Category: ٹوبہ ٹیک سنگھ

گوجرہ(سٹی رپورٹرمحمداجمل خان) نواحی گاؤں اور شہر میں مختلف افسوسناک اور جرائم پیشہ واقعات پیش آئے۔ چک نمبر 367 ج ب کا سیکنڈ ایئر کا طالب علم ریان، باپ کی مبینہ ڈانٹ ڈپٹ سے دل برداشتہ ہو کر زہریلی گولیاں کھا بیٹھا جس سے اس کی حالت غیر ہوگئی۔ اسے فوری طور پر تحصیل ہیڈ کوارٹر منتقل کیا گیا جہاں پر طبی امداد دی جارہی ہے۔

دوسری جانب شہر اور گردونواح میں چوری کی متعدد وارداتیں بھی رپورٹ ہوئیں۔ چک نمبر 359 ج ب کی بلقیس بی بی کے گھر نامعلوم چور دیوار پھلانگ کر داخل ہوئے اور 2 لاکھ 33 ہزار روپے مالیت کے پانچ موبائل فون چرا کر فرار ہوگئے۔ اسی طرح چک نمبر 241 گ ب کا علی رضا اپنے گھر کے باہر سویا ہوا تھا کہ اس کا موبائل فون اور نقدی چوری کر لی گئی۔ محلہ رحمان پورہ کے حسین علی کے گھر کا دروازہ توڑ کر ہزاروں روپے نقدی چرا لی گئی جبکہ محلہ رحیم آباد کی ونرین زوجہ راشد کے گھر میں گھس کر قیمتی سامان اور موبائل بھی لے اڑے۔ پولیس نے ان وارداتوں کے الگ الگ مقدمات درج کر لئے ہیں۔

ادھر محلہ قادری دربار میں خاتون کی عزت لوٹنے کی کوشش کا بھی واقعہ پیش آیا۔ متاثرہ شمائلہ اصغر نے پولیس کو بتایا کہ اس کی بھابی ثناء نے اپنے بھائی کامران کے ساتھ مل کر اسے بدنام کرنے کے لئے اوباش کے ذریعے اس کی عزت لوٹنے کی کوشش کرائی، اس دوران ملزم نے اس کے کپڑے پھاڑ دیئے تاہم شوروغل پر فرار ہوگیا۔ پولیس نے مقدمہ درج کر کے ملزم کی تلاش شروع کر دی ہے۔

گوجرہ (سٹی رپورٹر/محمد اجمل خاں) شہر میں جرائم پیشہ عناصر کی سرگرمیاں جاری ہیں۔ سبزی منڈی میں موٹر سائیکل چوری جبکہ دوسری واردات میں دو بھائی شدید زخمی ہو گئے۔

پولیس کے مطابق چک نمبر 243 گ ب کا رہائشی ساجد سبزی منڈی گوجرہ سبزی کی خریداری کے لیے آیا اور اپنی موٹر سائیکل نمبر FDK-4219 کھڑی کی۔ اس دوران نامعلوم چور موٹر سائیکل لے اڑا اور فرار ہوگیا۔ واردات کی اطلاع تھانہ سٹی گوجرہ کو دے دی گئی ہے تاہم مقدمے کے اندراج کے بارے میں کچھ معلوم نہیں ہو سکا۔

دوسری جانب محلہ طفیل کالونی میں تین مسلح افراد نے محمد عارف کے بیٹوں محمد ارسلان اور علی عثمان کو اسلحہ کے زور پر یرغمال بنایا۔ ملزمان نے فائرنگ کر کے محمد ارسلان کو زخمی کر دیا جبکہ علی عثمان کے سر پر پستول کے بٹ مارے جس سے وہ شدید زخمی ہوگیا۔ دونوں زخمیوں کو ہسپتال منتقل کر دیا گیا جہاں ان کا علاج جاری ہے۔ پولیس نے اطلاع ملنے پر مقدمہ درج کر کے ملزمان کی تلاش شروع کر دی ہے۔

گوجرہ (سٹی رپورٹر محمد اجمل) ڈسٹرکٹ پولیس آفیسر ٹوبہ ٹیک سنگھ عبادت نثار کے حکم پر ضلع بھر میں منشیات فروشوں اور جرائم پیشہ عناصر کے خلاف کریک ڈاؤن جاری ہے۔

اسی سلسلے میں تھانہ سٹی گوجرہ پولیس نے ڈی ایس پی گوجرہ اشرف تبسم کی سربراہی اور ایس ایچ او سرفراز احمد کی نگرانی میں کاروائی کرتے ہوئے ریلوے پھاٹک کے قریب شراب فروش ملزم اقبال مسیح عرف نکا ولد یوسف مسیح سکنہ کرسچین کالونی گوجرہ کو رنگے ہاتھوں گرفتار کر لیا۔

پولیس کے مطابق ملزم کے قبضہ سے 105 پونڈا شراب برآمد ہوئی، جس پر اس کے خلاف مقدمہ درج کر کے مزید تفتیش شروع کر دی گئی ہے۔

ڈی پی او ٹوبہ عبادت نثار کا کہنا ہے کہ ٹوبہ پولیس شہریوں کے جان و مال کے تحفظ اور منشیات کے خاتمے کے لیے ہر محاذ پر برسرِ پیکار ہے۔

گوجرہ (سٹی رپورٹر/محمد اجمل) گوجرہ میں پیش آنے والے متعدد سنگین واقعات میں ایک نوجوان کو قتل کر دیا گیا، ایک دوشیزہ سے زیادتی کی کوشش کی گئی اور پولیس مقابلے میں ایک ملزم زخمی حالت میں پکڑا گیا۔

کزن کا قتل، پولیس کو دھوکہ دینے کی کوشش
چک نمبر 241 گ ب گڑھا کا رہائشی وسیم اکرم اپنے کزن عبداللہ کے ساتھ موٹر سائیکل پر واپس گاؤں جا رہا تھا کہ مونگی بنگلہ کے قریب عبداللہ نے اسے پستول سے فائرنگ کر کے شدید زخمی کر دیا۔ وسیم زخموں کی تاب نہ لاتے ہوئے موقع پر ہی دم توڑ گیا۔

عبداللہ نے پولیس کو فون کر کے بتایا کہ ڈاکوؤں نے ان پر حملہ کیا ہے، لیکن صدر پولیس گوجرہ نے موقع پر پہنچ کر شواہد کی بنیاد پر عبداللہ کو حراست میں لے لیا اور آلہ قتل بھی برآمد کر لیا۔ پولیس کے مطابق، قتل کی وجہ لین دین کا تنازع ہے۔ لاش کو پوسٹ مارٹم کے بعد ورثاء کے حوالے کر دیا گیا ہے۔

گھر میں گھس کر زیادتی کی کوشش
ایک اور واقعے میں، چک نمبر 338 ج ب کے رہائشی شیر محمد نے تھانہ نواں لاہور میں مقدمہ درج کروایا ہے کہ اس کی 18 سالہ بیٹی صابراں بی بی گھر میں اکیلی تھی کہ گاؤں کا ایک اوباش نوجوان آصف گھر میں گھس آیا اور اس کے ساتھ زبردستی زیادتی کی کوشش کی۔ لڑکی کے شور مچانے پر ملزم فرار ہونے میں کامیاب ہو گیا۔ پولیس نے مقدمہ درج کر کے ملزم کی تلاش شروع کر دی ہے۔

پولیس مقابلہ، ایک زخمی ملزم گرفتار
دریں اثناء، سی سی ڈی پولیس گوجرہ کی ٹیم نے چک نمبر 371 ج ب مونگی روڈ پر گشت کے دوران دو مشکوک موٹر سائیکل سوار افراد کو رکنے کا اشارہ کیا۔ ملزمان نے پولیس پر فائرنگ کر دی اور فرار ہونے کی کوشش کی۔ پولیس نے تعاقب کیا تو اینی پلی کے قریب دونوں ملزمان موٹر سائیکل سے گر گئے۔ ایک زخمی ملزم محمد آصف سکنہ چک نمبر 510 گ ب کو گرفتار کر لیا گیا، جبکہ دوسرا فرار ہو گیا۔ زخمی ملزم کو ہسپتال منتقل کر دیا گیا ہے جو کہ مختلف مقدمات میں مطلوب تھا۔

گوجرہ (سٹی رپورٹر/محمد اجمل) گوجرہ کے تھانہ صدر کی حدود میں چک 241 گڑھا بہرام کے نوجوان وسیم اکرم کو کلیان پور کے قریب ڈاکوؤں نے فائرنگ کر کے قتل کر دیا۔ یہ واقعہ اس وقت پیش آیا جب وسیم اکرم اپنی موٹر سائیکل پر جا رہے تھے اور ڈاکوؤں نے انہیں لوٹنے کی کوشش کی۔

ذرائع کے مطابق وسیم اکرم اپنے گاؤں سے بستی دانش مندان کی طرف جا رہے تھے۔ جب وہ کلیان پور کے قریب پہنچے تو ناکہ لگائے ڈاکوؤں نے انہیں روکا اور موٹر سائیکل چھیننے کی کوشش کی۔ مزاحمت کرنے پر ڈاکوؤں نے ان پر فائرنگ کر دی، جس کے نتیجے میں وہ شدید زخمی ہو گئے اور موقع پر ہی دم توڑ دیا۔ ڈاکو ان کی موٹر سائیکل 125 لے کر فرار ہو گئے۔

واقعہ کی اطلاع ملتے ہی صدر پولیس موقع پر پہنچ گئی اور مزید کارروائی شروع کر دی ہے۔ اس واقعہ نے علاقے میں خوف و ہراس پھیلا دیا ہے اور شہری اپنے تحفظ کے حوالے سے تشویش میں مبتلا ہیں۔

گوجرہ(سٹی رپورٹر،اجمل خاں) گوجرہ میں موٹر سائیکل چوری کی وارداتوں کا سلسلہ تھمنے کا نام نہیں لے رہا۔ شہر میں ایک بار پھر دو مختلف واقعات میں نامعلوم چوروں نے دو موٹر سائیکلیں چرا لیں۔ ان واقعات نے شہریوں میں شدید خوف و ہراس پیدا کر دیا ہے اور وہ پولیس کی کارکردگی پر سوالات اٹھا رہے ہیں۔

تفصیلات کے مطابق، محلہ قادری دربار کے رہائشی زین نے اپنی موٹر سائیکل گھر کے باہر کھڑی کی ہوئی تھی کہ موقع پا کر نامعلوم چور اسے چوری کر کے فرار ہو گئے۔ اسی طرح، چک نمبر 363 ج ب میں ایک اور شہری اسرار کی موٹر سائیکل بھی اس کے گھر کے باہر سے چوری کر لی گئی۔ چور دونوں وارداتوں میں کامیاب رہے اور ان کا کوئی سراغ نہیں مل سکا۔

پولیس کو ان وارداتوں کی اطلاع دے دی گئی ہے، لیکن تاحال کسی بھی واقعے کا مقدمہ درج نہیں کیا جا سکا۔ شہریوں نے بڑھتی ہوئی وارداتوں پر گہری تشویش کا اظہار کرتے ہوئے اعلیٰ حکام سے نوٹس لینے اور چوروں کی گرفتاری کا مطالبہ کیا ہے۔