Category: میر پور خاص

میرپورخاص (نامہ نگارسیدشاہزیب شاہ) ڈویژنل ڈائریکٹر اطلاعات میرپورخاص محترمہ شبانہ چنہ نے ڈویژنل ڈائریکٹر اطلاعات حیدرآباد شہزاد شیخ اور ڈپٹی ڈائریکٹر اطلاعات نائلہ شیخ کے ہمراہ نیشنل پریس کلب میرپورخاص کا دورہ کیا۔

نیشنل پریس کلب پہنچنے پر کلب کے سرپرست اعلیٰ آفاق احمد، صدر حیات قریشی، سینئر نائب صدر سید لیاقت علی شاہ، میرپورخاص یونین آف جرنلسٹس کے جنرل سیکریٹری سلیم شیخ، سینئر صحافی قمرالدین شیخ اور دیگر عہدیداران نے مہمانوں کا پرتپاک استقبال کیا۔ اس موقع پر نیشنل پریس کلب کی جانب سے محترمہ شبانہ چنہ اور دیگر مہمانوں کو سندھ کی ثقافت کی علامت اجرک اور گلدستے پیش کیے گئے۔

سرپرست اعلیٰ آفاق احمد نے نیشنل پریس کلب کے قیام کے اغراض و مقاصد اور صحافیوں کو درپیش مسائل سے آگاہ کرتے ہوئے ان کے فوری حل کا مطالبہ کیا۔

خطاب کرتے ہوئے شبانہ چنہ نے کہا کہ وہ حکومتی پالیسیوں کے مطابق کام کریں گی اور کسی بھی دباؤ یا رکاوٹ کو خاطر میں نہیں لائیں گی۔ انہوں نے صحافیوں کو یقین دہانی کرائی کہ نیشنل پریس کلب اور صحافیوں کو ہر ممکن ریلیف دلانے کے لیے بھرپور کردار ادا کریں گی۔

تقریب میں جوائنٹ سیکریٹری مبین چانہیوں، شہریار بلند، انفارمیشن سیکریٹری اشفاق قریشی، گورننگ باڈی کے رکن محمد علی بھرگڑی، امام الدین شاہ، ممبران سید شاہزیب شاہ، علی شیر خاصخیلی، محمد اجمل، اویس احمد شیخ، روشن راجڑ سمیت دیگر صحافی و معزز شخصیات بھی موجود تھیں۔

میرپورخاص (باغی ٹی وی ،نامہ نگار سید شاہزیب)ڈسٹرکٹ میرپورخاص ایجوکیشن ورکس کے ایگزیکٹو انجینیئر عبداللہ انصاری کی ہدایت پر مین جھڈو شہر میں واقع سرکاری اسکول کی مرمت و بحالی کا کام مکمل کر لیا گیا۔ اسکول کی ریپیئرنگ کے بعد عمارت کی مجموعی حالت بہتر ہوگئی ہے اور طلباء کے لیے محفوظ اور خوشگوار تعلیمی ماحول میسر آگیا ہے۔

مرمتی کام میں کلاس رومز کی دیواروں اور چھت کی مضبوطی، کھڑکیوں و دروازوں کی تبدیلی، پنجروں کی مرمت، واش رومز کی اپگریڈیشن اور اسکول میں خوبصورت پودوں کی تنصیب شامل تھی۔ مرمت کے بعد اسکول کی ظاہری اور اندرونی حالت نمایاں طور پر بہتر دکھائی دے رہی ہے۔

ایگزیکٹو انجینیئر عبداللہ انصاری نے کام کی بروقت تکمیل پر خوشی کا اظہار کیا اور امید ظاہر کی کہ اس اقدام سے بچوں کی تعلیمی کارکردگی میں نمایاں بہتری آئے گی۔

میڈیا ٹیم کے دورۂ اسکول کے دوران علاقہ مکینوں نے سندھ کے صوبائی وزیر تعلیم سید سردار شاہ اور ایگزیکٹو انجینیئر عبداللہ انصاری کا دل سے شکریہ ادا کیا اور کہا کہ اس مرمتی کام نے بچوں کے مستقبل کو روشن کرنے میں اہم کردار ادا کیا ہے۔

میرپورخاص (باغی ٹی وی نامہ نگار سید شاہزیب شاہ) آل میرپورخاص شاعر مشرق علامہ اقبال وہیل چیئر ڈبل وکٹ کرکٹ لیگ میں میرپورخاص ٹائیگرز نے سنسنی خیز مقابلے کے بعد فائنل میں میرپورخاص ہیروز کو شکست دے کر ٹرافی اور کیش پرائز جیت لی۔

مسابقے کا انعقاد میرپورخاص اسپیشل اسپورٹس اینڈ ویلفیئر ایسوسی ایشن اور گلستان معذورین کے زیر اہتمام SMBBS گاما اسٹیڈیم میں ہوا، جس میں شہر کی آٹھ ٹیموں نے حصہ لیا۔ سیمی فائنل تک میرپورخاص ہیروز، گولڈ، ٹائیگرز اور ڈائمنڈ نے رسائی حاصل کی۔

فائنل میچ میں ڈی ایس پی اسلم جاگیرانی نے فاتح ٹیم کے کھلاڑیوں کو ٹرافی اور کیش پرائز دیے جبکہ ڈپٹی گورنر روٹری انٹرنیشنل نعمان ایس اے خان نے رنر اپ ٹیم کے کھلاڑیوں کو انعامات پیش کیے۔

اختتامی تقریب میں وہیل چیئرز تقسیم کی گئیں اور تقریب میں مختلف کھیلوں اور فلاحی تنظیموں کے سرکردہ شخصیات نے شرکت کی۔

میرپورخاص(باغی ٹی وی،نامہ نگارسیدشاہزیب شاہ) متحدہ قومی موومنٹ (ایم کیو ایم) کے وفد نے ایس ایس پی میرپورخاص سمیر نور چنہ سے ملاقات کر کے کمیونٹی پولیسنگ کی اہمیت پر زور دیا اور کہا کہ اس طریقہ کار سے معاشرے میں بہتری اور جرائم پر قابو پایا جا سکتا ہے۔ وفد نے ضلع بھر میں بڑھتی ہوئی وارداتوں پر تشویش کا اظہار کیا اور مطالبہ کیا کہ جرائم میں ملوث عناصر کو فوری طور پر قانون کی گرفت میں لایا جائے۔

رپورٹ کے مطابق حق پرست رکن اسمبلی انجینئر صابر قائمخانی، ڈسٹرکٹ انچارج خالد تبسم، جوائنٹ ڈسٹرکٹ انچارج آفاق احمد خان، جھڈو سیکٹر کے جوائنٹ انچارج ولایت قائمخانی اور دیگر رہنماؤں پر مشتمل وفد نے ایس ایس پی میرپورخاص سمیر نور چنہ سے ان کے دفتر میں ملاقات کی۔

اس موقع پر انجینئر صابر قائمخانی نے میرپورخاص سمیت پورے ضلع میں کار، موٹر سائیکل چوری، منشیات فروشی، اور رہزنی جیسی وارداتوں میں اچانک اضافے پر تشویش کا اظہار کیا۔ انہوں نے حال ہی میں جھڈو پولیس اور عوامی نمائندوں کے درمیان پیدا ہونے والے تنازع کا ذکر کرتے ہوئے کہا کہ ایسے معاملات کو باہمی رابطوں اور مشاورت سے حل کیا جانا چاہیے۔

ایس ایس پی میرپورخاص نے جرائم کے خاتمے اور امن و امان کے قیام کے لیے ایم کیو ایم کے تعاون کو سراہا اور وفد کو یقین دلایا کہ جرائم میں ملوث ملزمان کو جلد گرفتار کر لیا جائے گا۔

ملاقات کے بعد، وفد کے اراکین نے سابق چیئرمین بلدیہ میرپورخاص کامران شیخ کی رہائش گاہ جا کر ان کے بھائی ڈاکٹر عمران شیخ کی وفات پر تعزیت کی۔

میرپورخاص(باغی ٹی وی،نامہ نگارسیدشاہزیب شاہ) متحدہ قومی موومنٹ (ایم کیو ایم) کے رہنما ڈاکٹر عمران فاروق کی 15ویں برسی کے موقع پر میرپورخاص میں ان کی یاد میں قرآن خوانی اور فاتحہ خوانی کا انعقاد کیا گیا۔ اس تقریب میں ایم کیو ایم پاکستان میرپورخاص ڈسٹرکٹ کے رہنماؤں اور کارکنوں کی بڑی تعداد نے شرکت کی۔

تفصیلات کے مطابق یہ تقریب ایم کیو ایم پاکستان کے ڈسٹرکٹ آفس میں منعقد ہوئی، جس میں انچارج سندھ تنظیمی کمیٹی سلیم رزاق، رکن ایس ٹی سی شفیق احمد، ڈسٹرکٹ انچارج خالد تبسم، جوائنٹ ڈسٹرکٹ انچارج آفاق احمد خان، اور دیگر اراکین ڈسٹرکٹ کمیٹی، رکن مرکزی کمیٹی اے پی ایم ایس او حارث راجپوت اور یوسی چیئرمین سمیت مختلف شعبہ جات کے ذمہ داران و کارکنان نے شرکت کی۔

تقریب کے اختتام پر ڈاکٹر عمران فاروق اور تحریک کے دیگر شہداء کی مغفرت اور بلند درجات کے لیے خصوصی دعائیں مانگی گئیں۔ اس کے علاوہ، ملک کی سلامتی، ترقی اور خوشحالی کے لیے بھی دعا کی گئی۔ اس موقع پر ڈسٹرکٹ انچارج خالد تبسم اور دیگر رہنماؤں نے سابق حق پرست چیئرمین میونسپل کمیٹی میرپورخاص کامران شیخ کے بڑے بھائی ڈاکٹر عمران شیخ کے انتقال پر گہرے دکھ کا اظہار کیا اور مرحوم کے لیے مغفرت کی دعا کی۔

میرپورخاص(باغی ٹی وی، نامہ نگار سید شاہزیب شاہ)عالمی یوم خواندگی پر ریلی اور پروگرام کا انعقاد

عالمی یوم خواندگی کے موقع پر میرپورخاص میں ڈسٹرکٹ ایجوکیشن آفیسر (لٹریسی) ڈاکٹر پروفیسر چمن منشاء کی قیادت میں ایک آگاہی ریلی نکالی گئی۔ یہ ریلی بینظیر بھٹو شہید گورنمنٹ گرلز ہائر سیکنڈری اسکول سے شروع ہو کر پریس کلب تک پہنچی۔

ریلی سے خطاب کرتے ہوئے ڈاکٹر چمن منشاء نے کہا کہ اس دن کو منانے کا مقصد تعلیم کو عام کرنا، بالخصوص بچیوں کو تعلیم کے زیور سے آراستہ کرنا ہے۔ انہوں نے مزید کہا کہ تعلیم کے بغیر موجودہ دور میں انفارمیشن ٹیکنالوجی اور مصنوعی ذہانت (آرٹیفیشل انٹیلیجنس) کی ترقی کا مقابلہ کرنا ناممکن ہے۔ انہوں نے زور دیا کہ بچوں کو ڈیجیٹل اور سائنسی تعلیم دینا بہت ضروری ہے۔

ڈاکٹر چمن منشاء نے بتایا کہ وزیر تعلیم سندھ سید سردار علی شاہ کی سرپرستی میں ضلع بھر میں تھر ایجوکیشن الائنس، سندھ مدرسہ بورڈ اور این ڈی ایف کے تعاون سے 100 نان فارمل ایجوکیشن سینٹر چل رہے ہیں، جہاں 9 سے 16 سال کی عمر کے بچے مفت تعلیم حاصل کر رہے ہیں۔ انہوں نے مزید بتایا کہ ضلع میں خواندگی کی شرح 53 فیصد ہے۔

ریلی سے تعلقہ ایجوکیشن آفیسر سلیمان گرگیز، ڈپٹی ڈائریکٹر انفارمیشن غلام رضا کھوسو، پرنسپل مس فرزانہ، تھر ایجوکیشن الائنس کے ڈسٹرکٹ فوکل پرسن رحمت اللہ، ایم ڈی ایف کے فوکل پرسن امید علی ارباب، محمد اقبال، محمد بچل وسان اور دیگر مقررین نے بھی تعلیم کی اہمیت پر زور دیا۔ انہوں نے عوام، خاص طور پر والدین سے اپیل کی کہ وہ اپنے بچوں کو سرکاری اسکولوں میں داخل کروائیں جہاں تجربہ کار اساتذہ کی نگرانی میں مفت تعلیم فراہم کی جا رہی ہے۔

ریلی میں اساتذہ، طلبہ و طالبات نے بڑی تعداد میں شرکت کی۔ بعد میں پیپلز اسکول میں بھی عالمی خواندگی دن کے حوالے سے ایک آگاہی پروگرام منعقد کیا گیا۔