خاتونِ اول آصفہ بھٹو زرداری نے راولپنڈی میں حنا جاوید کے مبینہ قتل پر اظہارافسوس کیا ہے۔
فیس بک پر پوسٹ کرتے ہوئے آصفہ بھٹو زرداری نے سوگوار خاندان سے تعزیت اورہمدردی کااظہار کیا،انہوں نے حنا جاوید کے مبینہ قتل پر اظہارتشویش کرتے ہوئے مطالبہ کیا کہ المناک واقعہ کی مکمل اور شفاف تحقیقات کی جائیں، ذمہ دار افراد کو کیفرِ کردار تک پہنچا کر مثال قائم کی جائے،خواتین کے تحفظ اور جرائم کی روک تھام کے لیے مؤثر اقدامات ناگزیرہیں۔
واضح رہے کہ راولپنڈی کے علاقے لال کرتی میں بیدردی سے قتل کی گئی حنا جاوید کے کیس میں پولیس نے ان کے شوہر اور گھریلو ملازم کو حراست میں لینے کا دعویٰ کیا ہے،45 سالہ حنا جاوید کی لاش جمعرات کی صبح لال کرتی کے اپارٹمنٹ کے باتھ روم سے اس حالت میں برآمد ہوئی تھی کہ “دونوں ہاتھ پیچھے کپڑے سے بندھے ہوئے، منہ پر کپڑا دیا ہوا، اور گردن میں لپٹی تار اوپر نہانے والے شاور سے بندھی ہوئی تھی،واقعہ کی ایف آئی آر حنا جاوید کے بھائی فہد جاوید کی مدعیت میں تھانہ سول لائن میں درج ہوئی جس میں مقتولہ کے شوہر، سسر، اور گھریلو ملازم کو نامزد کیا گیا۔
ایف آئی آر کے مطابق جب لاش برآمد ہوئی تو “اس کے منہ سے خون نکل رہا تھا اور نیچے باتھ روم کے فرش پر بھی خون موجود تھا۔” لاش جمعرات کی صبح تب ملی جب حنا کے بھائی کو ان کے سسر نے کال کر کے بلایا کہ ایمرجنسی ہے، جب وہ ان کے گھر پہنچے تو باتھ روم میں اپنی بہن کو مردہ حالت میں دیکھا، حنا جاوید کی شادی 9 ماہ قبل فیصل اصغر سے ہوئی تھی اور وہ “آئے روز مقتولہ حنا جاوید کونہ صرف تنگ کرتا تھا بلکہ سخت اذیتیں بھی دیتا تھا اور مار پیٹ کرتا تھا۔”
ایف آئی آر میں کہا گیا کہ حنا جاوید کے شوہر فیصل اصغر کی یہ دوسری شادی تھی جبکہ اس کی پہلی بیوی نے بھی مبینہ گھریلو تشدد اور اذیتوں کے باعث طلاق لے لی تھی،حنا جاوید کو ان کے شوہر، سسر اور گھریلو ملازم نے انتہائی بے دردی اور بہیمانہ تشدد اور اذیتیں دے کر قتل کیا ہےقتل سے قبل حنا جاوید کو کوئی زہریلی چیز کھلائے جانے کا بھی شبہ ظاہر کیا گیا ہے یہ بھی کہا گیا کہ ملزمان نے قتل کو خودکشی کا رنگ دینے کی کوشش کی۔
پولیس کے مطابق مقتولہ حنا جاوید کا پوسٹ مارٹم کرایا جا چکا ہے اور رپورٹ کا انتظار ہے جائے وقوع سے شواہد اکٹھے کر لیے گئے ہیں جبکہ واقعے کے تمام پہلوؤں سے تفتیش جاری ہےمتاثرہ خاندان نے مقتولہ کے سسر اصغر علی کی گرفتاری کا بھی مطالبہ کیا ہے خاندان کے مطابق اصغر علی مقدمے میں نامزد ہیں تاہم انہیں تاحال گرفتار نہیں کیا گیا۔
