Category: رحیم یارخان


پنجاب کے ضلع رحیم یار خان میں مبینہ پولیس مقابلے میں ایک ملزم کی ہلاکت کے بعد ایک بار پھر پولیس مقابلوں کے طریقہ کار پر سوالات اٹھنے لگے ہیں۔
پولیس کے مطابق مقابلے میں ہلاک ہونے والا نعمان قیصر تھا جس پر سائیکلیں بنانے والی کمپنی سہراب سائیکل کے مالک کے بیٹے معاذ کے قتل کی منصوبہ بندی کا الزام تھا۔ بتایا گیا ہے کہ ملزم حال ہی میں سپین سے واپس پاکستان آیا تھا۔
‎پولیس کا کہنا ہے کہ ملزم ملک سے فرار ہونے کی کوشش کر رہا تھا۔ جب پولیس نے اسے روکنے کی کوشش کی تو اس نے اہلکاروں پر فائرنگ کر دی۔ پولیس کی جوابی کارروائی میں وہ زخمی ہوا اور بعد میں زخموں کی تاب نہ لاتے ہوئے ہلاک ہو گیا۔
‎یہ پہلا موقع نہیں کہ کسی ملزم کی ہلاکت مبینہ پولیس مقابلے میں ہوئی ہو۔ ماضی میں بھی ایسے متعدد واقعات سامنے آ چکے ہیں جن پر مختلف حلقوں کی جانب سے سوالات اور تحقیقات کا مطالبہ کیا جاتا رہا ہے۔

‎رحیم یار خان: ایک نوجوان کے قتل کی واردات میں پولیس کے ملوث ہونے کا انکشاف ہوا ہے۔ گرفتار ملزم کے بیان کے بعد دو سابق پولیس افسران سمیت چار افراد کو مقدمے میں نامزد کیا گیا ہے۔
‎پولیس کے مطابق شبیر احمد کو گزشتہ سال 16 مئی کو قتل کیا گیا تھا۔ ڈی پی او کا کہنا ہے کہ ملزمان کے خلاف تفتیش میرٹ پر کی جائے گی اور قانونی کارروائی مکمل شفافیت کے ساتھ ہوگی۔

رحیم یار خان کے علاقے لیاقت پور کی بستی بھٹی میں سگریٹ پیتے ہوئے پیش آنے والے افسوسناک حادثے میں ایک شخص بری طرح جھلس گیا۔ ریسکیو حکام کے مطابق سگریٹ کے شعلے اچانک متاثرہ شخص کے کپڑوں پر گر گئے، جس کے باعث کپڑوں میں آگ لگ گئی اور آگ تیزی سے پھیل گئی۔

ریسکیو ذرائع کے مطابق حادثے میں 45 سالہ اقبال نامی شخص شدید زخمی ہوا۔ واقعے کی اطلاع ملتے ہی ریسکیو ٹیم موقع پر پہنچ گئی اور ابتدائی طبی امداد فراہم کرنے کے بعد زخمی کو فوری طور پر تحصیل اسپتال لیاقت پور منتقل کیا گیا۔ حالت تشویشناک ہونے کے باعث بعد ازاں اسے شیخ زاید اسپتال رحیم یار خان ریفر کر دیا گیا۔ریسکیو حکام کا کہنا ہے کہ متاثرہ شخص کا تقریباً 30 فیصد جسم جھلس چکا ہے اور اسپتال میں اس کا علاج جاری ہے۔ ڈاکٹرز کے مطابق زخمی کی حالت پر کڑی نظر رکھی جا رہی ہے۔

رحیم یار خان میں مبینہ زیادتی کا شکار 24 سالہ لڑکی پولیس کے عدم تعاون اور بااثر ملزمان کے خلاف مقدمہ درج نہ ہونے پر احتجاجاً 100 فٹ اونچی پانی کی ٹینکی پر چڑھ گئی۔ لڑکی نے خودکشی کی دھمکی دیتے ہوئے کہا کہ جب تک اسے انصاف نہیں ملتا، وہ نیچے نہیں اترے گی۔

متاثرہ لڑکی کو پولیس اور اہل خانہ نے کافی دیر کی کوششوں کے بعد اس شرط پر نیچے اتارا کہ اس کا مقدمہ درج کیا جائے گا اور ملزمان کے خلاف کارروائی کی جائے گی۔ بعد ازاں لڑکی کو پولیس اپنے ساتھ تھانے لے گئی۔متاثرہ لڑکی، جس کی شناخت عائشہ کے نام سے ہوئی ہے، رحیم یار خان کے علاقے گلشنِ اقبال کی رہائشی ہے۔ عائشہ نے الزام لگایا کہ ایک بااثر شخص نے اسے دو ماہ تک اسلحے کے زور پر زیادتی کا نشانہ بنایا اور اس دوران اس کی نازیبا ویڈیوز بھی بنائیں۔عائشہ کے مطابق، ملزم نے اسے نشہ آور گولیاں دے کر قابلِ اعتراض ویڈیوز بنائیں اور بعد میں انہی ویڈیوز کے ذریعے بلیک میل کرتا رہا۔ متاثرہ لڑکی کا کہنا ہے کہ ملزم ان ویڈیوز کو اس کے عزیز و اقارب کو دکھاتا اور سنگین نتائج کی دھمکیاں دیتا رہا۔

عائشہ نے بتایا کہ اس نے اعلیٰ حکام سے رجوع کیا، جنہوں نے مقدمہ درج کرنے کے احکامات بھی جاری کیے، تاہم مقامی پولیس بااثر ملزمان کے دباؤ میں آکر کارروائی سے گریز کرتی رہی۔ متاثرہ لڑکی کا کہنا تھا کہ حتیٰ کہ عدالت سے آرڈر لینے کے باوجود پولیس نے مقدمہ درج نہیں کیا، جس کے باعث وہ انتہائی اقدام پر مجبور ہوئی۔واقعے کی اطلاع ملتے ہی ڈی ایس پی صدر میاں خالد موقع پر پہنچے اور ریسکیو 1122 کے عملے کے ساتھ مل کر لڑکی کو انصاف کی فراہمی کی یقین دہانی کرائی۔ بعد ازاں پولیس نے متاثرہ خاتون کو تحویل میں لے کر تھانے منتقل کر دیا۔ڈی ایس پی میاں خالد کا کہنا ہے کہ وہ ڈی پی او رحیم یار خان سے رابطہ کرکے واقعے کی مکمل تحقیقات کرائیں گے اور ذمہ داروں کے خلاف قانون کے مطابق کارروائی عمل میں لائی جائے گی۔

علاقے کے مکینوں اور سماجی تنظیموں نے اس واقعے پر شدید افسوس کا اظہار کرتے ہوئے مطالبہ کیا ہے کہ متاثرہ لڑکی کو انصاف فراہم کیا جائے اور پولیس اہلکاروں کے خلاف بھی کارروائی کی جائے جنہوں نے مقدمہ درج کرنے میں تاخیر کی۔

رحیم یار خان میں افسوسناک واقعہ پیش آیا جہاں پسند کی شادی کرنے والے جوڑے پر نامعلوم افراد نے گھس کر فائرنگ کردی۔ اس فائرنگ کے نتیجے میں لڑکی موقع پر ہی جاں بحق ہوگئی جبکہ اس کا شوہر شدید زخمی حالت میں اسپتال منتقل کیا گیا۔

پولیس حکام کے مطابق یہ واقعہ بدھ کی صبح اس وقت پیش آیا جب ملزمان جوڑے کے گھر میں داخل ہوئے اور اندھا دھند فائرنگ کردی۔ واقعے کے بعد ملزمان فرار ہونے میں کامیاب ہوگئے۔پولیس نے بتایا کہ مقتولہ اور اس کا شوہر آٹھ ماہ قبل کراچی میں پسند کی شادی کرکے رحیم یار خان منتقل ہوئے تھے۔ ابتدائی تحقیقات کے مطابق واقعے کا محرک "پسند کی شادی” معلوم ہوتا ہے، تاہم پولیس کا کہنا ہے کہ ابھی یہ تعین کیا جا رہا ہے کہ ملزمان کا مقتولہ اور زخمی نوجوان سے کیا تعلق ہے۔

پولیس نے جائے وقوعہ سے شواہد اکٹھے کر لیے ہیں اور واقعے کی تحقیقات جاری ہیں۔ ادھر اسپتال انتظامیہ نے بتایا ہے کہ زخمی نوجوان کی حالت تشویشناک ہے اور اسے طبی امداد دی جا رہی ہے