ساتھ ہر وقت رابطہ میں رہنے اور علاقہ کی عوام کے ساتھ بہترین تعلقات استوار رکھنے کی ہدایات کی جبکہ کسی بھی ناخوشگوار سرگرمی کی بروقت اطلاع افسران بالا تک پہنچانے کی ہدایات کی تاکہ اس کے سدباب کیلئے حکمت عملی ترتیب دی جا سکے جبکہ موجودہ سیکورٹی حالات کے پیش نظر نیشنل ایکشن پلان کے تحت کاروائیوں میں مدد کیلئے اپنی بیٹ میں افغان مہاجرین اور ملک دشمن عناصر پر کڑی نظر رکھنے کی ہدایات کی۔

ایبٹ آباد کی ضلعی انتظامیہ نے ضلع بھر میں ٹیکسی کار کے طور پر چلنے والی گاڑیوں کے لئے قانونی ضابطہ کار اور کرایہ وضع کرنے کا فیصلہ کیا ہے تاکہ مسافروں کو کرائے کے ضمن میں ڈرائیوروں کی من مانیوں سے نجات دلائی جاسکے ۔ یہ فیصلہ ڈپٹی کمشنر ایبٹ آبادعامر آفاق کی زیر صدارت خصوصی کمیٹی کے اجلاس میں کیا گیا جو ٹیکسی کاروں کوقانونی ضا بطہ کار میں لانے کے لیے قائم کی گئی ہے ۔ اجلاس میں اسسٹنٹ کمشنر ایبٹ آباد ،سیکر ٹری آر ٹی اے، اسسٹنٹ ڈائریکٹرکنز یومر پر وٹیکشن کورٹس، ڈی ایس پی ٹریفک ، ٹی ایم او ایبٹ آباد اور دوسرے افسران نے شرکت کی ۔ اجلاس کے دوران ٹیکسی کاروں کے استعمال کے بڑھتے ہوئے رجحان سے پیدا ہونے والے مسائل اور من مانے کرایوں کی وصولی سمیت ان سے متعلق سامنے آنے والی دیگر شکایات کا تفصیلی جائزہ لیا گیا ۔ اجلاس میں اس امر پر اتفاق کیا گیا کہ ٹیکسی کاروں اور سو زوکی کیری سے مسافروں کو اگرچہ سفر کی ایک بہتر سہولت میسر ہے تاہم ٹیکسی کاروں کے من مانے کرایوں اور ان کے ڈرائیوروں کے روئیے کے حوالے سے مسافروں میں تشویش بھی پائی جاتی ہے ۔ چنانچہ اجلاس میں فیصلہ کیا گیا کہ ضلعی انتظامیہ اورمتعلقہ سرکاری ادارے اس معاملے سے متعلق حقائق کا تفصیلی جائزہ لے کر ٹیکسی کاروں کے کاروبار کو قانونی ضا بطے میں لانے کے لیے ضروری اقدامات کریں گے ۔ اس سلسلے میں ڈپٹی کمشنر نے متعلقہ محکموں اور حکام کو دیگر اقدامات کے علاوہ ضلع بھر میں ٹیکسی کاروں کے تمام روٹس کا سر وے کرکے ان کے کرائے تجویز کرنے اور موزوں مقامات پر پارکنگ کے انتظامات کی بھی ہدایت کی ۔

ایبٹ آباد۔ 24 جولائی (اے پی پی) تحصیل کونسل حویلیاں کا 24 کروڑ 26 لاکھ 52 ہزار کا بجٹ سال 2019-20ء پیش کر دیا گیا۔ تحصیل ناظم سردار ارسل پرویز نے بجٹ پیش کیا۔ ممبران تحصیل کونسل نے متفقہ طور پر بجٹ کی منظوری دیدی ہے۔ تحصیل کونسل حویلیاں کا بجٹ اجلاس کنوینر سردار طاہر حبیب عباسی کونسل ہال میں منعقد ہوا جس میں سال 2019-20ء کے سالانہ بجٹ پیش کیا گیا۔ تحصیل ناظم سردار ارسل پرویز نے کونسل میں آئندہ مالی سال کیلئے 24 کروڑ 26 لاکھ 52 ہزار کا بجٹ پیش کیا جس میں 23 کروڑ 89 لاکھ 50 ہزار کی متوقع آمدنی کا تخمینہ ظاہر کیا گیا جبکہ ترقیاتی مد میں 14 کروڑ 46 لاکھ کی رقم مختص کی گئی اور غیر ترقیاتی فنڈ میں 9 کروڑ 80 لاکھ روپے رکھے گئے۔ تحصیل ناظم سردار ارسل نے کہا کہ گذشتہ سال صوبائی حکومت کی طرف سے عدم تعاون اور پی ایف سی کی مد میں صرف دو اقساط ہی موصول ہوئیں تاہم ٹی ایم اے نے ترقیاتی پروگرام کو بڑھایا۔ اس ضمن میں ٹی ایم اے سٹاف کی کارکردگی لائق تحسین ہے۔ کنوینر سردار طاہر حبیب نے اجلاس ایک گھنٹہ کیلئے ملتوی کرنے کے بعد دوبارہ اجلاس طلب کیا جس میں ممبران نے بجٹ میں اپنی اپنی تجاویز پیش کیں۔ اپوزیشن لیڈر افتخار احمد خان نے کہا کہ حویلیاں شہر کیلئے اب تک کوئی بڑا منصوبہ نہیں دیا گیا جس کیلئے ضروری ہے کہ شہر میں نامکمل ٹی ایم اے پلازوں پر فوری کام شروع کیا جائے تاکہ ٹی ایم اے کی آمدنی میں اضافہ ہو اور جن افراد نے دس سال سے سیکورٹی کیلئے رقم جمع کروا رکھی ہے ان کو بھی ریلیف دیا جائے۔ ممبر تحصیل کونسل امجد اقبال تنولی نے کہا کہ حویلیاں میں حیوانات ہسپتال کی جگہ کو خالی کرانے کیلئے صوبائی حکومت سے رابطہ کیا جائے تاکہ اس جگہ کو شہرمیں کسی بڑے منصوبہ کیلئے استعمال کیا جائے۔ بجٹ اجلاس سے دیگرممبران نے بھی خطاب کیا۔کنوینر سردار طاہر حبیب نے بجٹ سال 2019-20ء کو منظوری کیلئے ایوان میں پیش کیا جس کی متفقہ طور پر منظوری دی گئی۔ اجلاس غیر معینہ مدت کیلئے ملتوی کر دیا گیا

ہری پور۔ 24 جولائی (اے پی پی) ڈپٹی کمشنر ہری پور عارف اللہ اعوان کی خصوصی ہدایت پر خانپور میں عوام الناس کیلئے سہولت مرکز کا قیام عمل میں لایا گیا جس میں عوام الناس کی آگاہی کیلئے تشہیری مواد بھی رکھا گیا۔ سہولت کیمپ میں تحصیل خانپور کے دور دراز علاقوں سے تعلق رکھنے والے عوام الناس کو درپیش مسائل کے خاتمہ کیلئے اقدامات کرنے کے ساتھ مختلف تربیتی ورکشاپس اور طلبہ کی داخلہ مہم اور اپریل سے جولائی تک ہوائی فائرنگ کے خاتمہ کیلئے کئے جانے والے اقدامات بارے پمفلٹ بھی رکھے گئے۔ سہولت مرکز کی افتتاحی تقریب میں ڈپٹی کمشنر ہری پور عارف اللہ اعوان، اسسٹنٹ کمشنر تحصیل خانپور مس گل بانو بی بی اور پاکستان تحریک انصاف کے رہنما یوسف ایوب خان نے شرکت کی۔

ایبٹ آباد. محکمہ مال ایبٹ آباد میں میرٹ کی دھجیاں بکھیرنے کے خلاف انجمن پٹوارن کا احتجاج تیسرے روز بھی جاری ،دفاتر کو تالے لگانے کے بعدپٹواریوں نے تحصیل بلڈنگ میں احتجاجی کیمپ بھی لگا لیا،مالاکنڈکے جونئیر ترین پٹواری کی ایبٹ آباد میں نائب تحصیلدار کی تعیناتی اور چیف سیکرٹری کی اقر باء پروری اور رشتہ داری کی بناء پرمیرٹ کی دھجیاں بکھیرنے پر ہونے والی ہڑتال کے باعث شہریوں کوشدید پریشانی کاسامنا کرنا پڑارہا ہے اس ضمن میں گزشتہ روز نیو تحصیل بلڈنگ ایبٹ آباد میں لگائے جانے والے احتجاجی کیمپ کے دوران انجمن پٹواریاں وقانون گوئیاں ایبٹ آباد کے ضلعی صدرمحمد حنیف گل تحصیل صدر ذیشان جدون اور سینئرنائب صدر قاضی طاہر فاروق سمیت دیگر عہدیدارن اور پٹواریوں کی بڑی تعدادنے میڈیا کے نمائندوں سے بات چیت کرتے ہوئے کہا کہ نائب تحصیلدار ایبٹ آبادکی آسامی سکیل 14کی ہے اور یہ ڈویژن کے اندر سے تعیناتی کی جاتی ہے جبکہ چیف سیکرٹری نے اپنے رشتہ دارکوجوکہ ڈویژن سے ہٹ کردوسرے ڈویژن مالاکنڈسے تعلق رکھتاہے اور سکیل 9کا جونئیر پٹواری ہے اسے ایبٹ آباد تحصیل میں نائب تحصیلدار تعینات کردیا ہے جوکہ سراسر میرٹ اور قانون سے ہٹ کر ہے جب تک نائب تحصیلدار عامر شہزاد کا تبادلہ نہیں کیا جائیگا ہمارے دفاتر کی تالہ بندی اور ہڑتال جاری رہے گی پٹواریوں کی ہڑتال کی وجہ سے شہریوں کو شدید پریشانی کا سامناکرنا پڑ رہا ہے اورمحکمہ مال کے تمام کام زیر التواء ہے