Category: ٹوبہ ٹیک سنگھ

گوجرہ ،باغی ٹی وی(نامہ نگار عبد الرحمن جٹ) بھیک مانگنے کے بہانے بچوں کو اغوا کرنے والی دو خواتین کو محلہ شاہ آباد کالونی میں رنگے ہاتھوں گرفتار کر لیا گیا۔ ملزمان نے نعمان نامی شخص کی چار سالہ بیٹی کو اس وقت اغوا کیا جب وہ گھر میں سو رہی تھی۔

تفصیلات کے مطابق ملزم خواتین جن کی شناخت گڑیا اور فیروزہ کے نام سے ہوئی ہے، بچی کو اغوا کر کے فرار ہو رہی تھیں کہ محلے والوں نے بروقت کارروائی کرتے ہوئے انہیں پکڑ لیا۔ اطلاع ملنے پر ایس ایچ او سٹی سرفراز احمد موقع پر پہنچے اور بچی کو بازیاب کروا کر ملزمان کو گرفتار کر لیا۔

پولیس نے ملزم خواتین کے خلاف مقدمہ درج کر کے مزید تفتیش شروع کر دی ہے۔

گوجرہ (باغی ٹی وی نامہ نگار عبد الرحمن جٹ) تھانہ صدر گوجرہ کے نواحی گاؤں چک نمبر 98 ج ب کے قریب نہر سے ایک نامعلوم شخص کی لاش برآمد ہوئی ہے۔ پولیس کو اطلاع چک نمبر 99 ج ب کے رہائشی کامران رسول نے دی، جس نے بتایا کہ سیر کے دوران اس نے نہر کے موگے میں ایک لاش پھنسی ہوئی دیکھی۔

کامران رسول کے مطابق لاش کی حالت سے شبہ ہوتا ہے کہ اسے قتل کرکے نہر میں پھینکا گیا ہے۔ اطلاع ملتے ہی مقامی پولیس نے کارروائی شروع کردی ہے۔ ریسکیو 1122 کے ذریعے لاش کو گورنمنٹ آئی کام جنرل ہسپتال گوجرہ منتقل کردیا گیا ہے۔ پولیس مقتول کی شناخت اور ورثاء کی تلاش میں مصروف ہے۔

گوجرہ(نامہ نگارعبدالرحمن جٹ ) موٹروے ایم فور پر انٹرچینج کے قریب ایک المناک حادثے میں دو افراد موقع پر ہی جاں بحق جبکہ چار شدید زخمی ہو گئے۔ یہ افسوسناک واقعہ اس وقت پیش آیا جب چھ افراد پر مشتمل ایک اے پی وی وین، جس کا نمبر LEF 8831 تھا، ملتان سے فیصل آباد کی طرف جا رہی تھی۔

تفصیلات کے مطابق، گوجرہ موٹروے انٹرچینج کے قریب پہنچتے ہی گاڑی کا ٹائر اچانک پھٹ گیا، جس کے نتیجے میں گاڑی الٹ گئی۔ اس حادثے میں دو افراد موقع پر ہی جان کی بازی ہار گئے، جبکہ چار دیگر شدید زخمی ہوئے۔

جاں بحق ہونے والے افراد کی شناخت تاحال نہیں ہو سکی ہے۔ تاہم، زخمیوں کی شناخت رحمان (عمر 28 سال، چک 80 ج ب، فیصل آباد)، ذوالفقار علی (عمر 64 سال، فیصل آباد)، ثمر عباس (چک 337 ج ب)، اور شعیب حمید (نڑ والا بنگلہ) کے ناموں سے ہوئی ہے۔

ریسکیو 1122 کی فوری کارروائی کے نتیجے میں زخمیوں کو گورنمنٹ آئی کام جنرل ہسپتال گوجرہ منتقل کر دیا گیا ہے۔ مقامی پولیس اس واقعے کی تحقیقات میں مصروف ہے۔

گوجرانوالہ(نامہ نگارمحمدرمضان نوشاہی) انسانی سمگلنگ اور ویزا فراڈ میں ملوث 4 ملزمان گرفتار

تفصیلات کے مطابق گوجرانوالہ میں فیڈرل انویسٹی گیشن ایجنسی (ایف آئی اے) کی کارروائیوں میں انسانی سمگلنگ اور ویزا فراڈ میں ملوث 4 ملزمان گرفتار کر لیے گئے۔

ترجمان ایف آئی اے کے مطابق، گوجرانوالہ اور سمبڑیال میں چھاپوں کے دوران سرفراز احمد عرف صفدر، عبد الرحمان، آصف حسین اور محمد افتخار کو حراست میں لیا گیا۔ ملزمان نے شہریوں سے مجموعی طور پر ایک کروڑ 40 لاکھ 43 ہزار روپے بٹورے۔

حکام کے مطابق، سرفراز اور عبد الرحمان شہریوں کو سمندر کے راستے یورپ بھجوانے میں ملوث تھے اور اس مقصد کے لیے 90 لاکھ روپے وصول کیے۔ ملزمان نے شہریوں کو کشتی کے ذریعے لیبیا کے راستے اٹلی بھجوانے کی کوشش کی، تاہم شہریوں نے انکار کر دیا اور واپس آگئے۔

گرفتار ملزم محمد افتخار سال 2016 سے اشتہاری تھا، جس نے دبئی، امریکا اور کینیڈا میں ملازمت کا جھانسہ دے کر 43 لاکھ 69 ہزار روپے ہتھیائے۔ اسی طرح، آصف حسین نے شہری کو دبئی بھیجنے کے لیے 7 لاکھ روپے وصول کیے۔

ایف آئی اے حکام کے مطابق، ملزمان شہریوں کو بیرون ملک بھجوانے میں ناکام رہے اور روپوش ہو گئے تھے۔ مزید ملزمان کی گرفتاری کے لیے چھاپے جاری ہیں۔

گوجرہ ، باغی ٹی وی (عبدالرحمن جٹ) گوجرہ میں بھیک مانگ کر گزر بسر کرنے والے 60 سالہ شخص کی نعش ایک سکول سے برآمد ہوئی۔

تفصیلات کے مطابق تھانہ صدر پولیس گوجرہ کو اطلاع ملی تھی کہ پرائمری سکول چک نمبر 373 ج ب میں ایک نامعلوم شخص کی نعش پڑی ہے۔ پولیس نے موقع پر پہنچ کر نعش کو تحویل میں لیا اور ٹی ایچ کیو منتقل کیا۔ شناخت کے لیے علاقے میں اعلانات کروائے گئے جس کے بعد نعش کی شناخت محلہ سراج ٹاؤن گوجرہ کے انور ولد صادق حسین کے نام سے ہوئی۔

انور کے بھائی منور حسین کے مطابق ان کی عمر 60 سال تھی اور وہ کام نہ ہونے کی وجہ سے بھیک مانگ کر گزر بسر کرتے تھے۔ ان کی موت ہارٹ اٹیک سے ہوئی۔ پولیس نے ضروری کارروائی کے بعد نعش ورثاء کے حوالے کر دی۔

گوجرہ،باغی ٹی وی (نامہ نگارعبدالرحمن جٹ) نہر میں نہاتے ہوئے 11 سالہ بچہ ڈوب کر جاں بحق، کزن کی تلاش جاری

گوجرہ کی گلشن اقبال کالونی کے رہائشی عابد حسین کا 9 سالہ بھانجا امیر حمزہ جو کہ چک نمبر 320 ج ب سے مہمان آیا تھا، اپنے کزن ریحان عابد کے ساتھ چک نمبر 363 ج ب کے راجباہ میں نہانے گیا۔ ناخوشگوار واقعہ کبوترانوالہ قبرستان کے قریب راجباہ (چھوٹی نہر) میں پیش آیا جہاں نہاتے ہوئے ریحان عابد اچانک گہرے پانی میں چلا گیا اور ڈوب گیا، جبکہ امیر حمزہ بھی پانی کی لہروں کی نذر ہو گیا۔

واقعے کی اطلاع ملتے ہی ریسکیو 1122 کی ٹیم موقع پر پہنچی اور امدادی کارروائیاں شروع کر دیں۔ ریحان عابد کی نعش برآمد کر کے تحصیل ہیڈکوارٹر اسپتال منتقل کی گئی، جہاں ضروری قانونی کارروائی کے بعد تھانہ سٹی پولیس نے لاش ورثاء کے حوالے کر دی۔

دوسری جانب، ریسکیو ٹیم امیر حمزہ کی تلاش میں مصروف ہے۔ بچے کی نعش گھر پہنچنے پر کہرام مچ گیا، جبکہ اہل خانہ پر غشی کے دورے پڑنے لگے۔ پولیس نے قانونی کارروائی شروع کر دی ہے۔

گوجرہ،باغی ٹی وی(نامہ نگارعبدالرحمٰن جٹ) گوجرہ میں معمولی تنازعہ پر مسلح ملزمان نے فائرنگ کر کے ایک نوجوان کو قتل جبکہ دوسرے کو شدید زخمی کر دیا۔ ملزمان اسلحہ لہراتے ہوئے فرار ہو گئے، پولیس نے مقدمہ درج کر کے کارروائی شروع کر دی۔

تفصیلات کے مطابق سمندری روڈ پر واقع محمد حنیف کے پٹرول پمپ پر اس کا بیٹا مدثر موجود تھا، جو قریبی ہوٹل پر کھانے کا آرڈر دینے گیا۔ اسی دوران محلہ حسنیہ کالونی کے فیصل، نبیل اور ان کے ساتھی مسلح ہو کر موٹر سائیکلوں پر آئے اور مدثر پر اندھا دھند فائرنگ کر دی۔

ہوٹل مالک نصیر احمد کا بیٹا عبداللہ جب بچانے آیا تو ملزمان نے اسے بھی گولیوں کا نشانہ بنا دیا، جس سے دونوں شدید زخمی ہو گئے۔ ملزمان موقع سے فرار ہوگئے۔

زخمیوں کو تحصیل ہیڈکوارٹر اسپتال منتقل کیا گیا، جہاں مدثر زخموں کی تاب نہ لاتے ہوئے دم توڑ گیا، جبکہ عبداللہ کی حالت تشویشناک ہونے پر اسے الائیڈ اسپتال فیصل آباد ریفر کر دیا گیا۔

ذرائع کے مطابق واقعہ کی وجہ ایک دن پہلے پٹرول پمپ کے سروس اسٹیشن پر گاڑی دھلوانے کے دوران ہونے والا جھگڑا بتایا جا رہا ہے، جس میں فیصل، نبیل اور ذوالفقار کا مدثر سے تلخ کلامی ہوئی تھی۔

پولیس نے مقدمہ درج کر کے ملزمان کی گرفتاری کے لیے چھاپے مارنا شروع کر دیے ہیں، تاہم تاحال کوئی گرفتاری عمل میں نہیں آ سکی۔ ورثاء نے ملزمان کی فوری گرفتاری کا مطالبہ کیا ہے۔

گوجرہ،باغی ٹی وی(نامہ نگار عبد الرحمن جٹ) تھانہ سٹی گوجرہ کی حدود میں مبینہ پولیس مقابلے کے دوران 2 خطرناک ڈاکو اپنے ہی ساتھیوں کی فائرنگ سے ہلاک ہوگئے، جبکہ ایک ملزم فرار ہونے میں کامیاب ہوگیا۔ پولیس نے فرار ہونے والے ملزم کی تلاش کے لیے سرچ آپریشن شروع کر دیا ہے۔

ابتدائی اطلاعات کے مطابق تھانہ سٹی گوجرہ کے علاقے چک نمبر 278-RB کے رہائشی عبدالشکور وغیرہ نے 15 پر اطلاع دی کہ تین مسلح ملزمان نے 99JB روڈ کے قریب ناکہ لگا کر شہریوں سے نقدی اور دیگر قیمتی اشیاء لوٹ لی ہیں۔ واردات کی اطلاع ملتے ہی ایس ایچ او تھانہ سٹی گوجرہ انسپکٹر سرفراز احمد معہ پولیس نفری جائے وقوعہ پر پہنچے اور ملزمان کا تعاقب شروع کر دیا۔

پینسرہ روڈ پر ڈاکٹر عطا حمید ہسپتال کے قریب پولیس نے ملزمان کو روکنے کی کوشش کی، جس پر تینوں ملزمان نے پولیس پر فائرنگ شروع کر دی۔ فائرنگ کے نتیجے میں علی رضا نامی ایک راہگیر زخمی ہوگیا۔ پولیس نے بھی جوابی فائرنگ کی اور مزید نفری طلب کر لی۔

مقابلے کے دوران ڈاکو اپنے ساتھیوں کی گولیوں کا نشانہ بن گئےایس ایچ او تھانہ صدر گوجرہ اور تھانہ نواں لاہور کی نفری بھی موقع پر پہنچ گئی اور ملزمان کے خلاف محاصرہ سخت کر دیا گیا۔ کچھ دیر تک فائرنگ کا تبادلہ جاری رہا، تاہم اچانک ملزمان کی جانب سے فائرنگ بند ہوگئی۔ جب پولیس نے سرچ لائٹ کی مدد سے جائزہ لیا تو معلوم ہوا کہ دو ڈاکو اپنے ہی ساتھیوں کی گولیوں کا نشانہ بن کر ہلاک ہو چکے ہیں جبکہ ایک ملزم اندھیرے کا فائدہ اٹھاتے ہوئے فرار ہونے میں کامیاب ہوگیا۔

پولیس نے موقع پر پہنچ کر ہلاک ہونے والے ملزمان کی شناخت کر لی، جن کے نام درج ذیل ہیں:
سلمان ولد مختار، رہائشی چک نمبر 241-RB فیصل آباد،شاہد ولد اکبر، رہائشی چک نمبر 73-JB فیصل آباد

پولیس کے مطابق ہلاک ہونے والے ملزمان ریکارڈ یافتہ خطرناک ڈاکو تھے اور مختلف سنگین وارداتوں میں مطلوب تھے۔ہلاک ہونے والے ملزمان کی لاشوں کو ٹی ایچ کیو ہسپتال گوجرہ منتقل کر دیا گیا، جہاں ضروری قانونی کارروائی عمل میں لائی جائے گی۔

پولیس کی کامیاب کارروائی پر شہریوں کی بڑی تعداد موقع پر جمع ہو گئی اور پولیس کی بہادری کو سراہا۔ ڈی ایس پی گوجرہ اختر علی اور ایس ایچ او تھانہ سٹی گوجرہ موقع پر موجود رہے اور مزید تفتیش کے عمل کو یقینی بنایا۔ پولیس کا کہنا ہے کہ فرار ہونے والے ملزم کی گرفتاری کے لیے کارروائی جاری ہے۔