Category: ٹوبہ ٹیک سنگھ

گوجرہ (نامہ نگار باغی ٹی وی عبد الرحمن جٹ) ماسٹر ہاکی ورلڈ کپ 2024ء، الائنس انٹرنیشنل ٹیم کا شاندار کھیل، سلور میڈل حاصل

نیوزی لینڈ کے شہر آکلینڈ میں منعقدہ ماسٹر ہاکی ورلڈ کپ 2024ء کے فائنل میں آسٹریلیا نے الائنس انٹرنیشنل ہاکی ٹیم (مین 45 آئی ایم سی) کو شکست دے کر گولڈ میڈل اپنے نام کر لیا، جبکہ الائنس انٹرنیشنل ٹیم نے سلور میڈل جیت کر نمایاں کارکردگی کا مظاہرہ کیا۔

الائنس انٹرنیشنل ٹیم کے کپتان رانا محمد نواز اور دیگر کھلاڑیوں نے اپنی بہترین صلاحیتوں کا مظاہرہ کیا، جبکہ ٹیم کی کوچنگ عالمی شہرت یافتہ سابق کپتان شہباز احمد کے ذمہ تھی۔

رانا محمد نواز نے خصوصی گفتگو میں کہا کہ ماسٹر ہاکی ورلڈ کپ کے دوران ٹیم نے بھرپور محنت اور لگن کا مظاہرہ کیا۔ انہوں نے کہا:
"یہ ہمارے لیے بڑے اعزاز کی بات ہے کہ ہم فائنل میں پہنچے اور سلور میڈل حاصل کیا۔ کھیل میں ہار جیت ہوتی ہے، لیکن ہماری کارکردگی تسلی بخش رہی اور ہم دوسری پوزیشن پر فخر محسوس کرتے ہیں۔”

الائنس انٹرنیشنل ٹیم کی اس کارکردگی نے نہ صرف ہاکی کے کھیل میں پاکستان کا نام روشن کیا بلکہ ثابت کیا کہ ہاکی کا جذبہ آج بھی زندہ ہے۔

گوجرہ (باغی ٹی وی، نامہ نگار عبد الرحمن جٹ) اسسٹنٹ کمشنر گوجرہ رانا کامران اشرف نے کہا ہے کہ وزیر اعلیٰ پنجاب کے پروگرام "کھیلتا پنجاب” میں گوجرہ کے نوجوان کھلاڑیوں کی شرکت خوش آئند ہے۔ انہوں نے کہا کہ گوجرہ نے ہاکی کے میدان میں نمایاں خدمات سرانجام دی ہیں اور صحت مند معاشرے کے قیام کے لیے نوجوانوں کو کھیلوں کے مواقع فراہم کرنا وقت کی اہم ضرورت ہے۔

یہ بات انہوں نے انٹرنیشنل ہاکی اسٹیڈیم میں منعقدہ ایک تقریب سے خطاب کرتے ہوئے کہی، جہاں "کھیلتا پنجاب” میں نمایاں کارکردگی دکھانے والے کھلاڑیوں میں انعامات تقسیم کیے گئے۔ اس موقع پر اسسٹنٹ کمشنر نے گوجرہ کے کھلاڑیوں کی کامیابیوں کو سراہتے ہوئے کہا کہ یہ شہر ہمیشہ کھیلوں کے میدان میں اپنا لوہا منواتا رہا ہے۔

تقریب میں بتایا گیا کہ تحصیل گوجرہ سے ہاکی کھلاڑیوں نے "کھیلتا پنجاب” کے تحت ڈسٹرکٹ ٹوبہ ٹیک سنگھ اور ڈسٹرکٹ فیصل آباد دونوں میں فرسٹ پرائز حاصل کیا جبکہ وومین ہاکی ٹیم فیصل آباد ڈویژن سے رنر اپ رہی۔

تقریب میں انٹرنیشنل کھلاڑی خاور جاوید، محمود احمد اور محمد مالک ملک سمیت دیگر کھلاڑیوں اور شخصیات کی بڑی تعداد شریک ہوئی۔ اسسٹنٹ کمشنر نے نوجوان کھلاڑیوں کی حوصلہ افزائی کرتے ہوئے ان کی کامیابیوں کو گوجرہ کی روایت کا حصہ قرار دیا اور کہا کہ ایسے پروگرامز سے نوجوانوں کو اپنی صلاحیتیں دکھانے کا موقع ملتا ہے۔

گوجرہ (باغی ٹی وی عبد الرحمن جٹ) چیئرمین سینیٹ سید یوسف رضا گیلانی نے نواں لاہور کے نجی دورے کے دوران ممتاز سیاسی و سماجی شخصیت ملک شیر طارق کے ڈیرے پر پیپلز پارٹی کی مقامی قیادت سے ملاقات کی۔

ملاقات میں تحصیل صدر سرشار چیمہ اور جنرل سیکرٹری ظفر عالم چوہدری پر مشتمل وفد نے تنظیم سازی پر تفصیلی گفتگو کی۔ اس دوران پیپلز پارٹی قیادت نے این ایف سی کے ان ملازمین کی بحالی کا مطالبہ کیا، جنہیں مسلم لیگ (ن) کے دورِ حکومت میں ملازمت سے برطرف کیا گیا تھا۔

سید یوسف رضا گیلانی نے بتایا کہ قومی اسمبلی پہلے ہی ان ملازمین کی بحالی کے حق میں فیصلہ دے چکی ہے، تاہم اس پر عملدرآمد نہیں ہو سکا۔ انہوں نے یقین دہانی کرائی کہ پیپلز پارٹی اس معاملے کو دوبارہ قومی سطح پر اجاگر کرے گی اور ملازمین کی بحالی کے لیے بھرپور اقدامات کرے گی۔

گوجرہ (نامہ نگار ،عبدالرحمن جٹ کی رپورٹ) جنرل سیکرٹری انجمن تاجران شیخ امجد ضیا نے پولیس کی کارکردگی پر سخت تنقید کرتے ہوئے تھانہ سٹی گوجرہ کے ایس ایچ او کے فوری تبادلے کا مطالبہ کر دیا ہے۔

تفصیلات کے مطابق تھانہ سٹی گوجرہ کی حدود میں چوری اور ڈکیتی کی وارداتوں میں غیرمعمولی اضافہ دیکھنے میں آیا ہے۔ مونگی روڈ پر فارمیسی میں فائرنگ کے بعد ملزمان قتل کر کے فرار ہو گئے، جبکہ پولیس ملزمان کو ٹریس کرنے میں ناکام رہی۔

شیخ امجد ضیا نے میڈیا سے گفتگو کرتے ہوئے خبردار کیا کہ اگر جمعہ تک ملزمان کو گرفتار نہ کیا گیا تو مرکزی انجمن تاجران ہفتے کے روز پولیس کے خلاف احتجاج کرے گی۔ انہوں نے پولیس کی نااہلی کو شدید تنقید کا نشانہ بنایا اور کہا کہ شہریوں کی جان و مال غیر محفوظ ہو چکے ہیں، جبکہ پولیس خواب خرگوش کے مزے لے رہی ہے۔

اہلیان گوجرہ نے بھی اعلیٰ افسران سے فوری نوٹس لینے اور ایس ایچ او سٹی گوجرہ کے تبادلے کا مطالبہ کیا ہے۔ شہریوں نے پولیس کی موجودہ کارکردگی پر مایوسی کا اظہار کرتے ہوئے مطالبہ کیا کہ عوامی تحفظ یقینی بنایا جائے اور ملزمان کو جلد از جلد گرفتار کیا جائے۔

گوجرہ (نامہ نگار ، عبد الرحمٰن) صرافہ ایسوسی ایشن ٹوبہ ٹیک سنگھ کی تقریب حلف وفاداری مقامی ہوٹل میں منعقد ہوئی، جس میں گوجرہ کے رہنماؤں نے حاجی محمد اشرف محسن اور جنرل سیکرٹری رانا محمد طارق کی قیادت میں خصوصی شرکت کی۔

تقریب میں نومنتخب عہدیداروں نے اپنے عہدوں کا حلف لیا۔ حاجی محمد اشرف محسن نے خطاب کرتے ہوئے کہا کہ صرافہ برادری کو متحد ہو کر اپنے مسائل کے حل کے لیے جدوجہد کرنی چاہیے اور کاروبار کو درپیش مشکلات کے حل کے لیے مشترکہ حکمت عملی اپنانے کی ضرورت ہے۔

جنرل سیکرٹری رانا محمد طارق نے صرافہ برادری کے کردار کو سراہتے ہوئے کاروباری ماحول کو بہتر بنانے کے لیے تجاویز پیش کیں اور تنظیم کے اتحاد کو وقت کی ضرورت قرار دیا۔

تقریب میں ٹوبہ ٹیک سنگھ کی صرافہ برادری کے اہم رہنماؤں اور معززین نے بڑی تعداد میں شرکت کی۔ عہدیداروں نے عزم ظاہر کیا کہ وہ برادری کے حقوق کے تحفظ اور مسائل کے حل کے لیے ہر ممکن اقدامات کریں گے۔ تقریب کے اختتام پر مہمانوں کے لیے عشائیے کا اہتمام بھی کیا گیا۔