گوجرہ(نامہ نگار باغی ٹی وی عبد الرحمن جٹ) واردات کی نیت سے چھپے ساتھیوں کی فائرنگ سے مبینہ ڈاکو شدید زخمی، زخمی کو ٹی ایچ کیو منتقل کر دیا گیا۔
معلوم ہوا ہے کہ ٹینکی گراؤنڈ واٹر ورکس بازار گوجرہ میں تین نامعلوم آتشیں اسلحہ سے مسلح افراد واردات کی نیت سے چھپے بیٹھے ہوئے تھے۔ اس دوران دستگیر کالونی کا رہائشی شیر ولی خان بطور چوکیدار معمول کے مطابق دکانوں کے تالوں اور چھتوں کی چیکنگ کر رہا تھا جسے دیکھتے ہی ملزمان نے اس پر فائرنگ کر دی جس میں وہ معجزانہ طور پر محفوظ رہا۔
ملزمان فائرنگ کرتے ہوئے فرار ہو گئے۔ فائرنگ کی آواز سن کر دیگر چوکیدار بھی موقع پر آ گئے اور ٹارچوں کی روشنی میں سرچنگ کی گئی تو موقع پر ایک نامعلوم مبینہ ڈاکو ساتھیوں کی فائرنگ سے زخمی حالت میں پایا گیا جس کی اطلاع ملتے ہی تھانہ سٹی پولیس گوجرہ موقع پر پہنچ گئی اور زخمی کو تحصیل ہیڈ کوارٹر ہسپتال گوجرہ منتقل کر دیا گیا۔ پولیس نے چوکیدار شیر ولی خان کی مدعیت میں مقدمہ درج کر لیا ہے۔
زخمی حالت میں ملنے والے کا نام اعجاز سکنہ چوک منڈا بتایا جاتا ہے۔ پولیس نے فرار ہونے والے ملزمان کی تلاش شروع کر دی ہے۔
