Category: ٹوبہ ٹیک سنگھ

گوجرہ (باغی ٹی وی، نامہ نگار عبد الرحمن جٹ) تھانہ صدر گوجرہ کے نواحی گاؤں چک نمبر 90 ج ب میں معمولی تنازع جان لیوا ثابت ہوا، جہاں 35 سالہ نوجوان ڈاکٹر اعجاز علی کو اس کے سگے کزن محسن نے فائرنگ کر کے قتل کر دیا۔

تفصیلات کے مطابق ڈاکٹر اعجاز علی ولد احسان الحق قوم جٹ سکنہ چک نمبر 90 ج ب گوجرہ اپنے گھر کے باہر موجود تھا کہ اچانک اس کا کزن محسن ولد ریاض مسلح رپیٹر موٹر سائیکل پر آیا اور آتے ہی فائرنگ کر دی۔ فائر کے نتیجے میں تین چھرے ڈاکٹر اعجاز کے پیٹ کے بائیں جانب لگے جس سے وہ شدید زخمی ہو گیا۔ اہل خانہ نے زخمی کو اپنی مدد آپ کے تحت فوری طور پر الائیڈ ہسپتال منتقل کیا، جہاں وہ زخموں کی تاب نہ لاتے ہوئے دم توڑ گیا۔

ذرائع کے مطابق چند روز قبل دونوں فریقین کے درمیان جامن کے پتوں کو آگ لگانے کے معاملے پر تلخ کلامی اور گالم گلوچ ہوئی تھی، جس پر محسن نے رنجش رکھتے ہوئے ڈاکٹر اعجاز علی کو موت کے گھاٹ اتار دیا۔

مقامی پولیس نے موقع پر پہنچ کر شواہد اکٹھے کر لیے ہیں اور کارروائی جاری ہے جبکہ مقتول کی نعش ضروری قانونی کارروائی کے لیے گورنمنٹ آئی کام جنرل ہسپتال گوجرہ منتقل کر دی گئی ہے۔

گوجرہ (نامہ نگار عبدالرحمن جٹ)موٹروے ایم فور پر گوجرہ کے قریب ایک المناک حادثہ پیش آیا، جہاں گاڑیوں کے تصادم کے بعد آگ لگنے سے ایک ڈرائیور جھلس کر جاں بحق ہو گیا اور دس مسافر شدید زخمی ہو گئے۔ حادثے کے نتیجے میں دونوں گاڑیاں جل کر مکمل طور پر تباہ ہو گئیں۔

اطلاعات کے مطابق بس نمبر 4174 سی اے سی، جس کا ڈرائیور اصغر علی سکنہ خوشاب تھا اور وہ ڈیرہ غازی خان سے 41 مسافروں کو لے کر موٹروے ایم فور کے ذریعے راولپنڈی جا رہی تھی علاقہ نواں لاہور میں موٹروے ایم فور پر انٹرچینج چراغ آباد کے قریب ایک زرعی ادویات سے لدے ہوئے مزدا ڈالے سے ٹکرا گئی۔ تصادم کے نتیجے میں مزدا الٹ گیا اور فوری طور پر دونوں گاڑیوں میں آگ بھڑک اٹھی۔

آگ نے دیکھتے ہی دیکھتے دونوں گاڑیوں کو اپنی لپیٹ میں لے لیا، جس کے باعث بس کا ڈرائیور اصغر علی بری طرح جھلس گیا۔ وہ زخموں کی تاب نہ لاتے ہوئے موقع پر ہی جاں بحق ہو گیا۔ بس میں سوار دس مسافر جن میں ثناء فاطمہ، مغیث الرحمن، محمد اشفاق، تحریم بی بی، راشدہ بی بی، اطہر حسین، ابو بکر اور دیگر خواتین و حضرات شامل ہیں، شدید زخمی ہو گئے۔ زخمیوں کو فوری طور پر تحصیل ہیڈ کوارٹر ہسپتال گوجرہ منتقل کیا گیا جہاں انہیں طبی امداد فراہم کی جا رہی ہے۔ بس میں سوار دیگر مسافروں نے اپنی مدد آپ کے تحت گاڑی سے نکل کر اپنی جانیں بچائیں۔

حادثے کی اطلاع ملتے ہی ریسکیو 1122 کی فائر برگیڈ کی گاڑیاں فوری طور پر جائے حادثہ پر پہنچیں، تاہم اس وقت تک دونوں گاڑیاں جل کر خاکستر ہو چکی تھیں۔ مزدا ڈالے کا ڈرائیور موقع سے فرار ہونے میں کامیاب ہو گیا۔

حادثے کی اطلاع ملتے ہی ڈی ایس پی گوجرہ اشرف تبسم اور موٹروے پولیس کے دیگر افسران اور نواں لاہور پولیس کی نفری بھی جائے وقوعہ پر پہنچ گئی اور امدادی کارروائیوں میں مصروف ہے۔ پولیس حکام واقعے کی مزید تحقیقات کر رہے ہیں۔

گوجرہ (عبد الرحمن جٹ) زمین کے تنازعہ نے ایک اور جان لے لی، چک نمبر 281 ج ب کے رہائشی 35 سالہ راشد سلیم کو ٹوکے اور کسی تیز دھار آلے کے وار کر کے قتل کر دیا گیا۔ ملزمان واردات کے بعد موقع سے فرار ہونے میں کامیاب ہو گئے۔

اطلاعات کے مطابق راشد سلیم اپنے کھیتوں میں مکئی کی فصل کی دیکھ بھال کے لیے گیا تھا جہاں شہباز، بلال اور غفران وغیرہ نے اس پر حملہ کر دیا۔ ملزمان نے راشد سلیم پر ٹوکے اور کسی دوسرے ہتھیار سے پے در پے وار کیے جس کے نتیجے میں وہ موقع پر ہی دم توڑ گیا۔

واقعے کی اطلاع ملنے پر تھانہ صدر پولیس گوجرہ نے فوری کارروائی کرتے ہوئے مقتول کی نعش کو اپنی تحویل میں لے کر تحصیل ہیڈ کوارٹر (ٹی ایچ کیو) ہسپتال گوجرہ منتقل کیا۔ پوسٹ مارٹم کے بعد نعش ورثاء کے حوالے کر دی گئی ہے اور پولیس نے مفرور ملزمان کی تلاش شروع کر دی ہے۔

ذرائع کے مطابق ملزمان مقتول کے قریبی رشتہ دار بتائے جاتے ہیں جن کے درمیان زمین کا تنازعہ چل رہا تھا۔ آخری اطلاعات تک کسی بھی ملزم کی گرفتاری عمل میں نہیں آئی ہے تاہم پولیس کا کہنا ہے کہ وہ ملزمان کی گرفتاری کے لیے بھرپور کوششیں کر رہی ہے۔

گوجرہ (نامہ نگار عبد الرحمن جٹ)تھانہ صدر گوجرہ کی حدود میں افسوسناک واقعہ، نواحی گاؤں چک نمبر 351 ج ب میں گھریلو ناچاقی پر شوہر نے مبینہ طور پر اپنی بیوی کو گلا دبا کر قتل کر دیا۔

تفصیلات کے مطابق حق نواز نامی شخص نے گھریلو تنازع پر طیش میں آ کر اپنی 3 بچوں کی ماں نسرین بی بی کو گلا گھونٹ کر موت کے گھاٹ اتار دیا۔ واقعہ کی اطلاع ملتے ہی ڈی ایس پی گوجرہ محمد اشرف تبسم پولیس نفری کے ہمراہ موقع پر پہنچے۔

پولیس کے مطابق واردات کے بعد ملزم حق نواز موقع سے فرار ہو گیا، جس کی گرفتاری کے لیے چھاپے مارے جا رہے ہیں۔

پولیس نے مقتولہ کی لاش تحویل میں لے کر پوسٹ مارٹم کے لیے گورنمنٹ آئی کام جنرل ہسپتال گوجرہ منتقل کر دی جبکہ ابتدائی قانونی کارروائی شروع کر دی گئی ہے۔

گوجرہ ،باغی ٹی وی (نامہ نگارعبدالرحمن جٹ)کچہری کے باہر کتوں کا راج،وکیل زخمی، انتظامیہ بے بس!

گوجرہ کے اسسٹنٹ کمشنر کے دفتر کے باہر آوارہ کتوں کی موجودگی نے شہریوں کے لیے خطرہ پیدا کر دیا ہے۔ باغی ٹی وی کے نامہ نگار عبد الرحمن جٹ کے مطابق، یہ آوارہ کتے دفتر کے باہر موجود رہتے ہیں اور آنے جانے والے لوگوں پر حملہ آور ہوتے ہیں۔ حال ہی میں، ایک وکیل میاں شرجیل اشرف اس وقت آوارہ کتوں کا نشانہ بنے جب وہ اپنی موٹر سائیکل پر دفتر جا رہے تھے۔ کتوں کے حملے کی وجہ سے وہ خوفزدہ ہو کر اپنی موٹر سائیکل سے گر گئے، جس سے ان کے کندھے کی ہڈی ٹوٹ گئی اور انہیں دیگر چوٹیں بھی آئیں۔

شہریوں نے انتظامیہ اور میونسپل کمیٹی گوجرہ کی آوارہ کتوں کو تلف کرنے میں ناکامی پر تشویش کا اظہار کیا ہے۔ تھوڑے دن پہلے، گوجرہ میں ایک شخص کتے کے کاٹنے سے ہلاک ہو گیا تھا۔ شہریوں نے حکام سے مطالبہ کیا ہے کہ وہ فوری طور پر گوجرہ کچہری اور شہر کے پارکوں سے آوارہ کتوں کو تلف کریں تاکہ ایسے واقعات کو روکا جا سکے۔

گوجرہ ،باغی ٹی وی(نامہ نگار عبد الرحمن جٹ) بھیک مانگنے کے بہانے بچوں کو اغوا کرنے والی دو خواتین کو محلہ شاہ آباد کالونی میں رنگے ہاتھوں گرفتار کر لیا گیا۔ ملزمان نے نعمان نامی شخص کی چار سالہ بیٹی کو اس وقت اغوا کیا جب وہ گھر میں سو رہی تھی۔

تفصیلات کے مطابق ملزم خواتین جن کی شناخت گڑیا اور فیروزہ کے نام سے ہوئی ہے، بچی کو اغوا کر کے فرار ہو رہی تھیں کہ محلے والوں نے بروقت کارروائی کرتے ہوئے انہیں پکڑ لیا۔ اطلاع ملنے پر ایس ایچ او سٹی سرفراز احمد موقع پر پہنچے اور بچی کو بازیاب کروا کر ملزمان کو گرفتار کر لیا۔

پولیس نے ملزم خواتین کے خلاف مقدمہ درج کر کے مزید تفتیش شروع کر دی ہے۔