راولپنڈی:آرمی چیف جنرل قمر جاوید باجوہ نے آج ہیڈ کوارٹرز آرمی ایئر ڈیفنس کمانڈ کا دورہ کیا۔ترجمان پاک فوج (آئی ایس پی آر) کے مطابق آرمی چیف جنرل قمر جاوید باجوہ نے پاک آرمی ایئر ڈیفنس کے افسران اور جوانوں کی لازوال قربانیوں کو زبردست خراج تحسین پیش کیا۔
آئی ایس پی آر کا کہنا ہے کہ آرمی چیف نے افسران و جوانوں کی حاصل کردہ تربیتی معیار کو سراہا اور جنگ میں ایئر ڈیفنس کی اہمیت سمیت بدلتے خطرات کا احاطہ کیا۔
اس موقع پر آرمی چیف نے جدید ایئر ڈیفنس ویپن سسٹمز کی تربیت اور اپ گریڈیشن کی ضرورت پر زور دیا۔ترجمان پاک فوج کے مطابق قبل ازیں آمد پر آرمی ایئر ڈیفنس کمانڈ کے کمانڈر لیفٹیننٹ جنرل محمد ظفر اقبال نے آرمی چیف کا استقبال کیا۔
آئی ایس پی آر کا کہنا تھا کہ پاکستان میں عمان کے سفیر ڈاکٹر الشیخ محمد عمر احمد المرحون کی جی ایچ کیو آمد ہوئی اور انہوں نے آرمی چیف جنرل قمر جاوید باجوہ سے ملاقات کی۔
آئی ایس پی آر کے مطابق ملاقات میں باہمی دلچسپی کے امور، علاقائی سلامتی کی صورت حال اور مختلف شعبوں میں شراکت داری پر تبادلہ خیال کیا گیا۔
آرمی چیف جنرل قمر جاوید باجوہ کا کہنا تھا کہ پاکستان خلیجی ممالک کے ساتھ اپنے برادرانہ تعلقات کو قدر کی نگاہ سے دیکھتا ہے، پاکستان اومان کے تعلقات قریبی، گرم جوشی، دوستانہ اور گہرے ہیں۔
آرمی چیف نے کہا کہ دونوں ممالک کے درمیان دفاع اور میری ٹائم سیکیورٹی میں تعاون کی بڑی صلاحیت ہے، ہماری اسٹریٹیجک پارٹنرشپ میں ایک لازمی عنصر بن سکتی ہے۔
ترجما پاک فوج کا مزید کہنا تھا کہ عمان کے سفیر نے پاکستان میں سیلاب سے ہونے والی تباہی پر دکھ کا اظہار کیا اور متاثرین کے اہل خانہ سے دلی تعزیت کی۔
عمان کے سفیر نے علاقائی استحکام کے لیے پاکستان کی کوششوں کو بھی سراہا جب کہ عمان کے سفیر نے پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا۔
