Category: رحیم یارخان

رحیم یار خان کے شیخ زید ہسپتال کے آپریشن تھیٹر میں اچانک آگ بھڑک اٹھی، تاہم بروقت کارروائی کے باعث کوئی جانی یا مالی نقصان نہیں ہوا۔

ڈاکٹرز کے مطابق آپریشن تھیٹر میں آگ شارٹ سرکٹ کے باعث لگی۔ اطلاع ملتے ہی ریسکیو ٹیمیں فوری طور پر موقع پر پہنچ گئیں اور صرف 2 منٹ میں آپریشن تھیٹر تک رسائی حاصل کرلی۔ریسکیو ذرائع کے مطابق اہلکاروں نے تقریباً 10 منٹ کی کوشش کے بعد آگ پر قابو پالیا۔ آتشزدگی کے دوران کسی قسم کا جانی یا مالی نقصان نہیں ہوا۔ضلعی انتظامیہ کے افسران بھی موقع پر موجود رہے، جبکہ واقعے کی مزید تحقیقات جاری ہیں تاکہ آگ لگنے کی وجوہات اور دیگر معاملات کا تعین کیا جاسکے۔

رحیم یار خان میں کراچی سے آنے والی یوسف والا کول ٹرین فیروزہ ریلوے اسٹیشن کے قریب حادثے کا شکار ہوگئی، حادثے کے نتیجے میں ٹرین کا انجن الٹ گیا جبکہ انجن کے ساتھ 10 ویگنیں بھی پٹڑی سے اتر گئیں۔

ریلوے ذرائع کے مطابق کوئلے سے بھری ٹرین کے بریک مبینہ طور پر فیل ہونے کے باعث ٹرین سینڈ ہمپ میں جا گھسی، جس کے نتیجے میں انجن الٹ گیا اور اس کے ساتھ موجود 10 ویگنیں ریلوے ٹریک سے اتر گئیں۔

حادثے کے بعد اپ ٹریک بلاک ہوگیا جس کے باعث ریلوے ٹریفک متاثر ہوئی اور ٹرینوں کی آمدورفت عارضی طور پر معطل ہوگئی۔

حادثے کی اطلاع ملتے ہی متعلقہ ریلوے حکام اور امدادی عملہ موقع پر پہنچ گیا، جبکہ ٹریک کی بحالی اور متاثرہ ٹرین کو ہٹانے کے لیے کارروائی شروع کردی گئی۔

ابتدائی اطلاعات کے مطابق حادثے کے نتیجے میں کسی جانی نقصان کی اطلاع نہیں ملی۔


پنجاب کے ضلع رحیم یار خان میں مبینہ پولیس مقابلے میں ایک ملزم کی ہلاکت کے بعد ایک بار پھر پولیس مقابلوں کے طریقہ کار پر سوالات اٹھنے لگے ہیں۔
پولیس کے مطابق مقابلے میں ہلاک ہونے والا نعمان قیصر تھا جس پر سائیکلیں بنانے والی کمپنی سہراب سائیکل کے مالک کے بیٹے معاذ کے قتل کی منصوبہ بندی کا الزام تھا۔ بتایا گیا ہے کہ ملزم حال ہی میں سپین سے واپس پاکستان آیا تھا۔
‎پولیس کا کہنا ہے کہ ملزم ملک سے فرار ہونے کی کوشش کر رہا تھا۔ جب پولیس نے اسے روکنے کی کوشش کی تو اس نے اہلکاروں پر فائرنگ کر دی۔ پولیس کی جوابی کارروائی میں وہ زخمی ہوا اور بعد میں زخموں کی تاب نہ لاتے ہوئے ہلاک ہو گیا۔
‎یہ پہلا موقع نہیں کہ کسی ملزم کی ہلاکت مبینہ پولیس مقابلے میں ہوئی ہو۔ ماضی میں بھی ایسے متعدد واقعات سامنے آ چکے ہیں جن پر مختلف حلقوں کی جانب سے سوالات اور تحقیقات کا مطالبہ کیا جاتا رہا ہے۔

‎رحیم یار خان: ایک نوجوان کے قتل کی واردات میں پولیس کے ملوث ہونے کا انکشاف ہوا ہے۔ گرفتار ملزم کے بیان کے بعد دو سابق پولیس افسران سمیت چار افراد کو مقدمے میں نامزد کیا گیا ہے۔
‎پولیس کے مطابق شبیر احمد کو گزشتہ سال 16 مئی کو قتل کیا گیا تھا۔ ڈی پی او کا کہنا ہے کہ ملزمان کے خلاف تفتیش میرٹ پر کی جائے گی اور قانونی کارروائی مکمل شفافیت کے ساتھ ہوگی۔