Category: ٹوبہ ٹیک سنگھ

گوجرہ (باغی ٹی وی،نامہ نگار عبدالرحمن جٹ) گوجرہ کے تھانہ صدر کے علاقے میں ایک مہندی کی تقریب کے دوران خوفناک ٹریفک حادثہ پیش آیا، جس کے نتیجے میں چار افراد جان بحق ہوگئے جبکہ متعدد زخمی ہوئے۔

تفصیلات کے مطابق، چک نمبر 427 ج ب اضافی آبادی اوڈھوں والی مین جھنگ گوجرہ روڈ پر جمشید ولد منشا قوم اوڈھ کی مہندی کی تقریب جاری تھی کہ اسی دوران جھنگ کی طرف سے آنے والا بیڈ فورڈ ٹرک (نمبر Z-6515) بے قابو ہو کر تقریب کے شرکاء پر چڑھ گیا۔ یہ ٹرک نامعلوم ڈرائیور چلا رہا تھا جو کہ موقع سے فرار ہوگیا۔

حادثے کے نتیجے میں جاں بحق ہونے والوں میں یاسمین بی بی (22/23 سال)، عاسمہ بی بی (26/27 سال)، نمرہ (6/7 سال) اور نشا (7/8 سال) شامل ہیں۔

زخمیوں کی تعداد میں عاصم ولد ناصر (13 سال)، نسیم بی بی (30 سال)، ثنا اسلم (15 سال)، محمد حسن (12 سال)، محمد اسلم، جاوید (20 سال)، رخسانہ بی بی اور فرزانہ بلال شامل ہیں۔ شدید زخمی افراد کو فوری طور پر گورنمنٹ ایڈیشنل جنرل ہسپتال گوجرہ منتقل کیا گیا، جبکہ کچھ کو علاج کے لیے الائیڈ ہسپتال فیصل آباد ریفر کر دیا گیا۔

مقامی پولیس واقعے کی تحقیقات میں مصروف ہے۔ اس حادثے کے ساتھ ہی ضلع ٹوبہ ٹیک سنگھ میں گزشتہ آٹھ گھنٹوں کے دوران مختلف ٹریفک حادثات میں دس افراد کی جانیں جا چکی ہیں، جو کہ علاقے میں ٹریفک کے حالات کی سنگینی کو ظاہر کرتا ہے۔

گوجرہ (باغی ٹی وی،نامہ نگارعبدالرحمن جٹ کی رپورٹ) تھانہ نواں لاہور کے علاقے میں زمین کے تنازعے پر ایک نوجوان کو فائرنگ کرکے قتل کردیا گیا ہے۔

ملزموں کی شناخت محمد افضل عرف بگو اور منور عرف کلو کے طور پر ہوئی ہے۔ دونوں ملزمان چک نمبر 335 ج ب کے رہنے والے ہیں۔ مقتول محمد نواز ولد محرم قوم ملوکہ، عمر 45/46 سال، سکنہ 248 ج ب تھانہ لنگرانہ ضلع چنیوٹ تھا۔ وہ دودھ کا کاروبار کرتا تھا اور آج موٹر سائیکل پر دودھ لے کر جا رہا تھا جب اس پر فائرنگ کی گئی۔

ابتدائی تحقیقات کے مطابق دونوں فریقوں کے درمیان زمین کا تنازعہ تھا جو اس قتل کی وجہ بن سکتا ہے۔

پولیس نے فوری طور پر موقع پر پہنچ کر شواہد اکٹھے کیے اور ملزمان کی گرفتاری کے لیے سرچ آپریشن شروع کردیا ہے۔ مقتول کی لاش کو قانونی کارروائی کے لیے نواں ہسپتال منتقل کردیا گیا ہے۔

گو جرہ (نامہ نگار باغی ٹی وی عبدالرحمن جٹ سے) تھانہ صدر گوجرہ پولیس نے اندھے قتل کا معمہ حل کر لیا، جس میں 9 سالہ بچے سہیل عرف شیرو کو بدفعلی کے بعد قتل کرنے والا سفاک قاتل گرفتار کر لیا گیا ہے۔

مورخہ 3 ستمبر 2024 کو تھانہ صدر گوجرہ کو اطلاع ملی کہ چک 372 ج ب اضافی آبادی سے 9/10 سالہ بچہ سہیل عرف شیرو، 2 ستمبر 2024 سے غائب ہے۔ بچے کے والد کی درخواست پر فوراً مقدمہ نمبر 1032/24 درج کیا گیا۔

واقعے کی سنگینی کو مدنظر رکھتے ہوئے، ڈی پی او ٹوبہ نے ڈی ایس پی گوجرہ کی سربراہی میں ایس ایچ او تھانہ صدر گوجرہ و دیگر پولیس اہلکاروں پر مشتمل ٹیم تشکیل دی۔ پولیس ٹیم نے 7 ستمبر 2024 کو بچے کی لاش فصل جوار کے کھیت سے برآمد کی، جس پر مقدمہ میں دفعہ 302 ت پ درج کیا گیا۔

تفتیش کے دوران پولیس کو شواہد ملے کہ اسی گاؤں کے جاوید ولد اسلم قوم ملک کو بچے کے ساتھ جاتے ہوئے دیکھا گیا تھا۔ جاوید کو حراست میں لے کر تفتیش کی گئی، جس میں اس نے 9 سالہ بچے کو قتل کرنے کا اعتراف کیا۔ ملزم نے بتایا کہ اس نے بچے کے ساتھ بدفعلی کی اور بعد میں بچے کو راز افشاء ہونے کے خوف سے گلا دبا کر قتل کر دیا۔ ملزم نے بچے کے گھر والوں کے ساتھ مل کر بچے کو تلاش کرنے کی بھی کوشش کی۔

بچے کی گمشدگی اور لاش ملنے سے علاقے میں خوف کی لہر دوڑ گئی تھی، لیکن ملزم کی گرفتاری سے عوام میں تحفظ کا احساس پیدا ہوا ہے۔ اہلِ علاقہ اور شہریوں نے پولیس کی اس کامیابی کو سراہا ہے۔

گوجرہ (باغی ٹی وی،نامہ نگارعبدالرحمن جٹ سے) بجلی چوری سیکنڈل،جماعت اسلامی نے احتجاج کا اعلان

تفصیل کے مطابق جماعت اسلامی کے رہنما ڈاکٹر عطاء اللہ حمید نے گوجرہ میں ایک پریس کانفرنس کرتے ہوئے بجلی چوری کے ایک بڑے اسکینڈل کا انکشاف کیا ہے۔ انہوں نے بتایا کہ شہر میں بجلی کی تاروں پر کنڈے لگا کر واپڈا اور عوام کو لاکھوں روپے کا چونا لگایا جا رہا تھا۔

ڈاکٹر عطاء اللہ حمید کا کہنا ہے کہ اسسٹنٹ کمشنر اور چیف آفیسر موقع سے فرار ہو گئے ہیں جبکہ بجلی چوری میں ملوث افراد کی شناخت کر کے ان کے خلاف قانونی کارروائی کی جانی چاہیے۔ انہوں نے کہا کہ عام عوام بجلی کے بلوں میں اضافی ٹیکسز سے پہلے ہی تنگ آ چکی ہیں اور اس کے باوجود افسر شاہی بجلی چوری میں ملوث ہو گئی ہے۔

ڈاکٹر عطاء اللہ حمید نے مطالبہ کیا ہے کہ بجلی چوروں کے خلاف فوری کارروائی کی جائے اور انہیں کڑی سزا دی جائے۔ انہوں نے کہا کہ اگر ذمہ داران کو کٹہرے میں نہ لایا گیا تو جماعت اسلامی احتجاج کا اعلان کرے گی۔

گوجرہ (باغی ٹی وی،نامہ نگارعبدالرحمن جٹ) گوجرہ میونسپل کمیٹی میں افسران کی جانب سے واپڈا کی مین لائنوں میں ڈائریکٹ کنکشن لگا کر بڑے پیمانے پر بجلی چوری کا انکشاف ہوا ہے۔

ایف آئی اے کی ایک ٹیم نے ایکسئین فیسکو گوجرہ کے ہمراہ میونسپل کمیٹی میں چھاپہ مار کر یہ گھناؤنا فعل رنگے ہاتھ پکڑا ہے۔ چھاپے کی خبر ملتے ہی میونسپل کمیٹی کے افسران دفاتروں سے غائب ہو گئے۔

تفصیلات کے مطابق، افسران کو خفیہ اطلاع ملی تھی کہ میونسپل کمیٹی میں بجلی چوری کی جا رہی ہے۔ جس پر فوری کارروائی کرتے ہوئے چھاپہ مارا گیا اور واپڈا کی مین لائنوں پر ڈالے گئے کنکشنز کو ضبط کر لیا گیا۔ میونسپل کمیٹی میں نصب بجلی کے میٹرز کو بھی ناکارہ بنا کر قبضے میں لے لیا گیا ہے اور میونسپل کمیٹی کا بجلی کا کنکشن منقطع کر دیا گیا ہے۔

مقامی ذرائع کے مطابق، میونسپل کمیٹی میں کافی عرصے سے یہ بجلی چوری کا دھندہ جاری تھا جس سے واپڈا کو کروڑوں روپے کا نقصان ہوا ہے۔ مقامی سماجی حلقوں نے اس کارروائی کا خیرمقدم کرتے ہوئے ملوث افسران کے خلاف سخت قانونی کارروائی کا مطالبہ کیا ہے۔

گوجرہ (باغی ٹی وی،نامہ نگارعبدالرحمن) گوجرہ کے نواحی علاقے میں ایک دل دہلا دینے والے حادثے میں چوتھی کلاس کا طالب علم اپنی جان سے ہاتھ دھو بیٹھا۔

تفصیلات کے مطابق، تھانہ صدر گوجرہ کے علاقے چکنمبر 434 ج ب کا رہائشی حمزہ ولد وقاص، جو کہ صرف دس سال کا تھا اور ایک پرائیویٹ سکول میں چوتھی کلاس کا طالب علم تھا، سکول سے گھر واپس جاتے ہوئے رکشے سے گر گیا۔ اس حادثے میں وہ شدید زخمی ہو گیا اور طبی امداد کے دوران دم توڑ گیا۔

مقامی لوگوں نے زخمی طالب علم کو فوری طور پر قریبی ہسپتال منتقل کیا لیکن افسوسناک طور پر وہ اپنی جان نہیں بچا سکے۔ پولیس کو اطلاع ملنے پر وہ موقع پر پہنچ گئی اور مزید تحقیقات شروع کر دی ہیں۔

پیر محل(باغی ٹی وی رپورٹ) کم جہیز کیوں لائی،بہو پربہیمانہ تشدد، ہسپتال میں داخل

تفصیل کے مطابق پیر محل کے ایک گاؤں میں دل دہلا دینے والا واقعہ پیش آیا ہے جہاں ایک شادی شدہ خاتون کو جہیز نہ لانے پر اس کے شوہر اور سسرال والوں نے تشدد کا نشانہ بنایا ہے۔ متاثرہ خاتون20 سالہ آمنہ شفیق کو شدید زخمی حالت میں ہسپتال منتقل کیا گیا ہے۔

آمنہ شفیق نے بتایا ہے کہ اس کے شوہر اسد اور سسرال والوں نے اسے کمرے میں بند کرکے تشدد کیا اور اسے شدید مارا پیٹا۔ اس نے مزید بتایا کہ شادی کے وقت جہیز نہ لانے کی وجہ سے اسے بار بار تشدد کا سامنا کرنا پڑتا رہا ہے۔

مقامی پولیس نے واقعے کی اطلاع ملنے پر فوری کارروائی کرتے ہوئے مقدمہ درج کر لیا ہے اور ملزمان کی گرفتاری کے لیے چھاپے مارے جا رہے ہیں۔ متاثرہ خاتون کو عدالتی کارروائی کے لیے پیش کیا جائے گا۔