Category: وہاڑی

ٹبہ سلطان پور (نامہ نگار) ٹبہ سلطان پور کے نواحی گاؤں چک نمبر 110-ڈبلیو بی میں دیرینہ دشمنی پر مسلح افراد کی فائرنگ سے 60 سالہ واحد بخش بلوچ جاں بحق ہو گیا۔ فائرنگ کے بعد ملزمان موقع سے فرار ہو گئے جبکہ پولیس حسبِ روایت تاخیر سے پہنچی۔

واقعے کی تفصیلات کے مطابق، مقتول واحد بخش بلوچ معمول کے طبی معائنے کے لیے قریبی ڈاکٹر کے کلینک جا رہا تھا کہ راستے میں گھات لگائے بیٹھے مخالفین نے اچانک فائرنگ کر دی۔ شدید زخمی حالت میں اُسے فوری طور پر مقامی اسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گیا۔

پولیس تھانہ ٹبہ سلطان پور کو اطلاع دینے کے باوجود وہ تاخیر سے موقع پر پہنچی، جس کا فائدہ اٹھاتے ہوئے حملہ آور باآسانی فرار ہو گئے۔ مقتول کے ورثا نے واقعے کا مقدمہ درج کروانے کے لیے تھانے میں درخواست جمع کرا دی ہے، تاہم تا حال مقدمہ درج نہیں ہو سکا۔

علاقہ مکینوں نے پولیس کی سستی اور جرائم پیشہ عناصر کے خلاف مؤثر کارروائی نہ ہونے پر شدید تحفظات کا اظہار کیا ہے۔ مقتول کی لاش پوسٹ مارٹم کے بعد ورثا کے حوالے کر دی گئی، جب کہ پولیس نے معاملے کی تفتیش شروع کرنے کا دعویٰ کیا ہے۔

وہاڑی(باغی ٹی وی رپورٹ) تیز رفتار کارکو حادثہ، میاں بیوی سمیت3 افراد جاں بحق، 25 سالہ بیٹی زخمی

تفصیلات کے مطابق وہاڑی کے علاقے لڈن میں ایک افسوسناک حادثے میں لاہور سے حاصل پور واپس جانے والی فیملی کی تیز رفتار کار بے قابو ہو کر دکانوں سے جا ٹکرائی، جس کے نتیجے میں میاں بیوی سمیت تین افراد جاں بحق ہوگئے، جبکہ ان کی 25 سالہ بیٹی علیزہ شدید زخمی ہوگئی۔

ابتدائی معلومات کے مطابق حادثہ اس وقت پیش آیا جب ڈرائیور محمد عمر کو نیند کا جھٹکا آیا اور گاڑی کا کنٹرول ختم ہوگیا، جس کے باعث گاڑی تیز رفتاری سے دکانوں میں جا گھسی۔

جاں بحق ہونے والوں میں حاصل پور کے رہائشی محمد ایوب، ان کی اہلیہ ناہید اور ڈرائیور محمد عمر شامل ہیں جو قریبی عزیز بھی تھے۔ تینوں افراد موقع پر ہی دم توڑ گئے۔ حادثے کے فوری بعد امدادی ٹیموں نے موقع پر پہنچ کر لاشوں کو ٹی ایچ کیو ہسپتال حاصل پور منتقل کیا،

جبکہ زخمی علیزہ کو تشویشناک حالت میں ڈی ایچ کیو ہسپتال وہاڑی لے جایا گیا جہاں اس کا علاج جاری ہے۔

متاثرہ فیملی لاہور سے حاصل پور اپنے گھر واپس جا رہی تھی جب یہ المناک واقعہ پیش آیا۔ اس حادثے کی خبر سنتے ہی علاقے میں غم کی لہر دوڑ گئی، اور اہل علاقہ نے متاثرہ خاندان کے ساتھ گہری ہمدردی اور افسوس کا اظہار کیا۔

وہاڑی(باغی ٹی وی رپورٹ) ڈپٹی کمشنر وہاڑی سید آصف حسین شاہ کی ہدایت پر ضلع میں غیر قانونی پٹرول پمپوں کے خلاف بڑے پیمانے پر کارروائی شروع کردی گئی ہے۔

اسسٹنٹ کمشنر وہاڑی غزالہ کنول کی زیرِ نگرانی ماچھیوال میں 5 غیر قانونی منی پٹرول پمپوں کو اکھاڑ کر ضبط کر لیا گیا۔ سول ڈیفنس آفیسر محمد ریحان وڑائچ اور ان کی ٹیم نے اس آپریشن میں اسسٹنٹ کمشنر کا ساتھ دیا۔

اسسٹنٹ کمشنر غزالہ کنول نے بتایا کہ غیر قانونی پٹرول پمپ نہ صرف قومی خزانے کو نقصان پہنچاتے ہیں بلکہ آگ لگنے کے خطرے کو بھی بڑھا دیتے ہیں۔ انہوں نے واضح کیا کہ کسی کو بھی غیر قانونی طور پر پٹرول پمپ لگانے کی اجازت نہیں دی جائے گی اور اس طرح کی کارروائیاں جاری رہیں گی۔

انہوں نے کہا کہ انسانی جانوں کے ساتھ کھیلنے کی اجازت نہیں دی جائے گی اور غیر قانونی پٹرول پمپوں کے خلاف سخت کارروائی کی جائے گی۔

وہاڑی(باغی ٹی وی رپورٹ)محتسب دفتر فعال، شہریوں کی شکایات کا فوری ازالہ, 101 فیصلے صادر

تفصیل کے مطابق وہاڑی میں صوبائی محتسب پنجاب کا عوام دوست اقدامات جاری ہیں۔ ایڈوائزر محتسب پنجاب ریجنل دفتر وہاڑی، تنویر اقبال تبسم نے بتایا کہ دفتر میں آئے دن سائلین کی بڑی تعداد شکایات لے کر آتی ہے۔ انہوں نے کہا کہ ہر شکایت کو بغیر کسی تاخیر کے سنا جاتا ہے اور متعلقہ محکموں کو فوری کارروائی کے احکامات جاری کیے جاتے ہیں۔

تنویر اقبال تبسم نے بتایا کہ رواں ماہ 101 فیصلے صادر کیے گئے ہیں اور 50 سے زائد نئی درخواستیں موصول ہوئی ہیں۔ انہوں نے کہا کہ محتسب کا دفتر شفاف اور عوام دوست ادارہ ہے جہاں کسی قسم کی فیس یا وکیل کی ضرورت نہیں ہوتی۔

سائلین نے محتسب دفتر کے عملے کی خدمات پر اطمینان کا اظہار کیا اور انہیں بروقت انصاف فراہم کرنے پر شکریہ ادا کیا۔

وہاڑی(باغی ٹی وی رپورٹ) ڈسٹرکٹ پولیس آفیسر وہاڑی منصور امان کی ہدایت پر ڈی ایس پی ٹریفک رانا تنویر کی زیر نگرانی ایک مہینے کے دوران خانیوال چوک میں ٹریفک قوانین کی خلاف ورزیوں کے خلاف بڑے پیمانے پر کریک ڈاؤن کیا گیا۔

انسپکٹر غضنفر عباس کی قیادت میں چلنے والی اس مہم میں ون وے، تیز رفتاری، بے ہنگم ڈرائیونگ اور اوورلوڈنگ جیسے جرائم پر سخت کارروائی کی گئی۔ اس دوران 300 سے زائد افراد کو ون وے کی خلاف ورزی پر جرمانہ کیا گیا اور تقریباً 3 لاکھ روپے کا جرمانہ وصول کیا گیا۔ اس کے علاوہ 10 مقدمات بھی درج کیے گئے۔

ن صرف یہ بلکہ 5 افراد کے ڈرائیونگ لائسنس بھی کینسل کر دیے گئے اور اوورلوڈنگ کے جرم میں ملوث 4 گاڑیوں کے روٹ اور پاسنگ بھی منسوخ کر دیے گئے۔

انسپکٹر غضنفر عباس کا کہنا ہے کہ ان کارروائیوں کا مقصد ٹریفک قوانین کی بالادستی کو یقینی بنانا، شہریوں کی اصلاح اور شاہراہوں پر ٹریفک کے ہموار بہاؤ کو یقینی بنانا ہے۔

انہوں نے واضح کیا کہ ون وے، ون ویلنگ اور دیگر ٹریفک قوانین کی خلاف ورزی کرنے والے افراد کسی قسم کی رعایت کے حقدار نہیں ہوں گے اور ان کے خلاف سخت قانونی کارروائی کی جائے گی۔