سیریز کے دوسرے ٹی 20 میں سفیان مقیم نے پاکستان کے لیے بہترین بائولنگ فگرز کا اعزاز اپنے نام کرلیا ۔
بلاوایو میں کھیلے جارہے میچ میں میزبان زمبابوے کے کپتان سکندر رضا نے ٹاس جیتا اور پہلے بیٹنگ کرنے کا فیصلہ کیا۔ زمبابوے کا یہ فیصلہ بظاہر غلط ثابت ہوا، پاکستانی بولرز کے سامنے زمبابوے کی بیٹنگ لائن ریت کی دیوار ثابت ہوئی اور پوری ٹیم 12.4 اوورز میں 57 رنز پر ڈھیر ہوگئی۔زمبابوے کے 9 بیٹرز ڈبل فیگرز میں داخل نہ ہوسکے۔ برائن بینٹ 21 اور مارومانی 16 رنز کے ساتھ نمایاں رہے۔ پاکستان کی جانب سے سفیان مقیم نے شاندار بولنگ کرتے ہوئے 3 رنز دے کر 5 کھلاڑیوں کو آؤٹ کیا۔یہ کسی بھی پاکستانی بائولر کے ٹی ٹونٹی کرکٹ میں بہترین اعدادو شمار ہیں، اس سے قبل سابق فاسٹ بائولر عمر گل نے ٹی ٹونٹی ورلڈ کپ 2009ء میں نیوزی لینڈ کیخلاف 6 رنز کے عوض 5 وکٹیں لیں اور اس کے بعد 2013ء میں جنوبی افریقہ کیخلاف بھی 6 رنز دیکر 5 کھلاڑی آئوٹ کیے تھے۔اس کے علاوہ عباس آفریدی نے 2، ابرار احمد ، حارث رؤف اور سلمان علی آغا نے ایک، ایک وکٹ لی۔ پاکستان ٹیم سلمان علی آغا کی قیادت میں میدان میں اتری ہے جبکہ زمبابوے کی قیادت سکندر رضا کررہے ہیں۔ یاد رہے کہ پہلے ٹی 20 میچ میں پاکستان نے زمبابوے کو شکست دی تھی جس سے قومی ٹیم کو تین میچوں پر مشتمل سیریز میں 1-0 کی برتری حاصل ہے۔پاکستانی ٹیم میں عمیر یوسف، صائم ایوب، عثمان خان (وکٹ کیپر)، سلمان آغا (کپتان)، طیب طاہر، عرفان خان، جہانداد خان، عباس آفریدی، حارث رؤف، ابرار احمد، سفیان مقیم شامل ہیں جب کہ زمبابوے کی ٹیم برائن بینیٹ، تادیواناشے مارومانی (وکٹ کیپر)، ڈیون مائرز، سکندر رضا (کپتان)، ریان برل، کلائیو مداندے، تشنگا میوزیکیوا، ویلنگٹن مساکڈزا، رچرڈ نگروا، بلیسنگ مزاربانی، ٹریور گوانڈو پر مشتمل ہے۔
