گوجرہ،باغی ٹی وی (نامہ نگارعبدالرحمن جٹ) تھانہ سٹی گوجرہ کی حدود میں فائرنگ کے واقعے میں جرمنی پلٹ منظور احمد اور اس کا بھتیجا سہیل اختر شدید زخمی ہو گئے۔
ابتدائی معلومات کے مطابق منظور احمد ولد اللہ رکھا اور اس کا بھتیجا سہیل اختر ولد مقبول احمد گوجرہ شہر سے اپنے گاؤں 300 ج ب موٹر سائیکل پر واپس جا رہے تھے۔ چک 297 ج ب لنک روڈ پر ایک نامعلوم ملزم نے، جو 125 موٹر سائیکل پر سوار تھا، ان پر 30 بور پستول سے فائرنگ کر دی۔
فائرنگ کے نتیجے میں منظور احمد کی کمر اور پیٹ میں گولیاں لگیں جبکہ سہیل اختر کی کمر زخمی ہوئی۔ زخمیوں کو فوری طور پر سول اسپتال گوجرہ منتقل کیا گیا، جہاں منظور کی تشویشناک حالت کے پیش نظر اسے الائیڈ اسپتال فیصل آباد ریفر کر دیا گیا۔
منظور احمد حال ہی میں جرمنی سے چھٹی پر آیا تھا، اور آج اس کی واپسی کی فلائٹ تھی۔ ملزم موقع سے فرار ہو گیا، اور مقامی پولیس نے تحقیقات شروع کر دی ہیں۔
