ایئر کینیڈا کے ایک سابق کیپٹن پر الزام ہے کہ وہ تقریباً 17 سال تک بغیر درست لائسنس کے مسافروں کو لے کر سینکڑوں ملکی و بین الاقوامی پروازیں چلاتا رہا۔
سی این این کے مطابق کینیڈا کی پولیس نے اعلان کیا کہ ایئر کینیڈا کے ایک سابق پائلٹ کو جعلی پائلٹ کے لائسنس کے ساتھ تقریباً 17 سال تک ہزاروں مسافروں کو اڑانے کے جرم میں مجرمانہ الزامات کا سامنا ہے،59 سالہ پائلٹ جیوفری وال کو پولیس نے فراڈ اور جعلی دستاویزات استعمال کرنے سمیت متعدد الزامات کے تحت گرفتار کیا ہے حکام کے مطابق ملزم نے 2009 سے 2025 کے دوران 900 سے زائد پروازیں مبینہ طور پر جعلی یا غیر مکمل اسناد کی بنیاد پر چلائیں-
پیل ریجنل پولیس (اونٹاریو) کے مطابق تحقیقات میں یہ بات سامنے آئی ہے کہ ملزم کے پاس کمرشل پائلٹ لائسنس موجود تھا، تاہم وہ “ایئرلائن ٹرانسپورٹ پائلٹ لائسنس” حاصل نہیں کر سکا تھا، جو کسی بھی بڑے کمرشل طیارے کے کپتان کے لیے لازمی اعلیٰ ترین سرٹیفکیشن ہوتا ہے۔
پولیس نے کہا ہے کہ ابتدائی شواہد سے ظاہر ہوتا ہے کہ پائلٹ نے ایئر کینیڈا اور سول ایوی ایشن حکام کو اپنی اہلیت کے بارے میں گمراہ رکھا، جس کے ذریعے وہ برسوں تک پروازیں اڑاتا رہا ملزم پر ایک فردِ جرم فراڈ، دو جعلی دستاویزات استعمال کرنے، تین جعلی ٹریڈ مارک رکھنے اور ایک عوامی بدانتظامی (public mischief) کا الزام عائد کیا گیا ہے۔
ایئر کینیڈا نے اس معاملے پر ردعمل دیتے ہوئے کہا ہے کہ اس معاملے کو انتہائی سنجیدگی سے دیکھا جا رہا ہے، تاہم ان کے مطابق مسافروں کی حفاظت متاثر نہیں ہوئی کیونکہ تمام پائلٹس ہر چھ ماہ بعد لازمی ٹریننگ اور سالانہ فلائٹ چیک سے گزرتے ہیں، داخلی آڈٹ کے بعد کسی اور پائلٹ میں ایسی خلاف ورزی سامنے نہیں آئی، جبکہ معاملہ سامنے آنے کے فوری بعد متعلقہ شخص کو ڈیوٹی سے ہٹا کر ٹرانسپورٹ کینیڈا کو رپورٹ کر دیا گیا تھا۔
