Category: منڈی بہاؤالدین

منڈی بہاءالدین (باغی ٹی وی نامہ نگار افنان طالب)سابق چیئرمین بلدیہ منڈی بہاءالدین ملک صلاح الدین ایڈووکیٹ نے کہا ہے کہ ڈسٹرکٹ ہیڈ کوارٹر (ڈی ایچ کیو) ہسپتال منڈی بہاءالدین کی کارکردگی بہتر بنانے کا واحد مؤثر راستہ یہاں میڈیکل کالج کے قیام اور موجودہ ہسپتال کو ٹیچنگ ہسپتال کا درجہ دینے میں ہے۔ ان کے مطابق اس اقدام سے ضلع کے عوام کو معیاری علاج کی سہولت ان کے اپنے شہر میں ہی مہیا ہو سکے گی، جس کی دیرینہ ضرورت ہے۔

ملک صلاح الدین ایڈووکیٹ نے بتایا کہ گزشتہ کئی ماہ سے سوشل میڈیا پر ڈی ایچ کیو ہسپتال کے حوالے سے شکایات میں اضافہ ہوا ہے، عوام ڈاکٹرز کے رویے، سہولیات کی عدم دستیابی اور عملے کی کمی پر بجا اعتراض اٹھا رہے ہیں۔ تاہم ان کے مطابق صرف تنقید کے ذریعے حالات نہیں بدلیں گے؛ اصل مسائل کو سمجھ کر ان کا حل تلاش کرنا ہوگا۔ انہوں نے کہا کہ ہسپتال کا سب سے بڑا مسئلہ افرادی قوت کی شدید کمی اور ناکافی بجٹ ہے، جو براہِ راست علاج کے معیار پر اثر انداز ہو رہا ہے۔

انہوں نے ماضی کا حوالہ دیتے ہوئے بتایا کہ 1993 میں جب منڈی بہاءالدین کو ضلع کا درجہ دیا گیا، تو اس وقت کے پرانے تحصیل ہیڈکوارٹر ہسپتال کو عارضی طور پر ڈی ایچ کیو کا درجہ دے دیا گیا، تاہم مستقل تبدیلی کے لیے آج تک کوئی بنیادی اصلاحات نہیں کی گئیں۔ نئی عمارت تو قائم کر دی گئی، مگر ہسپتال کی اسامیاں اور عملہ بدستور اسی تحصیل سطح کے مطابق ہے، جبکہ اب یہ ادارہ ساڑھے تین سو بیڈز کے ڈی ایچ کیو ہسپتال کا بوجھ اُسی پرانے عملے سے اٹھا رہا ہے۔

ملک صلاح الدین ایڈووکیٹ نے یہ بھی بتایا کہ سٹی ہسپتال اور چلڈرن ہسپتال کو بھی ڈی ایچ کیو انتظامیہ کے ماتحت کر دیا گیا ہے، حالانکہ ان کے لیے کوئی علیحدہ بجٹ مختص نہیں، جس سے انتظامی مسائل مزید سنگین ہو رہے ہیں۔ انہوں نے حکومت پنجاب سے مطالبہ کیا کہ اگر واقعی عوام کو ریلیف دینا مقصود ہے تو یونیورسٹی آف رسول میں میڈیکل کالج کے قیام کا فیصلہ فوری طور پر کیا جائے۔ حکومت کا حالیہ اعلان کہ سرکاری یونیورسٹیوں کی موجودہ عمارتوں میں نئے میڈیکل کالج قائم کیے جا سکتے ہیں، منڈی بہاءالدین کے لیے ایک سنہری موقع فراہم کرتا ہے۔

ان کا کہنا تھا کہ میڈیکل کالج کے قیام سے نہ صرف ماہر ڈاکٹرز، پوسٹ گریجویٹ ٹرینی اور ہاؤس آفیسرز دستیاب ہوں گے بلکہ سینئر کنسلٹنٹس اور پروفیسرز کی نگرانی میں علاج کے معیار میں نمایاں بہتری آئے گی۔ اس سے مریضوں کو لاہور، اسلام آباد یا گجرات جیسے شہروں کا سفر نہیں کرنا پڑے گا اور علاج ان کے اپنے ضلع میں میسر ہو سکے گا۔

ملک صلاح الدین ایڈووکیٹ نے چیف سیکریٹری پنجاب، صوبائی وزیر محترمہ حمیدہ وحیدالدین اور ڈپٹی کمشنر ڈاکٹر فیصل سے اپیل کی ہے کہ وہ منڈی بہاءالدین کے عوام کے اس دیرینہ مطالبے کو ترجیحی بنیادوں پر پورا کریں۔ انہوں نے کہا کہ چیف سیکریٹری پنجاب پہلے بھی ضلع کے ترقیاتی منصوبوں کے لیے اہم اقدامات کر چکے ہیں، اور اگر سیاسی قیادت متحد ہو جائے تو منڈی بہاءالدین میں میڈیکل کالج کا قیام بالکل بھی مشکل نہیں۔

آخر میں انہوں نے ڈی ایچ کیو ہسپتال کے ڈاکٹرز اور عملے سے اپیل کی کہ وہ اپنے رویے میں بہتری لائیں، کیونکہ ڈاکٹر کا نرم لہجہ اور مناسب رویہ مریض کا آدھا علاج ہوتا ہے۔ انہوں نے کہا کہ سرکاری ہسپتالوں میں وہ عوام آتے ہیں جو مہنگے نجی علاج کے متحمل نہیں ہوتے، لہٰذا ان کے ساتھ ہمدردی، اخلاق اور ذمہ داری کے ساتھ پیش آنا فرض ہے۔ ملک صلاح الدین ایڈووکیٹ نے حکومت پنجاب سے مطالبہ کیا کہ ڈی ایچ کیو میں خالی اسامیوں پر فوری بھرتیاں کی جائیں، بجٹ میں اضافہ کیا جائے اور فنڈز کے شفاف استعمال کو یقینی بنایا جائے تاکہ یہ ادارہ حقیقی معنوں میں ضلع کے عوام کے لیے مثالی صحت گاہ ثابت ہو سکے۔

منڈی بہاؤالدین(باغی ٹی وی نامہ نگار: افنان طالب عرف چاندی) مقامی صحافی و بزنس مین محمد سعید شاکر کا برطانوی کونسل اسمبلی اور سرکاری دفاتر کا دورہ

تفصیلات کے مطابق منڈی بہاؤالدین سے تعلق رکھنے والے مقامی اخبار کے چیف ایڈیٹر اور چیف ایگزیکٹو ورلڈ ویزا کنسلٹنٹ محمد سعید شاکر نے برطانیہ میں برٹش کونسلر قیصر عباس گوندل کی خصوصی دعوت پر تھرک کونسل اسمبلی اور مختلف سرکاری دفاتر کا دورہ کیا۔

دورے کے موقع پر برٹش پاکستانی مئیرز ایسوسی ایشن کے وائس چیئرمین، سرپرستِ اعلیٰ ہوپ برطانیہ اور تھرک کونسل کے 49ویں ڈپٹی مئیر، کونسلر قیصر عباس گوندل نے ٹاؤن ہال آمد پر محمد سعید شاکر کا پرتپاک استقبال کیا۔ انہوں نے انہیں کونسل اسمبلی، اجلاس ہال، میئر آفس اور مختلف شعبہ جات کا تفصیلی دورہ کروایا اور برطانوی بلدیاتی نظام، عوامی خدمات اور کمیونٹی ورک کے عملی طریقہ کار سے آگاہ کیا۔

اس موقع پر محمد سعید شاکر نے گفتگو کرتے ہوئے کہا کہ:

“قیصر عباس گوندل منڈی بہاؤالدین اور پاکستان کا حقیقی فخر ہیں۔ وہ جس خلوص، دیانت اور جذبے سے مقامی و پاکستانی کمیونٹی کی خدمت کر رہے ہیں، وہ قابلِ تعریف ہے۔ ایسے باصلاحیت پاکستانی ہی وطنِ عزیز کا نام دنیا بھر میں روشن کر رہے ہیں۔“

برٹش کونسلر قیصر عباس گوندل نے بھی اپنے خیالات کا اظہار کرتے ہوئے کہا کہ:

“محمد سعید شاکر کی صحافتی اور کاروباری خدمات ہمیشہ نمایاں رہی ہیں۔ وہ نوجوانوں کے لیے مشعلِ راہ ہیں اور پاکستانی کمیونٹی کے وقار اور ترقی کے لیے ہمیشہ سرگرم رہے ہیں۔“

دورے کے اختتام پر دونوں رہنماؤں نے پاکستان اور برطانیہ کی کمیونٹی کے درمیان تعمیری تعلقات اور نوجوانوں کے لیے روزگار کے مواقع بڑھانے پر بھی تبادلۂ خیال کیا۔

منڈی بہاؤالدین (باغی ٹی وی، نامہ نگار افنان طالب عرف چاندی) شمالی وزیرستان دھماکے میں شہید ہونے والے 13 پاک فوج کے جوانوں میں شامل زاہد عمران گوندل کو ان کے آبائی گاؤں رتووال میں فوجی اعزاز کے ساتھ سپرد خاک کر دیا گیا۔ پاک فوج کے دستوں نے شہید کو سلامی دی اور مکمل پروٹوکول کے ساتھ تدفین کی گئی۔

زاہد عمران گوندل نے 23 سال پاک فوج میں خدمات انجام دیں۔ ان کے پانچ بچے ہیں جن میں دو بیٹے اور تین بیٹیاں شامل ہیں۔ نمازِ جنازہ میں ضلع بھر سے بڑی تعداد میں شہریوں نے شرکت کی اور شہید کو خراجِ عقیدت پیش کیا۔

شہید کے والد اور اہل خانہ نے تدفین کے بعد زاہد عمران گوندل کی شہادت کو فخر کا مقام قرار دیتے ہوئے دعا کی کہ اللہ تعالیٰ ان کی قربانی کو ملک و ملت کے لیے قبول فرمائے۔

منڈی بہاؤالدین (باغی ٹی وی، نامہ نگار افنان طالب ) ایڈیٹر کونسل منڈی بہاوالدین کا اہم اجلاس مقامی ہوٹل میں منعقد ہوا جس میں ضلع بھر کے مقامی اخبارات کے ایڈیٹران اور صحافیوں کی کثیر تعداد نے شرکت کی۔ اجلاس میں نئے مقامی اخبار کے چیف ایڈیٹر محمد خالد کلیمی کو پرتپاک انداز میں خوش آمدید کہا گیا۔

صدر پریس کلب رجسٹرڈ محمد ظہیر خان اور ایڈیٹر حافظ شاہد پرویز نے انہیں پھولوں کی مالا پہنائی اور خطاب کرتے ہوئے کہا کہ صحافت ایک مقدس پیشہ ہے جس کے تقدس کو مقدم رکھنا ہوگا۔ مقامی اخبارات کو متحد ہو کر ایک متفقہ لائحہ عمل ترتیب دینا چاہیے تاکہ عوامی مسائل اجاگر کیے جا سکیں اور سچائی کے فروغ میں صحافت اپنی اصل روح کے ساتھ پروان چڑھے۔

اجلاس میں چوہدری خالد پرویز سندھو، صدر ایڈیٹر کونسل، چوہدری آورش ندیم، ڈاکٹر طحہٰ، نوید شاکر، خاور محمود قریشی اور دیگر نمایاں شخصیات نے بھی شرکت کی اور صحافت کے فروغ و باہمی اتحاد پر اپنے خیالات کا اظہار کیا۔

اجلاس کا اختتام اس عزم کے ساتھ ہوا کہ صحافی برادری سچائی اور دیانتداری پر کاربند رہتے ہوئے عوامی مسائل کے حل کے لیے کردار ادا کرے گی۔

منڈی بہاولدین (باغی ٹی وی نامہ ،نگار افنان طالب ) ضلع منڈی بہاولدین کے گاؤں سیویا کے رہائشی اعجاز احمد ولد حاجی محمد اسلم، جو گزشتہ دنوں سعودی عرب میں انتقال کر گئے تھے، کے ایصالِ ثواب کے لیے ختم دسواں شریف مرحوم کی رہائش گاہ پر نہایت عقیدت و احترام سے منعقد ہوا۔

ختم کی محفل کا آغاز حافظ زاہد مظہر عطاری، خطیب امام مسجد عمر فاروق نے تلاوتِ قرآنِ مجید سے کیا۔ بعد ازاں قاری علامہ مولانا عابد ریاض سیالوی اور سید تنویر حیدر شاہ (سیالکوٹ) نے نعت رسول مقبول ﷺ پیش کی۔ خصوصی خطاب ممتاز مذہبی سکالر، بانی جامعۃ الحسنین رتالہ شریف اور خطیب اعظم سیالکوٹ حضرت علامہ مولانا زاہد ندیم سلطانی نے کیا۔

محفل میں مرحوم کے عزیز و اقارب اور دوست احباب کی بڑی تعداد شریک ہوئی جن میں ماموں یاسر اقبال رحمانی، بھائی حاجی ریاض احمد، بھتیجا عمر فاروق رحمانی، مرحوم کے بیٹے عبدالہادی، محمد موسیٰ رحمانی، زوہیب طالب، اصغر علی رحمانی، چوہدری قیصر محمود کھرل، چوہدری قیصر ڈورا، چوہدری عمران بھٹی ڈورا، چوہدری فیض رسول بھٹی، چوہدری سیرت علی بلہا، چوہدری شمشیر حیدر بھٹی، چوہدری عامر فاروق بھٹی، چوہدری اصغر ڈورا، چوہدری قیصر بلھا اور چوہدری فیصل کریم بھٹی شامل تھے۔

شرکاء نے مرحوم کے لیے فاتحہ خوانی اور مغفرت کی دعا کی۔ بیرونِ ملک مقیم دوستوں جنید طالب رحمانی، علی عباس خالد (کویت)، دانش رضا بھٹی اور بھتیجا کاشی فیاض نے بھی گہرے دکھ اور افسوس کا اظہار کیا۔