Category: ٹوبہ ٹیک سنگھ

گوجرہ (باغی ٹی وی،نامہ نگار عبد الرحمن جٹ):سی سی ڈی ٹوبہ ٹیک سنگھ نے بڑی کارروائی کرتے ہوئے اغوا برائے تاوان اور کمسن بچے کے قتل کے مقدمے میں مطلوب مرکزی ملزم کو مبینہ پولیس مقابلے میں ہلاک کر دیا۔

پولیس ذرائع کے مطابق مقدمہ نمبر 31/26 بجرم 365-A/302/201 ت پ تھانہ نواں لاہور میں مطلوب مرکزی ملزم ذوالقرنین ولد ضیاء اللہ قوم کمبوہ، سکنہ 339 ج ب گوجرہ سی سی ڈی ٹوبہ کی ٹیم کے ساتھ مبینہ مقابلے میں مارا گیا۔

تفصیلات کے مطابق سی سی ڈی پولیس ملزمان اور ناجائز اسلحہ فروشوں کی تلاش میں چک نمبر 364 ج ب کے قریب گشت کر رہی تھی کہ اس دوران موٹر سائیکل پر سوار تین مشتبہ افراد نے پولیس ٹیم کو دیکھتے ہی فائرنگ شروع کر دی۔ جوابی کارروائی کے دوران ایک ملزم اپنے ہی ساتھیوں کی فائرنگ سے موقع پر ہلاک ہو گیا جبکہ دو ملزمان فائرنگ کرتے ہوئے فرار ہونے میں کامیاب ہو گئے۔

پولیس کے مطابق ہلاک ہونے والا ملزم تھانہ نواں لاہور کی حدود میں اغوا برائے تاوان کے بعد کمسن بچے کے بہیمانہ قتل کا مرکزی کردار تھا۔ ملزم کے قبضے سے ناجائز پسٹل 30 بور بھی برآمد کر لیا گیا ہے۔

پولیس کا کہنا ہے کہ فرار ہونے والے ملزمان کی گرفتاری کے لیے چھاپے مارے جا رہے ہیں اور واقعے کی مزید تفتیش جاری ہے۔

گوجرہ (نامہ نگار عبد الرحمن جٹ) شیعہ علماء کونسل وسطی پنجاب کی صوبائی، ڈویزنل اور ضلعی قیادت نے اسلام آباد کے علاقے ترلائی کلاں میں واقع امامبارگاہ خدیجہ الکبریٰ میں نمازِ جمعہ کے دوران ہونے والے خودکش دھماکے کی شدید الفاظ میں مذمت کی ہے اور ذمہ داران کے خلاف فوری کارروائی کا مطالبہ کیا ہے۔

شیعہ علماء کونسل کے نائب صدر سید آصف شیرازی، ڈپٹی انفارمیشن سیکرٹری سید طاہر کاظمی، ڈویزنل صدر سبطین رضا اور ضلعی صدر سید ثقلین کاظمی نے مشترکہ بیان میں کہا کہ اس بزدلانہ دہشتگردی میں بے شمار بے گناہ نمازی شہید جبکہ متعدد زخمی ہوئے ہیں۔ دورانِ نماز کلمہ گو مسلمانوں کو نشانہ بنانا کھلی دہشتگردی اور انسانیت کے خلاف سنگین جرم ہے۔

سید آصف شیرازی نے کہا کہ یہ کارروائی کرنے والے عناصر کالعدم دہشتگرد تنظیمیں اور فتنۂ خوارج ہیں، جنہوں نے ماہِ رمضان سے قبل ملک کے دارالحکومت کی پُرامن فضا کو خون میں نہلا دیا۔ انہوں نے وزیراعظم پاکستان اور آرمی چیف جنرل سید عاصم منیر سے مطالبہ کیا کہ امامبارگاہ سانحہ میں ملوث ذمہ داران کو فوری گرفتار کر کے قرار واقعی سزا دی جائے اور تمام کالعدم تنظیموں کے خلاف بھرپور آپریشن کیا جائے جو دہشتگردوں کو پروان چڑھا رہی ہیں۔

انہوں نے خبردار کیا کہ اسلام آباد میں بعض کالعدم تنظیموں کے افراد کھلے عام اجتماعات اور اہلِ تشیع مخالف نعرے بازی کرتے رہے، جس پر فوری کارروائی نہ ہونا تشویشناک ہے۔ آخر میں انہوں نے کہا کہ اگر حکومت نے مؤثر اقدامات نہ کیے تو احتجاجی لائحہ عمل اختیار کیا جائے گا۔

گوجرہ(باغی ٹی وی،نامہ نگارعبدالرحمن جٹ کی رپورٹ)گوجرہ میں دو الگ الگ واقعات میں 3 افراد کو قتل کر دیا گیا ہے۔ پہلے واقعہ میں دشمنی کی بنا پر دو افراد کو فائرنگ کرکے قتل کیا گیا جبکہ دوسرے واقعہ میں ایک باپ نے غیرت کے نام پر اپنی بیٹی کو گولی مار کر ہلاک کر دیا ہے۔

چک نمبر 303 ج ب کٹھور کا رہائشی توصیف امجد اپنے رشتہ دار حسن کے ہمراہ ایک مقدمے میں تاریخ پیشی پر مقامی عدالت آ رہا تھا کہ جھنگ روڈ پر اس کے مخالفین رفیع اور دیگر نے موٹر سائیکلوں پر سوار ہو کر اندھا دھند فائرنگ کر دی۔

فائرنگ کے نتیجے میں توصیف امجد (عمر 50 سال)، حسن (عمر 30 سال) اور ایک راہ گیر گلزار احمد سکنہ چک نمبر 300 ج ب شدید زخمی ہو گئے۔
توصیف امجد موقع پر ہی دم توڑ گیاجبکہ حسن تحصیل ہیڈ کوارٹر ہسپتال میں زخموں کی تاب نہ لاتے ہوئے چل بساجبکہ زخمی راہ گیر گلزار احمد کو ابتدائی طبی امداد کے بعد مخدوش حالت کے پیش نظر الائیڈ ہسپتال فیصل آباد ریفر کر دیا گیا ہے۔

واضح رہے کہ یہ قتل چند ماہ قبل مقتول توصیف امجد کے بھتیجے عبدالرحمن کے ہاتھوں رفیع کے بیٹے سعد کے قتل کا شاخسانہ ہے۔تھانہ سٹی پولیس نے نعشیں تحویل میں لے کر ہسپتال منتقل کر دیں اور ملزمان کی تلاش شروع کر دی ہے۔

دوسرا واقعہ تھانہ صدر گوجرہ کے نواحی گاؤں چک نمبر 418 ج ب میں ایک اور اندوہناک واقعہ پیش آیا جہاں غیرت کے نام پر ایک باپ نے اپنی بیٹی کو قتل کر دیا۔

گاؤں ک چک نمبر 418 ج بے رہائشی محمد ماجد اقبال نے اپنی 23 سالہ بیٹی مسمات ام البنین کو فائرنگ کر کے قتل کر دیا اور موقع سے فرار ہونے میں کامیاب ہو گیا۔

قتل کی وجہ یہ بتائی جاتی ہے کہ مقتولہ چند دن قبل گاؤں کے ایک لڑکے کے ساتھ بھاگ گئی تھی۔ مقامی پولیس نے لڑکی کو برآمد کر کے عدالت میں پیش کیا تھا جہاں دوشیزہ کے بیان پر اسے ورثاء کے حوالے کر دیا گیا تھا۔ باپ نے اسی رنج کی بنا پر بیٹی کو قتل کر دیا۔

مقامی پولیس نے تفتیش شروع کر دی ہے اور ملزم کی گرفتاری کے لیے چھاپے مارے جا رہے ہیں۔

گوجرہ (سٹی رپورٹر/محمد اجمل) انصار کالونی کے دکاندار محمد افضل سے موٹر سائیکل سوار ڈاکو ہزاروں روپے نقدی اور قیمتی موبائل چھین کر فرار ہوگئے۔ واردات کی اطلاع تھانہ سٹی پولیس کو دی گئی تاہم مقدمے کے اندراج کے بارے میں کچھ معلوم نہ ہو سکا۔

دوسری جانب علاقہ تھانہ صدر میں گشت کے دوران سی سی ڈی پولیس کو مشکوک موٹر سائیکل سواروں نے دیکھتے ہی فائرنگ کر دی۔ تعاقب کے دوران ملزمان کی موٹر سائیکل بے قابو ہو کر برجی سے ٹکرا گئی، ایک ملزم موقع سے اندھیرے کا فائدہ اٹھا کر فرار ہو گیا جبکہ دوسرا ملزم عابد حسین ولد مظہر حسین سکنہ ٹوبہ ٹیک سنگھ زخمی حالت میں گرفتار کر لیا گیا۔

گرفتار ملزم سے ناجائز اسلحہ بھی برآمد ہوا جسے علاج کے لیے ٹی ایچ کیو ہسپتال گوجرہ منتقل کر دیا گیا ہے جبکہ فرار ہونے والے ساتھی کی تلاش جاری ہے۔

گوجرہ (سٹی رپورٹر محمد اجمل)چوروں نے گوجرہ میں دو شہریوں کو موٹر سائیکلوں سے محروم کردیا۔ محلہ نیو پلاٹ کے محمد بوٹا اپنی موٹر سائیکل (نمبری AYV1398) چوک ملکانوالہ میں دکان کے باہر کھڑی کر کے خریداری میں مصروف تھے کہ چور موقع سے موٹر سائیکل لے اڑے۔

اسی طرح محلہ گلشن اقبال کالونی کے ساجد مسیح کی موٹر سائیکل (نمبری FDO3785) بھی گھر کے باہر سے نامعلوم افراد چرا کر فرار ہوگئے۔

سٹی پولیس گوجرہ نے دونوں واقعات پر الگ الگ مقدمات درج کرکے ملزمان کی تلاش شروع کر دی ہے۔

گوجرہ (سٹی رپورٹر محمد اجمل)ستیاں ضلع جھنگ کا رہائشی محنت کش عبدالغفور، جو گوجرہ میں زمیندار کے پاس ملازم تھا، گدھا ریڑھی پر مویشیوں کے لیے چارہ لینے جا رہا تھا کہ مین جھنگ روڈ پر تیز رفتار ڈالہ (نمبری CAQ7288) کی ٹکر سے شدید زخمی ہو کر موقع پر ہی جاں بحق ہوگیا۔

حادثے کے بعد ڈالہ ڈرائیور موقع سے فرار ہوگیا۔ اطلاع ملنے پر صدر پولیس گوجرہ نے لاش تحویل میں لے کر تحصیل ہیڈکوارٹرز اسپتال منتقل کی، پوسٹ مارٹم کے بعد نعش ورثا کے حوالے کر دی گئی اور ڈالہ قبضے میں لے کر ڈرائیور کی تلاش شروع کر دی گئی۔

مرحوم کی میت گھر پہنچنے پر کہرام مچ گیا اور ہر آنکھ اشکبار ہوگئی۔

گوجرہ(باغی ٹی وی،سٹی رپورٹرمحمداجمل خان)شہر میں چوری کی وارداتوں کا سلسلہ جاری ہے، جہاں دو الگ الگ واقعات میں شہریوں کی دو موٹر سائیکلیں چوری ہو گئیں۔ اس کے علاوہ، فیسکو ٹاسک فورس نے دو افراد کو بجلی چوری کرتے ہوئے رنگے ہاتھوں پکڑ لیا ہے۔ پولیس نے تمام واقعات کا مقدمہ درج کر کے کارروائی شروع کر دی ہے۔

پہلے واقعے میں، محلہ شریف پورہ کا رہائشی محمد اکبر اپنی موٹر سائیکل (نمبر FDK-5224) لے کر غلہ منڈی میں ایک دکان پر آیا۔ وہ موٹر سائیکل باہر کھڑی کر کے دکان کے اندر گیا اور جب واپس آیا تو موٹر سائیکل غائب تھی۔

دوسرا واقعہ چک نمبر 279 ج ب میں پیش آیا، جہاں محمد علی نے اپنی موٹر سائیکل (نمبر ALP-6849) اپنے کلینک کے باہر کھڑی کی جو نامعلوم چور چرا کر لے گئے۔ تھانہ سٹی اور نواں لاہور پولیس نے دونوں واقعات کے الگ الگ مقدمات درج کر کے چوروں کی تلاش شروع کر دی ہے۔

اسی دوران، فیسکو ٹاسک فورس نے خفیہ اطلاع پر کارروائی کرتے ہوئے دو بجلی چوروں کو گرفتار کر لیا۔ محلہ شہسوار ٹاؤن کے غلام عباس اور چک نمبر 373 ج ب کے ناصر علی میٹر سے براہ راست تاریں لگا کر بجلی چوری کر رہے تھے۔ فیسکو اہلکاروں نے موقع پر چھاپہ مار کر انہیں بجلی چوری کرتے ہوئے پکڑا اور ان کے میٹر اتار لیے۔ دونوں ملزمان کے خلاف متعلقہ تھانوں میں مقدمات درج کر لیے گئے ہیں اور ان کی گرفتاری کے لیے چھاپے مارے جا رہے ہیں۔