Category: ٹوبہ ٹیک سنگھ

گوجرہ (باغی ٹی وی،سٹی رپورٹر، محمد اجمل) سینئر صحافی اور تاجر سے مسلح ڈکیتی کا ایک سال بعد بھی سراغ نہ ملا، تاجر برادری کا شدید احتجاج،لاکھوں روپے کی واردات، پولیس کی کارکردگی پر سوال، تاجران نے آئی جی پنجاب سے نوٹس لینے کا مطالبہ کر دیا

تفصیلات کے مطابق گوجرہ شہر میں ایک معروف تاجر اور سینئر صحافی شیخ محمود احمد کے ساتھ ہونے والی مسلح ڈکیتی کا سراغ نہ لگنے پر تاجر برادری نے شدید تشویش کا اظہار کرتے ہوئے احتجاج کیا ہے۔ یہ واردات تقریباً ایک سال قبل محمود ٹریڈر کی دکان پر پیش آئی تھی مگر تاحال لوٹا گیا مال و زر برآمد نہیں ہو سکا۔

شیخ محمود احمد نے نیشنل بینک والی گلی میں محمود ٹریڈر کے نام سے دکان بنا رکھی ہے۔ تقریباً ایک سال قبل، تین نامعلوم ڈاکوؤں نے دکان میں داخل ہو کر تمام افراد کو اسلحہ کے زور پر یرغمال بنا لیا تھا اور لاکھوں روپے کی نقدی اور قیمتی موبائل فون چھین کر فرار ہو گئے تھے۔

تھانہ سٹی پولیس نے فوری طور پر مقدمہ درج کر لیا تھا اور سی سی ٹی وی فوٹیج کی مدد سے ایک ملزم کو گرفتار بھی کیا گیا تھا۔ تاہم، پولیس دیگر ملوث ملزمان کو گرفتار کرنے اور لوٹا گیا مال و زر برآمد کرنے میں مکمل طور پر ناکام رہی ہے۔

متاثرہ تاجر شیخ محمود احمدانصاف کے حصول کے لیے متعدد بار ڈی پی او کی کھلی کچہریوں میں بھی پیش ہو چکے ہیں، مگر انہیں تاحال کوئی خاص شنوائی یا داد رسی نہیں ملی۔

ڈکیتی کی رقم اور ملزمان کی گرفتاری میں ناکامی پر مقامی تاجر حلقوں نے گہری تشویش کا اظہار کیا ہے اور پولیس کی کارکردگی کو نااہلی قرار دیا ہے۔ تاجر برادری نے مطالبہ کیا ہے کہ آئی جی پنجاب ڈاکٹر عثمان انور، آر پی او فیصل آباد اور ڈی پی او ٹوبہ ٹیک سنگھ فوری طور پر اس واقعے کا نوٹس لیں، ڈکیتی کرنے والے تمام ملزمان کو گرفتار کروائیں، اور لوٹا گیا مال و زر جلد از جلد برآمد کروائیں۔

گوجرہ(باغی ٹی وی سٹی رپورٹراجمل خان) ڈپٹی کمشنر ٹوبہ ٹیک سنگھ نعیم احمد سندھو کی ہدایت پر ضلع کی تحصیلوں پیر محل اور کمالیہ کے سیلاب سے متاثرہ علاقوں میں امدادی کارروائیاں جاری ہیں۔ ڈپٹی ڈائریکٹر سوشل ویلفیئر رانا کاشف نثار اور اسسٹنٹ ڈائریکٹر محمد شبیر ملک نے اپنی ٹیموں کے ساتھ فلاحی اداروں کے تعاون سے سیلاب زدگان میں کھانا اور پانی تقسیم کیا۔

متاثرہ علاقوں میں سندھیلیاں والی، اڈا بھسی، موضع ڈھیڈھی والا، موضع درگاہ پور، مائی صفورا، موضع کوٹ کرم شاہ، موضع شاہ پور، تارا حویلی اور مل فتیانہ شامل ہیں۔ تقریباً 600 افراد میں منرل واٹر، دوپہر اور رات کا کھانا تقسیم کیا گیا۔

حکام کا کہنا ہے کہ مشکل کی اس گھڑی میں متاثرین کو تنہا نہیں چھوڑا جائے گا اور ان کی مدد کے لیے ہر ممکن اقدامات کیے جائیں گے۔

گوجرہ (باغی ٹی وی، عبد الرحمن جٹ)چک نمبر 178 گ ب کے رہائشی موٹر سائیکل سوار باپ بیٹا تیز رفتار ڈمپر کی زد میں آ کر جاں بحق ہو گئے، حادثے کے بعد علاقے میں کہرام مچ گیا اور فضاء سوگوار ہو گئی۔

تفصیلات کے مطابق 17 سالہ شہریار اپنے والد بابر کے ہمراہ موٹر سائیکل پر شہر سے گاؤں واپس جا رہے تھے کہ راستے میں چک نمبر 369 ج ب، سرجا چوک کے قریب ایک تیز رفتار ڈمپر سے ٹکرا گئے۔ حادثے کے نتیجے میں دونوں شدید زخمی ہو گئے۔ شہریار زخموں کی تاب نہ لاتے ہوئے موقع پر ہی دم توڑ گیا جبکہ بابر کو تحصیل ہیڈ کوارٹر ہسپتال گوجرہ منتقل کیا گیا، جہاں سے حالت تشویشناک ہونے پر انہیں الائیڈ اسپتال فیصل آباد ریفر کیا گیا، لیکن وہ راستے میں ہی دم توڑ گئے۔

حادثے کے بعد ڈمپر ڈرائیور موقع سے فرار ہو گیا۔ پولیس تھانہ صدر گوجرہ نے لاشیں قبضے میں لے کر ضابطے کی کارروائی مکمل کرنے کے بعد ورثاء کے حوالے کر دیں، اور ڈرائیور کی تلاش شروع کر دی گئی ہے۔

نعشیں گاؤں پہنچنے پر ہر آنکھ اشکبار ہو گئی، اور باپ بیٹے کی اچانک موت سے گاؤں کی فضا رنج و الم میں ڈوب گئی۔ اہل علاقہ نے متعلقہ حکام سے مطالبہ کیا ہے کہ حادثے کے ذمہ دار ڈرائیور کو فوری گرفتار کر کے انصاف فراہم کیا جائے۔

گوجرہ (باغی ٹی وی،نامہ نگار عبد الرحمن جٹ)گوجرہ میں منشیات فروشی کے سنگین معاملے پر پولیس کی مبینہ سرپرستی کا انکشاف سامنے آ گیا ہے، جس کے بعد سوشل میڈیا پر شدید ردعمل اور عوامی غصے کی لہر دوڑ گئی۔ معاملہ اس وقت مزید سنگین ہو گیا جب پولیس اور منشیات فروشوں کے گٹھ جوڑ کی ایک مبینہ آڈیو کلپ وائرل ہو گئی۔

انجمن تاجران گوجرہ کے سیکرٹری جنرل شیخ امجد ضیاء نے اس حوالے سے سخت ردعمل کا اظہار کرتے ہوئے اپنے بیان میں کہا ہے کہ انجمن تاجران متعدد بار پولیس حکام سے اپیل کر چکی ہے کہ گوجرہ کو منشیات فروشی سے پاک کیا جائے، مگر بدقسمتی سے پولیس کی خاموشی اس بات کی غمازی کرتی ہے کہ منشیات فروشی کے اس مکروہ دھندے میں متعلقہ اہلکاروں کی ملی بھگت بھی شامل ہے۔

شیخ امجد ضیاء نے آئی جی پنجاب ڈاکٹر عثمان انور سے مطالبہ کیا ہے کہ وہ گوجرہ میں مبینہ طور پر پولیس کی سرپرستی میں جاری منشیات فروشی کی غیر جانبدار تحقیقات کروائیں، اور اس جرم میں ملوث تمام کرداروں کو قانون کے کٹہرے میں لا کر نشانِ عبرت بنایا جائے۔ انہوں نے کہا کہ منشیات نے گوجرہ کی نوجوان نسل کو تباہی کے دہانے پر لا کھڑا کیا ہے، اور کئی ماؤں کے لختِ جگر نشے کے باعث اپنی جانیں گنوا چکے ہیں۔

گوجرہ، (نامہ نگار باغی ٹی وی عبد الرحمن جٹ)گوجرہ میں پنجاب پولیس کے نئے قائم شدہ کرائم کنٹرول ڈیپارٹمنٹ (CCD) کے ساتھ مبینہ مقابلے کے دوران دو ملزمان ہلاک ہوگئے جبکہ ان کا ایک ساتھی فرار ہونے میں کامیاب ہوگیا۔ ہلاک ہونے والے ملزمان کی شناخت علی حیدر سکنہ کمالیہ اور یاسین سکنہ ساہیوال کے نام سے ہوئی ہے، جو پولیس ریکارڈ یافتہ بتائے جاتے ہیں۔

تفصیلات کے مطابق، تھانہ صدر گوجرہ کے علاقہ 158 گ ب کے قریب سی سی ڈی پولیس نے ناکہ بندی کر رکھی تھی۔ اسی دوران موٹر سائیکل پر سوار تین افراد کو رکنے کا اشارہ کیا گیا تو انہوں نے موٹر سائیکل پھینک کر فصلوں میں چھپنے کی کوشش کی اور مبینہ طور پر پولیس پارٹی پر فائرنگ شروع کر دی۔ پولیس نے بھی اپنی حفاظت میں جوابی فائرنگ کی۔ فائرنگ رکنے کے بعد سرچ آپریشن کیا گیا تو دو افراد شدید زخمی حالت میں پائے گئے، جو بظاہر اپنے ہی ساتھی کی فائرنگ سے زخمی ہوئے تھے۔ ان کا تیسرا ساتھی اندھیرے کا فائدہ اٹھاتے ہوئے موقع سے فرار ہونے میں کامیاب ہو گیا۔

شدید زخمیوں کو تحصیل ہیڈ کوارٹرز ہسپتال گوجرہ منتقل کیا جا رہا تھا کہ وہ زخموں کی تاب نہ لاتے ہوئے دم توڑ گئے۔ پولیس نے موقع سے آتشیں اسلحہ اور ایک چوری شدہ موٹر سائیکل قبضے میں لے لی ہے۔ سی سی ڈی پولیس فرار ہونے والے تیسرے ملزم کی تلاش کر رہی ہے اور مزید قانونی کارروائی جاری ہے۔

گوجرہ (باغی ٹی وی ،نامہ نگار عبد الرحمن جٹ) ٹوبہ ٹیک سنگھ کے نواحی علاقے میں لرزہ خیز واقعہ، جہاں دیور نے مبینہ طور پر اپنی بھابی کو زیادتی کا نشانہ بنانے کے بعد چھریوں کے وار کر کے قتل کر دیا۔ پولیس نے فوری کارروائی کرتے ہوئے ملزم کو گرفتار کر کے آلہ قتل برآمد کر لیا، جبکہ مقتولہ کی لاش پوسٹ مارٹم کے لیے ٹی ایچ کیو ہسپتال گوجرہ منتقل کر دی گئی ہے۔

تفصیلات کے مطابق، چک نمبر 250 گ ب کے رہائشی ابو سفیان، جو لاہور میں ملازمت کرتا ہے، کی اہلیہ سونیا بی بی کو اس کے دیور کاشف رحمان نے اپنے گاؤں چک نمبر 159 گ ب بلایا۔ پولیس ذرائع کے مطابق، وہاں کاشف نے مبینہ طور پر سونیا بی بی کو زیادتی کا نشانہ بنایا اور بعد ازاں چھری کے پے درپے وار کر کے قتل کر دیا۔ واقعہ کی اطلاع ملتے ہی تھانہ صدر گوجرہ کی پولیس موقع پر پہنچی، ملزم کو حراست میں لے کر آلہ قتل برآمد کر لیا اور نعش کو تحویل میں لے کر قانونی کارروائی کے لیے ہسپتال منتقل کر دیا۔

ابتدائی تفتیش میں ملزم نے پولیس کو بتایا کہ مقتولہ کے پاس اس کی نازیبا تصاویر موجود تھیں، جن کی بنیاد پر وہ اسے بلیک میل کر رہی تھی اور رقم کا مطالبہ کرتی تھی۔ پولیس نے اس دعوے کی تحقیقات شروع کر دی ہیں اور واقعے کے مختلف پہلوؤں کا جائزہ لے رہی ہے۔

تھانہ صدر گوجرہ کی پولیس نے واقعے کی مکمل تفتیش شروع کر دی ہے، جبکہ مقتولہ کے ورثاء کی جانب سے بھی قانونی چارہ جوئی متوقع ہے۔ واقعہ نے علاقے میں خوف و ہراس کی فضا قائم کر دی ہے اور شہریوں نے مطالبہ کیا ہے کہ مجرم کو سخت سزا دی جائے تاکہ ایسے سنگین جرائم کی روک تھام ہو سکے۔