Category: ٹوبہ ٹیک سنگھ

گوجرہ(باغی ٹی وی،سٹی رپورٹرمحمداجمل خان ) آسٹریلیا کے ہائی کمشنر برائے پاکستان نیل ہاکنز نے گوجرہ کا دورہ کیا، جہاں ان کے اعزاز میں ڈسٹرکٹ ہاکی ایسوسی ایشن ٹوبہ ٹیک سنگھ کے زیر اہتمام مردوں اور خواتین کے نمائشی ہاکی میچ کھیلے گئے۔ یہ میچز گوجرہ انٹرنیشنل ہاکی اسٹیڈیم میں منعقد ہوئے، جس کی نگرانی پاکستان ہاکی ٹیم کے ہیڈ کوچ اور اولمپیئن طاہر زمان نے کی۔

تفصیلات کے مطابق تقریب کے مہمان خصوصی آسٹریلوی ہائی کمشنر نیل ہاکنز تھے، جنہوں نے کھلاڑیوں میں انعامات بھی تقسیم کیے۔ میڈیا سے گفتگو کرتے ہوئے انہوں نے گوجرہ آکر خوشی کا اظہار کیا اور بتایا کہ وہ خود بھی ہاکی کے کھلاڑی رہے ہیں، اگرچہ زیادہ اچھے نہیں تھے۔ انہوں نے مزاحاً کہا کہ "گوجرہ کا پانی پی لیا ہے، ہوسکتا ہے اس سے اچھا ہاکی کھلاڑی بن جاؤں۔”

ہائی کمشنر نیل ہاکنز نے گوجرہ کے نوجوان لڑکوں اور لڑکیوں میں ہاکی کا حیران کن ٹیلنٹ موجود ہونے کی تعریف کی اور کہا کہ حکومت پاکستان کو قومی کھیل ہاکی کے مستقبل کے لیے سپورٹ کرنی چاہیے۔ اس موقع پر ان کی اہلیہ بھی ان کے ہمراہ تھیں۔ انہوں نے کھلاڑیوں کے ساتھ گھل مل کر ان کی حوصلہ افزائی کی۔

اس پروگرام کے لیے سیکیورٹی کے سخت انتظامات کیے گئے تھے۔ نمائشی میچوں کو دیکھنے کے لیے شائقین ہاکی کی بڑی تعداد موجود تھی، جنہوں نے کھلاڑیوں کی کارکردگی کو سراہا۔

گوجرہ (سٹی رپورٹر،محمد اجمل) ڈسٹرکٹ ہیلتھ آفیسر ڈاکٹر فیضان ارشد نے کہا ہے کہ سوشل میڈیا پر سروائیکل کینسر سے بچاؤ کی ویکسین کے حوالے سے پھیلائی جانے والی منفی ویڈیوز اور افواہیں بے بنیاد ہیں۔ عوام کو چاہیے کہ وہ ایسی جھوٹی خبروں پر کان نہ دھریں بلکہ صرف مستند طبی ماہرین کی رہنمائی پر اعتماد کریں۔

انہوں نے بتایا کہ سروائیکل کینسر سے بچاؤ کی مہم 15 سے 27 ستمبر تک ضلع ٹوبہ ٹیک سنگھ میں جاری ہے، جس کے دوران 9 سے 14 سال کی بچیوں کو عالمی ادارہ صحت (WHO) اور یونیسیف سے منظور شدہ ویکسین فراہم کی جا رہی ہے۔ یہ ویکسین محفوظ اور مؤثر ہے اور مستقبل میں بچیوں کو مہلک بیماری سے تحفظ دے گی۔

ڈاکٹر فیضان ارشد نے والدین پر زور دیا کہ وہ اپنی بچیوں کو بروقت ویکسین لگوائیں تاکہ ان کا مستقبل محفوظ ہو سکے اور وہ منفی پروپیگنڈے کا شکار نہ ہوں۔

گوجرہ (سٹی رپورٹر محمد اجمل) پاکستان میں آسٹریلیا کے ہائی کمشنر ایکسیلنسی نیل ہاکنز نے گوجرہ ہاکی اسٹیڈیم کا دورہ کیا جہاں ان کا شاندار استقبال کیا گیا۔ اس موقع پر انٹرنیشنل اور اولمپین کھلاڑیوں نے بڑی تعداد میں شرکت کی اور مہمانِ خصوصی کے ساتھ ملاقات پر اپنی خوشی کا اظہار کیا۔ چیف کوچ پاکستان ہاکی ٹیم اولمپین طاہر زمان اور کوچ شیخ محمد عثمان نے بھی پرتپاک خیر مقدم کیا۔

نیل ہاکنز نے اپنے پیغام میں کہا کہ گوجرہ کو ہاکی کے حوالے سے منفرد مقام حاصل ہے اور اس شہر کی خدمات ہمیشہ یاد رکھی جائیں گی۔ انہوں نے کہا کہ گوجرہ آ کر بے حد خوشی ہوئی، خصوصاً بچوں اور بچیوں کا کھیل دیکھ کر وہ بہت متاثر ہوئے ہیں۔

تقریب کے اختتام پر مہمانِ خصوصی کو استاد اسلم روڈا کے نام سے منسوب ہاکی اسٹک کا سووینئر اور 1994 ورلڈ کپ کی چیمپئن ٹیم کے دستخطوں والی خصوصی ہاکی اسٹک پیش کی گئی، جبکہ انٹرنیشنل اور اولمپین کھلاڑیوں میں انعامات بھی تقسیم کیے گئے۔

گوجرہ (باغی ٹی وی سٹی رپورٹر محمد اجمل) قاری حافظ محمد ریاض نے عربی زبان و ادب میں "پی ایچ ڈی غیر منقوط نعت رسول مقبول ﷺ” کا مرحلہ مکمل کر لیا، جس کی خوشی میں محمد رمضان گجر نے پُرتکلف دعوت کا اہتمام کیا۔

تقریب میں پنجاب ٹیچر یونین کے اساتذہ سمیت محمد اقبال گورایہ، ظہیر اکبر، چوہدری محمد الیاس، محمد ارشاد، ظہور احمد کنوینئر ای ایس ٹی عریبک ٹیچرز ایسوسی ایشن ٹوبہ ٹیک سنگھ، پیش امام مولوی محمد بشیر، ملک آصف اور میڈیا نمائندگان ڈاکٹر محمد اجمل و عبدالرحمن جٹ نے خصوصی شرکت کی۔

شرکاء نے قاری حافظ محمد ریاض کو پھولوں کے ہار پہنائے، گلدستے پیش کیے اور نیک تمناؤں کا اظہار کیا۔ مقررین نے کہا کہ قاری صاحب کی یہ کامیابی علاقہ چک نمبر 297 ج ب گوجرہ کے لیے باعثِ فخر ہے۔ تقریب کے آخر میں ملک و قوم کی سلامتی و خوشحالی کے لیے دعا بھی کی گئی۔

گوجرہ (سٹی رپورٹر/محمد اجمل) ترقی یافتہ ممالک میں معذور افراد، سائنسدانوں اور اساتذہ کو سب سے زیادہ اہمیت دی جاتی ہے۔ پنجاب ٹیچر یونین کے رہنما محمد رمضان کے مطابق وہاں اساتذہ کو معاشرے کا معزز ترین رکن مانا جاتا ہے، مگر افسوس کہ ہم اپنی روایت اور اقدار سے غافل ہیں۔

انہوں نے کہا کہ فرانس کی عدالتوں میں اساتذہ کے علاوہ کسی اور کو نہ کرسی پیش کی جاتی ہے اور نہ پروٹوکول دیا جاتا ہے۔ جاپان میں اگر کسی استاد کو گرفتار کرنا پڑ جائے تو پولیس کو عدالت سے اجازت لینا لازمی ہے۔ اسی طرح کوریا میں استاد اپنے سروس کارڈ کی بنیاد پر وہ تمام سہولتیں حاصل کر لیتا ہے جو وزراء اور اراکین پارلیمنٹ کو میسر ہیں۔

محمد رمضان نے مزید کہا کہ یہ تو ترقی یافتہ ممالک کی مثالیں ہیں، لیکن اگر ہم چودہ سو سال پیچھے جائیں تو حضرت علیؓ کا قول واضح ملتا ہے کہ "جس نے مجھے ایک لفظ سکھایا وہ مجھے مدینہ کی کسی بھی منڈی میں فروخت کر سکتا ہے”۔ اس کے ساتھ ہی نبی آخرالزماں ﷺ کا ارشاد ہے کہ "میں معلم بنا کر بھیجا گیا ہوں”۔ یہی قول معلمانہ پیشے کو پیغمبری پیشے سے منسوب کرتا ہے۔

انہوں نے کہا کہ بچہ اپنی پہلی درسگاہ ماں کی گود سے حاصل کرتا ہے، لیکن ماحول، تہذیب، اقدار، مذہب سے اپنائیت، حب الوطنی، سماجی میل جول، غورو فکر کی عادت اور برے بھلے کی پہچان جیسی تمام خوبیاں ایک استاد ہی اپنے شاگرد میں پیدا کرتا ہے۔ یہی وہ کردار ہے جس کی بنیاد پر استاد کو معاشرے کی تعمیر اور قوم کی رہنمائی میں ریڑھ کی ہڈی قرار دیا جاتا ہے۔