Tag: ادب

تو جتنا بھی انہیں اپنا سمجھ لے
سیاسی ہستیاں تیری نہ میری

معروف شاعرہ امیتا پرسورام کا قلمی نام امیتا پرسو رام میتا ہے امیتا 15دسمبر 1955ء میں پیدا ہوئیں-

غزل
۔۔۔۔۔
شدت شوق سے افسانے تو ہو جاتے ہیں
پھر نہ جانے وہی عاشق کہاں کھو جاتے ہیں
مجھ سے ارشاد یہ ہوتا ہے کہ سمجھوں ان کو
اور پھر بھیڑ میں دنیا کی وہ کھو جاتے ہیں
درد جب ضبط کی ہر حد سے گزر جاتا ہے
خواب تنہائی کے آغوش میں سو جاتے ہیں
بس یوں ہی کہتے ہیں وہ میرے ہیں میرے ہوں گے
اور اک پل میں کسی اور کے ہو جاتے ہیں
ہم تو پابند وفا پہلے بھی تھے آج بھی ہیں
آپ ہی فاصلے لے آئے تو لو جاتے ہیں
کوئی تدبیر نہ تقدیر سے لینا دینا
بس یوں ہی فیصلے جو ہونے ہیں ہو جاتے ہیں
کچھ تو احساس محبت سے ہوئیں نم آنکھیں
کچھ تری یاد کے بادل بھی بھگو جاتے ہیں

غزل
۔۔۔۔۔
بن گئے دل کے فسانے کیا کیا
کھل گئے راز نہ جانے کیا کیا
کون تھا میرے علاوہ اس کا
اس نے ڈھونڈے تھے ٹھکانے کیا کیا
رحمت عشق نے بخشے مجھ کو
اس کی یادوں کے خزانے کیا کیا
آج رہ رہ کے مجھے یاد آئے
اس کے انداز پرانے کیا کیا
رقص کرتی ہوئی یادیں ان کی
اور دل گائے ترانے کیا کیا
تیرا انداز نرالا سب سے
تیر تو ایک نشانے کیا کیا
آرزو میری وہی ہے لیکن
اس کو آتے ہیں بہانے کیا کیا
راز دل لاکھ چھپایا لیکن
کہہ دیا اس کی ادا نے کیا کیا
دل نے تو دل ہی کی مانی میتاؔ
عقل دیتی رہی طعنے کیا کیا

غزل
۔۔۔۔۔
محبت مہرباں تیری نہ میری
مکمل داستاں تیری نہ میری
گنوا دی عمر جس کو جیتنے میں
وہ دنیا میری جاں تیری نہ میری
خدا جانے ہے کس کا درد کتنا
یہ سانجھی سسکیاں تیری نہ میری
ہیں نا انصافیاں ہر سمت لیکن
کھلی اب تک زباں تیری نہ میری
بچا ہے اور نہ کوئی بچ سکے گا
غموں کی آندھیاں تیری نہ میری
تو جتنا بھی انہیں اپنا سمجھ لے
سیاسی ہستیاں تیری نہ میری
صحافت کو خریدا اہل زر نے
رہی اب سرخیاں تیری نہ میری
اداکاری ریا کاری دکھاوا
حقیقت کی زباں تیری نہ میری

احمد شاملو جدید فارسی شاعری کا منفرد نام ،ان کا قلمی نام ”بامدار“ تھا۔ 12 دسمبر 1925 میں تہران میں پیدا ہوئے۔ ان کے والد کی پیدائش کابل / افغانستان میں ہوئی تھی۔ شاملو کا تعلق فوجی خاندان سے ہے۔ شاملو شاعر ہونے کے علاوہ قاموس دان، صحافی اور سیاسی کارکن بھی تھے۔ وہ کچھ عرصے نیو جرسی / امریکا میں بھی مقیم رہے۔

وہ ایک عرصے تک پروفیسر اور مدیر بھی رہے۔ ان کی نظموں کے تراجم لٹریری رویو اور لٹریچر ایسٹ اینڈ ویسٹ میں چھپ چکے ہیں۔ ان کی بارہ/12 کتابیں شائع ہو چکی ہیں۔ ان کی اہم کتابوں میں ،”آہنگ ھائی فراموش شدہ“، ”زن پشت در مقری“، ”ھوائی تازہ“ اور ”قطغامہ“ شامل ہیں۔ شاملو کی تحریروں پر حافظ، خیام، نیما، بیاگی، رلکے،مایاوسکی،آرگن،لانگسٹن ہیوز اور لورکا کے گہرے اثرات ہیں۔

انھوں نے تین/3 شادیاں کیں۔ وہ ایران کی کمیونسٹ پارٹی کے سرگرم رکن رہے اور شاملو ایک سال سے زائد پابند سلاسل بھی رہے۔ زیباطیس / شوگر کے سبب ان کے دائیں پاوں کی جراحت ہوئی۔ اتوار 23 جولائی2000 میں انتقال ہوا۔ اور ”خراج“ /ایران میں پیوند زمین ہوئے۔

گرو رجنیش 11 دسمبر 1931 میں مدھیہ پردیش کے ضلع ھوشنگ آباد کچ ودا میں پیدا ھوئے ۔ ان کے والد کپڑے کی تجارت کرتے تھے ۔ رجنیش کا اصل نام چندر موھن جین تھا ۔ ان کے بارے میں مشہور ھے کہ وہ بچپن سے ہی بحث مباحثے کیا کرتے تھے ۔ اس کو اکثر اساتذہ سے شکائتیں رھتی تھیں ۔ بچپن میں ان کے نانا شدید بیمار ہوئے تو رجنیش ان کو بیل گاڑی میں لئے شہر کے کسی ڈاکٹر کی طرف روانہ ہوئے ، راستے میں نانا فوت ہو گئے اس حادثے نے رجنیش کی زندگی پر گہرا اثر ڈالا وہ اکثر کتھاؤں میں اس کا ذکر کیا کرتے تھے ۔

1953 میں رجنیش نے جبل پورکے ڈی این جین کے کالج سے ایم اے فلسفہ کا امتحان فرسٹ کلاس میں پاس کیا 1958 میں اسے یونیورسٹی آف جبل پور میں فلسفے کا پروفیسر مقرر کردیا گیا ۔ انہوں نے ہندوستان کے مختلف شہروں میں لیکچر دینے شروع کردئیے ۔ وہ زبردست فصاحت وبلاغت کے مالک تھے ان کی آواز لوگوں پر سحر طاری کردیتی تھی وہ صدیوں پرانے مذہبی عقیدوں کو اپنے فلسفی دلائل سے تہس نہس کردیتے تھے ۔ ھزاروں لوگ جن میں اکثریت تعلیم یافتہ لوگوں کی تھی انکے ھم خیال بن گئے ۔

1974 میں انہوں نے اپنا پہلا کمیون سنٹر پونا میں کھولا ۔ دیس پردیس کے لوگ وہاں آناشروع ھوگئے اور رجنیش کے پیروکار بننا شروع ھوگئے ۔ وہ صوفیانہ رنگ کے کپڑے اور گلے میں رجنیش کی تصویریں لٹکائے پھرتے ۔

جب اخباروں اور میگزینوں میں رجنیش کے چیلوں کی ننگے رقص کرتے ھوئے تصویریں چھپی تو وہ ہندوستان میں سیکس گرو (sex guru) کے نام سے مشہور ھوئے ۔ ان کے چیلے انکو بھگوان (خدا) ماننے لگے ۔

1981 میں اوریگوں امریکہ میں ھزاروں ایکڑ رقبہ پر ایک کمیون رجنیش پورم کے نام سے قائم کیا گیا ۔ امریکی مشہور اور امیر شخصیات پورم میں شامل ھونے لگیں ۔ ایک وقت ایسا آیا جب رجنیش کے پاس کئی مرسڈیز گاڑیوں کے علاوہ 100 سے زیادہ رولز رائس کاریں بھی تھیں ۔

1985 میں امریکی حکومت نے رجنیش پر دھوکہ دہی ، فراڈ اور چالبازی کے 35 مقدمات درج کئے اور سترہ روز اپنی تحویل میں رکھ کر پھر ملک بدر کردیا رجنیش واپس انڈیا آگئے اور کسی نئے مرکز کی تلاش میں دنیا کے سفر پر روانہ ھوگئے ۔

دنیا کے 21 ملکوں نے اسے ویزا دینے سے انکار کردیا ، ان کا جہاز کئی ملکوں کے ائرپورٹ پر گھنٹوں کھڑے کھڑے واپس آگیا 1987 میں ایک بار پھر پونا میں کمیون سنٹر کھولا گیا جسے اب اوشو کمیون انٹرنیشنل کہا جانے لگا دراصل اب رجنیش نے اپنے نام سے بھگوان لفظ ختم کرکے جاپانی زبان کاخطاب لفظ اوشو لگادیا تھا ۔

اوشو میں ,, او ,, کے معنی ھیں پیار محبت احترام ,, شو ,, کا مطلب شعور کا پھیلاؤ آخر میں وہ رجنیش کے نام کو بھی ترک کرکے صرف اوشو کہلوانے لگے ۔

1988 میں اوشو سخت بیمار پڑ گئے ان کے اپنے خیال کے مطابق امریکہ میں حراست کے دوران انہیں زھر دیا گیا تھا ان کے پیرو بھی اس بات پر یقین رکھتے تھے ۔ وہ ذیابیطس اور دمے کے مریض بن گئے ۔ بہترین علاج کے باوجود ان کا جسم کمزور اور ماند پڑنے لگا اپریل 1989 کو انہوں نے اپنی زندگی کا آخری لیکچر دیا ۔ اپنے خاص اور قریبی چیلوں کو بلاکر کچھ ھدایتیں دیں ۔

19 جنوری 1990 شام پانچ بجے اوشو نے مرنے سے پہلےآخری جملہ یہ کہا :
” I leave you my dream ”
اوشو نے اپنے پیروکاروں پر سوگ اور رونے کی پابندی عائد کی تھی ، وہ ناچتے گاتے رقص کرتے ھوئے اوشو کی لاش لے کر تلسی رام گھاٹ پہنچے جہاں ان کا اگنی سنسکار ان کے چھوٹے بھائی سوامی وجے بھارتی نے کیا ۔

اگلے روز انکی راکھ کمیون سنٹر لائی گئی اور اسکے آگے 9 ماہ پہلے اوشو کے اپنے ھاتھ کی لکھی تختی لگائی گئی اس تختی پہ تحریر تھا کہ :

” اوشو ۔۔۔۔۔۔۔۔ جونہ کبھی پیدا ھوا ۔۔۔۔۔۔۔۔۔۔۔۔ نہ کبھی مرا “