مرکزی رویت ہلال کمیٹی پاکستان کے سابق چیئرمین مفتی منیب الرحمٰن نے فطرہ، فدیہ اور کفارہ صوم کا اعلان کردیا۔

باغی ٹی وی :اس حوالے سے جاری ایک اعلامیے کے مطابق مفتی منیب الرحمٰن نے بتایا کہ رواں سال صدقہ، فطر اور فدیے کی کم از کم مقدار 140 روپے فی کس ہے ساتھ ہی اعلامیے میں بتایا گیا کہ اہل ثروت اپنی مالی حیثیت کے مطابق فطرہ و فدیہ ادا کریں-

اسی طرح جو مسلمان ‘گندم کے آٹے’، ‘جو’، ‘کھجور’، ‘کشمش’ کے حساب سے فطرہ ادا کرنا چاہتے ہیں ان کے لیے نصاب کچھ اس طرح ہے۔

دو کلو گندم کے آٹے کے حساب سے 140 روپے فی کس ،چارکلو جو کے حساب سے 320 روپے فی کس، چارکلو کھجور کے حساب سے 960 روپے فی کس، چار کلو کشمش کے حساب سے 1920 روپے فی کس کا نصاب ہے۔

بیان کے مطابق آٹے کے حساب سے ایک روزے کا فدیہ 140 روپے جبکہ 30 روزوں کا 4 ہزار200 روپے رکھا گیا ہے۔

اس کے علاوہ جو کے حساب سے ایک روزے کا فدیہ 320 جبکہ 30 کا 9 ہزار 600 روپے، کجھور کے حساب سے ایک روزے کا فدیہ 960 روپے اور 30 روزوں کا فدیہ 28 ہزار 800 روپے رکھا گیا ہے جبکہ کشمش کے حساب سے ایک روزے کا فدیہ 1920 روپے جبکہ 30 روزوں کا 57600 روپے ہے۔

بیان کے مطابق کفارہ برائے قسم آٹے کے حساب سے 1400 روپے ، جو کے حساب سے 3200 ، کھجور کے حساب سے 9600 اور کشمش کے حساب سے 19200 رکھا گیا ہے-

جبکہ بیان کے مطابق کفارہ برائے صوم برائے 60 مساکین کے لیے آٹے کے حساب سے 8 ہزار 400 روپے،جو کے حساب سے 19 ہزار 200 روپے ،کھجور کے حساب سے 57 ہزار 600 روپے، کشمش کے حساب سے ایک لاکھ 15 ہزار 200 روپے رکھا گیا ہے-

علاوہ ازیں مفتی منیب الرحمٰن کا کہنا تھا کہ گندم کے حساب سے یہ فطرہ، فدیہ اور کفارات کی کم از کم رقم ہے، یہاں تمام اجناس کا حوالہ اس لیے دیا گیا ہے تا کہ جن حضرات کو اللہ تعالیٰ نے رزق میں کشادگی عطا کی ہے اور وافر دولت سے نوازا ہے ان پر نعمت مال کا تشکر لازم ہے اور وہ اپنی مالی حیثیت کو پیش نظر رکھتے ہوئے آٹے، جو، کھجور، کشمش کے حساب سے فطرہ، فدیہ اور کفارات ادا کریں۔

انہوں نے قران پاک کی سورۃ البقرہ کی آیت کا بھی حوالہ دیا کہ اللہ تعالیٰ کا فرمان ہے کہ اور جو کوئی خوش دلی سے زیادہ دے تو یہ اس کے لئے بہتر ہے (البقرہ-184)

واضح رہے کہ صدقہ فطر عید کی نماز سے قبل ادا کرنا ضروری ہے جبکہ گھر کے سربراہ کو اپنے پیاروں یعنی بیوی اور بچوں وغیرہ کا فطرانہ بھی ادا کرنا ہوگا۔